کالاش ویلی میں مذہبی تہوار چوموس کا باقاعدہ اغاز، اختتامی تقریب23 دسمبر کو منعقد ہوگی
چترال ( نمائندہ چترال ٹائمز ) موسم سرما کی آمد اور نئے سال کی خوشیاں منانے کی مناسبت سے وادی کالاش میں منعقد ہونے والے مذہبی تہوار چوموس کا باقاعدہ آغاز بمبوریت کالاش ویلی سے ہوا۔
کالاش قبیلے کے مرد ،خواتین ، بزرگوں اور بچوں نے نئے کپڑے پہن کر مل کر رقص کریں گے اور نئے سال کی خوشیاں منائیں گے اس دوران چوموس تہوار کے کئی مذہبی رسومات ، شیشاؤ ، سرازرای،ساوی لیک ہار،اس توںگوس (بون فائر)، چوئی ناری ، منڈاہیک اور شارا بیرایک ،پوشو مارت،گوسٹ نیک،چان زہ ،سوری جاجک،سمیت مختلف مذہبی رسومات ادا کی جائیں گی ۔،کالاش فیسٹیول چوموس کی تیاری مہینوں پہلے شروع ہوتی ہے ۔
خصوصا خواتین تہوار کیلئے کپڑوں کی خریداری اور تیاری میں طویل وقت صرف کرتے ہیں۔ اور مختلف رنگین دھاگوں سے کشیدہ کاری کرکے انہیں نہایت ہی دیدہ زیب بناتے ہیں ۔ جو کہ دیکھنے کے قابل ہیں ۔
15 روزہ اس فیسٹیول میں کالاش کی تین وادیوں رمبور،بمبوریت اور بریر کے رہائشی مختلف مذہبی رسومات ادا کرینگے ۔ تاہم ساتھ ہی آپس میں پیار و محبت بانٹنے ، امن کا پیغام دینے اور اتحاد کیلئے آپس میں پھل اور خشک میوجات بھی تقسیم کریں گےاورچھوٹےجانوروں کی قربانی بھی کی جاتی ہے ۔
کالاش مذہبی تہوار چوموس ہر سال دسمبر میں منایا جاتا ہے جو کہ 7 دسمبر سے شروع ہوکر 22 دسمبر کو اختتام پذیر ہوتا ہے اس دوران بہت سارے مذہبی رسومات بھی ادا کیے جاتے ہیں۔
ڈپٹی کمشنر لوئر چترال محمد عمران خان کی ہدایات پر ایڈیشنل اسسٹنٹ کمشنر ہیڈکوارٹرز عدنان حیدر ملوکی کیلاش وادی میں موجود ہیں ۔ اور انتظامات کی نگرانی کر رہے ہیں۔
ضلعی انتظامیہ چترال کی طرف سے کسی قسم کی ویڈیوگرافی ، کالاش مردوخواتین کی میڈیا انٹرویو پر پابندی عائد کردی گئی ، خصوصا یوٹیوبر اور سوشل میڈیا ایکٹویسٹ کو سختی سے منع کردی گئی ہے۔ خلاف وزری کی صورت میں سخت قانونی کاروائی کی تنبیہ بھی کی گئی ہے۔
