مولانا عبدالرحیم چترالی کی دینی و ملی خدمات ہمیشہ یاد رکھی جائیں گی، قاری فیض اللہ چترالی

کراچی ( چترال ٹائمزرپورٹ) مولانا عبد الرحیم چترالی کی دینی اور ملی خدمات ہمیشہ یاد رکھی جائیں گی، آپ کی وفات سے پیدا ہونے والا خلا تا دیر قائم رہے گا، ان خیالات کا اظہار چترال کی معروف دینی و سماجی شخصیت قاری فیض اللہ چترالی، قاری حبیب اللہ چترالی، مولانا شفیع چترالی، مولانا ہدایت الرحمن، مفتی معراج حسین، مفتی ولی اللہ و دیگر نے اپنے مشترکہ تعزیتی بیان میں کیا۔

انہوں نے کہا کہ مولانا عبد الرحیم چترالی نے ساری زندگی قرآن و سنت اور دین اسلام کی خدمت میں گزاری۔ مولانا مرحوم ملک کی عظیم دینی درسگاہ جامعہ اشرفیہ لاہور کے بزرگ استاد تھے، آپ کے فیض یافتہ ہزاروں شاگرد آج دنیا بھر میں دینی خدمات انجام دے رہے ہیں۔

مولانا مرحوم چترال کے قدیم دینی و علمی گھرانے سے تعلق رکھتے تھے، وہ چترال کے عظیم داعی اور بزرگ مولانا مستجاب خان کے بھتیجے تھے۔ مولانا عبدالرحیم چترالی مرحوم نے ابتدائی تعلیم اپنے آبائی علاقہ چترال میں اپنے چچا مرحوم کی نگرانی میں حاصل کی، انہوں نے 1974ء میں جامعہ اشرفیہ لاہور سے درس نظامی کی تکمیل کی۔

فراغت کے بعد آپ نے مادر علمی جامعہ اشرفیہ میں تدریس کا آغاز کیا اور تادم آخر تقریباً پچاس برس تک تدریس کی خدمات انجام دیں۔ آپ نے سوگواروں میں دو بیٹے دو بیٹیاں، بیوہ اور ہزارو شاگرد چھوڑے۔

انہوں نے کہا کہ نماز جنازہ کے بعد مولانا مرحوم کو شیر شاہ قبرستان میں اپنے اساتذہ کے پہلو میں سپرد خاک کیا گیا۔

قاری فیض اللہ چترالی و دیگر نے مولانا مرحوم کی خدمات کو خراج عقیدت پیش کرتے ہوئے ان کے اہل خانہ سے دلی تعزیت کا اظہار کیا اور دعا کی اللہ تعالیٰ حضرت کی کامل مغفرت فرمائے اور جنت الفردوس میں اعلیٰ مقام عطا فرمائے، آمین۔