مشیر برائے کھیل کا دورہ اپرچترال، پولوکھلاڑیوں میں پانچ پانچ لاکھ روپے کے چیک تقسیم، کاغلشٹ فیسٹول کو کلینڈر ایونٹ کے طور پر منانے کا اعلان
اپر چترال (نمائندہ چترال ٹائمز ) مشیر برائے کھیل و امور نوجوانان تاج محمد خان ترند اپر چترال میں پولو کھلاڑیوں کے درمیان تقد رقم تقسیم کرنے کے حوالے سے منعقدہ ایک تقریب میں خصوصی طور پر شرکت کی۔ ان کے ہمراہ سیکریٹری کھیل خیبرپختونخواہ محمد آصف، ڈائریکٹر جنرل کھیل خیبرپختونخواہ تاشفین حیدر اور دیگر اعلیٰ حکام بھی موجود تھے۔اس موقع پر چترال کے چون پولو کھلاڑیوں کو پانچ پانچ لاکھ روپے کے نقد انعامات کے چیک تقسیم کئے گئے۔ اپر چترال پہنچنے پر ڈپٹی کمشنر اپر چترال محمد عمران خان نے مشیر کھیل اور وفد کا پرتپاک استقبال کیا۔
اس موقع پر چترال لیویز کے چاق و چوبند دستے نے مہمانانِ گرامی کو گارڈ آف آنر پیش کیا۔مشیر برائے کھیل اور سیکریٹری کھیل کے دورے کا مقصد گزشتہ سال شندور پولو ٹورنامنٹ میں شاندار کارکردگی کا مظاہرہ کرنے والے اپر چترال کے پولو کھلاڑیوں کی حوصلہ افزائی اور ان میں انعامات تقسیم کرنا تھا۔ اس سلسلے میں ڈپٹی کمشنر اپر چترال کے آفس لان میں ایک پروقار تقریب کا انعقاد کیا گیا۔تقریب سے خطاب کرتے ہوئے ڈپٹی کمشنر اپر چترال محمد عمران خان نے معزز مہمانوں کو خوش آمدید کہا اور ضلع میں کھیلوں کے فروغ کے لیے حکومتی اقدامات پر روشنی ڈالی۔اس موقع پر صدر پاکستان تحریک انصاف اپر چترال جناب سکندر الملک نے ایڈوائزر برائے کھیل کو اپر چترال میں پولو گراؤنڈز کی خستہ حالی، ان کی مرمت و بحالی، نئے اسپورٹس کمپلیکس کی تعمیر اور پولو گراؤنڈز کی حفاظت کے لیے چوکیداروں کی تعیناتی سے متعلق تفصیلی سپاسنامہ پیش کیا۔
مشیر برائے کھیل تاج محمد خان ترند نے اپر چترال میں پولو گراؤنڈز کی مرمت، آرائش و زیبائش، ریشن پولو گراؤنڈ میں پانی کی فراہمی، تحصیل سطح پر نئے پولو گراؤنڈز کی تعمیر کا اعلان کیا۔ علاوہ ازیں قاقلشٹ فیسٹیول کو باضابطہ طور پر اپنا کر آئندہ اسے محکمہ کھیل کے تحت منعقد کرنے کا اعلان بھی کیا گیا۔انہوں نے پیرا گلائیڈنگ سمیت دیگر کھیلوں کے فروغ کے لیے ہر ممکن تعاون فراہم کرنے کی یقین دہانی کرائی۔ تقریب سے سیکریٹری کھیل خیبرپختونخواہ نے بھی خطاب کیا اور ضلع بھر میں کھیلوں کے فروغ کے لیے بھرپور حکومتی تعاون جاری رکھنے کے عزم کا اظہار کیا۔تقریب کے اختتام پر مشیر برائے کھیل اور دیگر معزز مہمانوں نے چترال بی ٹیم، چترال سی ٹیم، چترال ڈی ٹیم، سب ڈویژن مستوج پولو ٹیم، لاسپور اے ٹیم اور لاسپور بی ٹیم کے پولو کھلاڑیوں میں فی کس پانچ، پانچ لاکھ روپے کے چیک تقسیم کیے۔
اس موقع پر صوبائی حکومت کی جانب سے چترال کے پولو کھلاڑیوں میں فی کس پانچ پانچ لاکھ روپے کے چیک تقسیم کیے گئے، جبکہ ریشن پولو گراؤنڈ اور کوشٹ پولو گراؤنڈ کی اپ گریڈیشن کا بھی اعلان کیا گیا۔
بعدازاں جشنِ کاغلشٹ کمیٹی کے اراکین نے مشیر برائے کھیل سے ملاقات کی اور فیسٹیول کے حوالے سے تفصیلی بریفنگ دی، جس کے دوران جشنِ کاغلشٹ کی ویڈیو ڈاکومنٹری بھی دکھائی گئی۔ مشیر برائے کھیل نے فیسٹیول کے انعقاد میں ہر ممکن تعاون کی یقین دہانی کراتے ہوئے آئندہ کاغلشٹ فیسٹیول کو باقاعدہ اسپورٹس ڈیپارٹمنٹ کے زیرِ نگرانی کیلنڈر ایونٹ کے طور پر منانے کا اعلان کیا۔
