اگلے انتخابات میں نوجوانوں کا اہم کردار، 45 فیصد ووٹرز 35 سال سے کم عمر
اگلے انتخابات میں نوجوانوں کا اہم کردار، 45 فیصد ووٹرز 35 سال سے کم عمر
اسلام آباد(چترال ٹایمز رپورٹ ) آئندہ عام انتخابات کی تیاریاں جاری ہیں اور الیکشن کمیشن نے ووٹرز کی تعداد اور عمر کے مطابق اہم تفصیلات جاری کردیں۔آئندہ عام انتخابات میں نوجوان ووٹرز کا کلیدی کردار ہوگا۔ عام انتخابات کیلیے اہل 45 فیصد سے زائد ووٹرز 35 سال سے کم عمر کے ہیں۔الیکشن کمیشن کے مطابق ملک میں رجسٹرڈ ووٹرز کی تعداد 12 کروڑ 60 لاکھ 66 ہزار سے زائد ہوگئی، جن میں سے مرد ووٹرز کی تعداد 6 کروڑ 80لاکھ،خواتین ووٹرز کی تعداد5 کروڑ 79 لاکھ ہوگئی۔اس بار اٹھارہ سے 35 سال کے 5 کروڑ 61 لاکھ ووٹرز حق رائے دہی استعمال کرینگے۔ 36 سے 45 سال کے ووٹرز کی تعداد 2 کروڑ 77 لاکھ، 46 سے 55 سال کے 1 کروڑ 81 لاکھ، 56 سے 65 سال کے 1 کروڑ 18 لاکھ جبکہ 66 سال سے اوپر کے 1 کروڑ 20 لاکھ ووٹرز ہیں۔اسلام آباد میں ووٹرز کی تعداد 10 لاکھ 35 ہزار 387، پنجاب 7 کروڑ 16 لاکھ6 ہزار 378، سندھ 2 کروڑ 65 لاکھ 29 ہزار 136، خیبر پختونخوا 2 کروڑ 16 لاکھ 21 ہزار 211 اور بلوچستان میں ووٹرز کی تعداد 52 لاکھ 74 ہزار 761 ہے۔اسلام آباد میں مرد ووٹرز کی شرح 52.51 فیصد اور خواتین کی 47.49 فیصد، پنجاب میں مرد 53.64 اور خواتین 46.35 فیصد، سندھ میں مرد 54.23 اور خواتین کی شرح 45.77فیصد ہے۔خیبر پختونخوا میں مرد ووٹرز کی شرح 54.56، خواتین کی 45.44 فیصد، بلوچستان میں مرد ووٹرز کی شرح 56.17 اور خواتین کی 43.83 فیصد ہیواضح رہے کہ گزشتہ عام انتخابات میں ووٹرز کی تعداد 10 کروڑ 59 لاکھ تھی۔ اس بار عام انتخابات میں 2 کروڑ نئے ووٹرز حق رائے دہی استعمال کرینگے۔
پرویز الٰہی تھری ایم پی او کے تحت ایک ماہ کیلیے نظربند
لاہور(سی ایم لنکس)پنجاب حکومت نے تھری ایم پی او کے تحت پرویز الٰہی کو ایک ماہ کیلیے نظربند کرتے ہوئے ان کی حفاظتی ضمانت کے فیصلے کے خلاف اپیل بھی دائر کردی۔سابق وزیراعلیٰ پنجاب اور پی ٹی آئی کے صدر پرویز الٰہی کی حفاظتی ضمانت دینے کے سنگل بینچ کے فیصلے کے خلاف پنجاب حکومت کی اپیل میں پرویز الٰہی، اینٹی کرپشن سمیت دیگر کو فریق بنایا گیا ہے۔درخواست میں مؤقف اختیار کیا گیا ہے کہ سنگل بینچ نے چوہدری پرویز الٰہی کی درخواست پر حقائق کے منافی فیصلہ دیا۔ متعلقہ تحقیقات کرنے والے ادارے قانون کے مطابق پرویز الٰہی سے تفتیش کررہے ہیں۔ فیصلے میں سنگل بینچ نے قانونی تقاضوں کو نظر انداز کیا ہے۔لاہور ہائی کورٹ سے استدعا کی گئی ہے کہ عدالت سنگل بینچ کا فیصلہ کالعدم قرار دیتے ہوئے فیصلے کو فوری معطل کرنے کا حکم دے۔علاوہ ازیں لاہور ہائیکورٹ میں 30 روزہ نظر بندی کے خلاف پرویز الہی کی درخواست پر سماعت ہوئی۔وکیل نے کہا کہ پرویز الہی کے خلاف جتنے بھی مقدمات تھے سب میں ضمانت ہوچکی ہے، بدنیتی کے بنیاد پر پرویز الہی کے نظر بندی کے احکامات جاری کردیے گئے، ہم نے رہائی کیلیے ڈپٹی کمشنر کو درخواست دی ہے۔جسٹس علی باقر نجفی نے پنجاب حکومت کے وکیل سے کہا کہ آپ اچھا نہیں کر رہے، غلط روایت ڈال رہے ہیں، جو ریاست کرتی ہے وہ بھگتی بھی ہے، نظر بند رکھنے کیلیے آپ کے پاس شواہد بھی ہونے چاہئیں۔عدالت نے پرویز الہی کے وکیل سے کہا کہ ہم پنجاب حکومت کو کہہ دیتے ہیں وہ آپکی درخواست کو سن کر فیصلہ کردیں۔پرویز الٰہی کے وکیل نے نظر بندی کے خلاف درخواست واپس لے لی تو جسٹس علی باقر نجفی نے درخواست واپس لینے کی بنیاد پر نمٹا دی۔