وزیر اعلیٰ خیبر پختونخوا علی امین خان گنڈاپور کی جانب سے یتیموں کے عالمی دن کے موقع پر وزیر اعلیٰ ہاوس میں صوبے کے یتیم بچوں کے اعزاز میں افطار ڈنر کا اہتمام
پشاور (چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور کی جانب سے یتیموں کے عالمی دن کے موقع پر وزیر اعلیٰ ہاوس میں صوبے کے یتیم بچوں کے اعزاز میں افطار ڈنر کا اہتمام کیا گیا جس میں مختلف یتیم خانوں میں رہائش پذیر ایک ہزار سے زائد یتیم بچوں اور بچیوں نے شرکت کی۔وزیر اعلیٰ نے یتیم بچوں کے ساتھ افطاری کی اور ان میں عید کے کپڑے اور نقد عیدی تقسیم کی۔صوبائی کابینہ اراکین، محکمہ سماجی بہبود کے حکام، فلاحی تنظیموں کے نمائندوں نے بھی افطار ڈنر میں شرکت کی۔
اس موقع پر ملک کی ترقی و خوشحالی، امن و امان، شہداء کے درجات کی بلندی کے لئے اجتماعی دعا کی گئی۔بچوں نے وزیر اعلیٰ کو اپنے درمیان پا کر خوشی کا اظہار کیا۔ وزیر اعلیٰ نے اس موقع پر گفتگو کرتے ہوئے کہا کہ یتیم بچے حکومت اور ریاست کے بچے ہیں، ان کی کفالت حکومت کی ذمہ داری ہے، معاشرے کے کمزور طبقوں کی کفالت فلاحی ریاست کی خصوصیات میں سے ہے۔ موجودہ صوبائی حکومت عمران خان کے وڑن کے مطابق معاشرے کے کمزور اور نادار طبقوں کی کفالت کا سلسلہ جاری رکھے گی۔
