کوہاٹ تا خرلاچی 192 کلومیٹر طویل نیا ریلوے ٹریک بچھایا جائے گا۔ فزیبیلیٹی اسٹڈی مکمل ہوچکی ہے اور زمین کی خریداری کا عمل جاری ہے۔ وزیراعلیٰ سہیل آفریدی کو بریفنگ
اسلام آباد(نمائندہ چترال ٹائمز ) وزیراعلیٰ خیبر پختونخوا محمد سہیل آفریدی کی زیر صدارت ریلوے سے متعلق ایک اہم اجلاس خیبر پختونخوا ہاوس اسلام آباد میں منعقد ہوا جس میں کوہاٹ تا خرلاچی ٹرین سروس سمیت صوبے میں موجود مختلف ریلوے ٹریکس پر جدید ٹرینیں چلانے پر تفصیلی غوروخوص کیا گیا۔ اجلاس کو بریفنگ میں بتایا گیا کہ کوہاٹ تا خرلاچی 192 کلومیٹر طویل نیا ریلوے ٹریک بچھایا جائے گا۔ کوہاٹ تا خرلاچی ریلوے منصوبے پر 642 ملین ڈالر لاگت آئے گی جبکہ منصوبہ دو سال میں مکمل کیا جائے گا۔ مزید بتایا گیا کہ مذکورہ منصوبے کی فزیبیلیٹی اسٹڈی مکمل ہوچکی ہے اور زمین کی خریداری کا عمل جاری ہے۔
وزیر اعلیٰ نے کہا کہ کوہاٹ تا خرلاچی ٹرین سروس وقت کی اہم ضرورت ہے،منصوبے سے سفری سہولیات کے ساتھ تجارتی سرگرمیوں کو بھی فروغ ملے گا۔ اجلاس میں جمرود تا لنڈی کوتل 32 کلومیٹر ٹریک پر سفاری ٹرین چلانے پر بھی تفصیلی غور و خوص کیا گیا۔وزیراعلیٰ نے متعلقہ حکام کو ریلوے منصوبوں کے لیے ٹائم لائنز کے ساتھ پلان تیار کرنے اور صوبے کے دیگر بڑے شہروں میں بھی ٹرینیں چلانے کے لیے اقدامات کی ہدایت کی ہے۔ اجلاس میں خیبرپختونخوا حکومت اور پاکستان ریلوے کے مابین تعاون و اشتراکِ کار بڑھانے پر اتفاق کیا گیا اور شہریوں کی سہولت کے لیے نئے جذبے کے ساتھ کام کرنے کے عزم کا اظہار کیا گیا۔
وزیر اعلیٰ نے اجلاس سے خطاب کرتے ہوئے کہا کہ صوبے کے عوام کے مفاد میں پاکستان ریلوے کو مکمل تعاون فراہم کیا جائے گا۔ اجلاس میں صوبے کے قدیم و تاریخی ریلوے اسٹیشنز کی بحالی، ریلوے اسٹیشنز کی صفائی اور ستھرائی، تزئین و آرائش اور ٹریکس کے اطراف گرین بیلٹس کی تعمیر پر بھی تفصیلی غور کیا گیا۔ مشیر خزانہ مزمل اسلم، چیف سیکرٹری خیبر پختونخوا شہاب علی شاہ، ایڈیشنل چیف سیکرٹری پلاننگ و ڈویلپمنٹ اکرام اللہ، سیکرٹری پاکستان ریلوے اور محکمہ ٹرانسپورٹ کے حکام اجلاس میں شریک ہوئے۔