Chitral Times

Nov 19, 2019

ﺗﻔﺼﻴﻼﺕ

  • ایونو مولدہا گیس سلنڈرو حادثہ متاثرہ خاندانو غمہ ہر فرد شریک وا ہر غیچہ اشرو غیچی گوین۔

    October 11, 2019 at 11:33 pm

    پشاورو کمپلیکس ہسپتالو برن اینڈ پلاسٹک سرجری یونٹہ داخل ہے متاثرہ خاندانو افراد انوسار انوس کم باو گونیان۔ ہے خاندانو سوت نفریان موژار فی الحال صرف جو نفری بچ اسونی۔ ہتیتان موژی ای منظور برار وا ای شاکر اللہ مرحوم برارو اژغال شامل اسونی۔
    تفصیلہ کی بغاتم جو تاریخہ ہے خاندانو سوت نفریان بشمول جو زنانہ ، تروئے چیچیق وا جو کُلانو کمپلیکس ہسپتالو برن اینڈ پلاسٹک سرجری یونٹہ داخل بیتیستانی، تروئے تاریخو انوسو شاکر اللہ مرحوم برارو ژور تانیہ حقوت توریتائے ، وا چار تاریخو انوسو منظور برارو چیق ژور کہکشان دی امانتو پیژیمیتائے ، ہیغار اچی منطور برارو اژیلیو دی غیچ ہوریکار پروشٹی ننو اشکما تان غیچھان بند ہونی وا بیہتی ہیہ دنیوتے گیتی چھوتیا دفن ہوئے، چھوئے تاریخو انوسو عیان نامین چیق دی ہیہ دنیار رخصت ہوئے وا سوت تاریخو انوسو ہیہ متاثرہ خاندانو سربراہ شاکر اللہ برار دی ہیہ فانی دنیوتے خدایار اریر ، شاکر اللہ مرحوم برارو دنیار شوخچیکو سوم جستہ منظور برارو اژغال دی اوشٹ تاریخا ہیہ دنیو پیچھی ہتے دنیو ویشکی قدم لاکھیتائے۔۔
    ہانیسے ہے خاندانو صرف جو نفری (ای شاکر اللہ برارو اژغال) وا ای منظور برار زندہ اسونی ، امیدو شاخور کم غیچی گونیان مگر۔۔۔غیچی گونیان۔
    امید خو امید وا، پورا دنیا امیدو سورا قائم۔
    پسہ دعان کوتھولیا پسہ ہوستار عطیاتن شکلہ نیک تمنان سہارا ہتیت ہمونیا پت ہمتو نو بیلیسونی ، ناامید نو بیتیسونی ، زندہ ہال بیکو ارمان ہانسے دی ہتیتان غیچہ ویریغ نایوران (اللہ پاک ہتیتان ارمانو پورا کورار)
    اوا یعنی عطا الرحمن عدیم ، سلیم الدین ایڈوکیٹ صاحب ، حبیب صاحب وا محمد یونس برار ہنون ہے متاثرہ خاندانو غمہ شریک بیکو بچے ہتیتان عیادتو بچے بیستام۔ اوا ذاتی طورا چندہ کوری تقریبا اکسٹھ ہزار 61000 روپیہ جمع کوریستم ہتیتانتے حوالہ اریتم، ہیہ چندآ پنڈیار مہ مامو چیت نصیر صاحب، شیر افضل شادمان صاحب، غفور صاحب ، عبد الحی صاحب ، نور افضل صاحب ، ڈگری کالج چھیترارو اسپہ محترم اساتذہ کرام ، عبید فلک صاحب وا مہ تان وجود حصہ گانیستانی اوا سفان ہردیار مینادار وا آئندہ دی ہیتان سر ہیہ قسمہ نیک کورمہ شریک بیکو امیدو تان لاکھومن۔ مہ اللہ پسہ سفانتے اجر عظیم عطا کورار۔ جزاک اللہ
    لہذا تھمام چھیتراری برارگینیان خدمتہ ای دردمندانہ اپیل کومن کی ہیتان سوم تان وسو مطابقہ امداد کورور ، وا خور ہش مخیر حضراتن چکے ہیتان سوم مدد کوراور۔ وا اسپہ موژی کیہ روئے کی لوٹ عہدین اسونی ہتیتان خدمتہ دی گزارش شیر کی ہے متاثرینان سوم ہیتان خاندانو سوم سرکاری ، نیم سرکاری وا نجی سطحہ امداد کوری ثواب دارین حاصل کورور۔
    وا پشاورا اساک برارگینیانتے گزارش شیر کی ہتیرا بی ہتیتان پوشی تسلیو ای جو لفظ ادا کورور ہیس ہتیتان زندہ ہال بیکو ای امید ساوز بوین ، وا لیئو یا خور کیہ عملی کورمو ضرورت کی ہوئے ہتیتان حاجتہ گیتی ہتیتان غمہ شریک بور۔
    بو شکریہ

  • error: Content is protected !!