وزیراعلیٰ علی خیبرپختونخوکا صوبے میں صفائی ستھرائی کے لئے صوبہ بھر کے دیہات کے ویلج کونسلز میں خصوصی پروگرام شروع کرنے کا فیصلہ، پہلے مرحلے میں 2061 دیہی یونین کونسلز میں یہ پروگرام شروع کیا جائیگا
پشاور ( نمائندہ چترال ٹائمز ) وزیر اعلیٰ خیبر پختونخوا علی امین خان گنڈاپور کی زیر صدارت محکمہ بلدیات کا اہم اجلاس وزیراعلیٰ سیکرٹریٹ پشاور میں منعقد ہوا جس میں دیہات کی سطح پر صفائی ستھرائی کیلئے خصوصی پروگرام شروع کرنے کا فیصلہ کیا گیا ہے۔متعلقہ اراکین صوبائی کابینہ، چیف سیکرٹری، متعلقہ انتظامی سیکرٹریز اور محکمہ بلدیات کے حکام نے اجلاس میں شرکت کی۔وزیراعلیٰ علی امین گنڈا پور نے صوبے میں صفائی ستھرائی کے لئے ایک اہم اقدام کے طورپر صوبہ بھر کے دیہات کے ویلج کونسلز میں صفائی ستھرائی کے لئے خصوصی پروگرام شروع کرنے کا فیصلہ کیا، پہلے مرحلے میں صوبے کی 2061 دیہی یونین کونسلز میں یہ پروگرام شروع کیا جائے گا،اس پروگرام پر عملدرآمد کے لئے ابتدائی طور پر ساڑھے پانچ ارب روپے کا تخمینہ لگایا گیا ہے۔
پروگرام کی تفصیلات کے حوالے سے بریفنگ دیتے ہوئے بتایا گیا کہ پروگرام کے تحت ہر یونین کونسل کے لئے چار افراد پر مشتمل صفائی عملہ بھرتی کیا جائے گا، یہ عملہ یومیہ اجرت کی بنیاد پر بھرتی کیا جائے گاجس کے لئے ایک صاف اور شفاف طریقہ کار وضع کیا جائے گا۔ یہ عملہ یونین کونسل کی سطح پر گھر گھر جا کر کوڑا کرکٹ اٹھاکر ٹی ایم اے کے کلیکشن پوائنٹ تک پہنچانے کا کام کرے گا۔ ابتدائی طور پر ہر یونین کونسل میں کوڑا کرکٹ اکٹھا کرنے اور صفائی کے لئے ایک لوڈر گاڑی اور دیگر ضروری سامان فراہم کیا جائے گا۔ مزید برآں متعلقہ اسسٹنٹ کمشنر، تحصیل میونسپل آفیسر اور اسسٹنٹ ڈائریکٹر لوکل گورنمنٹ پروگرام پر عملدرآمد کی نگرانی کریں گے۔
پروگرام کو کامیاب بنانے کے لئے منتخب بلدیاتی نمائندوں اور کمیٹی کی شرکت کو بھی یقینی بنایا جائے گا جبکہ پروگرام پر عملدرآمد کی نگرانی کے لئے مانیٹرنگ کا ایک موثر نظام وضع کیا جائے گا۔ اجلاس میں بتایا گیا کہ صوبائی کابینہ کے اگلے اجلاس میں باقاعدہ منظوری کے فوری بعد پروگرام کا عملی اجرائکیا جائے گا۔ دوسرے مرحلے میں صوبے کے پہاڑی علاقوں کی یونین کونسلز میں یہ پروگرام شروع کیا جائے گا۔
پروگرام کی افادیت سے متعلق گفتگو کرتے ہوئے وزیراعلیٰ نے کہا کہ یہ پروگرام موجودہ صوبائی حکومت کا ایک سگنیچر پروگرام ہے،صوبے کی تاریخ میں پہلی دفعہ ہم دیہاتی علاقوں میں سنیٹیشن سروسز کا آغاز کر رہے ہیں،کوشش ہے کہ 14 اگست تک پروگرام کا باضابطہ اجرا کردیں۔ علی امین گنڈاپورنے کہا کہ اس پروگرام سے نہ صرف دیہی علاقوں میں صفائی ستھرائی یقینی ہوگی بلکہ ہزاروں لوگوں کو روزگار کے مواقع بھی ملیں گے۔ انہوں نے متعلقہ حکام کو پروگرام پر مقررہ ٹائم لائنز کے مطابق عملدرآمد کے لئے ضروری اقدامات اٹھانے کی ہدایت کی اور واضح کیا کہ صفائی عملے کی بھرتی میں مروجہ قواعد و ضوابط پر عملدرآمد اور شفافیت کو ہر لحاظ سے یقینی بنایا جائے۔وزیراعلیٰ نے مزید ہدایت کی کہ اس پروگرام کو دیر پا بنیادوں پر چلانے کے لئے حقیقت پسندانہ لائحہ عمل وضع کیا جائے۔