پشاور(عطا الرحمن عدیم) ہنون یکشمبو انوس اپریل مسو 28 تاریخو 2 بجہ ارکائیوز ہال پشاورا انجمن ترقی کھوار حلقہ پشاورو زیر اہتمام انجمن ترقی کھوار حلقہ پشاورو سرپرست اعلی محترم جناب عنایت جلیل عنبر صاحبو کتاب سفرنامہ جانان چینو موخ پاشیکو تقریب منعقد کورونو ہوئے۔
تقریب رونمائیو صدارتو معروف ماہر تعلیم جناب اسماعیل ولی اخگر صاحب کوراوشتائے وا خاص مینؤو حیثیتہ ڈی آئی جی پولیس محترم جناب سید فدا حسن شاہ صاحب تشریف انگیتیستائے ہمی شخصیاتن سر علاوہ ڈاکٹر اسرار احمد صاحب، ڈائریکٹر جنرل ہیومن رائٹس کمیشن کے پی کے جناب راجا فضل خالق صاحب، عمران صاحب و محمد شفیع شفا صاحب دی تشریف انگیتیستانی، محفلو آغاز قاری شمس الدین صاحبو پرسوز ہوازا تلاوت قرآن پاکو سورا ہوئے۔
مشہور کالمنسٹ شریف شکیب، ماہر تعلیم اسماعیل ولی اخگر صاحب، وا شک نویوکو شخصیات کتاب جانان چینو بارا تان تاثراتن اظہارو ارینی وا مقالہ پیش ارینی وا الطاف الرحمن رومی صاحب منظوم مقالہ پیش کوری محفلوتے رونق پرائے۔
پشاورا چھیتراری بازارو سابق صدر جناب صادق امین صاحب دی تشریف انگیتی محفلو زعفران زار اریر وا کتاب جانان چینو مصنف عنایت جلیل عنبر صاحبو وا خاص مینو جناب فدا حسن شاہ صاحبوتے ایگان پھکوڑ تحفہ اریر۔
ڈی ائی جی فدا حسن شاہ صاحب تان تاثراتن اظہارو کوری کتاب جانان چینو نثری ادبہ ای لوٹ اضافہ وا نوقُل قرار دیتی کتابو مصنف جناب عنایت جلیل عنبر صاحبوتے بمبارکی پرائے وا ہموش قسمو کورمان کوریکو سورا زور دیتی تان تعاونو یقین دہانیو دی اریر۔
ہیہ قسمہ جناب اسماعیل ولی اخگر صاحب تان شھیلی تاثراتن وا دعائیہ کلماتن سورا محفلو اختتامو اریر۔
