کنگ سلمان ریلیف سنٹر کی جانب سے اپر چترال کے 1500 غریب خاندانوں میں فوڈ پیکجزتقسیم
اپر چترال (نمائندہ چترال ٹائمز )ضلعی انتظامیہ اپر چترال کی زیر نگرانی گورنمنٹ بوائز ڈگری کالج جنالی کوچ بونی میں کنگ سلمان فاؤنڈیشن کی جانب سے مستحق افراد میں فوڈ پیکج تقسیم کیئے گئے ۔
اپر چترال کے تین اہم مراکز میں مجموعی طور پر 1500 خاندانوں کو راشن مہیا کیا گیا:جس میں تورکھو شاگرام مرکز: 320 خاندان، تحصیل مستوج چونچ مرکز: 420 خاندان، گورنمنٹ ڈگری کالج بونی مرکز: 760 خاندان شامل ہیں۔
کنگ سلمان فاؤنڈیشن کی جانب سے یوسی چرون، یوسی کوشٹ، یوسی موڑکہو اور یوسی اویر وغیرہ کے مستحق خاندانوں کے لیے ریلیف فوڈ پیکج کی تقسیم کا عمل گورنمنٹ بوائز ڈگری کالج جنالی کوچ میں کامیابی سے مکمل ہوا۔ فوڈ پیکج کی تقسیم ایڈیشنل ڈپٹی کمشنر فنانس اینڈ پلاننگ/ریلیف اینڈ ایچ آر اپر چترال محمد انور کی نگرانی میں کی گئی جبکہ اسسٹنٹ کمشنرز انڈر ٹریننگ ، پولیس، لیویز فورس نے سیکورٹی کے فرائض سر انجام دئے۔ اس موقع پر کنگ سلمان فاؤنڈیشن کے نمائندے بھی موجود تھے۔
ریلیف پیکج میں مستحق خاندانوں کے لیے 80 کلو آٹا، 5 کلو چینی، 5 کلو تیل اور 5 کلو دال شامل تھے۔ یہ اشیاء یوسی اویر، یوسی موڑکہو، یوسی چرون اور یوسی کوشٹ کے مستحق افراد میں تقسیم کی گئیں جس سے 760 کی تعداد میں ضرورت مند گھرانے مستفید ہوئے اور مجموعی طور پر 1500 مستحقین نے اس پیکچ سے استفادہ حاصل کیں۔
اس اقدام کو مقامی عوام نے بے حد سراہا اور ضلعی انتظامیہ سمیت کنگ سلمان فاؤنڈیشن کے تعاون پر شکریہ ادا کیا۔ انتظامیہ کی منظم نگرانی اور سیکیورٹی اداروں کی شمولیت نے تقسیم کے عمل کو شفاف، منصفانہ اور پُرامن بنانے میں اہم کردار ادا کیا۔
اس ریلیف پیکج کے ذریعے نہ صرف مستحق خاندانوں کو سہارا ملا بلکہ چترال جیسے دور افتادہ اور نظر انداز کیے گئے علاقے میں انسانی ہمدردی کی ایک روشن مثال قائم کی گئی۔
کنگ سلمان فاونڈیشن کی طرف سے پیکجز کی تقسیم کا عمل پیس اینڈ ڈویلپمنٹ آرگنائزیشن کے زیر انتظام انجام پذیر ہوئے۔
