کفایت شعاری پالیسی اجلاس: وفاقی کابینہ کا 2 ماہ کی تنخواہ نہ لینے کا فیصلہ
.
اسلام آباد(نمائندہ چترال ٹائمز )کفایت شعاری پالیسی کے تحت وفاقی کابینہ نے 2 ماہ کی تنخواہ نہ لینے کا فیصلہ کیا ہے۔وزیراعظم محمد شہباز شریف کے زیر صدارت قومی کفایت شعاری پالیسی کی منظوری کیلئے اجلاس منعقد ہوا، اجلاس میں چاروں صوبوں کے وزرائے اعلیٰ اور وزیراعظم آزاد جموں و کشمیر نے ویڈیو لنک کے ذریعے شرکت کی۔اجلاس میں وفاقی وزیر خزانہ محمد اورنگزیب نے کفایت شعاری پالیسی پر بریفنگ دی، شرکا کو عالمی صورتحال کے باعث پٹرولیم مصنوعات کی بچت، سرکاری سطح پر کفایت شعاری اقدامات سے متعلق آگاہ کیا گیا۔اجلاس میں مستحق اور غریب شہریوں کو ریلیف دینے کی تجاویز پر غور کیا گیا، شہباز شریف نے صوبوں کی مشاورت سے قومی کفایت شعاری پالیسی تشکیل دینے کی ہدایت کی تھی۔
.
افغان دعوے محض پروپیگنڈا ہیں، پاکستان نے شہری علاقوں کو نشانہ نہیں بنایا: عطا تارڑ
.
اسلام آباد(سی ایم لنکس)وفاقی وزیر اطلاعات عطا اللّٰہ تارڑ نے کہا ہے کہ افغانستان میں شہری علاقوں کو نشانہ نہیں بنایا، کارروائیاں صرف دہشت گردوں کے خلاف ہیں۔غیر ملکی جرائد کے صحافیوں سے گفتگو کرتے ہوئے انہوں نے کہا ہے کہ پاکستان نے افغانستان میں کسی بھی شہری علاقے کو نشانہ نہیں بنایا، پاکستان افغانستان میں دہشت گردوں کے ٹھکانوں کے خلاف انٹیلی جنس معلومات کی بنیاد پر کارروائیاں کر رہا ہے اور ان کارروائیوں میں صرف دہشت گردوں کے بنیادی ڈھانچے اور ان کے معاون نظام کو ہدف بنایا جا رہا ہے۔انہوں نے کہا کہ افغان حکومت کی جانب سے پیش کیے جانے والے اعداد و شمار حقیقت پر مبنی نہیں اور سنجیدہ تبصرے کے بھی قابل نہیں۔
انہوں نے افغان وزارت دفاع کے ترجمان کی جانب سے پاکستان کے خلاف میدان جنگ میں کامیابیوں کے دعوؤں کو محض پروپیگنڈا قرار دیا۔وزیر اطلاعات نے اقوام متحدہ کے افغانستان میں قائم مشن کی ان رپورٹس کی بھی تردید کی جس میں افغان شہریوں کی ہلاکتوں کا ذکر کیا گیا تھا۔ان کا کہنا ہے کہ کابل میں قائم اقوام متحدہ کی ایجنسی کو ملنے والی معلومات کا زیادہ تر انحصار طالبان حکومت پر ہوتا ہے۔انہوں نے مزید کہا کہ افغان طالبان حکومت اور افغان سرزمین سے سرگرم مختلف دہشت گرد تنظیموں کے درمیان گٹھ جوڑ موجود ہے، افغان طالبان اور ٹی ٹی پی (فتنہ الخوارج) کی مشترکہ کارروائیاں اس تعلق کا واضح ثبوت ہیں۔عطا اللّٰہ تارڑ نے کہا کہ افغان طالبان کی جانب سے کیے گئے تمام حملوں کا فوری اور مؤثر جواب دیا گیا اور پاکستان نے دہشت گردوں اور ان کے معاونین بشمول افغان طالبان کے فوجی اڈوں کو درست طریقے سے نشانہ بنایا۔