کھوار شاعری ترجمو تناظرا۔۔۔ عبداللہ شہاب
شاعری خالص تخلیقی عملو نام، جذباتو شدتوچے خیالو ژنگی کیہ شاعرو شعری فکرو نمئیکو ترازو، شعری فنو ای نسہ کی لاکھی لوڑین ہوئے شعری فکر بو امبوخ اشناریان امیزش ہو زبان و بیانو سوم جوستہ خیالو سوم براہ راست تعلق شیر ۔ لوٹ خیال کیہ دی شعرو فکر تصورکورونو بوئے۔ شعرو تخلیق اگرچہ الہامی تصور بویان مگر جدید نقادان مطابقہ کوشش دی شعرو بو قباحتار پاک کوئے چونکہ خیال بو ژاغہ اموشت بونیان مگر مروجہ اوصولان خیالو لاکھیک ضروری۔
ماہران شاعریو بچے ای کما اشناریان ضروری قرار دونیان ہے موژی ای لوٹ بحث خور زبانار ترجمو یا خیال گانیکو شیر ہے سلسلہ ای کما لوان صرف کھوار شاعریو بچے دیکو ضروری جاشومان۔ ای کما اصطلاح شینی ھیتان پیروی ضروری۔ اسپہ شاعریا خور شاعریان رے ہتیغار استفادہ کوریکو رجحان بو بیتی شیر۔ہیتان موژی ای خور زبانو شعرو کھوارو اندازہ ترجمہ شیر۔ اگرچہ خور زبانار راستفادہ کوریک غلط نو لیکن کیہ خور زبانو شعرو من وعن خور زبانہ ترجمہ کوری تان سوم منسوب کوریک بو غلط۔ ای کما اشناری ہے حوالہ مہ یادی گونیان ھمیتان پیروی وا ہوش کوریک ضروری۔
1۔ ترجمہ کوریک: ترجمہ کوراوا ہاتے شاعرو حوالو دیک بو ضرری ورنہ ھیس “سرقہ” و زمرہ گویان سرقہ چھوغیوت ریر۔ بغیر حوالہ کیہ شعرو ترجمہ کوریک ادبی حوالہ ناجائز۔
2ـ خیالو گانیک: خور زبانو یا تان زبانو خیالو یی گانی ہتو بیان ہاتے زبانہ یا خور زبانہ کوریکوتے ادبی اصطلاحہ “توادر” ریر، توارد جائز بشرطیہ کی ہاتے خیالو ہاتے الفاظہ کی بیان نو کوری استاو۔
3۔ کیہ مصرعو استعمال کوریک: خور شاعرو ای مکمل مصرعو یی گانیک چاہییے ہاسے خور زبانو اوشوئے یا تان زبانو ھیہ دی جائز ھیہ ای صنعت، ہموتے تضمین ریر، البتہ تضمینہ ھیہ لوو خیالو لاکھیک ضروری کی ہاتے مصرعو واوینان یعنی ڈبل کومان ” “ موژو نویشیلیک بوئے تاکہ معلوم بوئے کی ھیہ خور شاعرو مصرعہ رے۔ ورنہ ھمو دی “سرقہ” جوشونو بوئے۔
4۔ خور زبانو مصرعو گانیک: تان زبانہ شاعری کوراوا وزنو بحرو برابریو چے مضمونو بندشوت لوڑی خور زبانو ای مصرعو استعمال کورین بوئے ہوتے “تلمیع” ریر۔ ھیہ دی ای صنعت۔
ھمی تھمام لوار اچی ثابت ھیہ بویان کی کیہ خور زبانو شعرو ترجمہ بغیر حوالہ ترجمہ کوری تان تخلیقو حصہ ساوزیک غلط۔ اسپہ بو استاد شعران کلامہ ھیہ خامی غیچی گویان مہ امید شیر کی ہیت تان کتابہ ہے حوالان ضرور دونی کوری کی نو پرانی ھیت غلط روایت قائم کونیان۔ نوجوان شعران بچے ھمی اوصولان پابندی بو ضروری۔