وزیراعلیٰ سہیل آفریدی نے مختلف جامعات کے 347 طلبہ میں 6 کروڑ 40 لاکھ روپے مالیت کے سکالرشپس چیکس تقسیم کیے
پشاور (نمائندہ چترال ٹائمز ) وزیر اعلیٰ خیبر پختونخوا محمد سہیل آفریدی نے مختلف جامعات میں زیرِ تعلیم انڈرگریجویٹ اور گریجویٹ 347 طلبہ میں 6 کروڑ 40 لاکھ روپے مالیت کے سکالرشپس چیکس تقسیم کیے۔ پیر کے روز وزیر اعلیٰ ہاؤس پشاور میں محکمہ اعلیٰ تعلیم کی جانب سے منعقدہ سکالرشپس تقسیم کی تقریب سے خطاب کرتے ہوئے وزیر اعلیٰ نے خیبر پختونخوا ایجوکیشن فاؤنڈیشن کے لیے 300 ملین روپے اضافی فنڈز فراہم کرنے کا اعلان بھی کیا، جن میں سے 200 ملین روپے بندوبستی اضلاع اور 100 ملین روپے ضم شدہ اضلاع کے لیے مختص ہوں گے۔
وزیر اعلیٰ نے تقریب سے خطاب کرتے ہوئے کہا کہ سکالرشپس کی فراہمی سے صوبے کے متوسط اور کمزور طبقے کو یکساں اور بہتر تعلیمی مواقع فراہم کر رہے ہیں۔ ہماری کوشش ہے کہ کوئی ہونہار طالب علم محض مالی مسائل کی وجہ سے اپنی تعلیم ادھوری نہ چھوڑے۔ خیبر پختونخوا کے طالب علم باصلاحیت ہیں، انہیں صرف مواقع اور مناسب سہولیات دینے کی ضرورت ہے، طلبہ پاکستان کا مستقبل ہیں، کل انہوں نے ملک و صوبے کی باگ ڈور سنبھالنی ہے۔ ہماری حکومت قائد عمران خان کے وژن کے مطابق اپنے نوجوانوں پر سرمایہ کاری کر رہی ہے، معیاری تعلیم اور بہتر صحت سہولیات کی فراہمی ہماری اولین ترجیح ہیں۔ صوبے کے تعلیمی نظام میں مارکٹ سے ہم آہنگ مضامین متعارف کرانے جا رہے ہیں تاکہ ہمارے طلبہ قومی اور بین الاقوامی سطح پر مقابلہ کر سکیں۔ ” ہماری کوشش ہے کہ طلبہ فارغ التحصیل ہوتے ہی نہ صرف نوکری حاصل کریں بلکہ روزگار فراہم کرنے کے قابل بنیں”۔
وزیر اعلیٰ نے اپنی تقریر میں کہا کہ طلبہ کے لیے انٹر شپ پروگرام شروع کر رہے ہیں تاکہ وہ بے روزگار نہ بیٹھیں، ہماری تمام پالیسیاں عوام کی فلاح و بہبود کے لیے ہونگی۔ ہم گور ننس کو بہتر اور اچھے طریقے سے ڈیلیور کر کے دکھائیں گے۔ قبل ازیں، شرکاءکو بریفنگ دیتے ہوئے بتایا گیا کہ رواں سال وزیر اعلیٰ ایجوکیشن انڈومنٹ فنڈ اور خیبر پختونخواایجوکیشن فاونڈیشن کے تحت 347 سکالرشپس دی جا رہی ہیں جن کے لیے 15000 ہزار سے زائد درخواستیں موصول ہوئی ہیں۔ سکالرشپس کے لیے درخواست دینے کے لیے آن لائن پورٹل متعارف کرایا گیا ہے جس کے ذریعے خود کار اور شفاف طریقے سے طلبہ کی سیلیکشن ہوتی ہے۔
مزید بتایا گیا کہ صوبائی حکومت کے سکالرشپ پروگرام کے تحت ملک و صوبے کی اعلیٰ تعلیمی درسگاہوں بشمول GIK،NUST ،IBAاور قائداعظم یونیورسٹی میں طلبہ مفت تعلیم حاصل کر رہے ہیں۔صوبائی وزیر مینا خان آفریدی ، محکمہ اعلی تعلیم کے حکام ، جامعات کے سربراہان اور طلبہ بھی تقریب میں شریک ہوئے۔
