وزیراعلیٰ خیبرپختونخوا کا بھارتی جارحیت کا موثر جواب دینے پر مسلح افواج کو خراج تحسین، شہدا کےلئے پچاس پچاس لاکھ جبکہ زخمیوں کے لئے دس دس لاکھ دینے کا اعلان
پشاور ( چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے پاکستان کے خلاف بھارتی جارحیت کا موثر جواب دینے پر مسلح افواج کو زبردست خراج تحسین پیش کیا ہے اور کہا ہے کہ بھارت کے خلاف اس شاندار فتح پر مسلح افواج اور پوری قوم مبارکباد کے مستحق ہیں۔ جمعرات کے روز اپنی صدارت میں منعقدہ صوبائی کابینہ کے بتیسویں اجلاس سے خطاب کرتے ہوئے وزیر اعلیٰ نے کہا “ہم بھارتی جارحیت کے نتیجے میں شہید ہونے والے کو بھی سلام پیش کرتے ہیں اوران شہداءکے اہل خانہ کے ساتھ دلی ہمدردی کا اظہارکرتے ہیں” ۔
وزیر اعلیٰ کا کہنا تھا کہ انہوں نے اس جارحیت میں خیبر پختونخوا کے شہید اور زخمی ہونے والوں کے لئے امدادی پیکج کا اعلان کیا ہے جس کے مطابق شہداءکے ورثاءکو 50، 50 لاکھ جبکہ زخمیوں کو 10، 10 لاکھ روپے دیے جائیں گے۔وزیر اعلیٰ نے متعلقہ ممبران اسمبلی کو ہدایت کی کہ وہ مقامی انتظامیہ کے حکام کے ساتھ ان شہداءاور زخمیوں کے گھروں میں جا کر انہیں امدادی پیکج جلد ادا کریں۔ علی امین گنڈاپورنے اس موقع پر کوہستان میں سامنے آنے والی مبینہ مالی بے ضابطگی کے خلاف نیب کی کارروائی کا بھی خیر مقدم کیا اور کہا ہے کہ یہ بات خوش آئند ہے کہ نیب نے اس کیس میں کچھ ریکوریاں بھی کی ہےں۔
علی امین گنڈاپور نے کہا کہ صوبائی حکومت اس سلسلے میں نیب کو بھر پور سپورٹ فراہم کرے گی، نیب کو تحقیقات کے لئے جو بھی ڈاکومنٹس درکار ہونگے، صوبائی حکومت ترجیحی بنیادوں پر فراہم کرے گی۔ انہوں نے کہا کہ اس کیس میں جو بھی لوگ اور ادارے ملوث ہیں ان کے خلاف سخت سے سخت کارروائی ہونی چاہیے۔ وزیر اعلیٰ کا کہنا تھا کہ بانی چیئرمین کے وژن کے مطابق صوبائی حکومت کرپشن کے خلاف زیرو ٹالرنس پالیسی پر عمل پیرا ہے، بدعنوانی کے اس کیس میں ملوث عناصر کے خلاف کسی اور ادارے سے زیادہ سخت کارروائی صوبائی حکومت خود کرے گی۔ وزیر اعلی نے متعلقہ کابینہ اراکین کو بھی ہدایت کی کہ وہ پریس کانفرنس کے ذریعے اس کیس کے حقائق عوام کے سامنے رکھیں۔ اجلاس میں اس کیس کی حکومتی سطح پر تحقیقات کے لئے کابینہ کمیٹی بنانے کا بھی فیصلہ کیا گیا ہے،کمیٹی کی سربراہی وزیر اعلی خود کریں گے جس میں متعلقہ کابینہ اراکین اور ممبران صوبائی اسمبلی شامل ہونگے۔