رمضان المبارک کے دوران محمد طلحہ محمود فاونڈیشن کے زیر اہتمام لویر اور اپر چترال کے درجنوں مقامات پر نادار افراد کے لئے افطار پارٹی کا اہتمام جاری

چترال (نمائندہ چترال ٹائمز) رمضان المبارک کے دوران محمد طلحہ محمود فاونڈیشن کے زیر اہتمام لویر چترال اور اپر چترال کے درجنوں مقامات پر نادار افراد کے لئے افطار پارٹی کا اہتمام جاری ہے جن سے مجموعی طور پر روزانہ کی بنیاد پر ہزاروں افراد مستفید ہورہے ہیں۔ افطار دسترخوان کا اہتمام کئی تعلیمی اداروں کے ہاسٹلوں میں رہائش پذیر اسٹوڈنٹس میں بھی کی جارہی ہے جبکہ ہسپتالوں میں داخل مریضوں اور ان کے تیمارداروں کے لئے بھی یہ سہولت فراہم کی جارہی ہے۔ چترال شہر میں افطار دسترخوان کا سب سے بڑا مرکز اتالیق پل میں رمضان کے شروع سے جاری ہے جہاں دن کے وقت محنت مزدوری کرنے والے غیر مقامی محنت کش بھی شامل ہوتے ہیں۔ محمد طلحہ محمود فاونڈیشن کے ریجنل کوارنیٹر مبشر نے میڈیا کو بتایاکہ افطار دستر خوان کا یہ سلسلہ چاند رات تک جاری رہے گا۔