پاکستان کا بھارت پر فتح کی خوشی اور یوم تشکر منانے کے سلسلے میں چترال لوئیر اور اپر میں ریلی اور جلسہ ، پورا علاقہ پاکستان زندہ باد کے نعروں سے گونچ اُٹھے
چترال (نمائندہ چترال ٹائمز ) پاکستان کا بھارت پر فتح کی خوشی اور یوم تشکر منانے کے سلسلے میں لویر چترال میں جلسہ اور ریلی کا اہتمام کیا گیا جس میں عوام نے ازلی دشمن پر غلبہ پانے اور ان کی پسپائی پر مسرت کا اظہار کرتے ہوئے اس عزم کا اعادہ کیا کہ پاکستان کے عوام مسلح افواج کے ساتھ ہیں اور اپنی مادر وطن پر آنچ آنے نہیں دیں گے۔ پاکستان مسلم لیگ (ن) کی اپیل پر نماز ظہر کے بعد تمام دیہات اور بازاروں کے مساجد سے کثیر تعداد میں پرجوش عوام اتالیق پل میں جمع ہوئے۔
جلسہ سے مسلم لیگ (ن) کے صدر عبدالولی خان عابد ایڈوکیٹ کے علاوہ نیاز اے نیازی ایڈوکیٹ، محمدکوثر ایڈوکیٹ، محمد ولی شاہ، مظفر الدین، مولانا اسرار الدین الہلال دین محمد ندیم، نعیم انجم، فضل رحیم ایڈوکیٹ، حاجی عیدالحسین اور دوسروں نے خطاب کرتے ہوئے افواج پاکستان کی دلیری پر انہیں خراج تحسین پیش کیا۔ مقررین کاکہنا تھاکہ پاکستان قائم رہنے کے لئے ہی بنا ہے اور رہتی دنیاتک یہ سبز ہلالی پرچم لہراتا رہے گا۔مقررین نے انڈیا کے مقابلے میں اس تاریخی فتح کو ہمیشہ کے لئے یاد رکھنے کے لئے ہر سال 10مئی کو منانے اور اس دن عام تعطیل کا مطالبہ کیا۔ بعدازاں اتالیق پل سے چیو پل ریلی نکالی گئی جس میں پاک فوج کے حق میں زبردست نعرہ بازی ہوئی۔
اپر چترال کے ضلعی صدر مقام بونی کے مقام پر بھی یوم فتح مبین منایا گیا جس میں عوام کثیر تعداد میں شریک ہوکر مسلح افواج کے ساتھ یکجہتی کا اظہار کیا اور اللہ رب العزت کا شکر ادا کیا۔ اس موقع پر ریلی بھی نکالی گئی جس کی قیادت اسسٹنٹ کمشنر مستوج احسان افریدی نے کیا۔ ریلی میں ضلعی انتظامیہ کے افسران اور تاجر یونین کے عہدیدار بھی موجود تھے۔
ریلی میں سینکٹروں کی تعداد میں بازار سے منسلک تجار برادری اور سول سوسائٹی کے ممبران نے پاکستان ذندہ باد ، پاک فوج ذندہ باد، قدم بڑھاؤ پاک فوج ہم تمہارے ساتھ ہیں، پاک ائر فورس ذندہ باد کے بلند شگاف نعرے لگائے اور پاکستان فوج کے اس اہم اور تاریخی کامیابی پر اللہ تعالیٰ کے حضور شکرانے کا دعا کئے۔
مقررین نے کہا کہ ہم اپنے پاک فوج کے ساتھ کھڑے ہیں اور مرتے دم تک ان کے ساتھ ہمیشہ کھڑے رہیں گے۔ انہون نے پاکستان کے بقاء کی خاطر اپنی جانوں کا نذرانہ پیش کرنے کے عزم کا اظہار کئے۔
