شندور فیسٹیول 2025 کی تیاریوں کے سلسلے میں چترال اور گلگت بلتستان کی انتظامیہ کا شندور پولو گراؤنڈ میں مشترکہ اجلاس
فیسٹول ۲۰ سے ۲۲ جون تک دنیا کے بلند ترین پولو گراؤنڈ “شندور” میں منعقد ہوگا
مستوج (نمائندہ چترال ٹائمز ) شندور پولو فیسٹیول 2025 کی شاندار اور پُرامن انعقاد کو یقینی بنانے کے لیے چترال اور گلگت بلتستان کی سول و عسکری قیادت کا ایک اہم مشترکہ اجلاس شندور پولو گراؤنڈ میں منعقد ہوا۔ اجلاس کی صدارت کمانڈنٹ چترال اسکاؤٹس کرنل بلال جاوید نے کی۔
اجلاس میں ڈپٹی کمشنر اپر چترال، ایڈیشنل ڈپٹی کمشنر لوئر چترال، ڈپٹی کمشنر ضلع غذر، ڈی پی او ضلع غذر، لیفٹیننٹ کرنل ایف سی این اے، سیکٹر کمانڈر جی بی اسکاؤٹس، ونگ کمانڈر 114 ونگ، اسسٹنٹ کمشنر مستوج، ڈی پی او اپر چترال، ڈی پی او لوئیر چترال، جی ایم ٹورازم ڈیپارٹمنٹ خیبرپختونخوا اور چترال و گلگت بلتستان پولو ایسوسی ایشنز کے صدور نے خصوصی طور پر شرکت کی۔
اجلاس میں شندور فیسٹیول کے تمام انتظامی، سیکیورٹی، سفری و طبی سہولیات، سیاحتی نظام، رہائش، صفائی، ٹریفک کنٹرول اور ایمرجنسی سروسز سے متعلق تفصیلی غور و خوض کیا گیا۔ فیصلہ کیا گیا کہ چترال اور گلگت بلتستان کی انتظامیہ باہمی رابطے اور مکمل ہم آہنگی کے ساتھ کام کرے گی تاکہ سیاحوں اور شائقین کو بہترین ممکنہ سہولیات فراہم کی جا سکیں اور فیسٹیول کا انعقاد ایک یادگار اور پُرامن ماحول میں ممکن ہو۔
واضح رہے کہ شندور پولو فیسٹیول ایک عالمی شہرت یافتہ ثقافتی اور روایتی کھیلوں کا میلہ ہے، جو ہر سال 20 سے 22 جون تک دنیا کے بلند ترین پولو گراؤنڈ “شندور” میں منعقد ہوتا ہے۔ اس فیسٹیول میں چترال اور گلگت بلتستان کی منتخب پولو ٹیمیں ایک دوسرے کے مدمقابل ہوتی ہیں، جبکہ ملک بھر اور بیرون ملک سے بڑی تعداد میں سیاح اور شائقین اس تاریخی ایونٹ میں شرکت کرتے ہیں۔
