گولین ہائیڈل پاور سٹیشن کی بحالی میں واپڈا کی طرف سے تاخیری حربہ انتہائی افسوسناک ہے۔مغفرت شاہ

چترال ( نمائندہ چترال ٹائمز ) سابق ضلع ناظم چترال مغفرت شاہ نے کہا ہے ۔ کہ گولین ہائیڈل پاور سٹیشن کی بحالی میں واپڈا کی طرف سے تاخیری حربہ اختیار کرنا انتہائی افسوسناک ہے ۔ جبکہ عوام لوڈ شیڈنگ کے عذاب سے گزر رہے ہیں ۔ پیر کے روز چترال پریس کلب میں میڈیا سے بات کرتے ہوئے انہوں نے کہا ۔ کہ گولین ہائیڈل پاور سٹیشن کے ہیڈ کی صفائی میں سست روی اختیار کرکے واپڈا عوام کو اشتعال دلانے کی دانستہ کوشش کر رہا ہے ۔ اگر ایسا ہوا ۔ تو حالات کی تمام تر ذمہ داری متعلقہ ادارے پر ہوگی ۔ انہوں نے کہا ۔ کہ یہ بات بھی باعث افسوس ہے ۔ کہ اتنے اہم پراجیکٹ کی ڈیزائننگ بھی ابتدا میں صحیح طریقے سے نہیں کی گئی ۔ اور پانی کے ڈائیورژن میں بہت بڑا فالٹ ہے ۔ جس کی وجہ سے ہر سیلاب میں ہیڈ کو بار بار نقصان پہنچ رہاہے ۔ اور بھاری مقدار میں حکومتی سرمایہ اس پر خرچ ہو رہا ہے ۔ پچھلے سال کے سیلاب کے نقصانات صحیح طور پر بحال نہیں ہوئے تھے ۔ کہ اس سال سیلاب نے نئی تباہ مچا دی ہے ۔ انہوں نے کہا ۔ کہ اس مرتبہ بھی اس کے ڈیزائن کو بہتر بنا کر تعمیر نہ کیا گیا ۔ تو یہ مستقل بنیادوں پر سیلاب کا شکار ہوتا رہے گا ۔ جس سے ایک طرف حکومتی خزانے کا ضیاع ہوتا رہے گا ۔ اور دوسری طرف عوام بجلی کو ترستے رہیں گے ۔ انہوں نے واپڈا سے اپیل کی ۔ کہ فوری طور پر اس کو بحال کرکے عوام کو بجلی کی مشکلات سے نجات دلائی جائے ۔