پی ایم ایل این کی حکومت میں چترال میں ریکارڈ ترقیاتی پراجیکٹس انجام پذیر ہوئے، جن میں لواری ٹنل اور گولین گول پراجیکٹ کی تکمیل، گیس پلانٹ، چترال شندور، گرم چشمہ اور کالاش ویلیز روڈ ز شامل ہیں۔ غزالہ انجم
چترال ( نمائندہ چترال ٹائمز) پاکستان مسلم لیگ (ن) سے تعلق رکھنے والی ممبر قومی اسمبلی غزالہ انجم نے کہا ہے کہ چترال کو پاکستان مسلم لیگ (ن) کا گڑھ بنایا جائے گا جہاں اس پارٹی کے مختلف ادوار حکومت میں ریکارڈ تعداد میں میگاترقیاتی پراجیکٹ انجام پذیر ہوئے جن میں لواری ٹنل پراجیکٹ اور گولین گول پراجیکٹ کی تکمیل، گیس پلانٹ، چترال شندور، گرم چشمہ اور کالاش ویلیز روڈ ز شامل ہیں۔ اتوار کے روز دنین میں واقع اپنی رہائش گاہ میں پارٹی کی تنظیمی اجلاس سے خطاب کرتے ہوئے انہوں نے کہاکہ چترال کے عوام کے ساتھ میاں نواز شریف، شہباز شریف اور مریم نواز خصوصی ہمدردی اور محبت رکھتے ہیں اور یہی وجہ ہے کہ انہوں نے کبھی بھی ترقی کے دوڑ میں چترال کو پیچھے نہیں رکھا اور اس پسماندہ علاقے کی طرف پوری پوری توجہ دے دی۔انہوں نے پارٹی کارکنان پر زور دیا کہ وہ اپنے صفوں میں موجودمثالی اتحادو اتفاق کوقائم رکھتے ہوئے پارٹی کو مضبوط بنیادو ں استوارکرنے میں دن رات ایک کریں اور آنے والے الیکشن میں ثابت کریں کہ چترال کے عوام میاں نوازشریف اور ان کے خاندان سے بے پناہ محبت کرتے ہیں۔ اس موقع پر پارٹی کے رہنماؤں سابق ایم پی اے سید احمد خان، فضل رحیم ایڈوکیٹ، محمد کوثر ایڈوکیٹ، نیاز اے نیازی ایڈوکیٹ، خورشید حسین مغل ایڈوکیٹ، صفت زرین، محمد ولی شاہ چیرمین، عمران الملک، مظفر الدین، امتیاز خواجہ، نوراحمد چارویلو اور دوسروں نے پارٹی کو مزید مستحکم بنانے کے سلسلے میں اپنے تجاویز پیش کئے۔ اجلاس کے مہمان خصوصی فضل رحیم ایڈوکیٹ تھے جبکہ سابق ایم پی اے اور وزیر اعلیٰ کے مشیر سید احمد خان نے صدارت کی۔
