عیدالفطر پر خیبرپختونخوا کے سیاحتی مقامات پر سیاحوں کی ریکارڈ آمد، سوات میں ایک لاکھ 86 ہزار سے زائد، جبکہ چترال اپر اور لوئیر میں تقریبا 8ہزار سیاحوں نے رخ کیا، ٹورزم ڈیپارٹمنٹ نے ڈیٹا جاری کردیا
پشاور (نمائندہ چترال ٹائمز)عیدالفطر کے موقع پر خیبرپختونخوا کے سیاحتی مقامات پر سیاحوں کی ریکارڈ آمد دیکھنے میں آئی ہے، جس کے مطابق تین روزہ تعطیلات کے دوران دو لاکھ 62 ہزار سے زائد سیاحوں نے مختلف علاقوں کا رخ کیا۔
خیبرپختونخوا کلچر اینڈ ٹورازم اتھارٹی کے ڈائریکٹر جنرل عثمان محسود کے مطابق وزیراعلیٰ خیبرپختونخوا محمد سہیل آفریدی اور چیف سیکرٹری شہاب علی شاہ کی ہدایات پر سیاحوں کے لیے بہترین انتظامات کیے گئے، جس کے باعث سیاحت میں نمایاں اضافہ دیکھنے میں آیا۔
اعداد و شمار کے مطابق عیدالفطر کے دوران سب سے زیادہ سیاحوں نے وادی سوات کا رخ کیا، جہاں ایک لاکھ 86 ہزار سے زائد افراد پہنچے۔ اسی طرح گلیات میں 51 ہزار 886 سیاحوں کی آمد ریکارڈ کی گئی۔
چترال میں سیاحوں کی تعداد نسبتاً کم رہی، جہاں اپر چترال کے مستوج اور بونی میں 295 جبکہ لوئر چترال کے کیلاش ویلی اور گرم چشمہ میں 7 ہزار 791 سیاحوں نے وزٹ کیا۔جوکہ پچھلے سالوں کے مقابلے کافی کم ہے۔
ڈی جی ٹورازم اتھارٹی کے مطابق عید کے دوران 76 غیر ملکی سیاح بھی خیبرپختونخوا کے مختلف سیاحتی مقامات پر موجود رہے۔ سیاحوں کی رہنمائی اور سہولت کے لیے ٹورازم پولیس کی چھٹیاں منسوخ کی گئیں، جبکہ ٹورازم ہیلپ لائن 1422 چوبیس گھنٹے فعال رہی۔
انہوں نے کہا کہ خیبرپختونخوا کے عوام نے روایتی مہمان نوازی کا مظاہرہ کرتے ہوئے سیاحوں کا بھرپور خیرمقدم کیا، جو صوبے کے مثبت تشخص کو اجاگر کرنے میں اہم کردار ادا کرتا ہے۔
