آغا خان ہایئر سیکنڈری سکول کوراغ میں “تمباکو نوشی سے اجتناب” کا عالمی دن کے حوالے سے تقریب

چترال (چترال ٹائمزرپورٹ ) 31 مئی دنیا بھر میں تمباکو نوشی سے اجتناب کا عالمی دن کے طور پر منایا جارہا ہے ۔ اسی سلسلے میں ایک اہم تقریب آغاخان ہائیر سیکنڈری سکول کوراغ کے آڈیٹوریم ہال میں منعقد کی گئی ۔ اس تقریب میں کوراغ اور چرون کے عمائدین اور مذہبی حلقوں کو شرکت کی دعوت دی گئی تھی جو کہ کافی تعداد میں لوگوں نے شرکت کیں اس تقریب کی صدارت پرنسپل سلطانہ برہان الدین نے کی ۔ تقریب میں تمباکو نوشی اور نسوار خوری کے نقصانات اور تباہ کاریوں سے متعلق طالبات اپنی تحقیقی اور تخلیقی کاوشوں سے محفل کی رونق میں رنگ بھر دیئے ۔

اس تقریب سے خطاب کرتے ہوئے سلطانہ برہان الدین نے معاشرے میں نسوار خوری اور تمباکو نوشی کی بڑھتی ہوئی رجحانات پر سیر حاصل گفتگو کی اور علاقے کے عمائدین اور مذہبی حلقوں پر زور دیتے ہوئے کہا کہ ان مضر صحت اور تباہ کن عناصر کی بیخ کنی اور انسداد کے لئے کمیونٹی اور مذہبی حلقوں کو مثبت قدم اٹھانے کی ضرورت ہے ۔ انھوں نے ماحولیاتی آلودگی پر تبصرہ کرتے ہوئے کہا کہ ماحولیاتی آلودگی پھیلانے والوں کے خلاف سوسائٹی کے لوگوں کو خود کھڑا ہونا ضروری ہے ورنہ باہر کے مفاد پرست عناصر ہمارے اس صحت بخش قدرتی ماحول کو تباہ و برباد کر کے رکھ دیں گے ۔
تقریب کے آخر میں کمیونٹی کو صحت مند ماحول کے حوالے آگاہی دینے پر علاقے کے عمائدین نے پرنسپل سلطانہ برہان الدین اور سکول انتظامیہ کا شکریہ ادا کیا ۔

رفیق علی قتل کیس ۔
تحریر ؛ شہزاد الحسن
چترال اپنی آمن اور پُرسکون ماحول کی وجہ سے پورے دنیا میں اہمیت کا حامل تھا ۔خاص کر کہ اپر چترال انتہائی پُرامن اور پُرسکون علاقہ تھا ۔دوسرے جگون کے باسی بھی چترال کی پرامن ماحول کے لیے دل میں ارمان رکھتے تھے۔کچھ مہینے پہلے طلب علم رفیق علی آف ریشن راغیں کی موت نے پورے علاقے میں خوف اور دشمنی کو اُجاگر کردیا۔رفیق علی انتہائی طبع دار اور قابل طالب علم تھا جو سکاس یونیورسٹی پشاور میں انجنیرنگ کی ڈگری حاصل کررہا تھا۔
رفیق علی کچھ مہینے پہلے اپنے گھر سے رات کے کھانے کے بعد زندہ سلامت باہر نکلا تھا اور صبح سویرے رفیق علی کی لاش کڑوم شغور بمقام ریشن برآمد ہوئی۔
ابتدائی تفتیش کے بعد قتل نے اپنے جرم کا اعتراف کیا اور ابھی جیل میں موجود ہے۔
یہاں سوال یہ بنتا ہے کہ کیا کوئی ایک بندہ باآسانی سے ایک مظبوط نوجوان کو باآسانی موت کے گھاٹ اتار سکتا ہے؟
کیا کوئی ایک بندہ رات کی تاریکی میں بیبان جگہ میں جا کر با آسانی کسی کو قتل کرسکتا ہے؟
ظاہر سی بات ہے کہ رفیق علی کے قاتل نے اکیلے خود قتل نہیں کیا بلکہ کوئی اور گروہ بھی قاتل کے ساتھ شامل ہیں اور قاتل کے شانہ با شانہ اس کی مدد کی اس قتل میں برابر کے شریک ہیں ۔
سوال یہ ہے کہ رافیق علی کا تعلق ماژے قوم سے تھا جبکہ قاقل کا بٹیکے قوم سے یہ دو الگ قوم ہیں اور نا ان کا کوئی زمیں کی دشمنی ہے اور نا کسی قومی اعتبار سے کوئی جھگڑا تھا۔
میرے خیال سے یہاں کوئی اور تیسرا فریق موجود ہے کہ جس نے قاتل کو اپنے مفاد کے لیے استعمال کیا اور خود کو پیچھے دھکیل دیا اور اس طرح سے ایک تیر سے دو شکار کیے ۔
ہم ایک جمہوری ملک میں رہ رہے ہیں لیکن افسوس یہاں جنگل کا قانون چل رہا ہے ۔
کیون پولیس خاموش تماشائی بنی ہوئی ہے؟
کیوں سیاسی دباؤ ڈالی جارہی ہے ؟
کیوں اس تیسرے فریق کو سامنے نہیں لایا جارہا ہے؟
اگر پولیس اس طرح خاموش تماشائی بنی رہی گی تو چاروں طرف سے خون بہہ سکتے ہیں یہ دشمنی خاندانی دشمنی کی شکل اختیار کر سکتا ہے۔
میں ایک بار پھر اپر چترال کے پولیس سے گزارش کرتا ہوں کہ مہربانی کر کہ اس تیسرے فریق کو سامنے لایے جس کی وجہ سے یہ سب کچھ ہوا اور اصل مجرموں کو پھانسی کے پھندے پر لٹکایا جائے ۔

شندور فیسٹول میں چترال کی کھلاڑیوں کی الاونس میں موجودہ مہنگائی کے تناسب سے اضافہ نہ کیا گیا تو پولو ایسوسی ایشن اس ایونٹ کا مکمل بائیکاٹ کرنے پر مجبورہوگی۔ شہزادہ سکندر الملک صدر پولو ایسوسی ایشن چترال

چترال (نمائندہ چترال ٹائمز) پولوایسوسی ایشن چترال کے صدر شہزادہ سکندر الملک نے حکومت کو خبر دار کرتے ہوئے کہا ہے کہ خیبر پختونخوا کلچر اینڈ ٹورزم اتھارٹی اور صوبائی فنانس ڈیپارٹمنٹ نے شندور فیسٹول میں چترال کی سائیڈ پر کھیلنے والے کھلاڑیوں کی الاونس میں اضافے کی راہ میں روڑے اٹکاتے رہے تو پولو ایسوسی ایشن اس ایونٹ کا مکمل بائیکاٹ کرنے پر مجبورہوگی کیونکہ موجودہ الاونس پر کوئی کھلاڑی گھوڑ الے کر شندور نہیں جاسکے گا۔ جمعہ کے روز چترال پریس کلب میں مقامی میڈیا سے گفتگو کرتے ہوئے انہوں نے کہاکہ شندور فیسٹول میں حصہ لینے والے کھلاڑی ایونٹ سے دس دن پہلے گھوڑا لے کر شندور پہنچ جاتے ہیں اور دو ہفتے تک اپنی جیب سے خرچ کرتے ہیں جس کی مالیت کا اندازہ مہنگائی وگرانی کے اس دورمیں ہر کوئی کرسکتا ہے۔ انہوں نے کہاکہ جب پولو ایسوسی ایشن نے یہ مسئلہ متعلقہ فورم پر اٹھایا توانہیں یقین دہائی کرائی گئی لیکن یہ سب سرخ فیتے کی نذر ہوتی ہوئی لگ رہی ہے اور ڈیمانڈ کے مطابق الاؤنس کو تین لاکھ روپے کرنے کی منظوری میں خیبر پختونخوا کلچر اینڈ ٹورزم اتھارٹی اور فنانس ڈیپارٹمنٹ لیت ولعل سے کام لیتے ہیں اور سنجیدگی کا مظاہر ہ بھی نہیں کررہے ہیں۔ شہزادہ سکندر الملک نے کہاکہ ساڑھے 10ہزار فٹ کی بلندی پر کھیلنے کے لئے کھلاڑی کو دس دن پہلے اس آب وہوا اور بلندی کے ساتھ اپنے آپ کو عادی بنانا ہوتا ہے اور شندور فیسٹول کی کھلاڑی کے لئے یہ محض تین دن کا فیسٹول نہیں بلکہ دو ہفتوں کا جان گسل کام ہے جس میں سویلین کھلاڑیوں کو بھاری اخراجات کا سامنا ہوتا ہے۔

پاکستان کا سب سے بڑا شندور پولو فیسٹیول کا آغاز28جون سے ہوگا،علی امین گنڈاپور
وزیراعلی خیبرپختونخوا نے شندور پولو فیسٹیول کی تاریخ کا اعلان کردیا، مشیر سیاحت زاہد چن زیب کی شندور پولو فیسٹیول کی تمام تیاریوں کو حتمی شکل دینے کی ہدایت

پشاور(چترال ٹائمزرپورٹ)وزیراعلی خیبرپختونخوا علی امین گنڈاپور نے اپر چترال کی وادی میں منعقد ہونے والے سالانہ شندور پولو فیسٹیول کی تاریخ کا اعلان کرتے ہوئے 28 جون سے منعقد کرنے کی منظوری دیدی۔ وزیراعلی خیبرپختونخوا علی امین گنڈاپور نے ہدایات جاری کرتے ہوئے کہا کہ فیسٹیول کیلئے تمام تیاریوں کو فلفور حتمی شکل دی جائے۔ انہون نے کہا کہ فیسٹیول کا انعقاد بہترین طریقے سے کیا جائے اور سیاحوں کو ہر ممکن سہولیات کی فراہمی یقینی بنائی جائے۔ مشیر سیاحت و ثقافت زاہد چن زیب نے وزیراعلی خیبرپختونخوا کی ہدایات کے مطابق تمام سٹیک ہولڈرز کو شندور پولو فیسٹیول کیلئے کی جانیوالی تیاریوں کو جلد مکمل کرنے کی ہدایت کرتے ہوئے کہا کہ فیسٹیول کا کامیابی سے انعقاد اور آگاہی مہم ابھی سے چلائی جائے۔ انٹرنیشنل سطح پر مشہور اس فیسٹیول میں ہر سال کثیر تعداد میں سیاح شندور وادی کا رخ کرتے ہیں۔ لہذا اس کی ہر پلیٹ فارم پر مہم چلائی جائے تاکہ سیاح اپنے ٹوور انہی تاریخوں پر ترتیب دے سکیں۔

انہوں نے کہا کہ چترال اپر کی خوبصورت وادی شندور میں منعقد ہونے والا شندور پولو فیسٹیول اس سال 28 جون کو منعقد ہو گا جس میں چترال لوئر و چترال اپر کی ٹیمیں گلگت بلتستان کی ٹیموں سے مدمقابل ہونگی۔ خیبرپختونخوا کلچراینڈٹورازم اتھارٹی،پاک فوج، ضلعی انتظامیہ چترال لوئر وچترال اپراور چترال سکاؤٹس کے باہمی اشتراک سے منعقد ہونے والے شندور پولو فیسٹیول کی تیاریوں کو حتمی شکل دینے دینے کیلئے اقدامات شروع کر دیئے گئے ہیں۔ شندور پولو فیسٹیول امسال 28 جون سے 30 جون تک منعقد ہوگا۔ فیسٹیول میں ہر سال شرکت کیلئے کثیر تعداد میں ملکی و غیر ملکی سیاح شندور اور چترال وادی کا رخ کرتے ہیں۔تین روزہ فیسٹیول میں خیبرپختونخوا اور گلگت بلتستان کی روایتی موسیقی پر مشتمل محفل موسیقی کا انعقاد بھی کیا جائے گا۔گزشتہ سال فیسٹیول میں چترال کی ٹیم فاتح قرار پائی تھی۔

شجر کاری اور پودے لگانا سنت عمل ہے، اور جنگلات کی حفاظت ہم سب کی زمہ داری ہے۔ مولانا خلیق الزماں شاہی خطیب

چترال (چترال ٹائمز رپورٹ)خطیب شاہی مسجد چترال مولانا خلیق الزمان کاکاخیل نے کہا ہے کہ شجر کاری اور پودے لگانا سنت عمل ہے، نبی کریم صلی اللہ علیہ و آلہ و سلم نے نہ صرف اس کی بھرپور حوصلہ افزائی فرمائی ہے بلکہ اپنے مبارک ہاتھوں سے پودے لگا کر اس کی اہمیت کو اپنے عمل سے اجاگر کیا ہے، اسلام کی نگاہ میں درختوں اور جنگلات کی اس قدر اہمیت ہے کہ خلافت راشدہ میں جب سیدنا صدیق اکبر رضی اللہ عنہ نے لشکر اسلام کو اسلام کی سرحدات کی طرف روانہ کیا تو اس بات کی بطور خاص تاکید فرمائی کہ سبزے اور درختوں کو مت اجاڑنا۔ ان خیالات کا اظہار مولانا خلیق الزمان کاکا خیل نے شاہی مسجد چترال میں اجتماع جمعہ سے خطاب کرتے ہوئے کیا۔

مولانا خلیق الزمان کاکا خیل نے عوام الناس سے اپنے خطاب میں کہا کہ اسلام نے اپنے پیروکاروں کی ذاتی اور انفرادی زندگی سے لیکر اجتماعی اور سماجی زندگی تک ہر ہر قدم پر رہنمائی کی ہے اور زندگی گزارنے کے طور و تہذیب بتلائی ہے۔ انہوں نے کہا کہ اسلامی تعلیمات اور تہذیب کو اپنانے سے انسان کامل بن جاتا ہے اور وہ دنیا اور اس کی ہر چیز کیلئے نفع رساں بن جاتا ہے۔ انہوں نے کہا کہ ہم نبی کریم صلی اللہ علیہ و آلہ و سلم کے طور طریقوں اور سنتوں کے مطابق اپنی زندگی ڈھالیں تو ہمارا ہر قدم عبادت سے عبارت ہو سکتا ہے،

انہوں نے کہا کہ دین اسلام میں ماحول کی حفاظت،صفائی ستھرائی کی بڑی اہمیت ہے اور راستوں کو صاف رکھنے کے ساتھ ساتھ درختوں اور سبزے کی حفاظت کو بھی انسانیت کی مشترکہ ضرورت بتایا گیا ہے، انہوں نے کہا کہ قدرتی ماحول کی حفاظت کیلئے درختوں کی حفاظت کرنا اور پودے لگانا بہت ضروری ہے، نبی کریم صلی اللہ علیہ و آلہ و سلم نے اپنے دست مبارک سے شجرکاری فرمائی ہے، اس لیے ہم اگر شجر کاری کریں تو نہ صرف یہ کہ یہ ہمارے ماحول کیلئے فائدہ مند ہوگی بلکہ یہ عبادت میں بھی شمار ہوگی۔

انہوں نے کہا کہ حضور صلی اللہ علیہ و آلہ و سلم نے اپنے مبارک ہاتھوں سے مدینہ میں حضرت سلمان فارسی رضی اللہ عنہ کے باغ میں سینکڑوں پودے لگائے ہیں۔ اس لیے پودے لگانا اور درختوں کی حفاظت کرنا اسلامی تہذیب کا ورثہ ہے، نہ کہ جنگلات تباہ کرنا اور درختوں کی بے دریغ کٹائی۔ انہوں نے کہا کہ درخت لگانا اور ان کی حفاظت کرنا حکومت اور عوام الناس دونوں کا فرض ہے۔ انہوں نے محکمہ جنگلات اور عوام الناس دونوں سے اپیل کی کہ جنگلات کی حفاظت یقینی بنائی جائے اور جنگلات کی بے دریغ کٹائی کی روک تھام اور آگ سے بچاؤ کے لئے اقدامات کئے جائیں۔

جنگل میں آگ لگنے کے حوالے سے انہوں نے کہا کہ اس سے نہ صرف درختوں کا ضیاع ہوتا ہے بلکہ ماحولیات پر بھی اس کا برا اثر پڑتا ہے۔
محکمہ جنگلات ،انتظامیہ اور عوام سے اپیل کی کہ وہ جنگلات کے تحفظ کے لئے ایک دوسرے کے ساتھ تعاون کریں اور ان کی حفاظت کو یقینی بنانے کے لئے کردار ادا کریں۔

بونی بازاز کے مسائل بارے تجاریونین بونی کے نمائندوں کا ضلعی انتظامیہ کے ذمہ داروں کے ساتھ اہم نشست ، مسائل کے حل کے لیے فوری اقدات اُٹھانے یقین دہانی

اپر چترال ( نمائندہ چترال ٹائمز ) تجار یونین بونی کو درپیش مختلف مسائل کے حل کے سلسلے میں محمد عرفان الدین ڈپٹی کمشنر اپر چترال کی ہدایات پر الیاس احمد تحصیلدار مستوج کی زیر صدارت ایک ایم میٹنگ منعقد ہوئی۔اس میٹنگ میں تحصیل میونسپل آفسر مستوج مصباح الدین ، سب ڈویژنل افسر پبلک ہیلتھ مستوج، تجار یونین بونی کے صدر رحیم خان ،نائب صدر عبدالجبار،ذاکر زخمی اور غلام ربانی و دیگر متعلقہ افراد نے شرکت کی ۔

میٹنگ میں بونی بازار کے لئے پینے کے پانی کی عدم دستیابی ، اوارہ کتوں کی بازار میں بھرمار اور بازار کے اندر سبزی والی گاڑیوں کی پارکنگ سمیت دوسرے مختلف مسائل پر تبصرہ کیا گیا۔
میٹنگ میں یہ فیصلہ ہوا کہ سب ڈویژنل افسر پبلک ہیلتھ بازار کے احاطے میں صارفین اور مسافروں کے لئے پینے کے پانی کی دستیابی کے لئے موثر اقدامات اٹھائے گا تاکہ صاف پانی کی دستیابی یقینی ہو۔

اوارہ کتوں سے نجات کے لئے ڈسٹرکٹ ہیلتھ آفسر اپر چترال اور تحصیل میونسپل آفسر مستوج اپس میں مل بیٹھ کر فوری طور پر کوئی لائحہ عمل طے کریں گے تاکہ اوارہ کتوں کے حملے سے راہگیر محفوظ رہ سکیں۔ اس طرح بازار کے اندر غیر ضروری پارکنگ، سبزی والے گاڑیوں اور سامان بردار گاڑیوں کی پارکنگ سمیت نقل و حمل کے مسائل کو حل کرنے کے لئے تحصیل میونسپل آفسر مستوج ایک موثر پلان تیار کرنے کو یقینی بنائے گا۔
تحصیلدار مستوج نے بازار ایریا کی صفائی ستھرائی اور دیگر مسائل کےفوری حل کے سلسلے میں ڈپٹی کمشنر اپر چترال کے احکامات سے متعلق متعلقہ اداروں کے سربراہان کو اگاہ کیا۔

چترال لوئیر میں جنگلات اور سیاحتی مقامات پر آگ جلانے اور ندی نالوں و دریا میں مچھلی کے شکا ر پر دفعہ 144 کے تحت نافذ کردیا ہے

چترال ( نمائندہ چترال ٹائمز ) ڈپٹی کمشنر لوئر چترال محمد عمران خان نے دو الگ الگ ارڈر میں دفعہ دفعہ 144 نافظ کر دیا ہے، جنگلات و جنگلی حیات کے تحفظ کے پیش نظر ضلع لوئر چترال کے تمام جنگلات و سیاحتی مقامات پر کسی بھی قسم کے اگ جلانے پر پابندی عائد کر کے دفعہ 144 نافظ کر دیا ہے۔ عوام الناس اور سیاحوں سے گزارش کی گئی ہے کہ جنگلات کا تحفظ یقینی بنائیں ۔ خلاف ورزی کے مرتکب افراد کے خلاف حاصل اختیارات کے تحت سخت قانونی کاروائی عمل میں لائی جاۓ گی۔ دریں اثنا ڈپٹی کمشنر لوئر چترال محمد عمران خان نے آبی حیات کے تحفظ کے پیش نظر ضلع لوئر چترال کے ندی نالوں اور دریا میں مچھلی کے شکار پر بھی پابندی عائد کر کے دفعہ 144 نافظ کر دیا ہے۔ عوام الناس اور سیاحوں سے گزارش کی گئی ہے کہ آبی حیات کا تحفظ یقینی بنائیں ۔ خلاف ورزی کے مرتکب افراد کے خلاف حاصل اختیارات کے تحت سخت قانونی کاروائی عمل میں لائی جاۓ گی۔

چترال لوئر کے ملازمین کا اپنے مطالبات کے حق میں  چترال پریس کلب تک احتجاجی ریلی اور جلسہ

چترال ( نمائندہ چترال ٹائمز ) چترال لوئر کی تمام ملازمین نے بدھ کے روز چترال پریس کلب تک ریلی نکالی اور ہائی سکول روڈ پر احتجاجی مظاہرہ کیا، جس کی صدارت صدر اگیگا امیر المک نے کی ۔ جس میں آل ٹیچرز، پیرامیڈکس، آکسا، کیپلا، کیپٹا، ایپکا، کلاس فور یونین،لیبر یونین (پی ڈبلیو ڈی) وی سی سییکرٹریز یونین، پٹوار و قانون گو ایسو سی ایشن کی نمایندگان نے خطاب کیا اور صوبائی حکومت کے حالیہ بجٹ کو مکمل طور پر مسترد کرتے ہوئے اسے ظالمانہ قرار دیا۔ اور کہا۔ کہ وزرا کیلئے 300 فیصد بیوروکریٹس کیلئے 200 فیصد اور غریب پسے ہوئے ملازمین کیلئے 10 فیصد اضافہ کسی صورت منظور نہیں۔ انہوں نے کہا۔ کہ میڈیکل، کنوینس الاونس، ہاوس رینٹ 20 سال پہلے کے ہیں۔ جن سے نہ ادویات ملتی ہیں۔ نہ مکان کا کرایہ ادا ہوتا ہے اور نہ ٹیکسی کرایہ کیلئے کافی ہیں۔ اس لئے ان میں مہنگائی کے تناسب سے اضافہ کیا جائے۔ انہوں نے کہا۔ کہ سابقہ پی ٹی آئی حکومت میں اساتذہ اور دیگر سرکاری ملازمین کی اپگریڈیشن کا جو وعدہ کیا گیا تھا۔ اس کو پورا کیا جائے۔ انہوں نے گریجویٹی، ماہانہ پنشن،لیو انکشمنٹ پر کٹوتی کو پنشن ختم کرنے کی سازش قرار دیا۔ اور کہا کہ ایسا ہرگز نہیں ہونے دیں گے۔ اورسابقہ طریقہ کار بحال رکھنے کا مطالبہ کیا۔

اخر میں ایک قرار داد کے زریعے حکومت سے مطالبہ کیا گیا یہ کہ مہنگائی کے تناسب سے تنخواہوں میں اضافہ کیا جائے ۔ہاوس رینٹ ، میڈیکل ، اور کنونس الاؤنس کو موجودہ مارکیٹ ریٹ پر دیا جائے ۔اصلاحات کے نام پر پنشن کٹوتی کو بند کیا جائے اور پنشن کا سابقہ طریقہ کار بحال کیا جائے .اساتذہ آپ گریڈیشن کابینہ سے منظور ہوچکا ہے جو کہ قانون بن چکا ہے اس کا نوٹیفکیشن فی الفور جاری کیا جائے ۔۔ مختلف محکموں کے سرکاری ملازمین کی تنخواہوں میں غیر آئینی ،غیر قانونی تفریق کو ختم کیا جائے۔ مرکزی حکومت آنے والے بجٹ میں سرکاری ملازمین کےلئے جو ریلیف مختص کرے۔ اسی طرز پر صوبائی حکومت بھی ملازمین کو ریلیف فراہم کرے۔

انہوں نے صوبائی حکومت کو خبردار کیا۔ کہ اگر ان کے جائز مطالبات کو ماننے سے انکار کیا گیا۔ تو وہ راست اقدام اٹھانے پر مجبور ہوں گے۔ ایسی صورت میں تمام تر حالات کی ذمہ داری موجودہ صوبائی حکومت پر ہوگی۔

عام انتخابات 2024 میں چترال سے قومی و صوبائی اسمبلی سے الیکشن لڑنے والے تمام امیدواروں کو یکم جون تک انتخابی اخراجات کی رسیدیں جمع کرنے کیلئے اخری نوٹس جاری ، بصور ت د یگر قانونی کاروائی عمل میں لائی جائیگی۔ضلعی الیکشن کمشنر چترال اپر اینڈ لوئیر

چترال ( چترال ٹائمز رپورٹ ) ضلعی الیکشن کمشنر چترال لوئیر اور اپر کی طرف سے جاری پریس ریلیز میں کہا گیا ہے کہ عام انتخابات 2024 میں حلقہ NA-I(چترال اپر و لوئر)، PK-I(اپر چترال)، PK-2(لوئر چترال)سے مدمقابل تمام امیدواران کو بذریعہ نوٹس ہذ ا مطلع کیا جاتا ہے کہ وہ اپنے انتخابی اخراجات (Form-C)بمع رسیدیں، پوسٹر کی کاپی اور بنک اسٹیٹمنٹ متعلقہ ڈسٹرکٹ الیکشن کمشنر آفس میں یکم جون2024 تک ہر صورت میں جمع کرادیں۔ اس ضمن میں تمام اُمیدواران کو ریٹرننگ آفیسر کی طرف سے تین دفعہ شو کازنوٹسز جاری کئے جاچکے ہیں اور یہ اسی تسلسل کی آخری نوٹس ہے۔لہذا مقررہ تاریخ تک انتخابی اخراجات کی تفصیل مندرجہ بالا فارم پُر کرکے دیگر دستاویزات کیساتھ زیر دستخطی کے آفس میں جمع کریں۔
بصورت دیگر الیکشن کمیشن آف پاکستان کی جانب سے ، الیکشن ایکٹ2017، کی شق -136 کے مطابق ضروری قانونی کارروائی کی جائیگی۔
(Form-Cزیردستخطی کے دفتراورالیکشن کمیشن آف پاکستان کی ویب سائٹ سے حاصل کیا جاسکتا ہے)

گرم چشمہ لوئیرچترال میں آغا خان ہائیر سیکنڈری اسکول کا سنگ بنیاد رکھ دیا گیا

گرم چشمہ (نمائندہ چترال ٹائمز )آغا خان ایجوکیشن سروس پاکستان کی جانب سے گرم چشمہ لوئیرچترال کے لیے ایک ہائیر سیکنڈری اسکول کی منظوری دی گئی ہے. یہ جدید تعلیمی ادارہ گرم چشمہ کے مقام ایژ میں تعمیر کیا جائے گا ۔ اس سلسلے میں گزشتہ دن گرم چشمہ کے مقام پر اس سکول کے سنگ بنیاد رکھنے کے حوالے سے ایک پروقار تقریب کا انعقاد کیا گیا۔ اس تقریب کے مہمان خصوصی اس پراجیکٹ کے ڈونر فیروز غلام حسین تھے ۔انہوں نے اپنے دست مبارک سے آغا خان ہائیر سیکنڈری اسکول کا سنگ بنیاد رکھا۔اس پروقار تقریب میں لیفٹنٹ کرنل انجم مشتاق نے بھی اعزازی مہمان کی حیثیت سے شرکت کی۔تقریب کی صدارت ریجنل کونسل لوئیر چترال کے پریزیڈنٹ ظفرالدین نے کی ۔

آغا خان ایجوکیشن سروس پاکستان کے چیف ایگزیکٹیو افیسرامتیاز مومن، ہیڈ آف ایجوکیشن آغا خان ایجوکیشن سروس پاکستان آئین شاہ ، جنرل منیجر گلگت بلتستان اورچترال بریگیڈئر ( ریٹائرڈ ) خوش محمد خان کے علاوہ علاقے کے عمائدین بھی اس تقریب میں بڑی تعداد میں شریک ہوئے۔

ابتدائی کلمات میں جنرل منیجر اے کے ای ایس پی بریگیڈئر ریٹائرڈخوش محمد خان نے مہمانوں کو خوش آمدید کہتے ہوئے کہا کہ آج کا دن بہت اہم اور تاریخی دن ہے۔ کیونکہ کہ اس سرزمین پر ایک ایسے ادارے کی بنیاد رکھی جا رہی ہے ۔جو آنے والے وقتوں میں علاقے کی نئی نسل کو معیاری تعلیم فراہم کرنے کے حوالے سے ایک سنگ ِ میل ثابت ہوگا ۔

انہوں نے کہا کہ آغا خان ہائیرسیکنڈری اسکول گرم چشمہ کی تعمیر کے منصوبے کی باقاعدہ اجازت شہز ادی زہرا غاخان نے 25 مئی کو اپنے مختصر دورۂ چترال کے موقع پر دی۔

انہوں نے اب تک آغا خان سکولوں کے لیے عطیات دینے والے افراد خاص طور پر اس جدید سہولیات سے آراستہ اسکول کے لیے زمین عطیہ کرنے والی کمیونٹی کے جذبے کو سراہا۔انہوں نے اس کامیابی کے پیچھے کارفرما عوامل کا ذکر کرتے ہوئے چترال کی لیڈرشپ کی تعریف کی کہ انہوں نے تعلیم کی اہمیت کو مدنظر رکھتے ہوئے دہائیوں کی کوشش سے اپنے علاقے ایسی تعلیمی سہولیات فراہم کرنے میں کامیاب ہوئے.

اس اسکول کے حوالے سے تفصیلی پرزنٹیشن دیتے ہوئے آغا خان ایجوکیشن سروس کے ہیڈ آف ایجوکیشن آئین شاہ نے کہا کہ مذکورہ ہائیر سیکنڈری اسکول میں ابتدائی تعلیم سے لے کر بارھویں جماعت تک ایک سیشن کے دوران ۱۳۰۰ سے زیادہ طلبہ پہلے شفٹ میں اور ضرورت پڑنے پر سیکنڈ شفٹ میں ۱۳۰۰ طلبہ تعلیم حاصل کرسکیں گے۔ان سکولوں میں آغا خان ایجوکیشن سروس کے زیر انتظام مصروف عمل ہائی سکولوں سے فارغ التحصیل طلبہ کے علاوہ دوسرے تعلیمی اداروں سے ثانوی تعلیم کی سند حاصل کرنے والے طلبہ کو بھی قابلیت کی بنیاد پر داخلہ ملے گا۔ سکول کی عمارت کی تعمیر ۲۰۲۷ کے اواخر میں مکمل ہوگی جبکہ پری پرائمری کلاسز کا اجرا پہلے سے ہوچکا ہے ۔

چیف انجینئر تنزیف شاہ نے کہاکہ عمارت کا نقشہ مجوزہ زمین کو قدرتی آفات کے تناظر میں، خوب چھان بین کرکے محفوظ قرار دینے کے بعد بنایا گیا ہے. یہ عمارت تعلیم کے جدید اور اعلیٰ معیار کو ملحوظ خاطر رکھتے ہوئے بنا ئی جائے گی ۔ جس میں جدید طرز تعلیم کی سہولیات سے مزئین کمرہ جماعت، جدیدسائنسی الات سے لیس تجربہ گاہیں، کانفرس روم, کھیلوں کی سہولیات، شدید زمینی بھونچال کو برداشت کرنے کی صلاحیت اور خدا نخواستہ آگ لگنے کی صورت میں بڑے نقصان سے محفوظ رہنے کی صلاحیت موجود ہوگی ۔

پروگرام کے خاص مہمان اور اس اسکول کے لیے فنڈ عطیہ کرنے والےفیروز غلام حسین نے اپنے خطاب میں کہا کہ میں خود بھی اے کے ای ایس کاپیدوار ہوں۔ میری تعلیم اے کے ای ایس تنزانیہ میں ہوئی ہے۔ آغا خان ایجوکیشن سروس کی معیاری تعلیم کے فوائد میں پوری زندگی حاصل کرتا رہا۔ آج اس ادارے کی بنیاد اس یقین کے ساتھ رکھ رہا ہوں کہ یہ تعلیمی ادارہ آگے چل کر کئی نسلوں کی زندگی میں بہتری لانے کا سبب بنے گا اور علاقے کے لوگوں کی زندگی میں آسانیاں پیدا کرنے کا موجب بنے گا۔ آپ سب لوگوں نے جس شاندار انداز میں استقبال کیا میں اس کے لئے تہہ دل سے آپ سب کا شکریہ ادا کرتا ہوں۔

لفٹنٹ کرنل انجم مشتاق نے کہا کہ آغاخان ایجوکیشن سروس کی تعلیمی خدمات کسی سے ڈھکی چھپی نہیں ہیں۔ اس ادارے کی تعلیمی خدمات کسی تعارف کے
محتاج نہیں اس کی جتنی تعریف کی جائے وہ کم ہے۔ ان کا کہنا تھا کہ چترال کے لوگوں کا تعلیم سے لگاؤ بھی بہت اہمیت کا حامل ہے علم حاصل کرنے کے اس لگاؤ کی وجہ سے چترال کے لوگ پورے ملک میں سب سے پرامن لوگ تصور کیے جاتے ہیں۔ اسی علم کی وجہ سے اس دھرتی نے بہت سارے نامور سپوت پیدا کئے ہیں جن بھی فخر کیا جاسکتا ہے۔

آغا خان ایجوکیشن سروس پاکستان کے سی ای او امتیاز مومن نے کہا کہ یہ اسکول ہمارے بچوں کی زندگیوں کو بدلنے میں اہم اکردار ادا کرے گا ۔ انہوں نے فیروز غلام حسین اور ان کی اہلیہ کا شکریہ ادا کیا اور ان کی فیاضانہ کردار کو خراج ِ تحسین پیش کیا ۔ انہوں نے کہا کہ اس طرح کے اداروں کو بنانا کسی فرد یا ایک ادارے کی بس کی بات نہیں ۔ اس کے لیے کمیونٹی کے تمام اسٹیک ہولڈرز متحد ہوکے کوشش کریں تو بات بنتی ہے ۔

تقریب کے آخر میں اسماعیلی ریجنل کونسل کے صدر ظفر الدین نے چترال کی ترقی میں ان تعلیمی اداروں کی اہمیت کو واضح کرنے کے ساتھ ساتھ کمیونٹی ، ڈونرز اور آغا خان ایجوکیشن سروس کا شکریہ ادا کیا ۔تقریب میں مختلف مکاتب فکرکے افراد کثیر تعداد میں شرکت کی۔

شندور فیسٹول کی تیاریوں کے سلسلے میں کمانڈنٹ چترال سکاوٹس اور چترال کے دونوں اضلاع کے ڈپٹی کمشنرز ودیگر کا انتظامات کا جائزہ لینے کیلئے شندور پولو گراونڈ کا دورہ

اپر چترال ( نمائندہ چترال ٹائمز ) شندور فیسٹول 2024 کے انتظامات کا جائزہ لینے کے سلسلے میں اج کمانڈنٹ چترال سکاؤٹس کرنل بلال جاوید، ڈپٹی کمشنر اپر چترال محمد عرفان الدین ، ڈپٹی کمشنر لوئر چترال محمد عمران خان ، ونگ کمانڈر 144 ونگ مستوج لیفٹننٹ کرنل محمد نور، صدر پولو ایسوسیشن چترال شہزادہ سکندرالملک اور ویلج کونسل سور لاسپور کے چیرمین نے شندور پولو گراؤنڈ کا دورہ کیا۔

ہر سال کی طرح اس سال بھی جشن شندور کو شایان شان طریقے سے منانے اور شائقین پولو کو ہرممکن سہولیات پہنچانے کے لئے پولو گراؤنڈ شندور کا تفصیلی جائزہ لیا گیا ۔

انہوں نے باہمی طور پر یہ فیصلہ کیا کہ اس سال شندور کی خوبصورتی کا خاص خیال رکھا جائے گا اور گراؤنڈ کے اس پاس اور پہاڑوں پر ہر قسم کی خطاطی، پینٹنگ یا غیر ضروری اشتہار وغیرہ لگانے پر مکمل پابندی ہوگی اور لکھنے یا اشتہار وغیرہ لگانے کی صورت میں اسے فوری طور پر ہٹا دیا جائے گا۔ اس حوالے سے بہت جلد ڈپٹی کمشنر اپر چترال دفعہ 144نافذ کرے گا۔

یہ طے ہوا کہ سویلین تماشائیوں کے لئے اس سال خصوصی سہولیات پہنچانے کی ہر ممکن کوشش کی جائے گی ۔یہ بھی طے ہوا کہ اس سال پولیس کیمپنگ والا سائڈ تماشائیوں کے رہنے کے لئے ریزرو کیا جائے گا۔ اس بات پر اتفاق کیا گیا کہ اس سال جشن شندور کو منعقد کرتے وقت مقامی لوگوں کے روایات اور اقدار کا خاص خیال رکھا جائے گا۔ پینے کے صاف پانی کی فراہمی سمیت ، پولو گراؤنڈ کی تزئین و آرائش اور تماشائیوں کے بیٹھنے کے لئے سیڑھیوں پر کام جلد از جلد مکمل کیا جائے گا۔یادرہے کہ جشن شندور اس سال 27 جون سے 29جون کے درمیان منایا جارہاہے، جبکہ اس سے پہلے یہ ایونٹ 7 سے 9 جولائی کے درمیان منایا جاتا رہاہے، گزشتہ برسوں کی طرح اس سال بھی اس فیسٹول کی میزبانی چترال کے دونوں اضلاع کی انتطامیہ کرینگے۔

انجمن ترقی کھوار چترال کی مادر ادبی تنظیم ہے۔ اس کے سایے میں بہت سے شخصیات و افراد نے نام کمایا ۔ اس سال انجمن کا 70واں سالگرہ منانے کی تیاری ہونی چاہئیے ۔ پروفیسر اسرار الدین

چترال ( محکم الدین ) چترال کے معروف تاریخی ، ثقافتی اور ادبی شخصیت سابق ڈین جغرافیہ ڈیپارٹمنٹ پشاور یونیورسٹی پروفیسر اسرارالدین نے اپنی رہئش گاہ سینگور چترال میں ممتاز دانشور کالم نگار ڈاکٹر عنایت اللہ فیضی ، چترال کی تاریخ و ادب کے محقق محمد عرفان عرفان ، نوجوان ریسرچر ارشد عرفان سے ایک غیر رسمی گفتگو میں کہا ہے ۔ کہ چترال کی ادبی تنظیم انجمن ترقی کھوار ایک تناور درخت ہے۔ جس کی عمر اب 70 سال ہونے کوہے ۔ اس تنظیم نے بہت شعراء و ادباء اور تاریخ سے دلچسپی رکھنے والے شخصیات پیدا کئے ۔ شعرو ادب و ثقافت اور تاریخ سے دلچسپی رکھنے والے افراد کی صلاحیتوں کو نکھارا ۔ اور انہیں شناخت دی ۔ لیکن افسوس سے کہنا پڑتا ہے ۔ کہ بہت سے لوگ اس کو اپنی قابلیت و صلاحیت سے ہی تعبیر کرتے ہیں ۔اگر انجمن ترقی کھوارچترال کے ادباء و شعرا کو یکجا ہونے ایک دوسرے کو سننے اور لکھت کےلئے پلیٹ فارم مہیا نہ کرتا ۔ تو شاید شعرو ادب سے وابستہ افراد کی صلاحتیں خوابیدہ رہ جاتیں ۔

انہوں نے کہا ۔ کہ کئی چھوٹی چھوٹی تنظیمیں اور فورمز انجمن کی کوک سے جنم لے چکی ہیں ۔ اور اس کے سائے میں زبان و ادب ،تاریخ اور مختلف ثقافت پر تحقیق و ریسرچ ہو رہے ہیں ۔ جبکہ یہ تنظیمات و فورمز زندہ رہنے کیلئےخوراک اور سایہ انجمن ترقی کھوار سے ہی حاصل کرتے ہیں ۔ انجمن ترقی کھوار کے قیام کے تقریبا ستر سال ہونے کو ہیں ۔ اس لئے اس کا ستر سالہ سالگرہ شایان و شان طریقے سے منانا انتہائی ضروری ہے ۔ ڈاکٹر عنایت اللہ فیضی اور محمد عرفان عرفان نے پروفیسر کی بات سے اتفاق کیا ۔ اور کہا ۔کہ اس بات میں کوئی کلام نہیں ۔ کہ انجمن ترقی کھوار عالمی سطح پر زبان وادب کی ترقی کیلئے کام کرنے والی تنظیم کی حیثیت سے بہت پہلے پہچان پیدا کر چکا ہے ۔ انجمن کی سرپرستی میں کئی انٹر نیشنل کانفرنسز منعقد ہو چکی ہیں ۔

عالمی سطح پر سکالرز کے ساتھ اس ادبی تنظیم کے روابط ہیں ۔ اور اس تنظیم کی سرپرستی میں کئی کتابیں شائع ہو چکی ہیں ۔ ان میں زبان و ادب سے دلچسپی رکھنے والے وہ کم وسائل کے حامل شاعر و ادیب بھی شامل ہیں ، جن کیلئے انجمن کے عہدہ داروں اور سرپرستوں نے ذاتی طور پر کوشش کرکے ان کی کتابیں شائع کیں ۔ جس کی وجہ سے انہیں نہ صرف مقام ملا ۔ بلکہ حکومت کی طرف سے مستقل بنیادوں پر اعزازیہ بھی انہیں مل رہا ہے ۔ اگر انجمن یہ کام نہ کرتا تو وہ لوگ حکومتی تعاون بھی حاصل نہ کرپاتے ۔ انہوں نے کہا ۔ کہ انجمن کے ستر سالہ سالگرہ منانے کی تجویز بہت اچھی ہے ۔ اس سے چترال میں ادب و ثقافت کے فروغ کیلئے مزید راہیں کھلیں گی ۔ تاہم یہ تجویز انجمن ترقی کھوار کے صدر شہزادہ تنویر الملک اور دیگر عہدہ داروں کے سامنے رکھی جائے گی ۔ جس کے بعد ہی حتمی فیصلہ کیا جائے گا ۔

عوامی شکایات پر چترال کے دونوں اضلاع کے ڈپٹی کمشنرزکا چترال-بونی-مستوج-شندور روڈ پر جاری کا معائنہ ، ناقص کام پر برہمی کا اظہار، ازسرنو تعمیر کی ہدایت

چترال ( نمائندہ چترال ٹائمز ) ڈپٹی کمشنر اپر چترال محمد عرفان الدین نے اج چترال-بونی-مستوج-شندور روڈ میں جاری کام کا جائزہ لیا۔اس موقع پر ڈپٹی کمشنر لوئر چترال محمد عمران خان بھی ان کے ہمراہ تھے۔ڈپٹی کمشنر نے کنکریٹ کے کام کا تفصیلی جائزہ لیا اور برہمی کا اظہار کرتے ہوئے مذکورہ کام فوراً روکنے کی، ہدایت کی۔ انھوں نے احکامات جاری کرتے ہوئے کہا کہ غیر معیاری کام کی اجازت ہر گز نہیں دی جائے گی۔ ڈپٹی کمشنر نے مذکورہ کام تسلی بخش طریقے سے دوبارہ کرنے کی کی ہدایت کرتے ہوئے کہا کہ آئندہ شکایات کا موقع نہ دیا جائے بصورت دیگر کمپنی کے خلاف قانونی کاروائی کی جائیگی۔

اس سے قبل ڈپٹی کمشنر لوئر چترال محمد عمران خان نے عوامی شکایات کا نوٹس لیتے ہوۓ چترال شندور روڈ کا دورہ کیا۔ اور روڈ پہ جاری کام کا معائنہ کیا۔اس موقع پر, این ایچ اے کے ذمہ داران بھی موجود تھے۔ڈپٹی کمشنر کو روڈ پہ جاری کام کے حوالے سے تفصیلی بریفنگ دی گئی۔ڈپٹی کمشنر نے روڈ پرجاری کام تیز و معیار کے مطابق کرنے, اور ناقص کام کی صورت میں متعلقہ ٹھیکیدار کے خلاف سخت قانونی کاروائی عمل میں لانے کی ہدایات جاری کیں۔ ڈپٹی کمشنر نے کہا کہ روڈ علاقے کی بنیادی ضرورت ہوتی ہے۔ لہذا تعمیراتی کام ہر صورت معیار کے مطابق یقینی بنایا جاۓ۔ اس حوالے سے ضلعی انتظامیہ روڈ پرجاری کام کی مسلسل نگرانی کرے گی۔

یادرہے کہ چترال بونی مستوج شندور روڈ پر جاری  کام ناقص ہونے کی شکایت روز کا معمول بن گیا ہے، گزشتہ دنوں سی ڈی ایم کے سینئرممبران نے مذکورہ روڈ کا معائنہ کرکے تمام نقاص کی نشاندہی کی تھی جس پر  اعلیٰ حکام کی طرف سے نوٹس لیا جارہاہےیہی وجہ ہے کہ چترال کے دونوں اضلاع کے ڈپٹی کمشنرز نے بھی اس کا نوٹس لیتے ہوئے روزانہ کی  بنیاد پر چترال شندور پر کام کا معائنہ کررہے ہیں، جس پر علاقے کے عوام نے  اطمینان کا اظہار کرتے ہوئے اس امید کا اظہار کیا ہے کہ دونوں اضلاع کے انتظامیہ اس بین الاقوامی اہمیت کے حامل سڑک کی تعمیر اور معیار میں کوئی سمجھوتہ نہیں کرینگے تاکہ قومی خزانے کا ضیاع نہ ہو۔

بانی پی ٹی آئی عمران خان کی رہائی اور سابق وفاقی وزیرمراد سعید کو تحفظ دینے کے حوالے سے اپر چترال میں احتجاجی جلسہ، صوبائی جنرل سیکریٹری یوتھ ونگ کی خصوصی شرکت

اپر چترال ( نمائندہ چترال ٹائمز ) بانی پاکستان تحریک انصاف عمران خان کی رہائی ، سابق وفاقی وزیر مواصلات مراد سعید کو تحفظ دینے اور عام انتخابات 2024 میں پاکستان تحریک انصاف کا مینڈیٹ چوری کرنے کے خلاف آج اپر چترال کے ہیڈکوراٹر بونی میں احتجاجی جلسہ منعقد کیا گیا۔احتجاجی جلسے میں جنرل سیکرٹری یوتھ ونگ پاکستان تحریک انصاف خیبر پختونخوا ڈاکٹر شفقت ایاز نے خصوصی طور پر شرکت کیں۔ احتجاجی جلسے میں چیئرمین تحصیل کونسل موڑکہو/تورکہو اپر چترال میر جمشید الدین ، چیئرمین تحصیل کونسل مستوج اپر چترال سردار حاکم ، پارٹی لیڈر شپ ، پاکستان تحریک انصاف اپر چترال کے تنظیمی عہدیداراں ، پارٹی ورکرز اور عوام الناس کثیر تعداد میں موجود تھے۔جنرل سیکرٹری یوتھ ونگ خیبر پختونخوا ڈاکٹر شفقت ایاز کا کوراغ اپر چترال میں پرتپاک استقبال کیا گیا اور بڑی ریلی کے ساتھ جب قافلہ ہیڈکوارٹر بونی میں داخل ہوا تو بڑے جلسے کی شکل اختیار کی۔ڈاکٹر شفقت ایاز ، چیٸرمین میر جمشید الدین ، چیٸرمین سردار حاکم ،محمد ہارون اور دیگر مقررین نے بانی پاکستان تحریک انصاف عمران خان کی گرفتاری کی بھر پور انداز میں مذمت کی اور عمران خان کی فوری رہاٸی ، سابق وفاقی وزیر مواصلات مراد سعید کو تحفظ دینے اور عام انتخابات 2024 میں پاکستان تحریک انصاف کی چوری شدہ مینڈیٹ کی واپسی کا مطالبہ کیا۔ احتجاجی جلسے کے بعد مین چوک بونی سے بازار کے وسط تک احتجاجی واک بھی کیا گیا۔

لوئیر چترال : تھانہ شغور اور کوغذی کے حدود میں فریقین کے درمیان تنازعہ خوش اسلوبی سے حل ,

چترال ( چترال ٹائمز رپورٹ ) ڈی۔پی۔او لوئر چترال افتخار شاہ کی خصوصی ہدایات پر عوام کے درمیان معمولی تنازعات کو معتبرات علاقہ کی موجودگی میں باہمی صلح اور اتفاق رائے سے حل کیا جارہا ہے۔ ڈی پی او آفس سے جاری پریس ریلیز کے مطابق ایس۔ایچ۔او تھانہ شغور ایس آئی عطاء الرحمن کی کاوشوں سے علاقہ اوڑاغ کریم آباد سے تعلق رکھنے والے دو فریقین کے درمیان جیب ایبل روڈ کے تنازعے کو معتبرات علاقہ کی موجودگی میں باہمی مشاورت سے حل کیا گیا۔دونوں فریقین ایس۔ایچ۔او تھانہ شغور کی موجودگی میں ایک دوسرے کے ساتھ بغلگیر ہوگئے اور اپنے درمیان تنازعے کو ہمیشہ کے لئے ختم کردیا ۔

اسی طرح تھانہ کوغذی لوئیر چترال کے حدود میں سگے بھائیوں کے درمیان جائداد کا سنگین تنازعہ ہمیشہ کے لئے ختم ہوگیا ، علاقہ راغ کوغوزی سے تعلق رکھنے والے سگے بھائیوں کے درمیان جائیداد کا تنازعہ ہوکر سنگین حالات اختیار ہونے کا اندیشہ تھا ۔ایس۔ایچ۔او تھانہ کوغوزی SI رحیم بیگ نے فریقین کو تھانے بلاکر راضی نامہ کرکے رنجش کو ہمیشہ کے لئے ختم کردیا ۔فریقین نے تھانے میں ایس۔ایچ۔او کی موجودگی میں تنازعے کو ختم کرکے ایک دوسرے کے ساتھ بغلگیر ہوگئے۔

مستوج سے لے کر بروغل تک سڑک کی عدم موجودگی ترقی کے تمام سیکٹرز کو بری طرح متاثر کرتی ہے، اس پر ہنگامی بنیادوں پر غور کیا جائے،عمائدین علاقہ

چترال (نمائندہ چترال ٹائمز ) اپر چترال کے مستوج ٹاؤن سے بروغل تک معیاری سڑک کی تعمیر کے لئے” تحریک مستوج بروغل روڈ” کے نام سے قائم سول سوسائٹی تنظیم کی نشست “مشقولگی”میں اظہار خیال کرتے ہوئے تحریک کے صدر سید مختارعلی شاہ ایڈوکیٹ اور دوسرے رہنماؤں نے لیاقت علی، صاحب عرفان، اختراکبر شاد اور حاجی کمال نے سڑک کی کمی کو مستوج سے لے کر بروغل تک اس علاقے کی پسماندگی کا ذمہ دار قرار دیا اور وفاقی حکومت سے پرزور مطالبہ کیاکہ اس پر ہنگامی بنیادوں پر غور کیا جائے۔ انہوں نے کہاکہ قیام پاکستان سے لے کر اس علاقے کے عوام نے ترقی کبھی نہیں دیکھی اور اب بھی پسماندگی میں ڈوبے ہوئے ہیں جس کا بنیادی وجہ معیاری اور سال بارہ مہینے کھلا رہنے کے قابل سڑک کا نہ ہونا ہے اور سڑک کی عدم موجودگی ترقی کے تمام سیکٹرز کو بری طرح متاثر کرتی ہے۔ انہوں نے کہاکہ مستوج سے بروغل تک کا علاقہ ہر لحاظ سے اہمیت کا حامل ہے اور یہاں سیاحت، زراعت اور مائننگ کی زبردست پوٹنشل موجود ہے جس کو بروئے کار لانے سے نہ صرف یہ علاقہ بلکہ پورا چترال اور صوبہ کو باالواسطہ اور بلا واسطہ فائدہ پہنچ سکتا ہے۔ لیاقت علی نے مائننگ اور دیہی ترقی کے حوالے سے گفتگو کرتے ہوئے کہاکہ بروغل پاس سے لے کر مستوج تک یہ علاقہ ایک تاریخی اہمیت کا حامل ہے اور زمانہ قدیم میں سنٹرل ایشیاء سے سفر حج کے قافلے بھی یہیں سے گزرتے تھے اور یہی تجارتی راستہ بھی تھا۔ انہوں نے کہاکہ یہ علاقہ دھاتی اور غیر دھاتی معدنیات سے ڈھکا ہوا ہے لیکن ٹرانسپورٹیشن کا انتظام نہ ہونے کی وجہ سے اس سے فائدہ اٹھانا ممکن نہیں ہے اور ہم خزانے کا مالک ہونے کے باوجود غریب چلے آرہے ہیں۔

ٹورزم کے شعبے سے تعلق رکھنے والے معروف شخصیت صاحب عرفان نے کہاکہ اس علاقے میں ٹورزم کی وہ پوٹنشل موجود ہے کہ جس سے استفاد ہ کرکے ہم علاقے میں پچاس فیصد بے روزگار نوجوانوں کو ا ن کے گھر کی دہلیز پر روزگار فراہم کرسکتے ہیں۔ انہوں نے کہاکہ عالمی سطح پر مشہور ومعروف دو ٹریکنگ روٹس یارخون ویلی میں موجود ہیں اور یہ علاقہ سیاحوں کے لئے جنت ہے مگر اس جنت تک رسائی کے لئے سڑک ندارد۔
زراعت کے شعبے کے ماہر اختر اکبر شاد نے کہاکہ مستوج سے بروغل تک کا علاقہ زرعی لحاظ سے کئی خصوصیات کا حامل ہے اور خصوصاً سیب اس علاقے کی پہچان ہیں اور حال ہی میں چیر ی کے باغات بھی لگائے جارہے ہیں جبکہ بروغل اور اپر یارخون میں لوگ کاشت کاری نہیں کرتے بلکہ علاقے کی موسمی حالات کو سامنے رکھتے ہوئے یاک پال کر نقد رقم حاصل کرتے ہیں لیکن سڑک کا مسئلہ درپیش ہونے سے جہاں پھل کی مارکیٹنگ مشکل ہے وہاں فروخت کے لئے جانوروں کو بھی مارکیٹ تک نہیں پہنچاسکتے اور باہر سے آئے ہوئے تاجر من مانے نرخوں پر پھل اور جانور ان سے لے جاتے ہیں۔ انہوں نے کہاکہ خراب سڑکوں کی وجہ سے ٹرانسپورٹیشن کا کرایہ بھی ذیادہ آتا ہے جس کی وجہ سے یہاں کے کسان اور مویشی پال حضرات بیچ، کیمیائی کھاد، زرعی ادویات بھی خریدنے کی استطاعت بھی گرجاتی ہے۔

سڑک کے نہ ہونے پر صحت کے شعبے کی زبون حالی پر حاجی کمال نے اظہار خیال کرتے ہوئے کہاکہ ڈلیوری کیس میں ہسپتال منتل کئے جانے کے دوران ہر سال درجنوں خواتین موت کے منہ میں چلی جاتی ہیں جبکہ یہی حال اپنڈکس کے مریضوں کا ہے جس کے پھٹ جانے سے راستے میں ہی دم توڑ جاتے ہیں۔ان سڑکوں پر مریضوں کو ہسپتال لانے پر ان کی بیماری یا زخم کی شدت میں مزید اضافہ ہوتا ہے۔
ا نہوں نے کہاکہ اسی خراب سڑک کی وجہ سے ڈاکٹر اور پیرامیڈیکل اسٹاف بھی ان علاقوں میں آنے سے کتراتے ہیں اور نتیجتاً ان علاقوں میں ڈاکٹروں کی سو نہیں تو نوے فیصد اسامیاں خالی ررہتی ہیں۔

اس موقع پر اس بات بھی زور دیا گیاکہ مستوج پل سے لے کر یارخون تک مین روڈ کا متبادل سڑک کا انتظام بھی کیا جائے تاکہ کسی بھی قدرتی آفات کی صورت میں اسے ہنگامی طورپر استعمال کیا جاسکے۔ فورم میں شریک حضرات نے زور دے کرکہاکہ مستوج سے بروغل تک کا علاقہ کنگ میکر ہے جہاں لوگ آپس میں اتحادواتفاق کا مظاہر ہ کرتے ہوئے ایک ہی امیدوار کو جتوانے میں کامیاب ہوتے ہیں اور اس دفعہ ایم این اے عبداللطیف اور ایم پی اے ثریا بی بی کو بھاری اکثریت سے اس علاقے میں ووٹ دے کر ان سے امیدیں وابستہ کئے ہوئے ہیں کہ وہ دونوں مل کر اس علاقے میں سڑک کو اولین فوقیت دے دیں۔

اب تک پنجاب سے چترال لائی جانے والی 3492ٹن گندم کی خریداری براہ راست کسانوں سے کی جاچکی ہے، 3900 روپے فی 40کلوگرام گندم کی قیمت خرید ہے جبکہ قیمت فروخت اب بھی 4600روپے فی 40کلوگرام برقرار ہے۔ڈی ایف سی ارشد حسین،

چترال ( نمائندہ چترال ٹائمز ) لویر چترال میں محکمہ خوراک کی طرف سے گندم کی خریداری کا عمل شروع ہوچکا ہے اور اب تک پنجاب سے یہاں لائی جانے والی 3492ٹن گندم کی خریداری براہ راست کسانوں سے کی جاچکی ہے۔چترال شہر میں واقع دنین کے مین گودام میں مقامی میڈیا کو تفصیلات بتاتے ہوئے ڈسٹرکٹ فوڈ کنٹرولر ارشد حسین اور اسسٹنٹ فوڈ کنٹرولر ریاض احمدنے کہاکہ اس سال صوبائی حکومت نے براہ راست کسانوں سے گندم خریدنے کا فیصلہ کیاتھا جس کے تحت کسان اپنے گندم کی پیدوار کو محکمہ خورا ک کی کسی بھی گودام میں پہنچائے گا جہاں کوالٹی کی چھان بین کے بعد اس سے گندم خریدا جارہا ہے۔ انہوں نے کہاکہ صوبائی حکومت نے ہر ضلع کی سطح پر ضلعی انتظامیہ، محکمہ زراعت اور دوسرے اسٹیک ہولڈروں پر مشتمل پروکیورمنٹ کمیٹی تشکیل دی ہے جوکہ کوالٹی اور کوانٹٹی دونوں پر نظر رکھتے ہیں۔ انہوں نے کہاکہ چترال میں 3900روپے فی 40کلو گرام یعنی 97روپے فی کلوگرام کے حساب سے گندم کی قیمت خرید مقرر کی گئی ہے۔ انہوں نے کہاکہ عوام میں پائی جانے والی ایک غلط فہمی کی نشاندہی کرتے ہوئے کہاکہ 3900 روپے فی 40کلوگرام گندم کی قیمت خرید ہے جبکہ قیمت فروخت اب بھی 4600روپے فی 40کلوگرام برقرار ہے۔ ڈی ایف سی نے کہا کہ تاریخ میں پہلی مرتبہ ضلعی لیول پر کسان سے براہ راست گندم خریدی جارہی ہے جس سے صوبائی خزانے کو مجموعی طور پر اربوں روپے کی بچت ہوگی جبکہ چترال جیسے دورافتادہ اضلاع میں گندم کی ٹرانسپورٹیشن کی سوفیصد بچت ہورہی ہے۔ انہوں نے کہاکہ اس وقت چترال کے لئے گندم کی پروکیورمنٹ کی حد 9000ٹن مقرر کی گئی ہے۔ اس موقع پر کمیٹی کے رکن محکمہ زراعت کے ڈپٹی ڈائرکٹر رفیق احمد نے کہاکہ گندم کی کوالٹی کو سائنسی خطوط پر چیک کیاجارہاہے جبکہ گندم کے دانوں کے اندر نمی کی موجودگی کا پتہ لگانے کے لئے بھی مشین استعمال کی جارہی ہے۔ کمیٹی کے ممبر اور فلور ملز ایسوسی ایشن کے صدر گل بہار خان بھی اس موقع پر موجود تھے اور گندم کی خریداری کے طریقہ کار پر اطمینان کا اظہار کیا۔

ہزہائینس پرنس کریم آغا خان کی صاحبزادی شہزادی زہرہ کا چترال لوئیر کا دورہ ، ائیرپورٹ پر پرتباک استقبال ، اے۔کے۔ڈی ۔این کے مختلف اداروں کا دورہ

چترال ( نمائندہ چترال ٹائمز ) ہزہائی نس پرنس کریم آغا خان کی صاحبزادی Princess Zahraہفتے کے روز دو روزہ نجی دورے پر گلگت سے چترال پہنچ گئی۔ چترال ائرپورٹ پر مہتر چترال اور ایم پی اے فاتح الملک علی ناصر نے ایکٹنگ ڈپٹی کمشنر لویر چترال انور اکبر خان اور ڈی پی او افتخار شاہ کے ہمراہ ان کا پرتپاک استقبال کیا۔ اس موقع پر انہوں نے چترال میں ہیلتھ اور ایجوکیشن سمیت دوسرے سیکٹرز میں آغا خان ڈیویلپمنٹ نیٹ ورک کی خدمات کو سراہتے ہوئے ان کا شکریہ ادا کیا اوران ترقیاتی سرگرمیوں کو جاری رکھنے کی استدعا کی۔Princes Zahra اس دورے میں آغاخان ہیلتھ سروس کےdiagnosticسنٹر، آغا خان ایجنسی فار Habitatکے ریجنل آفس میں ایمرجنسی اوپریشن سنٹر اور سرٹ کا دورہ کیا جہاں ان کو بریفنگ دی گئی ، شہزادی زہرہ نے اکاہ آفس کے لان میں پودا بھی لگایا ، جس کے بعد آغا خان ہائر سیکنڈری سکول سین لشٹ کا دورہ کیا۔ جہاں سے اسلام آباد روانہ ہوگئی، ائیرپورٹ پر سرکاری حکام کے ساتھ اسماعیلی کمیونٹی کے ذمہ داروں نے ان کو رخصت کیا۔جبکہ اس سے قبل اپرچترال میں بونی میڈیکل سٹرکا دورہ بھی کیا ۔

چترال گول نیشنل پارک میں پہلی مرتبہ مارخور کا عالمی دن منایا گیا

چترال (نمائندہ چترا ل ٹائمز) اس سال اقوام متحدہ کے جنرل اسمبلی سے 24مئی کو مارخور کا عالمی دن قراردئیے جانے کے بعد پہلی مرتبہ چترال میں یہ دن منایا گیا جس کے لئے چترال گول نیشنل پارک کے کور زون میں ایک تقریب منعقدہوئی جس میں جنگلی حیات کی کنزرویشن کے لئے کام کرنے والی سول سوسائٹی کے فعال کارکنان اور سرکاری حکام نے شرکت کی۔ تقریب کا انتظام چترال گول نیشنل پارک وائلڈ لائف ڈویژن ا ور چترال گول کنزرویشن ایسوسی ایشن نے مشترکہ طور پر کیا تھا جس میں رسمی طور پر کیک کاٹنے کے بعد چترال میں مارخوروں کی آبادی کے صورت حال اور ایکو سسٹم میں اس جانور کی اہمیت پر روشنی ڈالی گئی۔

اس موقع پر پارک ایسوسی ایشن کے صدر سلیم الدین، وائلڈ لائف ڈویژن کا نمائندہ محمد علی، چترال پریس کلب کے صدر ظہیر الدین اور دوسروں نے کہاکہ چترال میں کنزرویشن کمیونٹی کو یہ اعزاز حاصل ہے کہ 1980ء کے عشرے میں معدومیت کے خطرے سے شکار مارخور کی آبادی اب چار ہزار سے تجاوز کرگئی جبکہ صرف چترال گول نیشنل پارک میں اس کی آبادی ڈھائی ہزار کے لگ بھگ ہے۔ انہوں نے حکومت پاکستان کی کوششوں کو سراہتے ہوئے کہاکہ اقوام متحدہ کے جنرل اسمبلی میں 2مئی کو ایک قرارداد کے ذریعے 24مئی کو مارخور کا عالمی دن قرار دلوانا ایک عظیم کامیابی ہے جوکہ قابل ستائش ہے جس سے اس جانور کی کنزرویشن میں بین الاقوامی اور علاقائی سطح پر کاوشوں کو یکجا کرنے میں مدد ملے گی۔

ا نہوں نے کہاکہ اس کی ماحولیاتی اہمیت کے پیش نظر اسے پاکستان کی قومی جانور کی حیثیت بھی حاصل ہے جوکہ آزاد کشمیر، بلوچستان اور گلگت بلتستان کے ساتھ ساتھ خیبر پختونخوا کے علاقے کالام سوات، کوہستان اور چترال میں پایا جاتا ہے۔ انہوں نے کہا کہ چترال میں اس کی کنزریشن میں محکمہ وائلڈ لائف نے ویلج کنزرویشن کمیٹی کے ماڈل پر عمل پیر اہے جس کی وجہ سے کمیونٹی اس کی تحفظ میں دلچسپی لیتی ہے۔ا نہوں نے کہاکہ چترال گول نیشنل پارک مارخوروں کا سب سے بڑا ہبیٹاٹ (مسکن) ہے اور اس عالمی کویہاں منانے سے اس کی اہمیت واضح ہوجاتی ہے۔

جوائنٹ سیکریٹری کمیونیکشن اور این ایچ اے  حکام کا چترال بونی مستوج شندور اور کالاش ویلی روڈ کا معائنہ، ہر ماہ پراگراس ریویو میٹنگ منعقد کرنے کا فیصلہ

چترال (نمائندہ چترال ٹائمز) گزشتہ دنوں میڈیا میں نیشنل ہائی وے اتھارٹی کے چترال شندور روڈ پراجیکٹ کی کوتاہیوں کی نشاندہی کافوری نوٹس لیتے ہوئے فیڈرل سیکریٹری آف کمیونیکیشن علی شیر محسود کی ہدایت پر جائنٹ سیکرٹری کمیونیکشن بشارت احمد نے جنرل منیجر این ایچ اے خیبر پختونخوا،تنویر اسحاق، کنسلٹنٹ کمپنی نیسپاک کی ٹیم اور پراجیکٹ ڈائریکٹروں کے ہمراہ سائٹ کا دورہ کیا۔ ٹیم کے ارکان نے میڈیا کے نشاندہی کردہ مقامات کاموقع پر جاکر دورہ کرکے جائزہ لیا۔ بعدازاں ڈپٹی کمشنر لویر چترال محمد عمران خان کے دفتر میں جوائنٹ سیکریٹری کمیونکیشن اورڈپٹی کمشنر کے زیر صدارت روڈ پراجیکٹ کے بارے میں اجلاس منعقد کی گئی جس میں این ایچ اے کے ممبر نارتھ بھی زوم کے ذریعے شریک ہوئے۔ اس موقع پر تمام صورت حال کا تفصیل سے جائزہ لیتے ہوئے پراجیکٹ کی عملدرامد میں تکنیکی خامیوں اور خرابیوں کو دورکرنے اور کام کی رفتار میں بھی تیزی لانے کے لئے لائحہ عمل طے کرتے ہوئے ماہانہ بنیادوں پر ریویو میٹنگ منعقد کرنے کا فیصلہ کیا گیا۔ جنرل منیجر این ایچ اے تنویر اسحاق نے اب تک کے پراگرس کے بارے میں شرکاء کو پریزینٹیشن دی۔ اجلاس میں اس بات پر زور دیا گیا کہ کام کی کوالٹی میں کو ئی سمجھوتہ نہیں ہوگا،

اس موقع پر بتایا گیا کہ اس روڈ کےحوالے سے کنسٹرکشن کمپنی کے تمام بقایا جات ادا کردیے گئے ہیں، اور جہاں جہاں روڈ ترکول بچھانے کے لئے ہموار کیا گیاہے وہاں پر ترکول بچھانے کا کام شروع کیا جائیگا، جبکہ پرائیویٹ زمینات کی لینڈ ایکوزیشن کا عمل تیز کیاجائیگا، اس موقع پر مستوج آرسی سی پل بھی زیر بحث آیا جہاں گزشتہ سال دریا ئے چترال میں بہاو کے نتیجے میں پانی اسکی حفاظتی دیواروں کو نقصان پہنچایا تھا ، اجلاس میں اس پل کو دریا کی کٹائی سے بچانے کےلئے فوری اقدامات اُٹھانے اورپانی کی بہاو سے پہلے حفاظتی پشتے تعمیر کرنے کی بھی ہدایت کی گئی، اور ساتھ بونی کے مقام پر سڑک کی کٹائی اور بلاسٹنگ کا ملبہ دریائے چترال میں گرنے کے باعث پانی کا رخ بونی کی طرف ہوگیا ہے جس سے بونی کو نقصان پہنچنے کا خدشہ ہے لہذا دریائے چترال سے ملبہ ہٹانے کی فوری اقدامات کی بھی ہدایت کی گئی ۔اجلاس میں مائننگ ڈیپارٹمنٹ کے حوالے سے ایشوز کو بھی فوری حل کرنے کےلئے اے۔ڈی ۔ کو ہدایت دی گئی،

اجلاس میں چترال ایون کالاش ویلی روڈ کے حوالے سے بھی شرکاء کو ابتک کے پراگرس کے بارے میں اگاہ کرتے ہوئے بتایا گیا کہ اس روڈ کے پیکج ون کے تمام زمینات کے معاوضہ ادا کردیے گئے ہیں،اور تعمیراتی کام جاری ہے،۔ تاہم پیکج ٹو میں بجلی کے کھمبے اور پانی کے پائپ لائن کو ہٹانے کے لئے بھی اقدامات کئے جارہے ہیں، اجلاس میں فیصلہ کیا گیا کہ ان تمام کاموں پر پراگرس ریویو میٹنگ جون کے پہلے ہفتے میں دوبارہ منعقد ہوگی۔اجلاس میں پی ڈی این ایچ اے، ظہیر الدین، اے۔آر۔ای، نیسپاک محمد جنید، اسسٹ کمشنر ہیڈ کوارٹر محمد عاطف، عامر زیب اے ڈی این ایچ اے، ودیگر بھی موجود تھے۔

 آفاق کے زیر اہتمام پبلک سکولوں میں نمایاں کردار ادا کرنے والے اساتذہ کی حوصلہ افزائی کیلئے  ،ٹیچر آف دی ائیر ایوارڈ  کی تقریب

چترال (نمائندہ چترال ٹائمز) ڈپٹی کمشنر چترال لوئر محمد عمران خان نے کہا ہے ۔ کہ بچے مستقبل ک سرمایہ ہیں ۔ ان کو ملازم بنانے کیلئے نہیں ایک اچھا انسان بننے کیلئے پڑھائیں ۔ اور معیاری تعلیم فراہم کریں ۔ تاکہ بعد میں پچھتانا نہ پڑے ۔ معیاری تعلیم کی فراہمی میں آفاق کا بہت بڑا کردار ہے ۔ ان خیالات کا اظہار انہوں نے بدھ کے روز چترال کے ایک مقامی ہوٹل میں ایسوسی ایشن فار اکیڈمک کوالٹی ( آفاق ) کے زیر اہتمام 2023۔24 میں پبلک سکولوں میں نمایان کردار ادا کرنے والے اساتذہ کی حوصلہ افزائی کیلئے منعقدہ (ٹیچر آف دی ائیر ایوارڈ ) کی تقریب سے خطاب کرتے ہوئے کیا ۔ اس تقریب میں چترال میں 72 سکولوں کے 83 مردو خواتین اساتذہ موجود تھے ۔ جبکہ بڑی تعداد میں مہمانوں نے شرکت کی ۔ ڈپٹی کمشنر نے کہا ۔ بچوں کے شاندار مستقبل کیلئے والدین سے زیادہ اساتذہ کا مثبت کردار انتہائی اہم ہے ۔ اور یہ امر قابل تعریف ہے ۔ کہ آفاق معیاری تعلیم کی فراہمی اور بچوں کے نقسیات کو سمجھنے اور ان کو ملک کیلئے ایک کارآمد شہری بنانے کیلئے کام کر رہا ہے ۔ پاکستان اور چترال کے بچے بہت باصلاحیت ہیں ۔ صرف ان کومعیاری تعلیم اور بہتر رہنمائی کی ضرورت ہے ۔ عبداللہ شاہ شہاب نے اس تقریب کی نظامت کے فرائض انجام دی۔

سنئیر ائریا منیجر آفاق ذوالفقار علی خان نےتقریب میں شرکت پر مہمانوں اور اساتذہ کا شکریہ ادا کیا ۔ اور کہا ۔ کہ آفاق چترال میں معیاری تعلیم کی فراہمی ، نصاب سازی اور بچوں کی ہم نصابی سرگرمیوں کو ابھارنے کیلئے مختلف پروگرامات کاانعقاد کرتی ہے ۔جس میں سکولوں کو اچھی تعلیمی کارکردگی پر ایواراد دینے ، کوئز مقابلے ، اورکئی دیگر پروگرام شامل ہیں ۔ این سی ایچ ڈی کے سابق ڈائریکٹر محمد افضل نے کہا ۔ کہ جس طرح ایک نفیس اور مضبوط عمارت کی تعمیر کیلئے مضبوط بنیاد کی ضرورت ہوتی ہے ۔ اسی طرحل معیاری تعلیم تب ہی کوئی بچہ حاصل کر سکتا ہے ۔ جب بچے کی پرائمری ایجوکیشن اچھی ہو ۔ اس لئے پرائمری کلاسوں کے اساتذہ کی ذمہ داری بہت ہی اہمیت کی حامل ہے۔ اور یہ بہت مشکل کام ہے ۔ انہوں نے چترال کے ماحول میں معیاری تعلیم کی فراہمی کیلئے آج بھی ریسرچ کرنے کی ضرورت پر زور دیا ۔

آر پی ایم آفاق ملاکنڈ ڈوژن ماجد علی شاہ نے اپنے خطاب میں کہا ۔ کہ استاد کا پیشہ نہایت محترم ہے ۔ یہی وجہ ہے اللہ پاک کے رسول صل اللہ علیہ وسلم نے بھی اپنا تعارف استاد کے طور پر کیا ہے ۔ انہوں نے کہا ۔ کہ موجودہ وقت میں کتابیں تو بہت سے لوگ پڑھتے ہیں ۔ لیکن سوشل اور مارل ڈویلپمنٹ نہیں ہے ۔ جاپان کے پاس ایٹم بم نہیں ہے ۔ لیکن ان کا ایک اخلاقی معیار ہے ۔ کہ پوری دنیا کے لوگ ان پر اعتماد کرتے ہیں ۔ تقریب کے دوران نمایان کارکردگی کا مظاہرہ کرنے والے 70 سکولوں اور 83 اساتذہ کو شیلڈ اور سرٹفیکیٹ دیے گئے ۔ جو کہ ڈپٹی کمشنر چترال لوئر محمد عمران خان ، وائس پرنسپل کامرس کالج چترال پروفیسر وجیہ الدین ، پروفیسر حسام الدین ، فرید احمد رضا مئیر چترال ، پرنسپل سنٹینل ماڈل سکول چترال شاھد جلال ، صحافی محکم الدین ، مسٹر ذوالفقار علی AKES ،ڈائریکٹر (ر) این سی ایچ ڈی محمد افضل ، محمد اسماعیل سیکرٹری ،اقرار الدین پرنسپل حرا سکول ایون ،صحافی سید نذیر حسین شاہ،عطا حسین اطہر ایجوکشنسٹ ، سعادت اللہ سی ایس ایس آفیسر ، اسدالرحمن ،ماسٹرٹرینر آفاق ،پرنسپل آئیڈئیل سکول کوغذی عتیق الرحمن ، اے ڈی او احمد الدین ،انعام اللہ اور پرنسپل زاہد الدین کے ہاتھوں اساتذہ میں شیلڈ اور سرٹفیکیٹ تقسیم ہوئے ۔

ڈپٹی کمشنر لوئیر چترال محمد عمران کے زیر صدات نیشنل امیونائزیشن ڈیز کی تیاریوں کے حوالے سے اجلاس

چترال (نمائندہ چترال ٹائمز ) 3سے 7جون تک جاری رہنے والی سب نیشنل امیونائزیشن ڈیز (ایس این آئی ڈی) کی تیاریوں کے سلسلے میں ڈسٹرکٹ پولیو ایریڈیکیشن کمیٹی کا اجلاس ڈپٹی کمشنر لویر چترال محمد عمران خان کے زیر صدارت منعقدہوا جس میں ڈسٹرکٹ ہیلتھ افیسر ڈاکٹر فیاض رومی نے مہم کے لئے تیار کردہ پلان شرکاء کے ساتھ شئیر کیا جس کا تفصیل سے جائزہ لیا گیا۔ اس موقع پر بتایاگیاکہ لویر چترال میں یہ مہم صرف سات یونین کونسلوں ارندو، عشریت، دروش ون، دروش ٹو، ایون اور شوغور، گرم چشمہ میں چلائی جائے گی جس کے لئے 181موبائل ٹیمیں اور 13فکسڈ ٹیمیں اور کئی ٹرانزٹ ٹیمیں تشکیل دی گئی ہیں۔ اس موقع پر ڈی سی محمد عمران خان نے کہاکہ صوبے کے مختلف اضلاع میں پولیو وائرس کی موجود گی کے بعد صورت حال تشویش ناک ہوگئی ہے جس میں معاشرے کا ہر فرد اپنا بھرپور حصہ ڈال دے اور اس بات کویقینی بنائی جائے کہ پانچ سال سے کم ایک بچہ بھی پولیو کے قطرے پینے سے محروم نہ رہ جائے۔ انہوں نے علاقے کے مشران کے نام خصوصی پیغام دیتے ہوئے کہاکہ اس قومی کاز کے لئے پولیو ٹیموں کو مکمل سپورٹ کرے تاکہ وطن عزیز کے خوبصورت چہرے سے اس مہلک بیماری کا داغ مکمل طور پر اور ہمیشہ کے لئے مٹ جائے۔ اس موقع پر ایڈیشنل ڈی سی (فنانس اینڈ پلاننگ) انور اکبر، ڈی ایس پی چترال سجاد حسین، ڈبلیو ایچ او کے نمائندہ ڈاکٹر اسد، ڈسٹرکٹ خطیب مولانا فضل مولیٰ اور دوسرے موجود تھے۔

اپرچترال، این ایچ اے کے خلاف احتجاج اور نعرہ بازی پر بونی کے تقریبا 90افراد کے خلاف ایف آئی ار درج

اپر چترال ( نمائندہ چترال ٹائمز ) اپر چترال کے ہیڈ کوارٹر بونی میں این ایچ اے کے خلاف احتجاجی مظاہرہ اور نعرہ بازی پر بونی کے سرکردہ رہنماوں سمیت تقریبا90افراد کے خلاف ایف آئی ار درج کرلیا گیا ہے، بونی کے عوام سراپا احتجاج ہیں، ان کا کہنا ہے کہ بونی مستوج شندور روڈ پر کام کے دوران پچھلے سال این ایچ اے ٹھیکہ دار نے بڑی مقدار میں بلاسٹنگ کے بعد پہاڑی ملبہ دریا میں گرا کرپانی کے بہاؤ میں رکاؤٹ ڈالی تھی جس کی وجہ سے پانی کا رخ بونی کی طرف ہوگیا ہے اور دریا سے متصل زمینوں کی کٹائی شروع ہوچکی ہے۔اور قیمتی زمینات دریا بررہورہے ہیں۔
این ایچ اے کی غفلت کی طرف بار بار توجہ دلانے اور متعلقہ حکام کی یقین دہانیوں کے باوجود دریا سے ملبہ نہ ہٹانے پر بونی کے مقامی افراد نے گزشتہ دنوں بونی چوک میں جمع ہوکر نعرے بازی کی جس کی وجہ سے انہیں ایف آئی آر میں نامزد کیا گیا ہے۔

ایف آئی آر کے مطابق چئیرمین فیض الرحمان، محمد جاوید، محمد پرویز، منیجر اعظم اور دیگر 80 سے90 مقامی افراد کے خلاف اپر چترال پولیس نے دفعہ 147 149،اور 341کے تحت ایف آئی آر درج کیا ہے۔ایف آئی آر میں محمد جاوید پر الزام لگایا گیا ہے کہ انہوں نے اپنی تقریر کے دوران آزاد کشمیر میں حالیہ دنوں ہونے احتجاج کی مثال دی جسے ایف آئی آر میں قابلِ مواخذہ فعل قرار دیا گیا ہے۔اخری اطلاع تک ملزمان میں سے کسی کی گرفتاری عمل میں نہیں لائی گئی ہے۔