چترال ( نمائندہ چترال ٹائمز) ہفتے کے دن شام 7بجے کے قریب ڈسٹرکٹ ہیڈ کوارٹرز ہسپتال چترال کے ساتھ متصل سی اینڈ ڈبلیو ڈیپارٹمنٹ کی بلڈنگ میں اچانک آگ لگ گئی جس سے دفتر کے گارڈ روم کو نقصان پہنچا جبکہ چترال پولیس کے جوانوں نے فوری طور پر موقع پر پہنچ کر ریسکیو 1122کی فائربریگیڈ گاڑیوں کی مدد سے بہت ہی جلد آگ پر قابو پانے میں کامیاب ہوگئے جس سے آگ پھیل کر ہسپتال اور کامرس کالج کے ہاسٹل کو اپنی زد میں نہ لے سکا۔ اس موقع پر موجودلوگوں نے جان فشانی سے آگ بجھانے کے کام میں حصہ لینے پر چترال تھانہ کے ایس ایچ او سجا د حسین اور ان کے ساتھ اے ایس آئی نورشاہدین، محمد اسرار، جان باز، شہزاد علی، نصاب علی اور سیف الدین اور ٹی ایم اے کے فائر فائٹنگ اسٹاف قادر کی کارکردگی کو زبردست سراہا جبکہ ریسکیو 1122کی فائربریگیڈ کے ڈرائیور فداء الرحمن کو اطلاع ملنے کے چند منٹوں کے دوران موقع پر پہنچنے پر بھی داد دئیے گئے۔ آتشزدگی کی وجہ فوری طور پر معلوم نہ ہوسکا جوکہ دفتر کے گارڈ روم سے بھڑک اٹھی۔

چترال (نمائندہ چترال ٹائمز ) پی ٹی آئی ضلع لویر چترال کے نامزد صدر، چترال چیمبر آف کامرس اینڈ انڈسٹری کے صدر اور سرحد چیمبر آف کامرس اینڈ انڈسٹری کے کورونا کوارڈینیشن کمیٹی کے رکن سرتاج احمد خان کی طرف سے چیف منسٹر کے کمپلینٹ پورٹل میں شکایت درج ہونے کے بعد فوری طور پر چیف سیکرٹری کے دفتر سے متعلقہ حکام کو چترال کے لویر اور اپر اضلاع کے لئے مختلف سامان کی ترسیل کا حکم جاری کردیا گیا ہے۔ گزشتہ روز سرتاج احمد خان نے چترال کے دونوں اضلاع اور خصوصاً ڈسٹرکٹ ہیڈ کوارٹرز ہسپتال چترال میں کرونا وائرس سے نمنٹے کے لئے متعلقہ سازو سامان کی فراہمی میں غیر معمولی تاخیر کی شکایت کی تھی۔

درین اثناء سرتاج احمد خان نے محکمہ صحت کے حکام کے ساتھ مسلسل رابطے میں ہیں اور اب تک دونوں اضلاع کو ابتدائی طور پر 24اور 26مارچ کو فی ضلع 1000دستانے، 160عدد W-160 فیس ماسک، 550عام فیس ماسک، 40ہینڈ سنیٹائزر، 50عدد ڈنگری، 20گوگلز، 5عدد یو ٹی ایم اور 2000لیٹکس دستانے بھیجوادئیے گئے ہیں جبکہ ڈسٹرکٹ ہیڈ کوارٹرز ہسپتال سمیت دونوں اضلاع میں محکمہ صحت کو ان کی ضروریات کے مطابق سامان پیر کے دن تک روانہ کئے جائیں گے۔ سرتاج احمد خان نے بتایاکہ وہ محکمہ صحت کے سیکرٹریٹ اور ڈائرکٹوریٹ میں متلقہ افسران کے ساتھ رابطے میں ہیں تاکہ چترال جیسے دورافتادہ علاقے سے اس مہلک وائرس کو دور رکھا جاسکے۔سرتاج احمد خان نے سامان کی فراہمی اور ترسیل کے سلسلے میں ایڈیشنل ڈائرکٹر جنرل ہیلتھ ڈاکٹر نیاز، پروکیورمنٹ کے ہیڈ ڈاکٹر اکرام، ڈپٹی سیکرٹری (ایڈمن) ڈاکٹر کامران اور وزیر صحت کے نامزد کردہ فوکل پرسن حسن درانی، ڈپٹی ڈائرکٹر عامر رفیق کی کوششوں کا ذکر کیا ہے۔ انہوں نے چترال میں ڈاکٹر وں کی کمی کو پورا کرنے کے لئے یقین دہانی کرنے کی حکومتی قدم کو سراہا ہے۔ چترالی عوام کے نام اپنے پیغام میں انہوں نے کہا ہے کہ وہ وائرس کے خلاف جنگ میں حکومت کے ساتھ مکمل تعاون کرتے ہوئے ہدایات پر مکمل عمل کریں اور انتہائی ضرورت کے بغیر گھر سے باہر نہ آنے کو یقینی بنائیں۔

بونی (چترال ٹائمزرپورٹ ) ممبر صوبائی اسمبلی مولانا ہدایت الرحمن کے ساتھ شاہ سعود ڈپٹی کمشنر اپر چترال نے ہفتہ کے دن دوسرے اضلاع سے آئے ہوئے مسافروں‌کیلئے قائم قرنطینہ سنٹر کا دورہ کیا . اس موقع پر محمد ریاض خان اے،سی مستوج ، معظم خان ایڈیشنل اسسٹنٹ کمشنر مستوج اور سب ڈویژنل پولیس آفیسر مستوج بھی موجود تھے۔ وہ قرنطینہ میں موجود لوگوں سے ملے۔ ان کی خیریت دریافت کی اور دستیاب سہولیات کا جائزہ لیا اور تمام سہولیات بشمول بسترے، کھانے پینے کا انتظام اور تمام تر سہولیات کو تسلی بخش پایا اور انتظامات کو مزید بہتر کرنے کے حوالے سے احکامات جاری کیے۔ ایم پی اے نے بھی مسافروں کے لئے بنائے گئے تمام سہولیات کو تسلی بخش قراردیا۔
ان عافیت گاہوں میں گلگت سے آئے ہوئے 21لوگ موجود ہیں جن کو لاسپور میں بنائے گئے عافیت گاہ شفٹ کرنا چاہتے تھے مگر ا انہوں نے یہ کہہ کر وہاں جانے سے انکار کئے کہ یہاں سہولیات سے مطمئن ہیں اور مکمل طور پر فارغ کرنے تک وہ یہاں خوشی سے رہنا چاہتے ہیں۔

کورونا صورتحال،
اپنی جانوں کی پرواہ کئے بغیر خدمات انجام دینے والے اہلکاروں کی ہر ممکن حوصلہ افزائی کی جائے گی، وزیر اعلی
تجارتی مراکز کو بند رکھنے پر مالکان اور خود کو گھروں تک محدود کرنے پر عوام کا مشکورہوں، محمود خان
.
پشاور(چترال ٹائمزرپورٹ ) وزیر اعلی خیبر پختونخوا محمود خان نے کورونا صورتحال کے پیش نظر صوبے کے کمزور طبقے کے لئے ریلیف پیکیج کا اعلان کرنے کے بعد اس وائرس کے خلاف فرنٹ لائن پر لڑنے والے طبی عملے اور دیگر ملازمین کے لئے بھی خصوصی پیکیج کی منظوری کا عندیہ دیتے ہوئے کہا ہے کہ صوبائی حکومت اپنی جانوں کی پرواہ کیے بغیر لوگوں کو اس وبا سے محفوظ کرنے کے لئے دن رات خدمات انجام دینے والے ملازمین کی حوصلہ افزائی کے لئے انہیں خصوصی پیکیج دینے پر سنجیدگی سے غور کر رہی ہے۔
.
یہاں سے جاری اپنے ایک بیان میں وزیر اعلی نے کورونا کے خلاف اس جنگ میں فرنٹ لائن پر لڑنے والے ملازمین بشمول طبی عملے، ریسکیو اہلکار، پولیس اور دیگر ملازمین کو اصل ہیرو قرار دیتے ہوئے کہا ہے کہ صوبائی حکومت ان کی شبانہ روز خدمات کو انتہائی قدر کی نگاہ سے دیکھتی ہے۔ صوبائی حکومت حکومت ان ملازمین کی تحفظ اور ان کی حوصلہ افزائی کے لئے ہر ممکن اقدامات اٹھائے گی۔ انہوں نے کہا کہ وہ ذاتی طور پر فرنٹ لائن پر خدمات انجام دینے والے ان ملازمین کے حوصلے اور انسانی خدمت کے جذبے پر فخر محسوس کرتے ہوئے اس یقین کا اظہار کرتے ہیں کہ وہ قوم کے لئے اپنی گرانقدر خدمات کا یہ سلسلہ آنے والے دنوں میں اسی جوش اور جذبے کے ساتھ جاری رکھیں گے۔ وزیر اعلی نے مزید کہا کہ اگر خدانخواستہ دوران ڈیوٹی کوئی بھی اہلکار خود اس وبا سے متاثر ہو کر اپنی جان گنوا بیٹھتا ہے تو حکومت ان کے اہل خانہ اور ان کے بچوں کے مستقبل کو محفوظ بنانے کے لئے ہر ممکن مدد فراہم کرے گی۔
.
وزیر اعلی نے حکومتی کی طرف سے جاری کردہ احتیاطی تدابیر پر عمل کرتے ہوئے تجارتی مراکز بند رکھنے پر مالکان اور خود کو گھروں تک محدود رکھنے پر عوام کا شکریہ ادا کرتے ہوئے کہا کہ انشااللہ ہم سب مل کر اس وباء کو شکست دینے میں ضرور کامیاب ہونگے۔

تورکہو(نمائندہ چترال ٹائمز) استارو تورکہو کے مقام پرلکڑی کا پل ٹوٹنے سے ڈمپر گاڑی نمبر3953 سینکڑوں‌فٹ نیچے نالہ میں جاگری۔جس کے نتیجے میں ڈرائیور موقع پر جان بحق ہوگیا ہے۔یہ سب تحصیل تورکہو کو ضلع سے ملانے والا واحد پل تھا جو ٹوٹنے سے دونوں اطراف کے لوگ محصور ہوگئے ہیں۔ مقامی پولیس کے مطابق جان بحق ڈرائیور افتحار احمد ولد بشیر احمد سکنہ چکاری سوری ضلع لوئیر دیر تورکہو روڈ کے تعمیراتی ٹھیکہ دار کے ساتھ کام کررہا تھا۔ مقامی لوگوں‌نے لاش نالہ سے نکال کرتحصیل ہیڈکوارٹرہسپتال بونی منتقل کردیاہے جہاں سے آبائی علاقہ روانہ کردیا جائیگا. یادرہے کہ گاڑی میں‌صرف ایک ڈرائیورہی سوار تھا. مقامی لوگوں‌کے مطابق پل انتہائی بوسیدہ ہوگیا تھا باربارحکام بالا کی نوٹس میں لانے کے باوجود کوئی شنوائی نہیں ہورہی تھی اورآج نتیجہ یہ نکلا کہ ایک قیمتی جان چلی گئی اورلاکھوں‌کا مالی نقصان بھی ہوگیا.

مستوج(نمائندہ چترال ٹائمز)ضلعی انتظامیہ اورصوبائی حکومت کی طرف سے ٹرانسپورٹ پرپابندی کے باوجود آج درجنوں‌مسافرمختلف گاڑیوں‌میں مستوج پہنچنے پرپولیس نے دھرلیا. اورانٹری کے بعد سب کو چھوڑ دیا گیا . اس موقع پرمسافروں‌نے چترال ٹائمزڈاٹ کام کو بتایا کہ وہ پنڈی، اسلام آباد ودیگرعلاقوں سے ارہے ہیں اورانتہائی مشکل سفرطے کرکے مستوج پہنچنے ہیں. ان کا بتانا تھا کہ وہ مختلف ٹھیکہ داروں کے ساتھ یا دکانوں میں کام کررہے تھے جب تمام کام بند ہوئے توانھیں بھی مجبورعلاقہ چھوڑنا پڑا. مسافروں‌میں طلباء بھی تے. انھوں نے بتایا کہ وہ پانچ دنوں کا اذیت ناک سفرکرکے یہاں‌پہنچے ہیں . ان میں سے بعض نے ایک دن دیر میں گزارا، بعض کو ٹنل کے اندررات گزارنی پڑی ، اوربعض دروش، زیارت اوربعض کو جنالی کوچ میں بھی دو دن تک قرنطینہ میں رکھا گیا اورانھوں‌نے تحریری طور پر لکھ کردے آئے ہیں‌کہ وہ گھرمیں‌بھی آئسولیشن میں رہیں گے.مسافروں‌کا تعلق بریپ، یارخون ویلی اورلاسپورسے تھا. اخری اطلاع کے مطابق مستوج تھانے میں سب کی انٹری کے بعد انھیں چھوڑدیا گیا اوریہ ہدایت دی گئی کہ وہ پندرہ دن تک الگ رہیں گے.

چترال (نمائندہ چترال ٹائمز) چترال میں اب تک کروناوائرس سے مشتبہ قراردیکرپشاورریفرکئے ہوئے مریضوں کے ٹیسٹ نیگیٹورپورٹ ہوئے ہیں . گزشتہ دنوں پرکوسپ سے تعلق رکھنے والے شجاع الرحمن جو کراچی سے چترال آرہا تھا چترال پہنچنے پر مشتبہ قراردیکرپشاورریفرکیا گیاتھا ان کا ٹیسٹ رپورٹ نیگیٹوآیا ہے اسی طرح دو دن پہلے جغورشوت سے تعلق رکھنے والے حنیف کو بھی اسی خدشے میں‌پشاورریفرکیا گیا تھا آج ان کا ٹیسٹ بھی نیگیٹورپورٹ ہوئی ہے . جس پرچترال میں‌خوشی کی لہردوڑ گئ ہے . یادرہے کہ ان سے پہلے بھی غوروپرکوسپ سے تعلق رکھنے والے مریض کابھی نیگیٹو آیا تھا اسی طرح تنیوں‌کیس نیگٹیو آئے جو چترال کیلئ انتہائی خوشی کی بات ہے .

چترال (نمائندہ چترال ٹائمز) چترال کو کرونا وائرس سے دوررکھنے کے لئے چترال کی سیاسی قیادت ایک پیج پر آگئی اور جمعہ کے روز چترال کے ایک مقامی ہوٹل میں وزیر اعلیٰ خیبر پختونخوا کے معاون خصوصی برائے اقلیتی امور، وزیر زادہ ایم پی اے کی دعوت پر آل پارٹیز اجلاس میں ایم این اے مولانا عبدالاکبر چترالی اور مختلف سیاسی جماعتوں کے نمائندوں محمد حکیم ایڈوکیٹ، مولانا عبدالسمیع اور حاجی عیدالحسین نے حکومت سے مطالبہ کیا کہ اگرچہ دوسرے اضلاع میں جزوی طور پر لاک ڈاؤن جاری ہے لیکن چترال کی مخصوص جغرافیائی حالات اور یہاں علاج معالجے کی سہولیات کی فقدان اور عام لوگوں کی مالی استطاعت کم ہونے کی وجہ سے یہاں مکمل طور پر لاک ڈاؤن کیا جائے تاکہ اس وائرس کے پھیلاؤ کی کو ئی ممکنہ صورت اور خطرہ موجود نہ رہے۔ایک متفقہ قرار داد میں مزید مطالبہ کیا گیاکہ غیر ضروری طور پر ایک جگہ سے دوسرے جگہ نقل وحمل کی حوصلہ شکنی کی جائے اور اس سلسلے میں حکومت کی طرف سے اعلان کردہ اقدامات پر سوفیصد عملدرآمد کیا جائے اور دفعہ 144پر بھی مکمل عملدرآمد کیا جائے جوکہ اس وقت ناگزیر تھی۔ قرارداد میں کہا گیا ہے کہ چیکنگ پوائینٹ کو لواری ٹنل سے باہر نکلنے کے فوراً بعد کسی مقام پر قائم کیا جائے اور اس بات کو یقینی بنائی جائے تا کہ ان کے علاوہ کسی دوسرے کو نہ ضلعے میں داخل ہونے نہ دیا جائے۔ صوبائی حکومت کو چاہئے کہ بین الاضلاعی پسنجر ٹرانسپورٹ(inter-districts passengers transport)پر سوفیصد عملدرامد کو یقینی بنائی جائے جبکہ اس وقت ہر روز پشاور اور اسلام آباد سینکڑوں مسافروں کا چترال پہنچ جانا ایک سوالیہ نشان ہے۔ لواری ٹنل کے علاوہ اپر اور لویر چترال کے اضلاع میں داخل ہونے کے تمام دروں اور راستوں پر کڑی نظر رکھی جائے تاکہ کوئی بھی ان دروں یا راستوں سے چترال میں داخل نہ ہوسکے۔ سیاسی نمائندوں نے مزید مطالبہ کیا کہ لواری ٹنل سے چترال میں داخل ہونے والے اشیائے خوردونوش اور ادویات کی گاڑیوں میں ڈرائیوروں اور کلینروں کے علاوہ کسی کو ان گاڑیوں میں سفر پر پابندی لگادی جائے اور ایسی گاڑیوں کے ڈرائیوروں کے خلاف کاروائی کی جائے۔ انہوں نے حکومت کی طرف سے دہاڑی والے طبقے کے لئے حکومت کی طرف سے اعلان کردہ ریلیف پیکج کو اصل حقداروں تک پہنچانے کے لئے شفاف میکانزم بنانے کا مطالبہ جس میں نشاندہی کے کام میں آئمہ مساجد اور سو ل سوسائٹی کے ممتاز افراد کو شامل کئے جائیں۔قرارداد میں مزید مطالبہ کیا گیا کہ چترال میں خدمات انجام دینے والے تمام ڈاکٹروں، پیرامیڈیکل اسٹاف، پولیس اور لیوی فورس کے جوانوں کی تحفظ کے لئے مطلوبہ سازوسامان مہیاکرتے ہوئے ان کی تحفظ کو بھی یقینی بنائی جائے۔ اس موقع پر چترال میں اب تک COVID-19کے حوالے سے پیدا شدہ صورت حال سے موثر طور پر نمٹنے پر لویر اور اپر چترال کے ڈپٹی کمشنر صاحبان، ڈسٹرکٹ پولیس افیسر صاحبان، کمانڈنٹ چترال سکاوٹس، ڈسٹرکٹ ہیڈ کوارٹرز ہسپتال کے انتظامیہ کے ساتھ ساتھ رفاہی اداروں الخدمت فاونڈیشن اور آغا خان ہیلتھ سروس چترال کی خدمات کو سراہا گیا۔

اپرچترال (چترال ٹائمزرپورٹ) ڈپٹی کمشنر اپر چترال شاہ سعود کی ہدایت پر اپر چترال اور لوئیر چترال کے حد بندی شا چرکے مقام پر لیوی چیک پوسٹ کا قیام عمل میں لایا گیا۔ کرونا وائیریس سے پیدا شدہ صورتِ حال کے تناظر میں جمعرات کے دن ایڈیشنل ڈپٹی کمشنر اپر چترال محمد عرفان الدین، ایڈیشنل اسسٹنٹ کمشنر مستوج معظم خان، ایس ڈی پی او مستوج دیگرحکام کی موجودگی میں اپر اور لوئیر چترال کے حدبندی ”کھنونگیر دیرو بوہت شا چر“ کے مقام پر لیویز چیک پوسٹ کا باقاعدہ افتتاح کیا گیا۔
یاد رہے کہ لوئیر چترال کی طرف سے پہلے ہی لیوی چیک پوسٹ قائم کیا گیا ہے۔لیوی چیک پوسٹ کی قیام کا مقصد موجودہ صورتِ حال سے نمٹنے اور کرونا وائریس سے بچاو میں اختیاطی تدابیر اپنانے میں مدد حاصل کرنا ہے۔چیک پوسٹ پر موجود لیویز روزانہ کے بنیاد پر مسافروں کے امد و رفت کی ریکارڈ اور اعداد و شمار مرتب کرکے ڈپٹی کمشنر اپر چترال کو پیش کرینگے۔ ان اعداد و شمار کی روشنی میں لایحہ عمل ترتیب دی جائیگی۔اس سلسلے میں گزشتہ دونوں سے باہر سے انے والے مسافروں کے اعداد و شمار مرتب کرکے باقاعدہ طور پر انہیں قرنطینہ سنٹر(عافیت گاہ) میں رکھے گئے ہیں۔ ابتدائی طور پر ان کے تعداد 107 تک بتائی جاتی ہے۔ تا ہم وقت کے ساتھ ان میں اضافہ ہونے کا امکان ظاہر کیا جا رہا ہے۔
کرونا وائریس سے بچاو کے اختیاطی تدابیر اور لوگوں میں شعور اجاگر کرنے میں انتظامیہ اپر چترال کوشش کررہی ہے اس سلسلے لوگوں کوہدایت دی جارہی ہے کہ مجبوری کے علاوہ گھروں سے باہر نہ نکلیں۔ اور بعض لوگوں کو قانون شکنی پر موقع پر سزا دی اور انہیں متنبہ کیا گیا کہ ائیندہ کسی قانون شکن کو برداشت نہیں کیا جائے گا۔لوگوں میں شعور اجاگر کرنے کے لیے جگہ جگہ سنیٹائزر اور ماسک تقسیم کیے گئے۔ بعد میں ڈگری کالج خاندان میں کرونا سنٹر کا دورہ کیا جہاں ڈپٹی کمشنر اپر چترال شاہ سعود،ڈی۔پی۔او اپر چترال ذولفقار تنولی،سنئیر میڈیکل آفیسر ڈاکٹر سردار نواز پہلے سے انتطامات کا جائزہ لینے موجود تھے۔جہاں مختلف انتظامات کا تفصیلی جائزہ لیا گیا۔ ڈپٹی کمشنر اپر چترال موقع پر ہر قسم کے بہتر سہولیات فراہم کرنے کی ہدایت جاری کی اور عافیت گاہوں میں موجود لوگوں کی خیر یت دریافت کی۔ اس موقع قرنطینہ سنٹر دوسرے تحصیلوں تک بڑھانے پر بھی غور ہوا۔اور باہمی مشاورت سے فیصلہ ہوا۔ کہ دوسرے ضلع سے ائیے ہوئے ہر مسافر کو حفاظتی اقدامات کے طور پر ہر صورت قرنطینہ سنٹر پر رکھا جائے گا۔ تاکہ کسی کوتاہی کی بنا کوئی بڑا مسلہ پیش نہ ائیے۔ اور گھر گھر پریشانی نہ ہو۔یہاں یہ بات قابل ذکر ہے کہ اس وقت تک اپر چترال کے کسی بھی ہسپتال بشمول ہیڈ کوارٹر ہسپتال بونی کوئی ٹیسٹنگ کِٹ موجود نہیں نہ اسکرینینگ کا کوئی نظام ہے۔جو کہ سب سے بڑا مسلہ ہے۔

چترال ( نمائندہ چترال ٹائمز) ڈی پی او چترال وسیم ریاض خان نے ضلع لوئرچترال میں کرونا وائرس سے بچاؤ کے بارے میں عوامی آگہی مہم تیز کردی ہے جس میں مختلف پولیس اسٹیشنوں کے حدود میں میگافون کے ذریعے اور مقامی باشندوں سے ملاقات کرکے انہیں اس مہلک وائرس کے بارے مکمل تفصیلات سے آگاہ کردیا جارہا ہے۔ اس مہم کے دوران پولیس افسران نے دوردراز دیہات میں عوام کو بتایا کہ اس موذی مرض سے بچاؤ نہایت آسان ہے لیکِن علاج بہت زیادہ مشکل۔ انہوں نے بتایا کہ ہم اپنے گھروں کے اندر اپنے آپ کو محدود کرکے ہی اس جان لیوا وائرس کو شکست سے دو چار کر سکتے ہیں۔ دریں اثناء مقامی لوگوں نے چترال پولیس کی کارکردگی کو سراہتے ہوئے ان کے دئے ہوئے ہدایات پر عملدرآمد کی یقین دھانی کرائی۔

چترال(نمائندہ چترال ٹائمز)کرونا وائرس کی پھیلاو کے خدشے کے پیش نظرٹرانسپورٹ کی بندش کی وجہ سے چترال سے تعلق رکھنے والے مسافر مختلف شہروں میں انتہائی مشکلات کاشکارہیں، قُرم باراینڈ شندورایریاڈویلپمنٹ آرگنائزیشن مستوج کے چیئرمین سعادت جان نے صوبائی اور وفاقی حکومتوں سے اپیل کی ہے کہ پشاور اور اسلام آباد میں پھنسے ہوئے سینکڑوں چترالی باشندوں کو یا تواسکریننگ کے بعد سفر کرنے کی خصوصی اجازت دی جائے یا انہیں قیام و طعام کی سہولیات فراہم کی جائیں جو کہ کھلے آسمان تلے رہنے پر مجبور ہیں۔ مقامی میڈیا سے گفتگو کرتے ہوئے انہوں نے کہا کہ کرونا وائرس سے بچاؤ کے لیے ٹرانسپورٹ کی بندش سے ان شہروں میں چترالی باشندے انتہائی کسمپرسی کا شکار ہیں جن میں محنت مزدوری کرنے والے افراد، طلبا وطالبات اوربیماری کے باعث چیک اپ کیلئے آئے ہوئے باشندے شامل ہیں. انہوں نے کہا کہ پشاور اور اسلام آباد میں پھنسے ہوئے چترالی باشندوں کا مسئلہ دوسرے علاقوں کے لوگوں سے بالکل مختلف ہے۔ لہذاحکام بالا کو اس پرسنجیدگی سے غورکرنے کی اشد ضرورت ہے.

چترال (شہریار بیگ سے) کورونا وائیرس سے بچاو کے حوالےسے آگہی مہم کے سلسلے میں ڈرگ انسپکٹر نے چترال کا دورہ کرکے میڈیکل سٹور مالکان کو ایس او پی جاری کردیا. ڈرگ انسپکٹر ضیاء اللہ نے اپنے اسسٹنٹ راحت اللہ کے ہمراہ چترال کا دورہ کرتے ہوئے تمام میڈیکل سٹور مالکان کو یدایات جاری کی اور کہا کہ ادویات خریدنے والوں کو کاونٹر سے دو میٹر کے فاصلے پر رکھ کر کاروبار کریں. انہوں نے سختی سےہدایت کی کہ ڈاکٹری نسخے کے بغیر کسی کو بھی دوائ نہ بیجی جائے خلاف ورزی کرنے والوں سے سختی سے نمٹا جائے گا.اس سلسلے میں جمعرات کے روز انہوں نے ڈی ایچ کیو ہسپتال چترال سے متصل مارکیٹ میں عملی کاروائی کا آغاز کرتے ہوئے میڈیکل سٹورز کے دوکانوں کے سامنے دو میٹر فاصلے پر چونا کشی کرائی ،اس موقع پرمیڈیکل سپرٹنڈنٹ ڈی ایچ کیو ہسپتال چترال ڈاکٹر شمیم بھی موجود تھے.

دروش (چترال ٹائمزرپورٹ ) تحصیل میونسپل ایڈمینسٹریشن دروش کے زیرانتظام بدھ کے دن دروش بازار میں کورنا وائر س کی روک تھام اور صفائی کو مد نظر رکھتے ہوئے جراثم کش اسپرے کئے گیے۔ تحصیل میونسپل آٖفیسر مصباح الدین کی ہدایت پر دروش بازار ، مارکیٹس، آڈہ اور دیگر ایسے علاقہ جات جہاں لوگوں کی آمدورفت ہو، میں جراثیم کش اسپرے شروع کردیا ہےجبکہ درو ش بازار میں جراثیم کش اسپرے مہم جاری رہے گا اور اس مہم کو مرحلہ وار مسلسل جاری رکھا جائے گا۔مصباح الدین نے کورونا وائرس کے پھیلاؤ کی روک تھام اور حفاظتی تدابیر کے سلسلے میں حکومتی ہدایت پر کیے جانے والے اقدامات کے حوالے سے دروش کے شہریوں سے اپیل کی ہے کہ کورونا وائرس ایک وبا ہے اور جو اس وقت تقریباً پوری دنیا کو اپنی لپیٹ میں لے چکی ہے اور جب کبھی کہیں کوئی وبا پھیل جاتی ہے تو وہاں حالت جنگ کی صورتحال پیدا ہوجاتی ہے۔لہذا ماسک کا استعمال اور دیگر ضروری ہدایت پر عمل کر کے کرونا وائرس کی روک تھام میں اپنا کردار ادا کریں۔ مصباح الدین نے اپیل کی ہے کہ بلا ضرورت بازاروں میں گھومنے پھرنے سے گریز کریں کیونکہ احتیاطی تدابیر اختیار کرنے سے کرونا وائرس سے بچا سکتا ہے انھوں نے لوگوں‌کو گھروں‌میں‌رہنے کا مشورہ دیا تاکہ خود بھی وائرس کا شکار ہونے سے محفوظ رہیں اور دوسروں کو اس سے محفوظ رکھا جاسکے.
.

عشریت کے مقام پر کورونا وائرس سے بچنے کیلئے تمام تر ضروری اقدامات مکمل ۔ ٹی ایم او مصباح الدین

دروش ( چترال ٹائمزرپورٹ) ٹی ایم ا ے دروش نےصوبائی حکومت اور ضلعی انتظامیہ کے احکامات کو مد نظر رکھتے ہوئے کرونا وائرس سے بچنے کے لیے چترال کی گیٹ وے عشریت کے مقام پر تمام ضروری اقدامات مکمل کر لیے . ٹی ایم او دروش مصباح الدین مقامی میڈیا سے گفتگو کرتے ہوئے کہا کہ کرونا وائرس کی روک تھام کے لیے دن رات کام کر رہے ہیں اور اس وبا سے نمٹنے کے لیے احتیاطی تدابیر اور کرونا وائرس سے متعلق آگاہی دینا انتہائی ضروری ہے۔ کرونا وائرس کی صورتحال سے نمٹنے کے لیے ضلع انتظامیہ اور ٹی ایم او دروش کی جانب سے مکمل پلان ہے جس میں پہلے مرحلے میں تحصیل دروش کے مقام پر قرنطینہ کو چراثم کش اسپرے، مختلف مقامات پر ہینڈ واش ،صفائی کیلئے صابن،ہینڈ سینیٹائزر وغیرہ مہیا کر رہے ہیں۔ اب چونکہ عشریت کا مقام انتہائی حساس ہے جہاں سے لوگ دوسرے علاقوں سے داخل ہو رہے ہیں ان کی اسکریننگ اور کورو نا وائرس کی روک تھام کیلئے ٹی ایم اے دروش خصوصی انتظا م کر رہی ہے جہاں میڈیکل اور ٹی ایم اے دروش کے اسٹاف ڈیوٹی سر انجام دیتے آرہےہیں۔ مصباح الدین کا مزید کہنا ہے کہ کورونا کے خلاف جنگ صرف اسی صورت میں جیتی جاسکتی ہے کہ جب تما م شہری صفائی کے اصولوں کو اپنا تے ہوئے حکومتی احکامات اور اقدامات پر پوری طرح عمل در آمد کو یقینی بنائیں اس لیے تمام شہری حفاظتی تدابیر کو اختیار کرتے ہوئے کورونا کے خاتمے کیلئے اپنا کر دار ادا کریں۔

چترال (نمائندہ چترال ٹائمز) انتظامیہ خبرپرایکشن لیتے ہوئے چترال ٹاون کے نواحی گاوں جغورکے رہائشی کرونا وائرس سے مشتبہ مریض‌کو ایمبولینس کے زریعے پشاورکیلئے روانہ کردیا ہے . جس کی تصدیق سابق وی سی ناظم اقبال مراد نے کی . انھوں‌نے بتایاکہ مریض کے ساتھ ان کے والد کو بھی بغیرکسی حفاظتی انتظامات کے ایمبولینس میں بیٹھایا گیا.
یادرہے کہ چند گھنٹے پہلے انہی سطورپرکرونا سے مشتبہ مریض حنیف اللہ ولد مرضت اللہ حال جغورچترال کے بارے میں خبرشائع کی گئی تھی جس پر ایکشن لیتے ہوئے ہسپتال اورضلعی انتظامیہ نے ایمبولینس کا بندوبست کرکے مریض کو پشاورکیلئے روانہ کردیا ہے. دریں اثنا مختلف مکاتب فکرنے ضلعی انتطامیہ اورمنتخب نمائندگان سے پرزوراپیل کی ہے کہ صوبائی حکومت نے کرونا وائرس سے نمٹنے کیلئے خطیررقم ریلیز کرنے کااعلان کیا ہے امید ہے کہ ان سے ایمبولینس کا بھی بندوبست کریں گے. تاکہ مریضوں‌کو بروقت ڈاون ڈسٹرکٹ تک پہنچایا جاسکے.

……….
اس خبرکو بھی پڑھیے

بونی (چترال ٹائمزرپورٹ ) شاہ سعود ڈپٹی کمشنر اپر چترال نے ڈی،پی،او اپر چترال، محمد عرفان الدین ایڈیشنل ڈپٹی کمشنر اپر چترال، معظم خان ایڈیشنل اسسٹنٹ کمشنر مستوج ودیگرحکام کے ہمراہ اپر چترال کے مختلف علاقوں میں بنائے گئے قرنطینہ (عافیت گاہوں) کا دورہ کئے اور انتظامات کا جائزہ لیا اور متعلقہ آفیسران کو ہر ممکن سہولیات یقینی بنانے اور کسی بھی کمی بیشی کو پورا کر نے کے حوالے سے ہدایت کی۔ اس سے قبل اپرچترال انتظامیہ نے غیرسرکاری تنظیم چیپس کے چیئرمین جعفردوست کے ساتھ ملکرمختلف علاقوں میں اس وباسے متعلق اگاہی اور اختیاطی تدابیرکے حوالے اعلانات کرتے رہے اورلوگوں‌سے اپیل کی گئ کہ وہ اپنے گھروں‌میں‌رہیں بلاضرورت گھروں‌سے باہرنہ نکلیں .

دریں اثنا ڈپٹی کمشنر اپرچترال شاہ سعود نے کہا ہے کہ زندگی ایک حسین نعمت ہے۔۔ ڈسٹرکٹ ایڈمنسٹریشن اپر چترال اس بات کا عزم کرتی ہےکہ اپر چترال فری کورونا وائرس ڈسٹرکٹ ہو۔یہ تب ممکن ہوگا جب آپ ہمارے ساتھ تعاون کریں گے اور ہمارے تجویز کردہ ہدایات پر عمل کریں گے۔ ائیے سب مل کر اس بات کا اعادہ کریں کہ ہم اس وبا کو شکست دینے کے لئے اپنے گھروں میں رہیں گے۔ کسی سے ہاتھ نہی ملائیں گے۔ کسی سے گلے نہی ملیں گے۔اپنی جان کو بچانے کی خاطر اپنا سب کچھ قربان کریں گے۔ اپنے ضلعی انتظامیہ سے بھر پور تعاون کریں گے۔ہم میں سے جو لوگ باہر ملکوں میں ہیں وہ یہ وبا ختم ہونے تک اپنے اپنے جگہوں میں حفاظتی اقدامات کریں گے اور احتیاطی تدابیر اپنائیں گے۔ اور جو پاکستان کے مختلف شہروں میں مقیم ہیں وہیں رہ کر احتیاطی تدابیر پر عمل کریں گے۔ تب ہم کرونا وائرس سے محفوظ رہ سکتے ہیں.

چترال (نمائندہ چترال ٹائمز) چترال میں کرونا وائرس سے مشتبہ تیسرا مریض آئسولیشن روم ڈی ایچ کیوہسپتال میں‌داخل ہے جس کو پشاورپہنچانے کیلئے ڈی ایچ کیوہپستال چترال میں ایمبولیشن کی سہولت موجود نہیں‌ اورمریض کے ساتھ ان کے رشتہ دار بھی پریشانی سے دوچار ہیں‌. تفصیلات کےمطابق حنیف اللہ ولد میرضت اللہ (ٹیکنیشن) حال جغورچترال میں‌کرونا وائرس سے مشتبہ بخارمیں‌مبتلاہونے پرگزشتہ دن سے آئسولیشن میں ہے ، جہاں ایمبولینس کی سہولت موجود نہ ہونے پر پشاورپہنچانے سے قاصر ہیں ، مریض کے رشتہ دار اورسابق نائب ناظم وی سی واشچ تورکہو اقبال مراد نے چترال ٹائمزڈاٹ کام کو بتایا کہ مریض کراچی سے سفرکرکے گزشتہ دنوں‌ چترال پہنچا تھا جنھیں یہاں پر کرونا وائرس سے مشتبہ بیماری لاحق ہونے پر خود رضاکارانہ طورپرضلعی انتظامیہ کو ٹیلی فون پررابطہ کیا اورڈی ایچ کیوہسپتال چترال میں داخل ہوا. مگرستم ظریفی یہ ہے کہ گزشتہ دو دنوں سے دوضلعوں کی واحد ہسپتال میں ایمبولینس موجود نہیں جس کی وجہ سے انھیں پشاورنہیں‌پہنچایا گیا ہے. انھوں نے بتایا کہ چترال لیویز کےجوان گزشتہ دن سے ہمارے گھروں‌کے سامنے ڈیوٹی پرمامورہیں‌ جسکی وجہ سے جغور اوربکراباد کے تقریبا پانچ گھرانوں‌کے مکین باہر نکلنے سے بھی قاصر ہیں ، انھوں نے ضلعی انتطامیہ سے اپیل کرتے ہوئے کہا کہ مریض کو جلد پشاورپہنچایا جائے تاکہ معلوم ہوسکے کہ مریض میں واقع بیماری ہے یا نہیں‌. اورہمیں بھی تذبذب اورکرب سے نکالاجائے.
.
اس سلسلے میں جب ایم ایس ڈی ایچ کیوہسپتال چترال سے رابطہ کیا گیا توانھوں‌نے بتایا کہ ان کے پاس ایمبولینس نہیں‌ہیں‌. ڈی ایچ کیومیں‌صرف دو ایمبولینس ہیں‌جو حکام بالا کے حکم پرکسی بھی ایمرجنسی کیلئے اسٹینڈ بائی رکھے گئے ہیں.

یادرہے کہ چترال میں‌کرونا سے مشتبہ یہ تیسرامریض ہے جس کوپشاورپہنچانے کیلئے یہاں ایمبولینس موجود نہیں ، جبکہ اس سے پہلے دو مریضوں‌میں‌سے ایک کو آغاخان ہیلتھ سروس اوردوسرے کو الخدمت فاونڈیشن کی ایمبولینسوں‌میں پشاورپہنچائے گئے تھے.

چترال ( نمائندہ چترال ٹائمز ) چترال میں لاک ڈاون کے دوسرے روز کسی بھی مسافر ٹرانسپورٹ کو لواری ٹنل کے راستے چترال میں داخل نہیں ہونے دیا گیا ۔ تاہم کچھ مسافر جو مشکل سے نیچے سے آرہے تھے ۔ پیدل چترال میں داخل ہو گئے ہیں ۔ جنیں سکریننگ کے بعد جانے کی اجازت دی گئی ۔ ضلعی انتظامیہ چترال کی طرف سے سفری پابندی اور دوسری طرف پیر کی رات سے مسلادھار بارش نے چترال شہر اور اطراف میں لاک ڈاون کو کامیاب بنانے میں اہم کردار ادا کیا ۔ بازاروں میں سبزی کی دکانیں اور جنرل سٹور اکا دکا مقامات پر کھلی ہوئی تھیں ۔ جہاں لوگوں کو سودا سلف خریدتے دیکھا گیا ۔ جبکہ زیادہ تر دکانیں اور کاروباری ادارے بند دیکھے گئے ۔ گذشتہ روز کراچی سے آنے والے پرکوسپ مستوج کے رہائشی مشتبہ مریض کو دروش سے واپس ٹیسٹ کے لئے پشاور بھیجنے کی خبر پھیلنے کے بعد مقامی لوگ الرٹ ہو گئے ہیں ۔ اور حساسیت بڑھتی جا رہی ہے ۔ جو کہ اچھی علامت ہے ۔ لیکن سوشل میڈیا اور اخبارات و الیکٹرانک میڈیا سے دور رہنے والے لوگ اب بھی باتوں پر یقین کرنے کیلئے تیار نہیں ہیں ۔ باوجودیکہ ملک کے اندر اور باہر اس کی وجہ سے انسانی جانوں کے ضیاع اور ملکی معاشی گھمبیر صورت حال کا سامنا ہے ۔ کراچی سے آنے والے پر کوسپ مستوج کے شجاع الرحمن ولد فضل الرحمن کو سفر کے دوران ٹمپریچر تھا ۔ جس کی وجہ سے دروش کے سکریننگ پوائنٹ سے ہی الخدمت فاونڈیشن کے ایمبولینس میں اسے واپس پشاور روانہ کر دیا گیا تھا ۔ جہاں سے اس کے ٹیسٹ رزلٹ کا انتظار ہے ۔ اس سے پہلے اسی گاوں ہی سے تعلق رکھنے والے نوجوان مجتبی کے ٹسٹ نیگیٹیو آئے تھے ۔ جنہیں بھی شک کی بنیاد پر ٹسٹ کیلئے پشاور ریفر کردیا گیاتھا ۔ چترال میں لاک ڈاون کی وجہ سے دیہاڑی دار افراد کو شدید پریشانیوں کا سامنا ہے ۔ کہ ایک طرف باہر نکلنے پر کرونا وائرس سے جانی نقصان کا اندیشہ ہے ۔ اور دوسری طرف گھریلو اخراجات کیلئے جتن کئے بغیر زندگی گزارنا مشکل ہے ۔ اس لئے وائرس اوربے روزگاری دونوں نےلوگوں کے ذہنوں پر بوجھ بڑھا دیا ہے ۔ اس بات کا اندازہ لگانا مشکل ہے۔ کہ کرونا کا یہ خوف اور لاک ڈان کا یہ سلسلہ کب تک جاری رہے گا ۔

چترال (نمائندہ چترال ٹائمز) پیر کے دن کرونا وائرس کے دوسرے مشتبہ مریض کو ڈسٹرکٹ ہیڈ کوارٹرز ہسپتال چترال سے پشاور منتقل کردیا گیا جس کی شناخت پرکوسپ مستوج کے شجاع الرحمن ولد فیض الرحمن کے طورپر ہوئی ہے۔ مشتبہ مریض کے بارے میں معلوم ہوا ہے کہ انہیں کراچی سے براستہ لواری ٹنل چترال آتے ہوئے دروش کے مقام پر معمول کی چیکنگ کے دوران ٹریول ہسٹری اور جسم میں پائے جانے والے علامات کی بنیاد پر قرنطینہ میں رکھا گیا تھا جسے بعد میں ڈسٹرکٹ ہیڈ کوارٹرز ہسپتال منتقل کیا گیا۔ ہسپتال کے میڈیکل سپرنٹنڈنٹ ڈاکٹر شمیم کے مطابق مریض کو ٹیسٹ کے لئے پشاور منتقل کرنا پڑا کیونکہ ہسپتال میں مریض سے نمونے حاصل کرنے کے بعد مطلوبہ ٹمپریچر کو برقرار رکھتے ہوئے پشاور کے لیبارٹری پہنچانا ممکن نہ تھاکیونکہ محکمہ صحت کے پاس کولڈ چین کے انتظامات دستیاب نہ تھے۔ دریں اثنا ء چترال کے عوام نے مشتبہ مریض کو دروش سے چترال منتقل کرنے اور چترال میں ٹیسٹنگ کٹ سمیت دوسرے ضروریات کی عدم دستیابی پر تشویش کا اظہار کیا ہے۔
۔۔۔۔۔۔۔۔۔۔۔۔۔۔
دریں اثنا ڈپٹی کمشنر لوئر چترال نوید احمد نے پیر کی رات 7بجے سے لواری ٹنل کو ہر قسم کی موٹر گاڑیوں کے لئے تاحکم ثانی مکمل طورپر بند کرنے کا حکم دیا ہےتاکہ ملک کے دیگر حصوں سے چترال آنے والوں کو روکا جاسکے جوکہ اس ضلعے کو کرونا وائرس سے محفوظ رکھنے کے لئے ناگزیر ہے۔ مقامی میڈیا سے گفتگوکرتے ہوئے انہوں نے ملک کے دیگر حصوں میں رہائش پذیر چترال کے باشندوں پر زور دیا ہے کہ لواری
ٹنل کی بندش کا واحد مقصد اس پسماندہ ضلع کو کروناوائرس سے بچانا ہے اور بچاؤ کی یہی واحد صورت ہے جس میں عوام کا تعاون بھی ضروری ہے۔ انہوں نے کہاکہ اس دوران صرف اشیائے خوردونوش اور ادویات کی گاڑیوں کو صبح 9بجے سے لے کر شام 7بجے تک چھوڑ اجائے گا۔

بونی (ذاکرزخمی) ڈپٹی کمشنر اپر چترال شاہ سعود کی خصوصی ہدایت پر ایڈیشنل اسسٹنٹ کمشنر مستوج معظم خان اور تحصیلدار رب نواز مستوج کا دورہ کرکے کرونا وائریس سے پیدا شدہ صورتِ حال کے سلسلے حفاظتی اقدامات کا جائزہ لیا۔اور موقع پر مختلف اقدامات اٹھا لیے گئے۔ اے۔اے۔سی مستوج کی نگرانی میں ٹیم مستوج بازار کے متعدد دوکانیں بند کرکے سختی سے ہدایت کی کہ تا حکمِ ثانی اگر حکم عدولی کی گئی توسخت ترین کاروائی عمل میں جائیگی کیونکہ اس نازک صورتِ حال میں ہر کسی کو اپنے حصے کا کردار ادا کرنا چاہیے اور متنبہ کیا کہ بازار میں کسی بھی صورت لوگوں کی اجتماع کی اجازت نہیں دی جائیگی۔یاد رہے صوبائی حکومت کے آرڈر کے تحت ایشاء خورد و نوش کے دوکانوں کے علاوہ اکثر دوکانیں سختی سے بند کرنے کی ہدایت ہے۔ اس سلسلے میں انتظامیہ کے افسراں بازار کے علاوہ پی۔ٹی۔ڈی،سی موٹل مستوج،آر۔ایچ۔سی مستوج اور ہائی سکول مستوج کا بھی دورہ کرکے حالات سے اگاہی حاصل کی جہاں پی۔ٹی۔ڈی۔سی اور آر۔ایچ۔سی میں ائیسولیشن سنٹر بنائے گئے ہیں۔ اسی طرح صوبائی حکومت اور ضلعی انتظامیہ کے حکم پر آج بونی بازار مکمل بند رہا جہاں صرف مخصوص دوکانوں کے علاوہ باقی سارے بازار شٹر ڈاوں تھی۔ اس عمل کو یقینی بنانے اور اشیاء خورد ونوش کی سٹاک کا جائزہ لینے کے لیے صدر بازار یونین بونی محمد شفیع بذاتِ خٰود بازار میں موجود رہ کر حالات کی نگرانی کرتے رہے۔ اور اشیاء خورد و نوش کی موجود اسٹاک پر اطمینان کا اظہار کیا۔

چترال (نمائندہ چترال ٹآئمز) کورونا وائرس کی روم تھام کے سلسلے میں ایک ہنگامی اجلاس ڈی سی لوئیر چترال کے آفس میں منعقد ہوا جس میں ایم این اے مولانا عبدالاکبر چترالی،ایم پی اے مولانا ہدایت الرحمن،ڈی سی لوئیر چترال نوید احمد،ڈی پی او لوئیر چترال وسیم ریاض اور میجر عثمان نے شرکت کیں۔

اجلاس میں متفقہ طور ایک لائحہ عمل منظور ہوا۔جس کےتحت آج رات 7 بجے کے بعد لواری ٹنل ہر قسم کی ٹریفک کیلئے بندکرنے کا فیصلہ کیا گیا۔اور کل پورے چترال میں جزوی طور پر لاک ڈاون ہو گا۔آخر میں ڈی پی او لوئیر چترال اور میجر عثمان نے چترال بازار کا دورہ کیا۔اور دفعہ 144 کے خلاف ورزی کرنے والوں کے خلاف کاروائی بھی کیں۔یادرہے کہ لواری ٹنل صرف خوراک اورادویات کی نقل وحمل کیلئے کھلا رہیگا. باقی ہرقسم کی ٹریفک کیلئے غیرمعینہ مدت کیلئے بند کردیا گیا . اجلاس میں تمام شہریوں‌سے اپیل کی گئی کہ وہ اپنے گھروں‌میں رہیں اسی میں ہم سب کی بقاہے.

بونی (ذاکرزخمی)کرونا وائرس سے پیدا شدہ صورت حال کے پیش نظر اپر چترال کی انتظامیہ ڈپٹی کمشنر اپر چترال شاہ سعود کی ہدایت پراپر چترال میں قرنطینہ سنٹرز کا قیام عمل میں لایا گیا۔ ایڈیشنل اسسٹنٹ کمشنر مستوج معظم خان کے زیرِ نگرانی آج گوارنمنٹ بوئز ڈگری کالج بونی سے متصل عمارت کو ائیسولیشن سنٹر میں تبدیل کر کے ا بتدائی طور پر ضروریاتِ کے چیزیں اس میں مہایا کی گئی جن میں بسترے بیڈ شیڈ وغیر شامل ہیں۔ اے۔اے۔ سی کا کہنا تھا کہ ضلعی انتظامیہ اپنی وسائل کے اندر رہتے ہوئے عوام کو ہر ممکن سہولت پہنچانے کے کوشش میں مصروف ہے۔تاکہ پریشانی کی اس الم میں عوام خود کو تنہا نہ سمجھے۔ ملک میں موجود تشویش ناک صورتِ حال کے پیش نظر ہر وہ کام انتظامیہ اپر چترال کریگی جس سے عوام کی فلاح اور خیر ہو۔ اس لیے بین الاضلاع مسافر بردار گاڑیوں کی نقل و حمل پر مکمل پابندی لگائی گئی ہے اور تا حکمِ ثانی ایک ضلعے سے دوسرے ضلعے کوئی بھی مسافر بردار گاڑی نہیں جائیگی البتہ مال بردار اور پرائیویٹ گاڑیوں پراس حکم کا اطلاق نہیں ہوگا۔ جب کہ بازار اور ہوٹل کے سروسز کو محدود کر دیے گئے ہیں۔اس میں صرف ایشاء خورد ونوش کی دوکانیں،سبزی فروش،میڈیسن،آٹا فروش،تندور،چکن،گوشت اور فروٹ کی دوکانیں اس حکم سے مستثنیٰ ہونگے۔ اس حوالے سے تحصیلدار اپر چترال رب نواز نے بتایا کہ پی۔ٹی۔ڈی۔سی بونی اور پی۔ٹی۔ڈی۔سی مستوج اور گرلز ڈگری کالج جنالکوچ کو بھی قرنطینہ مرکز بنا دیئے گئے ہیں۔ اس طرح اپر چترال میں حفاظتی اقدامات کے پیش نظر ڈگری کالج مردانہ بونی میں 15بیڈز، پی۔ٹی۔ڈی۔سی بونی میں 8بیڈز،ڈگری گرلز کالج جنال کوچ15بیڈز اور پی۔ٹی۔ڈی۔سی مستوج میں 20 بیڈز پر مشتمل قرنطینہ سنٹر قائم کیے گئے ہیں۔جو کسی بھی ایمرجنسی کے لیے دستیاب ہونگے۔بعد میں اسسٹنٹ کمشنر مستوج معظم خان اورتحصیلدار رب نواز بونی بازار،جنالکوچ اور کوراغ تک بذاتِ خود جا کر دوکانداروں سے دوکانیں بند کرادی۔انھوں نے اپر چترال کے عوام سے موجودہ حالات کے پیشِ نظر اور اپنی صحت کے خاطر ضلعی انتظامیہ سے بھر پور تعاون کی بھی اپیل کی۔

کراچی (چترال ٹائمزرپورٹ ) چترال کے سابق ڈپٹی کمشنر ارشاد سدھیر نے اپنے ٹیلی فونی پیغام کے زریعے کراچی میں موجود تمام چترالی بہن بھائیوں سے کہا ہے کہ وہ مشکل کی اس گھڑی میں کسی بھی قسم کی مدد کیلئے تیارہے.انھوں‌نے کہا ہے کہ اس وقت کراچی میں موجود جو بھی چترالی بہن بھائی اگر کسی طرح مشکل حالت کا شکار ہیں وہ بلاجھجھک مجھ سے مل سکتا ہے. ہم ان کیساتھ اپنی کسی بھی طرح کی تعاون اور مدد کرنے کوشش کریں گے.
یادرہے کہ ارشاد سدھیرموجودہ وقت میں کراچی ساوتھ میں‌بحثیت ڈپٹی کمشنرتعینات ہیں. ارشاد سدھیرکی اس ہمدردی پر ممبرنیشنل یوتھ اسمبلی انعام اللہ نے اپرچترال کے نوجوانوں‌کی طرف سے ان کاشکریہ اداکرتے ہوئے اس امید کا اظہارکیا ہے کہ وہ آئندہ بھی اسی طرح چترالی عوام کی خدمت میں کسی قسم کی کسرنہیں‌اُٹھائیں‌گے.

چترال (نمائندہ چترال ٹائمز) ملک اورصوبے کے دوسرے حصوں‌کی طرح چترال میں بھی لاک ڈاون رہی ، تما م کاروباری مراکز، مارکیٹس بند رہے، صرف میڈیکل سٹورز اورسبزی کی دکانیں کھلی رہیں، ٹرانسپورٹ معطل رہی، ٹرانسپورٹ آڈے ویران اورسنسان رہے . کسی بھی قسم کی بین الاضلاعی پبلک ٹرانسپورٹ کی اجازت نہیں دی گئی، تاہم پشاورودیگرڈآون ڈسٹرکٹ سے کچھ فلائنگ کوچز میں‌ مسافر چترال پہنچ گئے، چترال پولیس نے گزشتہ دن پکڑے گئے بعض فلائنگ کوجز کو آج چھوڑ دیا گیا اورانھیں متنبہ کیا گیا کہ ٹرانسپورٹ کی پابندی کے دوران اگردوبارہ چترال آنے کی کوشش کی توانکے ساتھ سخت قانونی کاروائی کی جائیگی. فلائنگ کوجز ڈرائیوروں‌کے مطابق انھیں‌ہدایت کی گئی کہ واپسی پرکسی قسم کی بھی سواری نہیں‌ لے جاسکیں‌گے .

یادرہےکہ گذشتہ روز انتظامیہ کی طرف سے سختی سے اس بات کا حکم دیا گیا تھا ۔ کہ بروز اتوار کسی بھی مسافر گاڑی کو ٹنل کے راستے چترال آنے کی اجازت نہیں دی جائےگی۔ جبکہ اتوار کے روز ایک درجن سے زیادہ گاڑیاں مسافروں کو لے کر چترال پہنچ گئے۔ انتظامیہ کی مسلسل تبدیل ہوتی اس رویے کی وجہ سے چترال آنے والے مسافروں کو شدید مشکلات کا سامنا کر نا پڑ رہا ہے ۔اور ضلع سے باہر پھنسے ہوئے مسافر چترال انتظامیہ کے طفلانہ فعل کی وجہ سے تذبذب کا شکار ہیں ۔ ادھر اتوار کے روز پولیس مضافاتی علاقوں میں ٹریفک بزور بند کرنے کی کوشش کرتی رہی ۔ اور اس دوران کئی گاڑیوں کو قبضے میں لے لیا ہے ۔ یہ عمل چترال شہر اور اطراف میں ہوتے رہے۔ ایون میں ٹریفک نہ روکنے پر ایک درجن گاڑیوں کے خلاف پولیس تھانہ ایون نے کاروائی کی ۔ اور اپنی تحویل میں لے لیا ۔ چترال بازار میں ٹریفک نہ ہونے کے برابر رہی ۔جبکہ اطراف میں دکانیں اور بازار کھلے رہے۔ اور لوگ معمول کی خریداری اور کام کرتے رہے۔ جنہیں دیکھ کر یہ کہا جا سکتا ہے ۔ کہ فی الحال لوگوں کو کروناوائرس کے نقصانات کا بالکل اندازہ نہیں ہے ۔ لوئر چترال شہر میں لوگ تقریبا گھروں میں محصور ہو کر رہ گئے ۔ تاہم اپر چترال کے کچھ مقامات سمیت ، گرم چشمہ ،کریم آباد وغیرہ علاقوں میں سادگی سے نوروز تہوار منانے کی اطلاعات موصول ہوئی ہیں۔ جس میں خواتین اور بچوں نے خصوصی طور پر شرکت کی ۔ کرونا وائرس سے بچاو کے حوالے سے کئےگئے اقدامات کی وجہ سے جہاں زندگی کے تمام کام متاثر ہوئے ہیں ۔ وہاں 23مارچ کی تقریبات بھی متاثر ہوئی ہیں ۔ اور چترال بھر میں کسی بھی مقام پر 23مارچ کے حوالے سے کوئی بھی تقریب منعقد نہیں ہوگی ۔ ضلعی انتظامیہ چترال کی طرف سے عوام میں حساسیت پیدا کرنے کیلئے ہر ممکن کوشش کی جارہی ہے ۔ اور ہزاروں کی تعداد میں چترالی باشندے جو دیگر شہروں سے چترال آنے کی کوشش کررہے ہیں ۔ اپنے مقام پر رہنے کی ہدایت کی ہے ۔ درین اثنا چترال کے مختلف مساجد میں کرونا وائرس سے نجات حاصل کرنے کیلئے ختم قرآن شریف کا سلسلہ جاری ہے ۔ ایون میں دو مقامات پر ممتاز عالم دین مولانا کمال الدین اور معروف عالم حافظ خوشولی خان کی قیادت میں ختم یسن شریف کے بعد کرونا سے محفوظ رہنے کیلئے اللہ کے حضور دعائیں مانگی گیئں۔ ڈپٹی کمشنر چترال کے آفس سے موصول شدہ اطلاعات کے مطابق خیبر پختونخوا حکومت کی طرف سے آج رات سے لواری ٹنل کو بند کیا جائے گا۔

چترال(چترال ٹائمزرپورٹ)چیف وارڈن سول ڈیفنس چترال محمد فاروق اقبال نے تمام رضاکاروں کو اطلاع دیتے ہوئے کہا ہے کہ وہ اپنے اپنے علاقوں میں رہتے ہوئے کرونا وائرس کے لئے آگاہی مہم شروع کریں جس میں سب سے پہلے اختیاطی تدابیر کے بارے میں آگاہی پھیلائے اور اپنے علاقے کے تمام علماء اور مساجد کی امام صاحبان سے ملکر اُنکو بھی تاکید کریں کہ وہ آگاہی مہم میں ہمارا ساتھ دیں۔اور حکومت کی طرف سے کی گئی اختیاطی تدابیر اور اقدام کی پاسداری کریں اور اس مہلک وائرس سے اپنے ملک،اپنے علاقے کو ملکربچائیں۔اُنہوں نے کہا کہ کسی بھی ہنگامی صورت حال میں کنٹرول روم نمبر0943-412519 پر رابطہ کریں. اُنہوں نے کہا کہ ہمارا قومی اور اخلاقی فریضہ ہے کہ مل کر اس عظم کو نبھائیں۔

اسلام آباد(چترال ٹائمزرپورٹ) اتوار سے بدھ کے دوران مزید بارشوں کی پیشگوئی کی گئی ۔محکمہ موسمیات سندھ ،پنجاب اور خیبر پختونخوا میں گندم کی فصل کے لیےمزید بارشیں نقصان دہ ہوسکتی ہیں.

اتوار سے پیر کے دوران کوئٹہ، زیارت، ہرنائی، مستونگ، قلعہ عبداللہ، قلعہ سیف اللہ، ژوب، بارکھان، کوہلو، پشین، قلات، چاغی، خضدار، لسبیلہ،آوارن، کیچ گودار،پنجگور،لاڑکانہ، سکھر، جیکب آباد، شکار پور، شہید بینظیر آباد، دادو، حیدرآباد اور کراچی میں تیز ہوائواں اور گرج چمک کے ساتھ بارش کا امکان ہے.
.
پیر سے بدھ کے دوران خیبر پختونخوا اور پنجاب کے تمام اضلاع ، اسلام آباد، گلگت بلتستان اور کشمیر میں تیز ہوائوں اور گرج چمک کے ساتھ بارش اور بعض مقامات پر ژالہ باری کا امکان ہے.
.
کشمیر، دیر، سوات، شانگلہ، بونیر، مانسہرہ، ایبٹ آباد، مردان، پشاور، اسلام آباد/راولپنڈی میں پیر رات سے منگل کے دوران گرج چمک کے ساتھ موسلادھار بارش کی توقع ہے.