وزیر اعلیٰ خیبر پختونخوا کا بین الاقوامی شراکت دار اداروں کے تعاون سے جاری میگا ترقیاتی منصوبوں اور سیاحتی شعبے میں جاری منصوبوں پر کام کی رفتار کو مزید تیز کرنے کی ہدایت
وزیر اعلیٰ خیبر پختونخوا کا بین الاقوامی شراکت دار اداروں کے تعاون سے جاری میگا ترقیاتی منصوبوں اور سیاحتی شعبے میں جاری منصوبوں پر کام کی رفتار کو مزید تیز کرنے کی ہدایت
پشاور ( چترال ٹائمزرپورٹ )وزیر اعلیٰ خیبر پختونخوا سردار علی امین خان گنڈاپور کی زیر صدارت بین الاقوامی شراکت دار اداروں کے تعاون سے جاری میگا ترقیاتی منصوبوں سے متعلق ایک اہم اجلاس منعقد ہوا جس میں خیبر پختونخوا رورل انویسمنٹ، اینڈ انسٹیٹیوشنل سپورٹ پراجیکٹ ، خیبرپختونخوا انٹگریٹڈ ٹوارزم ڈویلپمنٹ پراجیکٹ ، خیبرپختونخوا رورل ایکسیسیبلٹی پراجیکٹ اور خیبر پختونخوا رورل روڈز ڈویلپمنٹ پراجیکٹ پر پیشرفت کا تفصیلی جائزہ لیا گیا۔سیکرٹری زراعت جاوید مروت ، سیکرٹری لوکل گورنمنٹ داود خان ، سیکرٹری سی اینڈ ڈبلیو اسد علی کے علاوہ چیف اکانومسٹ عارف اللہ اور دیگر متعلقہ حکام نے اجلاس میں شرکت کی۔ متعلقہ حکام کی جانب سے اجلاس کو مذکورہ بالا منصوبوں کی مجموعی لاگت، ذیلی پراجیکٹس، مدت تکمیل اور پراجیکٹس پر پیشرفت کے حوالے سے تفصیلی بریفنگ دی گئی۔
وزیر اعلیٰ علی امین گنڈاپور نے تمام میگا منصوبوں پر ٹائم لائنز کے مطابق پیشرفت یقینی بنانے کی ہدایت کی ہے اور کہا ہے کہ میگا منصوبوں پر پیشرفت کےلئے باقاعدگی سے جائزہ اجلاس منعقد کیے جائیں اور حائل رکاوٹوں کو بروقت دور کیا جائے تاکہ منصوبوں میں غیر ضروری تاخیر نہ ہو۔ انہوں نے کہا کہ بین الاقوامی شراکت دار اداروں کے تعاون سے جاری ترقیاتی منصوبوں کو مقررہ ٹائم لائنز کے مطابق مکمل کرنے کےلئے روایتی طریقہ کار سے ہٹ کر تیز رفتار کام کیا جائے، موجودہ صوبائی حکومت میگا منصوبوں کےلئے درکار تمام تعاون ترجیحی بنیادوں پر فراہم کرے گی۔عوامی سہولت کےلئے شروع کیے گئے میگا منصوبوں کے ثمرات بلا تاخیر عوام تک پہنچانا ضروری ہے۔ وزیر اعلیٰ نے واضح کیا کہ تعمیراتی منصوبوں کے معیار پر کسی قسم کا سمجھوتہ نہیں کیا جائیگا۔ وزیر اعلیٰ نے سیاحتی شعبے میں جاری منصوبوں پر کام کی رفتار کو مزید تیز کرنے کی بھی ہدایت کی ہے اور کہا ہے کہ شعبہ سیاحت حکومت کی ترجیحی فہرست میں شامل ہے، اس کے فروغ کےلئے غیر معمولی اقدامات کیے جائیں گے،سیاحت کے شعبے کو ترقی دے کر صوبے کی معیشت کو مستحکم کیاجا سکتا ہے۔
وزیر اعلیٰ خیبر پختونخوا سردار علی امین خان گنڈاپور سے انٹرنیشنل فنڈ فار ایگریکلچرل ڈویلپمنٹ (آئی ایف اے ڈی ) کی ریجنل ڈائریکٹر ریحانہ رضا کی ملاقات
پشاور ( چترال ٹائمزرپورٹ ) وزیر اعلیٰ خیبر پختونخوا سردار علی امین خان گنڈاپور سے انٹرنیشنل فنڈ فار ایگریکلچرل ڈویلپمنٹ (آئی ایف اے ڈی ) کی ریجنل ڈائریکٹر ریحانہ رضا نے اسلام آباد میں ملاقات کی ہے۔ ملاقات میں صوبے میں رورل اکنامک ٹرانسفارمیشن پراجیکٹ سے متعلق امور پر تفصیلی تبادلہ خیال کیا گیا ہے اور مذکورہ پراجیکٹ پر عملی کام شروع کرنے کےلئے پیشگی انتظامات کو جلد حتمی شکل دینے کا فیصلہ بھی کیا گیا ہے۔منصوبے پر ٹائم لائنز کے مطابق پیشرفت یقینی بنانے کےلئے مشترکہ لائحہ عمل پر اتفاق کرنے کے ساتھ ساتھ اس سلسلے میں متعلقہ صوبائی محکموں اور ڈونر ادارے کے درمیان کوآرڈینیشن کا موثر میکنزم تیار کرنے کا بھی فیصلہ ہوا ہے۔ چیف سیکرٹری ندیم اسلم چوہدری کے علاوہ سیکرٹری زراعت جاوید مروت اور محکمہ منصوبہ بندی کے اعلیٰ حکام بھی ملاقات میں موجود تھے۔ ملاقات میں متعلقہ حکام کو خیبرپختونخوا رورل اکنامک ٹرانسفارمیشن پراجیکٹ کے سلسلے میں بیس لائن سروے جلد مکمل کرنے کے علاوہ ضروری عملے کی تعیناتی اور دیگر لوازمات کو جلد پورا کرنے کی بھی ہدایت کی گئی ہے۔
اس موقع پر تمام متعلقہ محکموں کو پراجیکٹ پر پیشرفت کی راہ میں حائل رکاوٹوں کو دور کرنے کےلئے ضروری ہدایات جاری کی گئی ہیں جبکہ منصوبوں پر پیشرفت کا جائزہ لینے کےلئے متعلقہ انتظامی سیکرٹریز کو ہر 15 دنوں میں باقاعدگی سے اجلاس منعقد کرنے کا ٹاسک دیا گیا ہے۔وزیراعلیٰ نے اس موقع پر گفتگو کرتے ہوئے کہاکہ لوگوں کو خود روزگاری کے مواقع فراہم کرنے کےلئے رورل اکنامک ٹرانسفارمیشن ایک اہم منصوبہ ہے اس پر ٹائم لائنز کے مطابق عملدرآمد یقینی بنایا جائے گا، صوبائی حکومت اس منصوبے پر عملدرآمد کےلئے اپنے حصے کے فنڈز کی فراہمی سمیت ہر قسم کا تعاون یقینی بنائے گی۔ وزیر اعلیٰ کا کہنا تھاکہ زراعت کے شعبے کی جدید طرز پر ترقی صوبائی حکومت کی اہم ترجیحات میں شامل ہے اور اس مقصد کےلئے صوبائی حکومت خاطر خواہ سرمایہ کاری کر رہی ہے۔لوگوں کو ذریعہ معاش اور روزگار کے مواقع فراہم کرنے کےلئے زراعت کے شعبے میں بہت زیادہ استعداد موجود ہے،نوجوانوں کو روزگار کے مواقع فراہم کرکے انہیں اپنے پاوں پر کھڑا کرنا صوبائی حکومت کی اہم ترجیح ہے،موجودہ صوبائی حکومت اس استعداد کا موثر استعمال یقینی بنانے کےلئے ایک جامع حکمت عملی کے تحت اقدامات کررہی ہے۔
وزیر اعلیٰ نے اپنی گفتگو میں کہا کہ زراعت کے شعبے کی ترقی کےلئے موجودہ صوبائی حکومت 49 مختلف منصوبوں پر کام کر رہی ہے۔زراعت کے شعبے میں لوگوں کو آسان قرضوں کی فراہمی کےلئے نئے بجٹ میں چار ارب روپے رکھے گئے ہیں، صوبے کی فوڈ سکیورٹی کے مسئلے کو حل کرنے کےلئے سی آر بی سی، گومل زام اور ٹانک زام ڈیم جیسے منصوبوں پر کام جاری ہے۔اس کے علاوہ چیک ڈیمز کی تعمیر کےلئے متعدد موزوں مقامات کی نشاندہی کر لی گئی ہے اور ان منصوبوں پر عملدرآمد سے نہ صرف لوگوں کو روزگار کے مواقع ملیں گے بلکہ آبی وسائل کا تحفظ بھی ممکن ہوگا۔ اگلے ایک سال میں صوبائی حکومت اپنی آمدن میں خاطر خواہ اضافہ کرے گی جبکہ آمدن پیدا کرنے والے محکموں کی استعداد کو بڑھانے پر خصوصی توجہ دی جا رہی ہے۔
