آئی ایم ایف کا غربت کے خاتمے کے پروگرامز میں توسیع کا مطالبہ۔حج پروازیں شروع، 4,398 عازمین حج قومی ایئرلائن کے زریعے حجاز مقدس پہنچ گئے
آئی ایم ایف کا غربت کے خاتمے کے پروگرامز میں توسیع کا مطالبہ۔حج پروازیں شروع، 4,398 عازمین حج قومی ایئرلائن کے زریعے حجاز مقدس پہنچ گئے
اسلام آباد( چترال ٹائمزرپورٹ)عالمی مالیاتی فنڈ (آئی ایم ایف) نے غربت کے خاتمے کے پروگرامز میں توسیع کا مطالبہ کردیا۔پاکستان اور آئی ایم ایف جائزہ مشن کے درمیان نئے قرض پروگرام کیلئے آج چوتھے روز بھی مذاکرات ہوئے۔ آئی ایم ایف نے غربت کے خاتمے اور سماجی تحفظ کے پروگرامز کو مزید توسیع دینے کا مطالبہ کیا۔ذرائع کے مطابق آئی ایم ایف نے بینظیر انکم سپورٹ پروگرام(بی آئی ایس پی) کی کوریج میں اضافے اور شفافیت یقینی بنانے اور انتظامی استعداد کار میں بہتری لانے پر زور دیتے ہوئے کہا کہ جتنا ممکن ہوسکے کیش ٹرانسفر پروگراموں کے بجٹ میں اضافہ کیا جائے۔حکام نے آئی ایم ایف مشن کو بریفنگ میں بتایا کہ رواں سال بی آئی ایس پی پر 472 ارب روپے خرچ کیے جائیں گے۔ بی آئی ایس پی مستحقیقن کو مستقبل میں بجلی ٹیرف پر کیش ٹرانسفر پروگرام کے ذریعے تحفظ دیا جائیگا۔ ستمبر 2024 تک 2 کروڑ گھرانوں کو مکمل طور پر فعال متحرک رجسٹری میں شامل کرنے کا ہدف ہے۔حکام کا مزید کہنا تھا کہ بہ آئی ایس پی سے فائدہ اٹھانے والوں کی تعداد 93 لاکھ تک پہنچ گئی ہے۔ رواں سال کفالت پروگرام میں مزید 3 لاکھ خاندانوں کو شامل کیا گیا ہے۔ ہیلتھ کیش ٹرانسفر پروگرام میں 9 لاکھ خاندانوں کو رجسٹرڈ کیا گیا ہے۔ ایجوکیشن کیش ٹرانسفر پروگرام پروگرام میں 19 لاکھ بچوں کو شامل کیا گیا ہے۔ اگلے مالی سال سماجی تحفظ کے پروگرامز کے لیے مزید فنڈز مختص کیے جائیں گے۔
قومی ایئرلائن پی آئی اے نے کل 20 پروازوں کے ذریعے 4,398 عازمین حج کو حجاز مقدس پہنچایا، ترجمان پی آئی اے
اسلام آباد(سیم ایم لنکس) قومی ایئرلائن (پی آئی اے) نے قبل از حج آپریشن کے تحت گزشتہ 7 روز کے دوران کل 20 پروازوں کے ذریعے 4,398 عازمین حج کو حجاز مقدس پہنچایا۔ پی آئی اے کے ترجمان عبداللہ حفیظ خان کی طرف سے جمعرات کو جاری بیان کے مطابق ان پروازوں میں 14 پروازیں براہ راست مدینہ منورہ کے لئے روانہ ہوئیں جبکہ 6 پروازیں براستہ کراچی اپنی منزل مقصود پر اتری ہیں۔ترجمان نے کہا کہ پی آئی اے کی حج پروازیں 23 مئی تک مدینہ منورہ کے لئے آپریٹ ہو رہی ہیں۔ ترجمان نے کہا کہ 24 مئی سے 10 جون تک جدہ کے لئے حج پروازیں چلائی جائیں گی۔ ترجمان نے کہا کہ پی آئی اے کا قبل از حج آپریشن 190 پروازوں پر مشتمل ہوگا جن میں 170 پروازیں براہ راست اور 20 پروازیں براستہ کراچی آپریٹ ہوں گی۔ براستہ کراچی پروازوں میں 15 پروازیں کوئٹہ سے اور 5 پروازیں سکھر سے چلائی جائیں گی۔