محکمہ ابتدائی و ثانوی تعلیم خیبرپختونخوا نے نیا تعلیمی کیلنڈر جاری کر دیا، مختلف موسمی حالات کو مدنظر رکھتے ہوئے سمر اور ونٹر زونز کے حساب سے الگ الگ تعلیمی سال ہوں گے
پشاور (نمائندہ چترال ٹائمز) محکمہ ابتدائی و ثانوی تعلیم خیبرپختونخوا نے نیا تعلیمی کیلنڈر جاری کر دیا ہے۔ صوبے میں مختلف موسمی حالات کو مدنظر رکھتے ہوئے اب پرائمری تا مڈل سکولوں کے لئے سمر اور ونٹر زونز کے حساب سے الگ الگ تعلیمی سال ہوں گے۔ محکمہ تعلیم کی طرف سے جاری شدہ نوٹیفکیشن کے مطابق اس فیصلے کا مقصد طلباء و طالبات کی فلاح و بہبود اور معیاری تدریسی عمل کو یقینی بنانے کیلئے کیا گیا ہے۔سمر زون کے اسکولوں میں نیا تعلیمی سال یکم ستمبر سے اگست تک ہوگا۔ اس میں پہلا سمسٹر ستمبر سے دسمبر اور دوسرا سمسٹر جنوری سے مئی تک جاری رہے گا۔ جبکہ جون تا اگست موسم گرما کی تعطیلات ہوں گی۔ اسی طرح ونٹر زون کے اسکولوں میں تعلیمی سال یکم مارچ سے دسمبر تک ہوگا،
اس میں پہلا سمسٹر مارچ سے جون اور دوسرا سمسٹر اگست سے دسمبر تک ہوگا جبکہ دسمبر تا فروری موسم سرما کی تعطیلات ہوں گی۔ نئے نظام کے مطابق امتحانات بھی دو حصوں میں ہوں گے۔ پہلے سمسٹر کے امتحانات کو سالانہ نتیجے میں 45 فیصد اور دوسرے سمسٹر کے امتحانات کو 55 فیصد وزن دیا جائے گا تاکہ طلباء کی کارکردگی کا متوازن اور شفاف انداز میں جائزہ لیا جا سکے۔ سمر زون کے امتحانات دسمبر اور مئی میں جبکہ ونٹر زون کے امتحانات دسمبر میں منعقد ہوں گے۔ اس پالیسی کے تحت صوبے کے مختلف خطوں میں موسمی تنوع کو مدنظر رکھتے ہوئے تعلیمی نظام مزید مربوط اور بچوں کے لیے سازگار بنایا گیا ہے۔ یہ قدم نہ صرف تعلیمی معیار میں بہتری لائے گا بلکہ طلبہ اور اساتذہ دونوں کے لئے آسانی اور سہولت بھی پیدا کرے گا۔ محکمہ تعلیم کی طرف سے تمام ڈسٹرکٹ ایجوکیشن آفیسرز اور سکول سربراہان کو اس پر فوری عمل درآمد کرنے کی ہدایات جاری کی گئی ہیں۔
\