حکومت خیبر پختونخوا نے صوبے کی قابل تجدید توانائی کے پورٹ فولیو کے لیے پہلی کاربن ایسٹ انونٹری کا اجرا کر دیا،

پشاور ( نمائندہ چترال ٹائمز)  صوبے میں دیرپا کلائمیٹ ایکشن اور پائیدار ترقی کی جانب ایک اہم پیش رفت کے طور پر حکومت خیبر پختونخوا نے صوبے کی قابل تجدید توانائی کے پورٹ فولیو کے لیے پہلی کاربن ایسٹ انونٹری کا اجرا کر دیا ہے جس سے خیبر پختونخوا اب بین الاقوامی کاربن مارکیٹس تک رسائی حاصل کرنے اور کلائمیٹ فنانس کے نئے مواقع کھولنے کی راہ پر گامزن ہو چکا ہے۔ اس سلسلے میں وزیر اعلیٰ ہاﺅس پشاور میں پروقار تقریب کا انعقاد کیا گیا جس میں وزیر اعلیٰ علی امین خان گنڈاپور نے انونٹری کا باضابطہ اجراءکیا۔ وزیر اعلیٰ کے معاون خصوصی برائے توانائی طارق سدوزئی، محکمہ توانائی اور پیڈو کے اعلی حکام کے علاوہ ترقیاتی شراکت داروں پاکستان انوائرمنٹ ٹرسٹ اور سیدڈ پروگرام کے نمائندوں نے تقریب میں شرکت کی۔

صوبے کے قابل تجدید توانائی منصوبوں کی کاربن ایسٹ انوینٹری برطانیہ کے بین الاقوامی ترقیاتی ادارے کے تعاون سے چلنے والے سیڈ (SEED) پروگرام کے اشتراک سے تیار کی گئی ہے، جس میں پیڈو کے قابل تجدید توانائی منصوبوں کی نقشہ کشی کی گئی ہے اور ان کی کاربن کریڈٹس اور انٹرنیشنل رینیوایبل انرجی سرٹیفکیٹس ((I-RECs لیے قابلیت کا تجزیہ کیا گیا ہے۔ تقریب سے خطاب کرتے ہوئے وزیراعلیٰ خیبر پختونخوا علی امین گنڈاپور نے کہا “یہ اقدام کلائمیٹ ایکشن کے سلسلے میں خیبر پختونخوا کی قیادت کا جرات مندانہ اقدام ہے جو اس عزم کی عکاسی کرتا ہے کہ ہم صاف توانائی کے حل کو فروغ دینا چاہتے ہیں، گرین فنانس کو متوجہ کرنا چاہتے ہیں اور پائیداری کے فوائد کو اپنی عوام تک منصفانہ انداز میں پہنچانا چاہتے ہیں۔

 انہوں نے کاربن ایسٹ انونٹری کے اجراءکو ایک تاریخی لمحہ قرار دیتے ہوئے کہا کہ یہ اس بات کا ثبوت ہے کہ ہمارا صوبہ عالمی ماحولیاتی اہداف سے ہم آہنگ ہونے کے لیے تیار ہے، یہ اقدام پائیدارمعاشی ترقی کے لیے مارکیٹ بیسڈ طریقہ کار کو اپنانے کے حکومتی عزم کا بھی عملی مظہر ہے۔ وزیر اعلیٰ نے پیڈو اور سیڈ پروگرام کے درمیان اشتراک کار کو بھی قابل ستائش قرار دیا اور کہا کہ سب کی مشترکہ کاوشوں سے ہی صوبے کی پہلی کاربن ایسٹ انونٹری کی تیار ممکن ہوئی ہے۔ علی امین گنڈاپور کا کہنا تھا کہ یہ انونٹری ایک جدید ٹول ہے جو پیڈو کے رینیو ایبل انرجی منصوبوں کا نقشہ پیش کرتا ہے اور کاربن اخراج کی بیس لائن قائم کرتا ہے، جس سے پیڈو بچائے گئے اخراجات کو مقدار میں تبدیل کر سکتا ہے۔

 انہوں نے اس عزم کا اظہار کیا کہ وہ صوبے میں گرین انرجی کے حل کو فروغ دینے کےلئے کلائمیٹ فنانسنگ کے مواقع سے بھرپور استفادہ کریں گے اور اس مقصد کے لیے اس عمل کو اپنی ترقیاتی حکمت عملی کا مستقل حصہ بنائیں گے۔علی امین گنڈاپور نے کہا کہ یہ صوبہ قابل تجدید توانائی میں خصوصی استعداد رکھتا ہے، پیڈو کے تحت متعدد منصوبوں پر کام جاری ہے اور کئی ایک پائپ لائن میں ہیں، پیڈو اور پیٹ کے مابین معاہدہ ایک سنگ میل کی حیثیت رکھتا ہے جس کے تحت قابل تجدید توانائی کی موجود استعداد کو صوبے کی معاشی استحکام کے لئے موثر طریقے سے استعمال میں لایا جائے گا۔

 علی امین گنڈاپور کا کہنا تھا کہ صوبے کی معاشی خود انحصاری اور اس کا ماحولیاتی استحکام ان کی حکومت کی اہم ترجیحات میں شامل ہیں، اس مقصد کے لیے استعداد کے حامل تمام شعبوں کی ترقی پر بھرپور توجہ دی جا رہی ہے۔ قبل ازیں متعلقہ حکام نے شرکاءکو بریفنگ دیتے ہوئے بتایا کہ یہ کاربن ایسٹ انونٹری پیڈو کے ہائیڈرو پاور اور سولر منصوبوں کو معروف عالمی کاربن اسٹینڈرڈز—ویرا، گولڈ اسٹینڈر اور گلوبل کاربن کونسل کے مطابق جانچتی ہے، جس کے مطابق پیڈو کے آٹھ منصوبے ویرا کے لیے اہل ہیں، جبکہ 13 منصوبے گولڈ اسٹینڈرڈ اور 37 منصوبے گلوبل کاربن کونسل کے معیار پر پورے اترتے ہیں۔

 مزید برآں پیڈو کے تمام منصوبے انٹرنیشنل رینیوایبل انرجی سرٹیفیکیٹس ((I-RECs کے لیے اہل ہیں۔مجموعی طور پر، یہ منصوبے ہر سال 54 لاکھ ٹن کاربن ڈائی آکسائیڈ کے اخراج سے بچاو¿ کی صلاحیت رکھتے ہیں اور 1 کروڑ 19 لاکھ رنیو ایبل انرجی سرٹیفکیٹس پیدا کر سکتے ہیں، جو کہ کاربن مارکیٹس کے ذریعے آمدن کا ایک اہم موقع فراہم کرتے ہیں۔ تقریب میں ایک اور اہم پیش رفت کے طور پر، پیڈو نے پاکستان انوائرمینٹ ٹرسٹ (PET) کے ساتھ ایک معاہدے پر دستخط کیے، جس کے تحت پیڈو کو بین الاقوامی رینیوایبل انرجی سرٹیفیکیٹسن کے ساتھ رجسٹر کیا جائے گا۔ ابتدائی مرحلے میں پیڈو کے پانچ منصوبے اس بین الاقوامی نظام میں رجسٹر کیے جائیں گے، جس سے خیبر پختونخوا کو عالمی قابل تجدید توانائی کی مارکیٹ میں باضابطہ داخلے کا موقع ملے گا۔

 وزیر اعلیٰ کے معاون خصوصی برائے توانائی طارق سدوزئی نے بھی تقریب سے خطاب کیا اور اقدام کے ممکنہ مثبت نتائج پر روشنی ڈالی۔ سیڈ پروگرام کے ٹیم لیڈر حسان خاور نے اپنے تاثرات کا اظہار کرتے ہوئے کہا کہ یہ یہ اقدام خیبر پختونخوا کی ماحولیاتی طور پر دانشمندانہ ترقی اور معاشی لچک کے عزم کو اجاگر کرتا ہے، جو پاکستان کو ایک زیادہ سرسبز، پائیدار اور جامع مستقبل کی جانب لے جانے میں مددگار ثابت ہو گا۔