گزارشات……..شاعریو جدید رجحانات ….آصفی چترالی
نظم جدید / جدید شاعری :
مہ محترماں غزل سمیت تھمام جدید شاعری ہتے شاعری کی ہسے کیہ اشناریو سرسری بیان نوبوئے بلکہ عنوانو اندرینو غیری ئی نیسیر ۔ فرض کورے انسان کی موضوع ہوئے ہتوغو ذاتو پہانہ بی توغو نفسیاتو بھرپور عکاسیو کوروئے ۔ وا جدید شاعریو جوو خصوصیت ہیہ کی ہتیرا جذبات نگاری کمار کام غیچی گوئے سائنسی دورو انسانی ذہنوت پون دکو بش شاعری بوئے ۔ ترویو لوٹ خصوصیت ہیہ کی ہیس کیہ اشناریو برا اتے اشناریو تان حقائقان وا صفاتان بیان کورکو ژاغہ کیہ اشناریو نوغ ای الگ زاویہ مطالعہ کوروئے وا نوغ خیال پروشٹہ انگوئے ۔
جدید رجحانات :
1: ترقی پسند رجحان : ہیہ صرف کھوارو بچے نوغ رجحان اردوا اسی سالارئی چالو شیر ۔ ہیہ رجحان ہاروش ہاروش شاعریو پروشٹہ انگویان کہ شاعر پیسو غیر منصفانہ تقسیمو ، آمریتو ، ناکام جمہوریتو ، عدم مساواتو وا ہمی کمزوریان پیش نظرا وجودا گیاک امیر غریبو فرقو موضوع گنی شاعری کویان ۔ ہمو مقصد ہرگز ہیہ نو کی ہیہ محض ای بغاوت بلکہ شاعر ہیہ غریبو چے مزدورو وا خاص کوری وطنو تانتے محبوب گنیر ۔ ملکہ ناکام جمہوریت یا آمریت ہورو بچے فرقتو چھوئی بونی وا غریب طبقو چے وطنو خوشحالی ہورو مقصد حاصل( منزل) بونی مطلب ہیہ کی شاعریو حسن اتے قسمہ تان جاری بہچور ۔ شعریت کیہ دی صورتہ متاثر نوبوئے اگر کی ہوئے ہیس وا شعری رجحان نو بہچور بلکہ ای سیاسی پروپیگنڈا غیرور ۔
2: معاشرتی رجحان :
مغربی تہذیبی وا معاشرتی اثراتان پیش نظرا مشرقو جوائنٹ فیملی سسٹم متاثر بتی انسان ذاتی وا نفسی زندگی تییران ۔ ہے سورا مشرقو معاشرتی اقدار پامال بونیان ۔ تن موژی ایوال ایوالیو ادب ، عزت ، مدد وغیرہ ختم باو گونیان ۔ ہموش موقع شاعر معاشرتی رجحان گنی شاعری کوئے مگر شاعریو بالکل تبلیغ یا وعظ نو غیریر بلکہ شعری اسلوبو خیالو لکھی ہے رجحانو پرچارو کوروئے ۔
3: انسان کی عظمت کا رجحان :
مشینی ترقیو سببہ انسانو اہمیتہ وا قدرو قیمتہ کمی غیچی گویان ۔ ہے وجہیں دتی شاعر انسانی زندگیو وا انسانی ژانو عظمت و اہمیتو اجاگر کویاں ۔ ہیہ رجحان انسانی عظمتو ۔ کورکو کہ مشینو ساوزیاک وا مشینو چالیاک دی انسان اسور ۔ انسانار بےغیر مشین بےکار مگر مشینار بےغیر دی انسان ٹھیک ٹھاک زندگی کورکو بوئے لہذا انسانی زندگیو وا انسانو علم ادبو ہر موقع انسانوت اہمیت دتی بہچیلی ۔ صرف مشین تان نو بلکہ ہیہ مادی دورا پسہ انسانو سار محترم بیتی شیر وا انسان پیسو حصولہ وا لالچہ تمام انسانی اقداران پامال کورویان ۔ تھے مودودا شاعرو مشینو چے پیسو سورا انسانو ترجیح دیلی ۔
ذاتِ انسانی کا رجحان :
جدید شاعریو لوٹ رجحان وا تقاضا ہیہ کی ہیس انسانی حسنو چے ظاہری اوصافان بیانو سوم جستہ جستہ اتوغو ذاتو فلسفیانہ وا نفسیاتی مطالعہ کوروئے ۔ ذاتو ضروریاتن ، مسائلان وا مقاصدان پروشٹہ انگوئے ۔ انسانو ذات ای انتہائی وسیع وا کوڑوم سمندرو مثال شیر ۔ ہے اندرینی کندوری دنیا آباد شینی اتیتان دریافت کوریک وا انسانو نفسیاتی وا ذہنی پیچیدگی شینی ہتیتان حوالہ ذاتو مطمئن کوریک ہیہ رجحانہ شامل ۔
کائناتی رجحان :
سائنسو ترقی بو امبوخ ایجاداتان ، دریافتن پروشٹہ انگتی دنیو ای گلوبل ویلج ساوزیے شیر ۔ اگرچہ ہے سورا بو امبوخ مسائل حل بونیان وا معلومات پروشٹہ گونیان مگر ہےسوم جستہ جستہ کائناتو حوالہ بو امبوخ ہاروش سوالات دی ذہنہ گونیان کہ اتیت انسانو الجھنہ پیسونیان ۔ لہذا شاعرو فلسفیو ذہنو لکھی فکرو مطالعہ کوریلی خور کائناتو وسعتو وا حرکتو حوالہ تسلی بخش شعر انگیلی تاکہ ہے حیرانی ختم بوئے ۔
تقدیر کی درست تفہیم کا رجحان :
پروشٹو شعراء وا تھمام بےکار معاشرہ ہایہ منفی سوچو پیسی بیسور کی ۔ قسمتہ کی اوشوئے تان بوئے کی نو اوشوئے کیہ دی کی ارو نوبوئے ۔۔۔ مہ محترمان خدایو نائب انسانو بچے ہیہ مایوسیو لو وا پست سوچ ۔ کوریکو مشرقو انسان ہورو ہاروش تقلیدا اسور کی بالکل کورم نوکویان ۔ تان ہوستین تان تقدیرو ساوزئکو عظیم نعمتار ہیس محروم بویان ۔ نشی ہال بکو تمام تدبیر الٹہ بونیان ۔ دعا قبول نوبونیان ۔ ہمیت سف ہے سوچو نتیجہ کہ مشرقو انسان سست الوجودیہ وا تن آسانیہ اسور ۔ لہذا ہیہ دورو مغروبو محنتو زندگیار وا توغو ترقیار خبردار شاعروت ہیہ زیب نودویان کی ہسے پست خیال پیش کوری معاشرو مزید تن آسانیہ پیسور ۔ لہذا ہیہ رجحانو تضاضا ہیہ کی انسان محنت ، مشقت خیشار تمام مشکلاتان رکاوٹان سامنا کورار تاکہ اتوغو مستقل محنتو مشقتوتے لوڑی کاتب تقدیر دی ہتوغو تقدیرو بدیل دوئے اگر کی کمی برائے ۔ ہیہ سورا انسانو موژا خودی گوئے ، خوداعتمادی گوئے وا خوروت ہیس عملی نمونہ ساوز بوئے ۔