یوم تکبیر چترال لوئیر اور اپر میں ملی یکجہتی اورروائتی قومی جزبے وحب الوطنی کے ساتھ منایا گیا، پاک فوج کے ساتھ مکمل یکجہتی کا اظہار
چترال (نمائندہ چترال ٹائمز)ملک کے دوسرے شہروں کی طرح چترال میں بھی یوم تکبیر روایتی قومی جذبے، حب الوطنی اور ملی یکجہتی کے ساتھ لوئیر چترال کے اتالیق پل اوراپر چترال کے ہیڈکوارٹر میں منایاگیا۔ جس میں سیاسی ومذہبی جماعتوں کے رہنمااورعوا م نے بڑی تعداد میں شرکت کی ۔
تقریب سے خطاب کرتے ہوئے امیرجماعت اسلامی لوئرچترال وجہہ الدین ، سابق ایم پی اے سید احمد خان ، سینئررہنماپاکستان مسلم لیگ(ن) عبدالولی خان عابدایڈوکیٹ،ضلعی صدرعوامی نیشنل پارٹی چترال الحاج عیدالحسین ،سابق ضلع ناظم حاجی مغفرت شاہ ، سابق امیرجماعت اسلامی مولاناجمشید احمداوردوسروں نے کہاکہ 28 مئی 1998ءکا دن پاکستان کی تاریخ میں ایک روشن اور ناقابل فراموش دن ہے، جب پاکستان نے 6 ایٹمی دھماکے کر کے روایتی دشمن کے غرور کو خاک میں ملا دیا۔ ہم ان تمام شخصیات کوخراج تحسین پیش کرتے ہیں کہ جنہوں نے پاکستان کوایٹمی قوت بنانے میں اپنابھرپورکرداراداکیا ہے ۔
انہوں نے کہاکہ افواج پاکستان سیسہ پلائی ہوئی دیوار بن کر دشمن کے کسی بھی ناپاک عزائم کو خاک میں ملانے کی بھر پور صلاحیت رکھتی ہے۔ ہمیں اپنی مسلح افواج پرفخرہے جس کے جوانوں نے ملک وقوم کے لئے ہمیشہ آگے بڑھ کرقربانی کے جذبے کامظاہرہ کیاہے ۔آج پوری دنیایہ جانتی ہے کہ پاکستان اپنے دفاع سے غافل نہیں ہے ۔پاکستانی قوم ایک امن پسندقوم ہے مگرجارحیت برداشت ہرگزنہیں کریں گے۔ہم اینٹ کاجواب پتھرسے دیناجانتے ہیں۔
اسی طرح یوم تکبیر کے سلسلے میں اپرچترال کے ہیڈ کوارٹر بونی دیگر علاقوں مستوج، وریجون موڑکہو ودیگر مقامات میں بھی یوم تکبیر کے حوالے سے تقاریب اور ریلی کا اہتمام کیا گیا اور پاکستان کو ایٹمی طاقت کا درجہ دینے میں کردار ادا کرنے والے تمام کرداروں کو خراج تحسین پیش کیا گیا ۔ اور پاک فوج کے ساتھ مکمل یکجہتی کا اظہار کیا گی ا
