خیبرپختونخوا کابینہ کا اجلاس، بھارتی جارحیت کی شدید الفاظ میں مذمت، سیکورٹی فورسز کو ہرقسم کے تعاون کی یقین دہانی
پشاور ( نمائندہ چترال ٹائمز ) وزیر اعلیٰ خیبرپختونخوا علی امین خان گنڈاپور کے زیر صدارت صوبائی کابینہ کا ہنگامی اجلاس بدھ کے روز وزیر اعلیٰ سیکرٹریٹ پشاور میں منعقد ہوا جس میں پاکستان کے خلاف بھارت کی جارحیت پر سخت ردعمل کا اظہار کیا گیا ہے اور جارحانہ اقدام کی شدید الفاظ میں مذمت کی گئی ہے۔ اسپیکر صوبائی اسمبلی بابر سلیم سواتی، صوبائی اسمبلی میں اپوزیشن لیڈر عباد اللہ خان، صوبائی کابینہ اراکین، چیف سیکرٹری، آئی جی پی، ایڈیشنل چیف سیکرٹری اور انتظامی سیکرٹریز نے اجلاس میں شرکت کی۔
اجلاس میں بھارتی جارحیت کے نتیجے میں شہید ہونے والوں کے درجات کی بلندی، زخمیوں کی جلد صحت یابی اور ملکی سلامتی کےلئے دعائیں کی گئیں اور ملکی دفاع کےلئے ہر قسم کی قربانی دینے کے عزم کا اظہار کیا گیا جبکہ بھارتی جارحیت کا منہ توڑ جواب دینے کےلئے سکیورٹی فورسز کو ہر قسم کے تعاون کی یقین دہانی کرائی گئی۔
کابینہ کو پاک بھارت کشیدگی کی صورتحال اور کسی بھی ہنگامی صورتحال سے نمٹنے کے لئے صوبائی حکومت کی تیاری اور احتیاطی تدابیر پر بریفنگ بھی دی گئی۔ صوبائی کابینہ نے بھارت کی طرف سے جارحیت کو قابل مذمت اور افسوسناک قرار دیتے ہوئے کہا کہ بھارت کی طرف سے رات کی تاریکی میں شہری آبادی کو نشانہ بنانا انتہائی شرمناک اور بزدلانہ اقدام ہے ، بھارت کا یہ اقدام بین الاقوامی قوانین کی سنگین خلاف ورزی ہے اور عالمی برادری اس کا نوٹس لے۔
اجلاس میں اظہار خیال کرتے ہوئے وزیر اعلیٰ علی امین گنڈاپور نے کہا”ہم یہاں سے بھارت کو پیغام دینا چاہتے ہیں کہ ہم ملک کی دفاع کےلئے ہر وقت تیار ہیں، ہمارا ایمان ہے کہ غزوہ ہند ہوگا اور اس میں فتح مسلمانوں کی ہوگی اور ہماری خوش قسمتی ہوگی اگر ہم غزوہ ہند کا حصہ بنیں۔” علی امین گنڈاپور نے کہا کہ بحیثیت مسلمان ہمارے لئے سب سے بڑا رتبہ شہادت ہے اور ہم شہادت کےلئے ہر وقت تیار ہیں۔ انہوں نے کہا کہ ہم بھارتی جارحیت کا نشانہ بننے والے کشمیر اور پنجاب کے عوام کے ساتھ کھڑے ہیں اور انہیں ہر ممکن تعاون کا یقین دلاتے ہیں، ملکی دفاع کےلئے ہم سب متحد ہیں، 25 کروڑ عوام ملک کی فوج ہے۔
وزیر اعلیٰ کا کہنا تھا کہ مودی کی جارحانہ پالیسی نہ صرف علاقائی امن بلکہ اس کے اپنے ہی لوگوں اور ملک کو خطرے میں ڈال رہی ہے، پاکستان اپنے تحفظ کے لئے بھر پور جواب دینے کا حق رکھتا ہے اور ہماری سکیورٹی فورسز بھارتی جارحیت کا بھر پور جواب دے رہی ہیں۔ علی امین گنڈاپور نے بھارتی جارحیت کا بھر پور اور بروقت جواب دینے پر سکیورٹی فورسز کو خراج تحسین پیش کرتے ہوئے کہا کہ خیبر پختونخوا کے عوام اور حکومت سکیورٹی فورسز کے ساتھ بھر پور یکجہتی کا اظہار کرتے ہیں۔
وزیر اعلیٰ کا کہنا تھا کہ بھارتی فاشسٹ حکومت کا جارحانہ رویہ خطے کے امن کےلئے مستقل خطرہ ہے،بھارت ہماری امن کی خواہش کو کمزوری نہ سمجھے، ہم اینٹ کا جواب پتھر سے دیں گے۔ انہوں نے واضح کیا کہ خیبر پختونخوا کے عوام ملک کی دفاع کےلئے کسی بھی قربانی سے دریغ نہیں کریں گے، وطن کی مٹی کے دفاع کےلئے ہماری جانیں حاضر ہیں۔ علی امین گنڈاپور نے مزید کہا کہ ملک کو اس وقت ایک اہم قومی مسئلے کا سامنا ہے اور ملکی سلامتی کے اس معاملے پر قومی اتحاد و اتفاق کی ضرورت ہے اس لئے ضروری ہے کہ ملک کے بڑے سیاسی پارٹی کے مقبول لیڈر عمران خان کو اس حساس اور اہم معاملے پر مشاورت میں شامل کیا جائے۔ انہوں نے واضح کیا کہ ہمارے لئے سب سے پہلے پاکستان ہے اور ہم اس کے دفاع کےلئے کسی قربانی سے دریغ نہیں کریں گے۔
