گندم 10 ہزار 414 روپے فی 100 کلو کی رعایتی قیمت پر فراہم کی جائے گی۔ اس اقدام کے نتیجے میں عوام کو 20 کلو آٹے کا تھیلا 2 ہزار 220 روپے میں دستیاب ہوگا۔ وزیراعلیٰ
پشاور(نمائندہ چترال ٹائمز ) پنجاب حکومت کی جانب سے بین الصوبائی نقل و حرکت پر عائد غیر آئینی پابندیوں کے باعث پیدا ہونے والی صورتحال کے پیشِ نظر وزیر اعلیٰ خیبر پختونخوا محمد سہیل آفریدی کی بروقت مداخلت سے عوامی ریلیف کے لیے عملی اقدامات کا آغاز کر دیا گیا ہے۔ وزیر اعلیٰ کی ہدایت پر محکمہ خوراک خیبر پختونخوا نے صوبے کے اسٹریٹجک ذخائر سے ایک لاکھ چھتیس ہزار میٹرک ٹن گندم کی ریلیز شروع کر دی ہے تاکہ پنجاب حکومت کی جانب سے بین الصوبائی نقل و حرکت پر عائد پابندیوں کے بعد اوپن مارکیٹ میں قیمتوں کے غیر معمولی دباو سے عوام کو فوری تحفظ فراہم کیا جا سکے۔
وزیر اعلیٰ محمد سہیل آفریدی نے واضح کیا ہے کہ پنجاب حکومت کی پابندیوں کے بعد صوبے کی اوپن مارکیٹ میں 100 کلو گندم کی قیمت 13 ہزار 650 روپے تک پہنچ چکی تھی، جس کے پیشِ نظر صوبائی حکومت نے فیصلہ کیا ہے کہ عوام کو ریلیف دینے کے لیے گندم 10 ہزار 414 روپے فی 100 کلو کی رعایتی قیمت پر فراہم کی جائے گی۔ اس اقدام کے نتیجے میں عوام کو 20 کلو آٹے کا تھیلا 3 ہزار 20 روپے کے بجائے 2 ہزار 220 روپے میں دستیاب ہوگا۔انہوں نے کہا کہ آئینِ پاکستان کا آرٹیکل 151 ملک بھر میں اشیائے ضروریہ کی آزادانہ نقل و حرکت کی ضمانت دیتا ہے اور خیبر پختونخوا حکومت خوراک کی دستیابی کو کسی بھی صوبائی رکاوٹ یا انتظامی حدود کا یرغمال بننے نہیں دے گی۔
ان کا کہنا تھا کہ عوام کے بنیادی حقوق کا تحفظ حکومت کی آئینی ذمہ داری ہے اور اس ضمن میں کوئی سمجھوتہ نہیں کیا جائے گا۔وزیر اعلیٰ نے اس بات پر زور دیا کہ گندم کی ریلیز کا عمل مکمل طور پر شفاف اور طے شدہ طریقہ کار کے مطابق انجام دیا جائے گا، جس کے تحت صرف مستحق فلور ملز اور مجاز ڈیلرز کو گندم فراہم کی جائے گی۔ انہوں نے مزید کہا کہ مقررہ سرکاری نرخوں پر آٹے کی فروخت ہر صورت یقینی بنائی جائے گی اور اس مقصد کے لیے ضلع اور تحصیل کی سطح پر مانیٹرنگ اور فزیکل ویریفکیشن کا موثر نظام نافذ کیا جائے گا۔محمد سہیل آفریدی نے واضح کیا کہ ذخیرہ اندوزی، ناجائز منافع خوری اور سرکاری نرخوں سے تجاوز کرنے والوں کے خلاف بلاامتیاز سخت کارروائی عمل میں لائی جائے گی۔ انہوں نے اس عزم کا اعادہ کیا کہ حکومت خیبر پختونخوا ہر حال میں اپنے عوام کے ساتھ کھڑی ہے اور غریب آدمی کے مفاد پر کوئی سمجھوتہ نہیں ہوگا۔