گلگت بلتستان: سیلاب سے 9 افراد جاں بحق، 500 گھر، 27 پل تباہ ہوئے، ترجمان
گلگت(نمائندہ چترال ٹائمز)گلگت بلتستان کی حکومت نے تصدیق کی ہے کہ گلگت بلتستان میں سیلابی تباہ کاریوں سے 9 افراد جاں بحق ہوئے ہیں، جن میں 2 خواتین اور 2 بچے ہیں۔ترجمان گلگت بلتستان حکومت نے کہا کہ سیلابی ریلے میں لاپتہ افراد کی تعداد 10 سے 12 ہوسکتی ہے، سیلاب کی تباہ کاریوں سے 500 گھر تباہ ہوئے ہیں، مجموعی طور پر 12 کلومیٹر سے زائد سڑکیں تباہ ہوئیں۔فیض اللہ فراق نے بتایا کہ صوبہ بھر میں 27 پل اور 22 گاڑیاں سیلابی ریلوں کی نذر ہوگئی ہیں، متعدد دکانیں و مویشی خانے بھی تباہ ہوئے ہیں، ہزاروں فٹ عمارتی لکڑی ریلوں کے ساتھ بہہ گئی، سب سے زیادہ مالی و جانی نقصانات ضلع دیامر میں ہوئے۔
ترجمان نے کہا کہ سیلابی تباہ کاریوں سے 12 افراد زخمی ہوئے، 300 سے زائد پھنسے مسافروں اور سیاحوں کو ریسکیو کیا گیا، ریسکیو و سرچ آپریشن میں پاک فوج نے بڑھ چڑھ کر حصہ لیا، جی بی سکاؤٹس کے جوانوں نے بھی ریسکیو آپریشن و امدادی کاروائیوں میں حصہ لیا۔ترجمان کا کہنا ہے کہ لاپتہ افراد کی تلاش کے لیے سرچ آپریشن اب بھی جاری ہے، صوبے کے مختلف علاقوں میں پانی کے بہاؤ اور سلائیڈنگ کا سلسلہ جاری ہے، لینڈ سلائیڈنگ اور پانی کے بہاؤ میں تیزی کے باعث سرچ آپریشن میں مشکلات کا سامنا ہے۔ترجمان کے مطابق بڑھتے پانی کے بہاؤ کی وجہ سے سڑکوں کی بحالی میں بھی مشکلات کا سامنا ہے، پانی و بجلی کی بحالی کیلئے کام شروع ہے، حکومت متاثرین سیلاب کو تنہا نہیں چھوڑے گی، ہر ممکن مدد کرے گی۔
کوہستان کرپشن سکینڈل: ٹھیکیدار ایک ارب 45 کروڑ واپس کرنے کیلئے تیار
پشاور(سی ایم لنکس) کوہستان میں اربوں روپے کی کرپشن کے بڑے سکینڈل میں نیب نے اہم پیش رفت کرتے ہوئے مرکزی ملزم محمد ایوب کی پلی بارگین کی درخواست منظور کر لی ہے۔نیب ذرائع کے مطابق پلی بارگین کے تحت ملزم ایک ارب 45 کروڑ روپے کی رقم واپس کرنے پر رضامند ہوا ہے، جس کی منظوری چیئرمین نیب کی جانب سے دے دی گئی ہے،
محمد ایوب پر مجموعی طور پر 3 ارب 45 کروڑ روپے کی بینک منتقلیوں کا الزام ہے۔ذرائع کے مطابق تحقیقات میں یہ بات سامنے آئی ہے کہ ملزم نے اسلام آباد، ایبٹ آباد اور مانسہرہ میں کروڑوں روپے مالیت کی جائیدادیں خریدیں، جنہیں اب نیب نے منجمد کر دیا ہے اور جلد نیلامی کا عمل شروع کیا جائے گا۔نیب کا کہنا ہے کہ پلی بارگین کی منظور شدہ درخواست تین روز کے اندر احتساب عدالت میں پیش کی جائے گی، جہاں قانونی کارروائی مکمل ہونے کے بعد وصول شدہ رقم قومی خزانے میں جمع کرائی جائے گی۔
یاد رہے کہ یہ کیس خیبرپختونخوا کے ضلع کوہستان میں ترقیاتی منصوبوں میں مبینہ خوردبرد اور جعلی ٹھیکوں کے ذریعے سرکاری خزانے کو بھاری نقصان پہنچانے سے متعلق ہے، جس کا تخمینہ 40 ارب روپے لگایا گیا ہے، نیب کی جانب سے اس کیس میں مزید گرفتاریوں اور ریکوری کا عمل جاری ہے۔