وزیراعلیٰ خیبرپختونخوا کے زیرصدارت پختونخوا ہائی ویز کونسل کا اجلاس، آپریشنل گرانٹ کو 30 ملین روپے سے بڑھا کر 40 ملین روپے کرنے کی منظوری دی گئی
پشاور ( نمائندہ چترال ٹائمز ) وزیراعلیٰ خیبرپختونخوا محمد سہیل آفریدی کی زیر صدارت پختونخوا ہائی ویز کونسل کا چوبیسواں اجلاس پشاور میں منعقد ہوا جس میں پختونخوا ہائی ویز اتھارٹی کے بجٹ، سالانہ مینٹیننس پلان اور دیگر اہم امور کی منظوری دی گئی۔ اجلاس میں اتھارٹی کی سالانہ ایڈمنسٹریٹو اینڈ آپریشنل گرانٹ کو 30 ملین روپے سے بڑھا کر 40 ملین روپے کرنے کی منظوری دی گئی تاکہ ادارے کی کارکردگی کو مزید مو ثر بنایا جا سکے اور سڑکوں کی دیکھ بھال کے نظام کو جدید تقاضوں سے ہم آہنگ کیا جا سکے۔
وزیراعلیٰ محمد سہیل آفریدی نے ہدایت کی کہ آئندہ بجٹ میں ہائی ویز اتھارٹی کے منصوبوں کے لیے زیادہ فنڈز مختص کیے جائیں اور بڑے ترقیاتی منصوبوں کو شامل کیا جائے تاکہ صوبے میں رابطہ سڑکوں کے نظام کو بہتر بنایا جا سکے۔ وزیر اعلیٰ کا کہنا تھا کہ اتھارٹی کے اگلے ترقیاتی پروگرام میں اہم منصوبے شامل ہوں گے جن کی بروقت تکمیل کے لیے مناسب فنڈز مختص کرنے کی ضرورت ہے۔اجلاس میں خیبرپختونخوا انٹرنشپ پالیسی کے تحت اتھارٹی کی طرف سے مجوزہ انٹرنشپ پلان کی بھی منظوری دی گئی۔
وزیر اعلی نے اس موقع پر خیبرپختونخوامجموعی انٹرنشپ پروگرام کے تحت نشستوں میں بھی 20 فیصد اضافے کی منظوری دی، جس کے نتیجے میں مجموعی تعداد 5 ہزار سے بڑھا کر 6 ہزار کر دی گئی ہے۔ اس اقدام کا مقصد نوجوانوں کو عملی تجربہ فراہم کرنا اور انہیں روزگار کے بہتر مواقع کے لیے تیار کرنا ہے۔ وزیراعلیٰ نے ہائی ویز اتھارٹی کو ہدایت کی کہ رائیٹ آف وے چارجز وصول نہ کیے جائیں تاکہ صوبے میں ایز آف ڈوانگ بزنس کو فروغ دیا جا سکے اور سرمایہ کاری کے لیے سازگار ماحول فراہم کیا جا سکے۔ مزید برآں اجلاس میں اتھارٹی کے سروس ریگولیشز 2019 میں مجوزہ ترامیم کی منظوری دی گئی جبکہ ملازمین کے لیے ریٹائرمنٹ بینیفٹ اینڈ ڈیتھ کمپنسیشن کے نظام کو بھی بہتر بنانے کا فیصلہ کیا گیا، تاکہ ادارے کے ملازمین کو بہتر تحفظ اور سہولیات فراہم کی جا سکیں۔
اس موقع پر صحت انصاف کارڈ کے تحت زیر علاج خاندان کے سربراہ کی وفات کی صورت میں ورثاءکے لیے مالی معاونت کے پہلے سے مجوزہ پیکج کو مزید بہتر بنا کر عملی جامہ پہنانے کا اصولی فیصلہ بھی کیا گیا۔ وزیر اعلیٰ کا کہنا تھا کہ اصل مقصد سربراہ سے محروم خاندان کو مالی سہارا فراہم کرنا ہے تاکہ ان کے مسائل کو کم کیا جا سکے۔ وزیراعلیٰ محمد سہیل آفریدی نے گل آباد تا سربالا روڈ ضلع دیر لوئر کی پراونشلائزیشن کے لیے باقاعدہ فزیبیلٹی اسٹڈی کرانے کی ہدایت بھی جاری کی اور کہا کہ دور دراز علاقوں میں بنیادی ڈھانچے کی بہتری حکومت کی اولین ترجیح ہے۔ انہوں نے اس عزم کا اعادہ کیا کہ عمران خان کے وژن کے مطابق عوامی فلاح و خوشحالی کے لیے تمام دستیاب وسائل بروئے کار لائے جائیں گے اور ترقیاتی عمل کو مزید تیز کیا جائے گا تاکہ صوبہ پائیدار ترقی کی راہ پر گامزن ہو سکے۔
۔عمران خان کی صحت سیاسی معاملہ نہیں بلکہ ان کی زندگی کا مسئلہ ہے جسے کسی صورت نظر انداز نہیں کیا جا سکتا۔وزیراعلیٰ سہیل آفریدی
۔
پشاور ( نمائندہ چترال ٹائمز ) وزیر اعلیٰ خیبرپختونخوا محمد سہیل آفریدی سے پشاور، ملاکنڈ اور کوہاٹ ریجن سمیت شمالی پنجاب کے پی ٹی آئی پارلیمنٹرینز اور ضلع خیبر کے وفود نے ملاقات کی جس میں عمران خان کی صحت، رہائی امن تحریک، مجوزہ مردان جلسے اور دیگر اہم امور پر تفصیلی مشاورت کی گئی جبکہ مجموعی سیاسی صورتحال، گورننس کے معاملات، تنظیمی امور اور آئندہ کے لائحہ عمل پر بھی تبادلہ خیال کیا گیا۔وزیر اعلیٰ محمد سہیل آفریدی نے اس موقع پر گفتگو کرتے ہوئے کہا کہ عمران خان کی صحت سیاسی معاملہ نہیں بلکہ ان کی زندگی کا مسئلہ ہے جسے کسی صورت نظر انداز نہیں کیا جا سکتا۔ انہوں نے اس امر پر تشویش کا اظہار کیا کہ عمران خان تک اہلِ خانہ اور ذاتی معالجین کی رسائی نہ دینا باعثِ فکر ہے۔
ان کا کہنا تھا کہ ملک و قوم کے مفاد میں عمران خان کی واپسی ناگزیر ہو چکی ہے اور اس حوالے سے ہر ممکن آئینی و جمہوری جدوجہد جاری رکھی جائے گی۔ وزیر اعلیٰ نے مجوزہ مردان جلسے کے حوالے سے کہا کہ جلسے کے اعلان کے بعد اسے ناکام بنانے کے لیے منفی پروپیگنڈا کیا جا رہا ہے، تاہم عوام ایسے ہتھکنڈوں کو مسترد کریں گے۔ انہوں نے واضح کیا کہ کچھ عناصر جلسے کو سبوتاژ کرنے اور سیاسی عدم استحکام پیدا کرنے کی کوشش کر رہے ہیں مگر حکومت اور پارٹی اپنی پالیسی پر ثابت قدم ہے۔ ان کا مزید کہنا تھا کہ مخالفین کا پروپیگنڈا 19 تاریخ کو عوام خود رد کر دیں گے۔محمد سہیل آفریدی نے بتایا کہ جمعہ کے روز وکلاءکا جرگہ منعقدکیا جارہا ہے جبکہ دیگر طبقات کے جرگے بھی منعقد کیے جائیں گے تاکہ وسیع تر مشاورت کے ذریعے مشترکہ حکمت عملی طے کی جا سکے۔ انہوں نے اس عزم کا اعادہ کیا کہ عمران خان قوم کی خاطر ناحق قید ہیں اور پوری قیادت و کارکنان ان کے ساتھ کھڑے ہیں، ان کی ہدایات ہر سطح پر مقدم ہیں۔
وزیر اعلیٰ نے کہا کہ عوام کے حقوق کے تحفظ اور عمران خان کی واپسی کے لیے بھرپور جدوجہد جاری رکھی جائے گی۔ انہوں نے مزید کہا کہ صوبے میں عمران خان کے وڑن کے مطابق بہتر طرزِ حکمرانی اور عوامی فلاح پر خصوصی توجہ دی جا رہی ہے تاکہ عوام کو حقیقی معنوں میں ریلیف فراہم کیا جا سکے۔ وزیر اعلیٰ کا کہنا تھا کہ آئندہ سالانہ ترقیاتی پروگرام کی تیاری پر کام جاری ہے اور اس سلسلے میں عوامی رائے کو شامل کرنے کے لیے ریجن وائز اجلاس منعقد کیے جائیں گے۔ انہوں نے اس بات پر زور دیا کہ آئندہ بجٹ نوجوانوں کی فلاح اور عوامی مفاد کو مدنظر رکھتے ہوئے مرتب کیا جائے گا تاکہ صوبے کی پائیدار ترقی کو یقینی بنایا جا سکے۔