صدر مملکت نے یوم پاکستان کی پریڈ اور تقریبات منسوخی کی منظوری دیدی
.
اسلام آباد(نمائیندہ چترال ٹائمز) صدر مملکت آصف علی زرداری نے 23 مارچ 2026 کو یومِ پاکستان کے موقع پر ہونے والی پریڈ اور دیگر تقریبات منسوخ کرنے کی منظوری دے دی۔حکومت نے کفایت شعاری اور توانائی کے تحفظ کے پیش نظر ان تقریبات کو نہ کرنے کی سفارش کی تھی، جسے صدر نے منظور کر لیا۔صدر مملکت کا کہنا تھا کہ قومی وسائل کا ذمہ دارانہ اور محتاط استعمال ہر شہری کی مشترکہ ذمہ داری ہے۔ادھر یومِ پاکستان کے حوالے سے اعزازات کی تقریب کو مؤخر کرتے ہوئے اب 28 اپریل 2026 کو منعقد کرنے کا فیصلہ کیا گیا ہے۔
.
کم آمدنی والوں کے لیے سستے گھروں کی فراہمی ترجیح، وزیراعظم کا ہاؤسنگ اصلاحات تیز کرنے کا حکم
.
اسلام آباد(سی ایم لنکس)وزیراعظم کی زیر صدارت وزارت ہاؤسنگ اینڈ ورکس کے امور پر اہم اجلاس منعقد ہوا جس میں ہاؤسنگ سیکٹر میں اصلاحات اور کم آمدنی والے طبقے کے لیے رہائش کی فراہمی پر غور کیا گیا۔وزیراعظم شہباز شریف نے کہا کہ سستے گھروں کے منصوبے، نجی شعبے کی حوصلہ افزائی اور عوامی سہولیات کی بہتری حکومت کی اولین ترجیحات میں شامل ہیں۔ انہوں نے عام آدمی تک ہاؤس فنانس کی سہولت مؤثر انداز میں پہنچانے کے لیے عملی اقدامات تیز کرنے کی ہدایت بھی جاری کی۔اجلاس کو وزارت ہاؤسنگ اینڈ ورکس کے اسٹریٹجک روڈ میپ پر بریفنگ دی گئی، جس میں بتایا گیا کہ تعمیراتی شعبے کے ٹیکس اسٹرکچر میں اصلاحات کی جا رہی ہیں اور اس حوالے سے فیڈرل بورڈ آف ریونیو اور صوبوں کے درمیان مشاورت جاری ہے۔بریفنگ میں مزید بتایا گیا کہ ہاؤس مورٹگیج اصلاحات کے مسودے پر کام جاری ہے جبکہ پبلک پرائیویٹ پارٹنرشپ کے تحت کم آمدنی والے افراد کے لیے گھروں کی تعمیر کا لائحہ عمل بھی تیار کیا جا رہا ہے۔
حکام کے مطابق رئیل اسٹیٹ اور ہاؤسنگ کے شعبے کو منظم کرنے کے لیے ریئل اسٹیٹ ریگولیٹری اتھارٹی کے قیام کی تجویز زیر غور ہے۔ اس کے علاوہ ہاؤس فنانس کے فروغ کے لیے رئیل اسٹیٹ انویسٹمنٹ ٹرسٹ کے حوالے سے وزارت خزانہ، ایف بی آر اور صوبے وزارت ہاؤسنگ کے ساتھ مل کر کام کر رہے ہیں۔اجلاس میں وفاقی وزرا ء محمد اورنگزیب، اعظم نذیر تارڑ، احد چیمہ، شزا فاطمہ اور دیگر حکام نے شرکت کی۔