اشکومن، فلنگ اسٹیشن میں آتشزدگی، علاقے کو بڑی تباہی سے بچایا گیا

اشکومن(کریم رانجھا) ؔ گاڑی میں تیل ڈالنے کے دوران فلنگ اسٹیشن کے فلنگ ایریا میں آگ بھڑک اٹھی،موقع پر موجود افراد نے بہادری کا مظاہرہ کرتے ہوئے آگ کو پھیلنے سے روک دیا،گاہکوچ سے فائر بریگیڈ کی گاڑی طلب ،کوئی جانی نقصان نہیں ہوا،پمپ میں آگ بجھانے والے آلات نہ ہونے کا انکشاف۔چٹورکھنڈ تحصیل آفس سے متصل طاہر فلنگ سٹیشن میں ہفتے کی صبح 7:30بجے آلٹو کار میں تیل بھرنے کے دوران شارٹ سرکٹ کے باعث آگ بھڑک اٹھی اس دوران موقع پر موجود افراد نے ہمت کا مظاہرہ کرتے ہوئے پانی کی مدد سے آگ کوپھیلنے سے روک دیا تاہم فلنگ مشین جل کر خاکستر ہوگیا،پولیس تھانہ چٹورکھنڈ کو اطلاع ملنے پر ایس ایچ او چٹورکھنڈ برکت اللہ نفری کے ہمراہ موقع پر پہنچے اور گاہکوچ سے فائر بریگیڈ کی گاڑی بھی طلب کرلی تاہم گاڑی کے پہنچنے سے قبل آگ پر قابو پایا جاچکا تھا۔آگ لگنے کی وجہ سے پمپ کا ملازم معمولی زخمی ہوا ۔آگ کے ٹینکی تک پہنچنے کی صورت میں بڑی تباہی کا خدشہ تھا۔پمپ کے ساتھ ہی تحصیل کی عمارت موجود ہے اور ستم ظریفی کی بات یہ ہے کہ آگ بجھانے کے لئے ضروری سامان Fire Extinguisherپمپ میں موجود نہیں تھا ،حادثے کے بعد ایک نجی سکول سے آلہ منگوایا گیا۔