بھارتی جارحیت کے خلاف قوم متحد، چترال لوئیر اور اپر میں پاک فوج کے ساتھ اظہاریکجہتی ریلی، پاک فوج کے شانہ بشانہ ہرقسم کی قربانی کیلئے پرعزم
چترال(نمائندہ چترال ٹائمز )بھارت کی بزدلانہ جارحیت کے خلاف چترال لوئر اور اپر میں احتجاجی ریلی نکالی گئی۔ ریلی میں اسسٹنٹ کمشنر محمد افتاب منیر , انتظامی افسران , چترال لیویز / پولیس کے جوان ,طلباء اور عوام کی کثیر تعداد نے شرکت کی۔
شرکاء نے ملک سے اظہارِ یکجہتی کرتے ہوئے گزشتہ رات بھارت کی طرف سے بزدلانہ جارحیت کی شدید مذمت کی اور اس عزم کا اعادہ کیا کہ وطنِ عزیز کے دفاع کے لیے ہر ممکن قدم اٹھائیں گے۔ ریلی کے دوران پاکستان زندہ باد اور پاک فوج کے حق میں نعرے بھی لگائے گئے۔
دریں اثنا مختلف مکاتب فکر نے آتالیق پل پر پاک فوج سے یکجہتی اور بھارت کی جارحیت کے خلاف زبردست احتجاجی مظاہرہ کیا، جس کی صدارت معروف سیاسی و دینی شخصیت مولانا اسرار الدین الہلال نے کی، مختلف پارٹیوں کے سربراہوں نے بھی خطاب کیا، عید الحسین، نورآحمد چارویلو ودیگر خطاب کرتے ہوئے بھارتی جارحیت کی شدید الفاظ میں مذمت کی ، انھوں نے کہاکہ بزدل دشمن نے رات کی تاریکی سے فائدہ اُٹھاکر سیولین کو اپنا نشانہ بنایا ،جبکہ مساجد اور بچوں کو شہید کیا،
انھوں نے اس عزم کا اظہار کیا کہ چترال کے عوام پاک فوج کے شانہ بشانہ کھڑی ہے ، جو ملک کی سلامتی کے لئے کسی بھی قربانی سے بھی دریغ نہیں کرینگے۔ جلسہ اور ریلی پاک فوج زندہ باد کے واشگاف الفاظ کے ساتھ پر آمن اختتام پذیر ہوئی۔
دریں اثنا اپر چترال کے ہیڈ کوارٹر بونی میں بھی پاک فوج کے ساتھ یکجہتی اور بھارت کی جارحیت کے خلاف ایک زبردست احتجاجی ریلی نکالی گئی۔ اس ریلی کا اہتمام ڈسٹرکٹ انتظامیہ اپر چترال کی جانب سے کیا گیا تھا، جس میں مختلف شعبہ ہائے زندگی سے تعلق رکھنے والے افراد نے بھرپور شرکت کی۔
ریلی کے دوران فضاء “پاک فوج زندہ باد”، “ہمیں اپنی فوج پر فخر ہے”، “بھارت کی جارحیت نامنظور” جیسے نعروں سے گونجتی رہی۔ شرکاء کا کہنا تھا کہ وہ ہر محاذ پر پاک فوج کے شانہ بشانہ کھڑے ہیں اور ملکی سلامتی و خودمختاری پر کوئی سمجھوتہ نہیں کیا جائے گا۔
اس موقع پر مختلف مقررین نے خطاب کرتے ہوئے کہا کہ بھارتی جارحیت صرف سرحدوں پر نہیں بلکہ خطے کے امن پر حملہ ہے، اور پاکستانی قوم اپنی فوج کے ساتھ ہے۔ انہوں نے کہا کہ اپر چترال کے عوام وطن سے محبت میں کسی سے پیچھے نہیں اور ملکی دفاع کے لیے ہر قسم کی قربانی دینے کو تیار ہیں۔
