نگران وزیر اعلیٰ خیبر پختونخوا جسٹس ریٹائرڈ سید ارشد حسین شاہ کی زیرِ صدارت صوبے کے سرکاری و نجی میڈیکل اور ڈینٹل کالجز کی نشستوں میں اضافے سے متعلق اہم اجلاس
پشاور ( چترال ٹائمزرپورٹ ) نگران وزیر اعلیٰ خیبر پختونخوا جسٹس ریٹائرڈ سید ارشد حسین شاہ کی زیرِ صدارت صوبے کے سرکاری و نجی میڈیکل اور ڈینٹل کالجز کی نشستوں میں اضافے سے متعلق ایک اہم اجلاس وزیر اعلیٰ پشاور میں منعقد ہوا۔ وزیر اعلیٰ کے مشیر برائے صحت ڈاکٹر ریاض انور، محکمہ صحت کے اعلی حکام اور صوبے کے سرکاری و نجی میڈیکل کالجز کے حکام نے اجلاس میں شرکت کی۔ اجلاس میں کالجز کی موجودہ استعداد، سیٹوں میں اضافے کی ممکنہ استعداد اور دیگر متعلقہ پہلووں پر تفصیلی تبادلہ خیال کیا گیا۔ اجلاس کو خیبر پختونخوا میں نجی اور سرکاری کالجز اور ان کی استعداد کے حوالے سے بریفنگ دیتے ہوئے بتایا گیا کہ سرکاری و نجی دونوں شعبوں میں مجموعی طور پر 21 میڈیکل کالجز اور گیارہ ڈینٹل کالجز ہیں جن میں سالانہ نشستوں کی کل تعداد 3210 ہے۔
اجلاس کو مزید بتایا گیا کہ صوبے کے میڈیکل اور ڈینٹل کالجوں میں سیٹوں کی محدود تعداد کی وجہ سے ہر سال ہزاروں کوالیفائیڈ اُمیدوار داخلوں سے محروم رہ جاتے ہیں جس کے پیش نظر صوبے کے میڈیکل اور ڈینٹل کالجوں کی موجودہ نشستوں میں خاطر خواہ اضافہ کرنے کی ضرورت ہے۔ اس موقع پر گفتگو کرتے ہوئے نگران وزیر اعلیٰ سید ارشد حسین شاہ نے کہا کہ انہوں نے میڈیکل اور ڈینٹل کالجوں کی نشستوں میں اضافے کا معاملہ پاکستان میڈیکل اینڈ ڈینٹل کونسل کے حکام کے ساتھ اٹھایا ہے اور اور پی ایم ڈی سی نے صوبے کے میڈیکل اور ڈینٹل کالجوں کی استعدادکے مطابق نشستوں میں اضافے سے اصولی اتفاق کرلیا ہے، یہ ایک سنہرا موقع ہے اور ہمیں اس موقع سے بھر پور استفادہ کرنے کی ضرورت ہے لہذا تمام میڈیکل اور ڈینٹل کالجز اس سلسلے میں اپنی اپنی استعداد اور ضروریات کے بارے میں بلاتاخیر صوبائی حکومت کو آگاہ کریں تاکہ صوبائی کابینہ کی منظوری کے بعد معاملہ حتمی منظوری کے لئے پی ایم ڈی سی کو ارسال کیا جاسکے۔
وزیر اعلیٰ نے ہدایت کی کہ سیٹوں میں اضافے کے سلسلے میں حقیقت پسندانہ حکمت عملی اختیار کی جائے تاکہ تعلیمی و تدریسی معیار متاثر نہ ہو۔انہوں نے واضح کیا کہ اس معاملے میں پی ایم ڈی سی کے مروجہ معیارات پر کسی صورت کوئی سمجھوتہ نہیں کیا جائے گا۔ اس موقع پر پرائیویٹ میڈیکل اینڈ ڈینٹل کالجز کی اضافہ شدہ سیٹوں پر داخلوں میں خیبرپختونخوا کے طلباءو طالبات کو ترجیح دینے اور ان سیٹوں کا 20 فیصد حصہ سکالرشپ پر مستحق امیدواروں کے لیے مختص کرنے پر اتفاق کیا گیا۔ نگران وزیر اعلیٰ نے اجلاس کے شرکاءسے خطاب کرتے ہوئے کہا کہ ہمارا حتمی مقصد مختلف شعبوں میں زیادہ سے زیادہ قابل اور ماہر افرادی قوت تیار کرنا ہے جو خوشحال خیبر پختونخوا پروگرام کا ایک اہم جزو ہے۔ اجلاس کے شرکاءنے نشستوں میں اضافہ کے حوالے سے نگران وزیراعلیٰ کی کاوشوں کو سراہتے ہوئے کہا کہ یہ وزیراعلیٰ کی بڑی کامیابی اور صوبے کے عوام کی بہت بڑی خدمت ہے جسے ہمیشہ یاد رکھا جائے گا۔