رمضان المبارک میں صارفین کو سرکاری نرخ نامے کے مطابق اشیاخوردونوش کی فراہمی کویقینی بنانے کیلئے انتطامیہ متحرک ، گران فروشی کے پاداش میں آیون میں متعدد دکانیں سیل کردیئے گئے
چترال (نمائندہ چترال ٹائمز) رمضان المبارک کے مہینے میں صارفین کو سرکاری نرخ نامے کے مطابق اشیا ٗ خوردونوش کی فراہمی کویقینی بنانے کیلئے ضلعی انتظامیہ متحرک ہے ، ڈپٹی کمشنر چترال لوئیر راو ہاشم عظیم کی ہدایت پر انتظامی افسران کی طر ف سے مختلف بازاروں کا معائنہ روزانہ کی بنیاد پر جاری ہے، اور مختلف بازاروں میں مانٹیرنگ ڈیسک بھی قائم کیئے گئے ہیں۔ اس سلسلے میں پیر کے دن ایڈیشنل اسسٹنٹ کمشنر چترال عیسیٰ محمد خان نے ایون بازار کا جامع معائنہ کیا۔ اس دوران قصابوں، مرغی فروشوں، نانبائیوں، جنرل اسٹورز اور سبزی فروشوں کی دکانوں کو تفصیلی طور پر چیک کیا گیا۔ اے اے سی ٹو کی گاڑی پہنچتے ہی کئی دکانداروں نے معائنے سے بچنے کے لیے اپنی دکانیں اچانک بند کر دیں، جس کے نتیجے میں ایسی دکانوں کو سیل کر کے ان کے خلاف ایف آئی آرز درج کر لی گئیں۔ اس کارروائی کے دوران قوانین کی خلاف ورزی کرنے والوں کے خلاف 16 ایف آئی آرز درج کی گئیں اور 12 دکانیں سیل کر دی گئیں۔ دکانداروں اور تاجر برادری کو واضح طور پر مطلع کیا گیا کہ قوانین اور ضوابط کی کسی بھی خلاف ورزی پر، بالخصوص رمضان کے دوران، کسی قسم کی رعایت نہیں برتی جائے گی۔ درین اثناء ایون کے عوام نے رمضان المبارک کے دوران ضلعی انتظامیہ کی طرف سے پرائس کنٹرول کی سرگرمیوں پر اطمینان کا اظہار کیا ہے۔
