ہیہ پویہ پت !! نیویشاک: جی کے رضوان
پسہ دی یادی گونیہ ہتے شوخڅیرو وخت ہتے بوغدو لمحات نو محض قصہ اوچے افسانہ بیتی بہچی شینی !!!
ہتے وختان نیویشاک نیویشیکو کوشش کوری اسور۔ مصنف ران کی مہ دورا انگار اژیکوتے ماچس نو بیکو مہ واوی تاٶو ݰان روندی زپہ درے جو چمخ بوختان ایتو چمخ دیتی ݯریخ نیسی تاٶو ݰائیہ دیتی دوری انگار اژیاٶتائے ۔ وا کیاوت کیاوت چھوئے بیکو جم ڈانگ قونان بوت ژیبیکار اچی دوپھے پیݯھاٶتانی۔ چھوچی ایہہ روپھی راغیشٹی ہے دوپھیروانگارو موژار غروݱ ای گنی ݯوݯھو ساروز دارو لینڅہ یا کھونوان سورا انگار اژیاٶتانی۔
روشتیو ژیر پیژیر بیکو سم ای کمہ دیہو ٹکڑا جوانان ہوازہ کوری تن مخصوص پونگی ݯاکینیان کا پائتاوا کا تاچینگ دیتی ورانگان کریمہ دیتی ݱیکانان اوچے شیمینیان میہی بوتی اٶرینیان سوم ٹھونگیان گنی براٹان میہہ دیتی داروتے بوغاٶتانی وا کا پژالان تن اوناران گنی ترکوہ ساوزیے پژالیوتے یا سوت سیریوتے بوغاٶتانی۔
نماز گار بیکو ملان گنی انگونیان رے بو افسی بیتی دیہو څیڅق پروشٹ دی بوغاٶتانی۔
تن وختاری وخت نیزی کولانو کا شُو کوراٶتانی کا دوک گییاٶتانی کا درائی کورٶتانی۔ نن گینی پوݰپ دوماٶتانی گییاٶتانی وا کا قلامی کورٶتانی۔ واو گینیان تکہ چھمہ خلتہ شونجہ ہانو سورو سوئیرو کھوئے پونگی کھون دی نمایان اوشونی۔ ہر کوس شرانی تغوناری نیزیرو کڑوچیان ہواز خمہ خہ گیاٶتائے۔
وا تمبوسو یورا گول اوچے ژویین ڈقان اوسنیکو قوژد خماخہ گوئے وا کوس خوشانی کی ہوئے روژایوتے کوموران کندوری دودیری پوئی پروشٹ بیک۔ ڈفان دیتی ہروݰ دی اوشوئے۔
نمیژ خامئیکو ݰوئے کی ہوئے دیہو ای کمہ باشیاک ڈقانان ایوکون مݰکی دیہوتے نیساٶتانی۔وا بیکار یومونو دیہہ گنزولا بو اشٹوک باٶتانی۔
ہیتان موژی پاٹیک دیک، بولی دیک، سقان دیک دی شامل اوشونی ۔
وا کندوری څیڅیق تن مکتب سکولوتے تیاری کورٶتانی تن ݰوݯوغو بوتلہ کوری تن شوڑ قلمو سورا تن تختہ الف بان نیوشی ہوستہ کوری تن سکولوتے بوغاٶتانی ۔
سکولار اچی گیکو شیرین نان جوارائے ٹٹھوریان پیݯ توا پیڅھی ݰئیلی کوری پچاٶتائے ۔ اچی پیݯہ پیݯ شوتوٶ مورے کیپیھنی گنی ژیبیکو کیہ خال اوشوئے۔
وا کیاوت کیاوت ہوستہ خستہ ݰاپیکان تروپ چایو مورے ݱیبیکو کیہ خال باوتائے۔
وا کیاوت کیاوت شیرین نان تن اژیلیان بچین بسینی گومو یاجواریو دان کوری اژیلیان دلاسہ کوراوتائے وا گرم بیشیو ہیہ خلوص اوشوئے کی گرام بیشان بوتو شخ ٹٹھوریو دی ای بیتی ایغو سوم بوژی ژیباٶتانی ۔ تھے شام کی ہوئے ای پھتو دوری دوٶ دار بونی ہتیت دوٶ رار دونی روشتیو بچین۔
وا کا دیوتے پورمان پولتہ کورونی روشیو بچین وا کوس دوری لاٹینو شیشان مژینی ۔ وا کا پیہچہ دون پیڅھی پورم پولتہ کوری بوتہ پت وا کا موم بتی روشتے وختوشخڅیاٶتانی وا کا مس کی توریتائے مسہ نیشی ݰاپیک ژباٶتانی
وا کا تن زمانو بو ہوݰ کورک اوشونی کا ہروݰ ماہر فلکیات دی اوشونی کی ہتیتان وختو مخصوص نام مثلا مردیچ چشٹ بوت نرکوکو ڈاٶ ۔اشپیر دانگ ۔ویلاغبیلو مس وا بو خور خور دی ۔
انوسو یورو وا ہتوغو چھاغو سورا مخصوص ٹیم و نݰان کوراٶتانی وا چھویو آسمانہ مسو اوچے استاریان نشان اوشوئے کیچہ کی بول استاری ای نیسیک۔ اف غیریک۔ بوت بوژک استاری ای نیسیک۔ ترازو استاریان ای نیسیک ۔وانگہہ چھویو کوئے کی سفار نیستائے ای پھتی کوئے بیکو بچین ݯوݯھو داران تریز نیزی ݯنڅاکوراٶتانی وا کا داری لوق بوتی پوت ساوزئے راہین کوساٶتانی۔
وابعض دوری بلبچہ زیادہ بیکو وجہین بوتو سوری دورو واوی پھوݰپاکی کوری پیݯ قونان موڑا دیاٶتانی۔ تھے ہتے پھوݰپاکی ݰپیکو کیہ ݰئیلی خال اوشوئے۔ وا کیاوت دورو واوی طعامو ہوݯ کوریک ضرورت بیکو ژوڑان تیل نیزی ہوݯ کوراٶتانی۔ وا دوری بپ گینی ساروزو پھیرا پین نسوار پیݰاٶتانی کا تن نسوار دانو دراٶتائے وا کا بلا غونو ۔دورو لوٹھورو کیاوت کیاوت تن اژیلیان مشقول کوریکو بچین شیلوغ دیاٶتانی بس ہیہ سلسلہ حیاتہ مست اسیتاتانی۔
نون زمانہ غیچھو پیلکہ بدل ہوئے۔
#جیکےرضوان