افغانستان میں چھوڑا گیا اسلحہ افغان دہشت گردوں کے ہاتھ لگ چکا ہے، ترجمان دفتر خارجہ
افغانستان میں چھوڑا گیا اسلحہ افغان دہشت گردوں کے ہاتھ لگ چکا ہے، ترجمان دفتر خارجہ
اسلام آباد( چترال ٹایمزرپورٹ )دفتر خارجہ کی ترجمان ممتاز زہرہ بلوچ نے کہا ہے کہ پاک افغان بارڈر پر حالیہ واقعہ سے متعلق عبوری افغان حکومت کو اپنے تحفظات سے آگاہ کیا ہے۔ہفتہ وار میڈیا بریفنگ میں انہوں نے بتایا کہ نگراں وزیر خارجہ جلیل عباس جیلانی 12 سے 15 ستمبر کو لندن میں کامن ویلتھ یوتھ وزارتی کانفرنس کی صدارت کریں گے اور کامن ویلتھ کانفرنس میں شریک مختلف ممالک کے رہنماؤں سے ملاقاتیں کریں گے۔انہوں نے کہا کہ بھارت کے غیرقانونی زیرقبضہ جموں کشمیر میں انسانی حقوق کی خلاف ورزیوں کا سلسلہ جاری ہے۔ انسانی حقوق کی بین الاقوامی تنظیموں نے جی 20 ممالک کی توجہ مقبوضہ کشمیر میں جاری انسانی حقوق کی خلاف ورزیوں کی جانب مبذول کرائی ہے۔ انسانی حقوق کی بین الاقوامی تنظیموں نے جی 20 ممالک کو خط لکھ کر آگاہ کیا ہے۔ خطے میں بھارت کے غیرقانونی زیرقبضہ جموں کشمیر میں آزادی اظہار رائے پر پابندیوں کے حوالے سے بھی آگاہ کیا گیا ہے۔ترجمان دفتر خارجہ کے مطابق پاکستان کے سکیورٹی ادارے ملک سے دہشت گردی کے خاتمے کے لیے پرعزم ہیں۔ انہوں نے کہا کہ پاک افغان بارڈر پر حالیہ واقعے سے متعلق عبوری افغان حکومت کو اپنے تحفظات سے آگاہ کیا ہے۔ممتاز زہرہ بلوچ کا مزید کہنا تھا کہ افغان سرزمین سے دہشت گرد حملوں کا معاملہ افغان حکام کے ساتھ اٹھایا ہے۔ افغانستان میں چھوڑا جانے والا اسلحہ افغان دہشت گرد گروہوں کے ہاتھ لگ گیا ہے۔ہم کسی کو بھی مؤرد الزام نہیں ٹھیراتے۔ افغانستان میں چھوڑا جانے والا اسلحہ عالمی توجہ کا متقاضی ہے۔انہوں نے کہا کہ پاکستان کی اقتصادی صورتحال پر تبصرہ نہیں کر سکتے۔ پاکستان اور روس کے اہم تعلقات ہیں۔ پاکستان اور روس کے مابین وفود کا تبادلہ ہو رہا ہے۔ پاکستان اور روس کے مابین توانائی کے حوالے سے تعاون جاری ہے۔ نگران وزیر خارجہ کے دورہ برطانیہ کے حوالے سے معاملات کو حتمی شکل دے رہے ہیں۔ترجمان کا کہنا تھا کہ بھارتی قیادت اپنے اندرونی سیاسی معاملات کے زیر اثر ہے۔ بھارتی قیادت بھارتی عوام کو درپیش چیلنجز پر توجہ مرکوز کرے۔ بھارتی قیادت پاکستان پر غیر ضروری بیانات کا سلسلہ ختم کرے۔
سانحہ 9 مئی، پی ٹی آئی رہنماؤں کی جائیدادیں ضبط کرنے کیلیے اثاثوں کی تفصیلات طلب
لاہور(سی ایم لنکس) پولیس نے سانحہ 9 مئی کو جلاؤ گھیراؤ، توڑ پھوڑ اور پْرتشدد کارروائیوں میں اشتہاری قرار دیئے جانے والے پی ٹی آئی رہنماؤں کی جائیدادیں ضبط کرنے کے لیے متعلقہ اداروں سے اثاثوں کی تفصیلات طلب کرلیں۔ ڈی آئی جی انویسٹی گیشن کی جانب سے کمشنر لاہور، گورنر اسٹیٹ بینک اور چیئرمین ایف بی آر کو خط ارسال کیا گیا ہے جس میں متعلقہ حکام سے پی ٹی آئی رہنماؤں کی تمام تر جائیدادوں کی تفصیلات مانگی گئی ہیں جب کہ پی ٹی آئی کے 22 رہنماؤں کی جائیداد قرق کرنے کی عدالت سے اجازت حاصل کی گئی ہے۔خط کے متن میں کہا گیا ہے کہ پی ٹی آئی کے اشتہاری رہنماؤں کی حالیہ خریدی اور قابض جائیدادوں کی تفصیلات دی جائیں، سی آر پی سی سیکشن 87 کے تحت اشتہاری ملزمان کی جائیداد قرق اور اکاؤنٹ سیل کرنے کی کارروائی کا آغاز کیا جائے گا۔پولیس ذرائع کے مطابق ان رہنماؤں کے ناموں میں چیئرمین پی ٹی آئی کی بہن حلیمہ خان، عظمی خان، میاں اسلم اقبال، حماد اظہر، فرخ حبیب، زبیر نیازی، امتیاز شیخ، حافظ فرحت،عندلیب عباس، احمد خان نیازی، خالد گجر، کرامت علی کھوکھر سمیت دیگر شامل ہیں۔تمام ملزمان کو 9 مئی کے واقعے میں ملوث پائے جانے پر تفتیشی ٹیم کی جانب سے اشتہاری قرار دیا گیا۔