سال 2025 کے دوران لوئیر چترال میں دو ہزار سے زائد غیر ملکی جبکہ 5,14,630 مقامی سیاحوں نے چترال کی سیر کی
چترال ( نمائندہ چترال ٹائمز ) ڈی پی او لوئیر چترال کے دفتر سے جاری ایک پریس ریلیز میں کہا گیا ہے کہ چترال میں سال 2025 کے دوران سیاحت کے شعبے میں ایک غیر معمولی کامیابی حاصل کی گئی، جس کے نتیجے میں لوئر چترال ایک نمایاں عالمی سیاحتی مقام کے طور پر ابھر کر سامنے آیا۔ اس عرصے کے دوران بڑی تعداد میں غیر ملکی سیاحوں نے لوئر چترال کا رخ کیا اور یہاں کی رنگا رنگ ثقافت اور دلکش قدرتی مناظر سے لطف اندوز ہوئے۔
پولیس کی طرف سے جاری اعدادوشمار کے مطابق سال 2025 کے دوران مجموعی طور پر 2,204 غیر ملکی سیاحوں نے چترال لوئیر کا وزٹ کیا،
جن میں
کالاش اوچاؤ فیسٹیول : 333 غیر ملکی مہمانوں نے شرکت کی اور روایتی تقریبات کا مشاہدہ کیا۔،
کلاش جوشی فیسٹیول : 330 غیر ملکی سیاح ثقافتی تقریبات میں شریک ہوئے۔
کلاش پھو فیسٹیول : 246 غیر ملکی سیاحوں نے منفرد رسومات کا تجربہ کیا۔
چوموس فیسٹیول : 99 غیر ملکی سیاحوں نے سرمائی تہوار میں شرکت کی۔
شندور پولو فیسٹیول : 247 غیر ملکی سیاحوں نے سنسنی خیز پولو مقابلے دیکھے۔
دیگر سیاحتی مقامات: 799 غیر ملکی سیاحوں نے قدرتی و تاریخی مقامات کی سیر کی۔
قاقلشٹ فیسٹیول : 150 غیر ملکی مہمانوں نے فیسٹیول سے لطف اٹھایا۔
اسی طرح سال 2025 میں ملکی سیاح: 5,14,630 مقامی سیاحوں نے لوئر چترال کا دورہ کیا۔
ڈسٹرکٹ پولیس آفیسر لوئر چترال رفعت اللہ خان (پی ایس پی) نے دنیا بھر سے سیاحوں کو لوئر چترال آنے کی دعوت دیتے ہوئے کہا کہ لوئر چترال پولیس کا فارن رجسٹریشن آفس غیر ملکی مہمانوں کو ہر ممکن سہولیات فراہم کرنے کے لیے ہمہ وقت تیار ہے تاکہ ان کا قیام خوشگوار اور یادگار بنایا جا سکے۔
لوئر چترال پولیس نے تمام ملکی و غیر ملکی سیاحوں کے لیے بہترین سکیورٹی اور مہمان نوازی کو یقینی بنایا، جس سے علاقے کے ثقافتی ورثے اور قدرتی حسن کو بھرپور انداز میں اجاگر کیا گیا۔ سیاحوں کی یہ نمایاں آمد اس امر کا واضح ثبوت ہے کہ لوئر چترال تیزی سے ایک اہم اور پسندیدہ عالمی سیاحتی مقام کے طور پر اپنی شناخت بنا رہا ہے۔