روز چترال  کی طرف سے چترال کے سرحدی علاقہ ارندو گول سے تعلق رکھنے والے ایک ہونہار طالب علم کو سکالرشپ کا چیک دیا گیا

چترال ( چترال ٹائمزرپورٹ ) آج “روز چترال” کے آفس میں منعقدہ ایک تقریب میں چترال کے ایک دور افتادہ اور پسماندہ سرحدی علاقے ارندو گول سے تعلق رکھنے والے ایک ہونہار طالب علم ذاکر اللہ کو پچاس ہزار روپے اسکالر شپ کا چیک دیا گیا اس طالب نے دوران تعلیم محنت مزدوری کرکے اپنے تعلیمی اخراجات پورے کئے اور بالآخر یونیورسٹی آف انجنیئرنگ اینڈ ٹیکنالوجی پشاور میں داخلہ لینے میں کامیابی حاصل کی جو کہ اس نیم قبائلی اور تعلیمی اعتبار سے نہایت پسماندہ علاقے سے پہلے طالب علم ہیں جنہوں نے انجنیئرنگ میں داخلہ لیا ہے۔

اس تقریب کے مہمان خصوصی سجاد علی سنگال سی۔ای۔او مارخور سیڈز تھے جب کہ مہمان اعزاز “روز چترال” کے اسکالر اور پی۔ایم۔ایس آفیسر ڈاکٹر محمد فاروق تھے۔ اس موقع پر مارخور سیڈز کے ڈائریکٹر آفتاب آ حمد بھی موجود تھے۔ مہمانوں نے اعلی تعلیم کے شعبے میں “روز چترال” کے کردار کی تعریف کی اور مستقبل میں “روز” کے ساتھ ملکر چترال کے مستحق طلبہ کی مدد کا وعدہ کیا ۔

اس موقع پر اپنے خیالات کا اظہار کرتے ہوئے چیرمین ROSE, Chitral ہدایت اللہ نے کہا کہ ادارہ ذاکر اللہ جیسے پسماندہ اور دور افتادہ علاقوں کےطلبہ کی سرپرستی کرتے ہوئے اب تک سینکڑوں طلبہ کے مستقبل کو محفوظ بنانے میں اپنا کردار باوجود شدید مشکلات کے ادا کر تا آرہا ہے ۔کیونکہ ارندو جیسے دور دراز اور پسماندہ علاقے کے نوجوانوں کے مستقبل کو سنوارنے کے لئے اعلی تعلیم کا حصول ہی واحد ذریعہ ہے۔ اپنے وسائل کو اللہ تعالیٰ کے بندوں میں تقسیم کرنے سے روح کی نشونما ہوتی ہے اسی لئے تمام مخیر خواتین و حضرات سے اپیل ہے کہ وہ اپنے وسائل میں معاشرے کے مستحق افراد کو شریک کرے تاکہ روحانی آسودگی حاصل کرسکے۔