گولین ویلی کے سیلاب میں کمی آنے کے ساتھ ہی بحالی کا کام شروع کیا جائیگا۔وزیرزادہ

Posted on July 14, 2020July 14, 2020

چترال (نمائندہ چترال ٹائمز) وزیراعلی خیبر پختونخوا محمود خان کی خصوصی ہدایت پر معاون خصوصی برائے اقلیتی امور وزیر زادہ نے ماشیلیک گولین کے مقام کا دورہ کیا اور وادی سے باہر پھنسے ہوئے لوگوں کو یقین دہانی کرائی کہ انہیں تمام ممکنہ امداد کی فراہمی کے ساتھ ساتھ ریسکیو کے کام میں بھی تیزی لائی جائے گی۔ انہوں نے کہاکہ ضلعی انتطامیہ نے پہلے سے ضروری اشیاء اور ادویات وادی گولین پہنچادی ہیں۔ جبکہ ہنگامی صورتحال سے نمٹنے کے لیے ریسکیو 1122، پولیس اور دیگر ضروری محکموں کے اہلکار چوبیس گھنٹے موقع پر موجود ہیں۔ انہوں نے ضلعی انتظامیہ اور تمام متعلقہ محکمہ جات کے افسران کو ہدایت کی کہ انفراسٹرکچر کی بحالی کاکام سیلاب کی شدت میں کمی آنے کے ساتھ ہی شروع کیا جائے۔ وزیرزادہ نے کہا کہ گزشتہ ماہ گلاف وارننگ کے اجراء کے بعد ضلعی انتظامیہ نے اقدامات لیتے ہوئے تمام ضروری اشیاء وادی پہنچاکر اسٹور کردی تھیں جن میں لائف سیونگ ڈرگز بھی شامل ہیں۔ وزیرزادہ کا کہنا تھا کہ فی الحال وادی میں داخل ہونے یا اس سے باہر نکلنے کے تمام راستے بند ہیں اور ضلعی انتظامیہ کو ہدایات جاری کردی ہیں کہ وادی سے باہر پھنسے ہوئے افراد کے لئے گورنمنٹ ہائی سکول کوغوزی میں قیام وطعام کا بندوبست کیا جائے۔ معاون خصوصی وزیر زادہ نے کہاکہ گزشتہ سال بھی انفراسٹرکچر کی بحالی کے لئے انہوں نے خصوصی طور پر 40کروڑ 7 لاکھ روپے کی منظوری لی تھی اور اس سال بھی اپنی کوشش جاری رکھیں گے۔اس موقع پر ٹی ایم اے۔،پبلک ہیلتھ، ایریگیشن، ریسکیو 1122، پولیس، ڈسٹرکٹ انتظامیہ، کے اہلکاروں سمیت ایس آر ایس پی کے طارق احمد، محکمہ موسمیات کے انچارج منظور احمد اور یواین ڈی پی کے گلاف پراجیکٹ سیدنوید شاہ بھی موجود تھے۔

ہلال احمر کے زیر انتظام چترال ٹاون کے مختلف مقامات پر ہاتھ دھونے کیلئے پانی کی ٹینکیاں نصب

Posted on July 13, 2020July 13, 2020

چترال (چترال ٹائمز رپورٹ)ہلال احمر پاکستان نے کروناوائر س کے خلاف حفاظتی تدابیر،اس سے بچاؤاورآگاہی کے لئے ڈسٹرکٹ ہیڈکواٹرہسپتال چترال سمیت دیگر 7مقامات پر ہاتھ دھونے کیلئے پانی کی ٹینکیاں،واش بیسن اور صابن بھی ر کھنے کا اہتمام کیا ہے۔پیرکے روزاسسٹنٹ کمشنرلوئرچترال آفس کے باہرہاتھ دھونے کے لئے پانی والی ٹینکی اور واش بیسن نصب کر دئیے گئے۔اس موقع پرڈسٹرکٹ سٹلمنٹ افیسرچترال فدا الکریم نے کہاکہ ہلالِ احمر کی اِس حوالے سے خدمات قابل ِ ستائش ہیں اور ہم اْمید رکھتے ہیں کہ آنے والے دِنوں میں بھی ہلالِ احمر طبّی سہولتوں کی فراہمی میں اپنا حصہ ڈالے گا۔ کرونا وائرس کے مقابلے اور اس کی روک تھام کے حوالے سے حکومت ایس اوپیزپرسختی سے عمل کرنے کی ضرورت ہے ماہرین کے تجربات سے مستفید ہو کر عوام الناس میں کرونا وائرس کیخلاف ہلالِ احمر کے رضاکاروں کی بدولت احتیاطی تدابیر کی آگاہی کے مثبت نتائج سامنے آئیں گے۔

۔اس موقع پر ڈسٹرکٹ سیکرٹری پاکستان ہلال احمرچترال شیرنبی نے کہاکہ کروناکے روک تھام اور حفاظتی تدابیرکو مددنظررکھتے ہوئے ڈی ایچ کیوہسپتال سمیت 7 پبلک مقامات پرہاتھ دھونے کے لئے پانی والی ٹینکی اور واش بیسن نصب کر دئیے گئے ہیں اور ساتھ ہی بینرز بھی لگائے گئے ہیں جن پر تحریر کیاگیا کہ کرونا سے بچاؤ کیلئے بار بار ہاتھ دھوئیں تاکہ اس موذی وائرس کو شکست دی جاسکے اور اس مہم سے پیدیل چلنے والے مسافروں اورہسپتال آنے والے حضرات کوباربارہاتھ دھونے میں آسانی ہوگی۔انہوں نے کہاکہ اس سے قبل دروش،چترال اوربونی کے سرکاری ہسپتالوں میں علاج معالجہ پر مامور ڈاکٹرزاور پیرامیڈیکس کیلئے N-95ماسک، پرسنل پروٹیکشن کِٹس اوردیگر پی پی سی کی فراہمی کئے ہیں۔وائرس کے پھیلنے سے بیماری کے ساتھ درپیش چیلنجز سے نمٹنے کیلئے مناسب انتظامات ضروری ہے۔انہوں نے ٹی ایم اے اسٹاف چترال کاشکریہ اداکرتے ہوئے کہاکہ ان سات مقامات پرانسٹالیشن اورپانی بھرنے میں بھرپورمددکی۔انہوں نے مزیدکہاکہ گذشتہ دومہینوں سے ڈی ایچ کیوہسپتال چترال میں ہلال احمرکی جانب سے اسکریننگ کا عمل شروع کیاہے اوراگست کے آخرتک جاری رہے گا۔اس موقع پرایڈمن ہلال احمرچترال کمال الدین اوردیگراسٹاف بھی موجودتھے۔

مئیر چترال کا سالانہ اجلاس، کھوار زبان و ادب کی ترقی میں کلیدی کردار کوسراہا گیا

Posted on July 13, 2020July 13, 2020

چترال (چترال ٹائمزرپورٹ  )مادرٹانگ انیشیوٹیوز فار ایجوکیشن اینڈریسرچ(MIER)چترال کا سالانہ اجلاس گزشتہ دن بکرآباد میں منعقد ہوا جس میں ادارے کے تین سالہ s Strategic Planکے حوالے سےگفت و شنید ہوئی۔ اجلاس کا باقاعدہ آغاز تلاوت کلام پاک سے ہوا جس کے بعد عطاحسین اطہر نے اجلاس کی کاروائی کا آغاز کیا اور مہمانوں کو خوش آمدید کہا۔ ظہورالحق دانش نے اجلاس کے اغراض  ومقاصد کے حوالے سے حاضرین کو آگاہ کیا جس کے بعدفرید احمد رضا نے مئیر چترال کے حوالے سے تفصیلی پریزینٹیشن دی۔

اس موقع پر اپنے خیالات کا اظہار کرتے ہوئے پروفیسر ممتاز حسین ، علی اکبر قاضی ،فخرالدین اخونزادہ ، محمد عالمگیر بخاری، ذوالفقار علی خان، مولانا نثار احمد،ثناء اللہ ثانی، حسن بصری حسن، احسان اللہ احسان،محمد نایاب فارانی ، راحت حسین راحت ، جاوید اختر جواد،انعام اللہ انعام ،انیس الرحمان اور دوسروں نے کہا کہ مئیر چترال گزشتہ دس سالوں سے کھوار زبان و ادب کی ترقی میں کلیدی کردار ادا کرتے آیا ہے جس کے لیے یہ ادارہ  خصوصی دا د کا مستحق ہے۔انہوں نے کہا کہ موجودہ وقت میں زبان و ثقافت کی ترقی و ترویج کے لیے قدم اٹھانا مشکل کا م ہے لیکن مئیر کے جوانوں نے جس ہمت اور حوصلے کے ساتھ اس اہم کام کی انجام دہی میں کردار اداکررہے ہیں وہ قابل ستائش ہے۔شرکاء نے کھوار نثری ادب کی ترقی ، رسم الخظ میں یکسانیت پیداکرنے،کھوار نامہ کا اجراء ،کھوار کلینڈر کی چھپائی ،کثیراللسانی تعلیم کے لیے نصاب سازی  ، درسی کتابوں کی تیاری اورمختلف موضوعات پر  کتابوں کی اشاعت کے لیے مئیر کی کاوشوں کو سراہا۔

واضح رہے MIERچترال مادری زبان میں تعلیم اور تحقیق کا  ایک غیرسرکاری اورغیر منافع بخش ادارہ ہے۔ تنظیم کی بنیاد کا مقصد چترال کے اندر مختلف زبان و ثقافت کی ترویج و ترقی ہے جن پر اب تک کام نہیں ہوا ہے۔ چونکہ کھوار اس علاقے کی سب سے بڑی اور رابطے کی زبان ہے اس لیے تحقیق کا کام مئیر نے پہلے کھوار زبان سے شروع کیاہے۔ اب تک مئیر چترال کے کاموں میں سرفہرست کھوار نامہ کا اجراء، کھوار رسم الخط میں یکسانیت لانا، مادری زبان میں کثیراللسانی تعلیم کے لیے  نصاب  کی تیاری، درسی کتابوں کی اشاعت، چترال کی تاریخ میں پہلی مرتبہ کھوار (بہمنی سال کا تعین کرتے ہوئے) کلینڈر کا اجراء، مختلف ثقافتی اور ادبی موضوعات پر کتابوں کی چھپائی اور ادبی اور ثقافتی موضوع پر ورکشاپس  اور سیمینارز کا انعقاد شامل ہیں۔

گولین ویلی میں سیلاب ؛ دس گھر، مساجد، پائپ لائن،انفراسٹرکچراورکھڑی فصلیں سیلاب میں بہ گئیں

Posted on July 13, 2020July 14, 2020

چترال (نمائندہ چترال ٹائمز) چترال لویر کے ضلعی ہیڈ کوارٹرز سے 20کلومیٹر دوروادی گولین میں گلیشیائی جھیل کے پھٹ جانے کی وجہ سے آنے والی سیلاب (گلاف) نے وادی میں دس گھروں، کئی مساجد، ایک دینی مدرسہ، ایک پن بجلی گھر، ابپاشی اور ابنوشی کے پائپ لائنوں، باجرہ اور جوار کی کھڑی فصلوں کے ساتھ چار پلوں، ایک گاڑی اور تین کلومیٹر سڑکوں پر مشتمل مواصلات کی انفراسٹرکچروں کو بہالے گئی ہے۔

پیر کی صبح آٹھ بجے آنے والی اس سیلاب سے وادی میں واقع پانچ سو سے ذیادہ گھرانے پہاڑوں کے درمیان محصور ہوکر رہ گئے ہیں کیونکہ وادی کو بونی روڈ کے ساتھ ملانے والا واحد سڑک اور چار معلق پل سیلاب برد ہوگئے ہیں جبکہ گولین چار وں طرف پہاڑوں میں گھری ہوئی تنگ وادی ہے۔ وادی میں واپڈ ا کا 108میگاواٹ کا پن بجلی گھر کے ہیڈ ورکس کو نقصان پہنچنے کی وجہ سے بجلی گھر بند کردی گئی ہے۔

گولین کے اوپر پہاڑی سلسلوں میں کئی گلیشائی جھیل واقع ہیں جن میں سے کئی ایک کی پھٹ جانے کی پیشگی وارننگ یو این ڈی پی کی گلوف پراجیکٹ اور محکمہ موسمیات کے ماہرین نے جون کی 19جون کو جاری کردی تھی۔

وزیر اعلیٰ خیبر پختونخوا کے معاون خصوصی برائے اقلیتی امور وزیر زادہ نے کوغوزی گاؤں قریب وادی گولین کوجانے والی سڑک کے ماشیلیک کے مقام کا دورہ کیا اور وادی سے باہر پھنسے ہوئے وادی کے باشندوں کو یقین دلایا کہ ان کو تمام ممکنہ امداد کی فراہمی کے ساتھ ساتھ ریسکیو کے کام میں تیزی لائی جائے گی۔ انہوں نے کہاکہ ضلعی انتطامیہ نے پہلے سے ضروری اشیاء اور ادویات وادی گولین پہنچادی تھی۔ انہوں نے ضلعی انتظامیہ اور تمام متعلقہ محکمہ جات کے افسران کو ہدایات جاری کردی کہ انفراسٹرکچروں کی بحالی کاکام سیلاب کی شدت میں کمی آنے کے ساتھ ہی شروع کیا جائے۔

اس سیلاب سے موری پائین، برغوزی اور کوجو کے لئے ابنوشی اور ابپاشی کے پائپ لائن بھی شدید متاثر ہوگئے ہیں۔

ایڈیشنل ڈپٹی کمشنر لویر چترال حیات شاہ نے بتایاکہ گزشتہ ماہ گلاف وارننگ کے اجراء کے بعد ضلعی انتظامیہ نے ضروری اقدامات لیتے ہوئے تمام اشیاء وادی پہنچاکر اسٹور کردیا تھا جن میں لائف سیونگ ڈرگز بھی شامل ہیں۔ انہوں نے کہاکہ فی الحال وادی میں داخل ہونے یا اس سے باہر نکلنے کے تمام راستے بند ہیں اور ضلعی انتظامیہ نے وادی سے باہر پھنسے ہوئے افراد کے لئے گورنمنٹ ہائی سکو ل کوغوزی میں قیام وطعام کا بندوبست کیا گیا ہے۔

ماشیلیک کے مقام پرمتاثرہ گاؤں موری پائین کے عوامی رہنماؤں نبی خان اور رحمت وزیر شاہ اور برغوزی کے ظفر احمد نے کہاکہ گزشتہ سال بھی 7جولائی کو گلاف کے نتیجے میں ان دیہات کاپائپ لائن گولین کو نقصان پہنچا تھا جس کی بحالی میں چار ماہ لگ گئے اور گاؤں والوں نے اپنی مدد آپ کے تحت کام کیا۔ انہوں نے کہاکہ اگر اس سال بھی تاخیر ی حربہ استعمال ہوا تو وہ بونی روڈ کو بلاک کردیں گے۔ انہوں نے متاثرہ علاقوں میں ایمرجنسی کے نفاذ کا مطالبہ کیا تاکہ بحالی کے کام ترجیحی بنیادوں پر انجام پاسکیں۔

اس موقع پر موجود وزیر اعلیٰ کے معاون خصوصی وزیر زادہ نے انہیں یقین دہانی کرائی اور کہاکہ گزشتہ سال بھی انفراسٹرکچروں کی بحالی کے لئے انہوں نے خصوصی طور پر 40کروڑ 60لاکھ روپے کی منظوری لے لی تھی اور اس سال بھی اپنی کوشش جاری رکھیں گے۔ محکمہ موسمیات کے انچارج منظور احمد اور یواین ڈی پی کے گلاف پراجیکٹ کے سیدنوید شاہ نے ماشیلیک کے مقام پرموجود تھے۔ ان کاکہناتھاکہ اگر گرمی کا سلسلہ جاری رہا تو مزید گلیشیر بھی پھٹ سکتے ہیں۔

چترال میں کورونا وائرس سے متاثرہ افراد کی کل تعداد 293ہوگئی ، 148افراد صحتیاب ،چارجان بحق

Posted on July 12, 2020July 12, 2020

چترال (نمائندہ چترال ٹائمز) چترال کے دونوں اضلاع میں کورونا وائرس سے متاثرہ افراد کی تعداد میں روزبہ روز اضافہ ہوتا جارہاہے ،جہاں عام پبلک اس وائرس سے متاثرہے وہیں پر ڈاکٹرزاور ہیلتھ اہلکار وں کو بھی اس وائرس نے نہیں بخشی ہے ۔ تاہم خوشی کی بات یہ ہے کہ متاثرہ افراد بہت جلد صحت یاب ہورہے ہیں ۔

محکمہ ہیلتھ چترال کے ایک ذمہ دار نے چترال ٹائمز ڈاٹ کام کو بتایا کہ اپر چترال میں کورونا وائس سے متاثرہ افراد کی تعداد 112ہوگئی ہے ۔ جن میں 69 صحت یاب ہوچکے ہیں جبکہ43افراد اب بھی آئسولیشن میں ہیں۔ اپر چترال میں ابتک 723کورونا مشتبہ افراد کا ٹیسٹ کیا گیا جن میں 597افراد کے ٹیسٹ رپورٹ نیگیٹوموصول ہوئے۔اورابھی تک کوئی فوتگی نہیں ہوئی ہے۔

اسی طرح لوئیر چترال میں اب تک 1293کورونا مشتبہ افراد کا ٹیسٹ کیا گیا جن میں1060افراد کا ٹیسٹ نیگیٹو موصول ہوئے جبکہ 181افراد کے ٹیسٹ رپورٹ پازیٹیو موصول ہوئے ۔ اور48ٹیسٹ رپورٹ کا انتظار ہے ۔ جبکہ 79افراد صحت یاب ہوچکے ہیں اور 98افراد آئسولیشن میں ہیں ۔ جبکہ لوئیرچترال میں کورونا وبا سے مرنے والوں کی تعداد چار ہے ۔جن میں دو خواتین اوردو مرد شامل ہیں۔

اسی طرح اپر اورلوئرچترال میں اب تک کورونا وائرس سے متاثرہ افراد کی کل تعداد 293ہوگئی ۔محکمہ ہیلتھ اور انتظامیہ کی طرف سے ایک بار پھر عوام سے اختیاط کی اپیل کی گئی ہے اورساتھ ایس اوپیز پر سختی سے عمل کرنے کی تلقین کی گئی ہے ۔

دروش کا شمالی حصہ گزشتہ دس برسوں سے مسلسل سیلاب کی زدمیں ہے،تباہی سے بچایاجائے۔۔خدیجہ بی بی

Posted on July 12, 2020July 12, 2020

چترال (نمائندہ چترال ٹائمز) عوامی نیشنل پارٹی خیبر پختونخوا کے نائب صدر خدیجہ بی بی نے کہا ہے کہ چترال کامشہور قصبہ دروش کا شمالی حصہ گزشتہ دس سالوں سے چکیدام گول کی وجہ سے مسلسل سیلاب کی خطرے کی زد میں ہے اور ذمہ دار حکومتی اداروں کی غفلت اور نااہلی کی وجہ سے یہ خطرہ ہرسال بڑھتا ہی جارہا ہے اور شمس آباد سمیت دوسرے گاؤں اور سرکاری عمارات سیلاب سے ملیامیٹ ہونے کے قریب ہیں۔

ایک اخباری بیان میں انہوں نے کہا ہے کہ اس برساتی نالے کا سطح اوپر آجانے کی وجہ سے اس کے آس پاس علاقوں میں رہائش پذیر لوگوں کا جینا حرام ہوگیا ہے اور معمولی بارش کے بعد بھی وہ گھر بار چھوڑکر کہیں محفوظ جگہے میں پناہ لینے پر مجبور ہوتے ہیں۔ اے این پی کی صوبائی رہنما خدیجہ بی بی نے اس بات پر افسوس کا اظہار کرتے ہوئے کہا ہے کہ اس نالے کے آس پاس پی ٹی وی براڈ کاسٹنگ سنٹر، گورنمنٹ ہائیر سیکنڈر ی سکول اور محکمہ تعلیم کی ریجنل ٹریننگ سنٹر کی عمارتین اس نالے کی گزرگاہ سے نیچے رہ گئے کیونکہ گزشتہ دس سالوں سے ملبہ مسلسل جمع ہونے کی وجہ سے اس کے سطح میں بھی اضافہ ہورہا ہے۔ انہوں نے کہاکہ گزشتہ دنوں بھی ایک سرکاری ادارے کے اہلکاروں نے سیلاب کے ملبہ کو نالے کے دونوں کناروں میں جمع کرکے موٹر گاڑیوں کی ٹریفک کو آزاد کردیا جس سے اگلی بار سیلاب کا رخ گاؤں کی طرف ہونے کا خطرہ پیدا ہوگیا ہے۔ انہوں نے کہاکہ اے این پی کے ایک صوبائی ذمہ دار کی حیثیت سے انہوں نے متاثرہ مقام کا دورہ کیا تو مقامی لوگوں نے اپنی تشویش سے انہیں آگاہ کردیا ہے اور خدانخواستہ سیلاب کا رخ گاؤں یا سرکاری عمارات کی طرف ہونے پر پہنچنے والی نقصان کا ازالہ کرنے کی ذمہ داری این ایچ اے اورمقامی انتظامیہ پر ہوگی۔ انہوں نے وزیر اعلیٰ خیبر پختونخوا اور وفاقی وزیر مواصلات سے مطالبہ کیا ہے کہ اس نالے کی کم ازکم پندرہ فٹ چینلائزیشن کا حکم دے کر مقامی لوگوں کو سکون سے جینے کا موقع فراہم کریں بصورت دیگر عوامی نیشنل پارٹی سخت قدم اٹھانے پر مجبور ہوگی۔

چترال گول نیشنل پارک کو تباہی سے بچایا جائے، سول سوسائٹی کی پریس کلب کے سامنے احتجاجی مظاہرہ

Posted on July 12, 2020July 12, 2020

چترال (نمائندہ چترال ٹائمز) چترال گول نیشنل پارک میں جنگلی حیات اور درختوں کی غیر قانونی شکار اور کٹائی کے خطرات پر خاموشی برتنے اور کمیونٹی واچروں کو گزشتہ دس ماہ سے تنخواہوں کی عدم ادائیگی سے پیدا ہونے والی صورت حال پر محکمہ وائلڈ لائف کی خاموشی اور غفلت کے خلاف سول سوسائٹی کے نمائندوں نے چترال پریس کلب کے سامنے احتجاجی مظاہرہ کیا اور ایسے حالات پید اکرنے کے ذمہ دار افسران کے خلاف کاروائی کا مطالبہ کیا اور کہاکہ ایک طرف پی ٹی آئی حکومت 15مقامات پر ماڈل نیشنل پارک بنانے کا اعلان کیا ہے تو پہلے سے موجود اور عالمی سطح پر مشہور اس نیشنل پارک کونظر انداز کردیا ہے۔ چترال گول نیشنل پارک سے متصل گیارہ دیہات میں قائم ویلج کنزرویشن کمیٹیوں کی نمائندہ تنظیم نیشنل پارک ایسوسی ایشن کے ذمہ داروں نے نیشنل پارک میں جنگلی حیات اور درختوں کو تحفظ فراہم کرنے کے مطالبات پر مشتمل نعرے لگائے جبکہ ان مطالبات پر مشتمل کتبے بھی اٹھارکھے تھے۔ نمائندہ ایسوسی ایشن کے صدر عالم زیب ایڈوکیٹ اور ویلج صدور حسین احمد، ظفر علی شاہ،ریاض احمد دیوان بیگی، اشفاق احمد،اعجاز احمد، علی خان، مسرور علی شاہ، خورشید احمد، رحمت علیم، عزیز اللہ اور دوسروں نے کہاکہ 1984ء میں نیشنل پارک کے قیام کے وقت مارخوروں کی تعداد 200تھی مگر اب کمیو نٹی کی تعاون کی وجہ سے یہ تعداد چھ ہزار سے تجاوز کرگئی ہے اور دوسرے جنگلی حیات کی تعداد بھی بڑھ گئی ہے اور دیودار کی جنگل بھی پہلے سے ذیادہ رقبے پر پھیل گئی ہے مگر وائلڈ لائف ڈیپارٹمنٹ اپنی ذمہ داری اور متاثرہ دیہات کے ساتھ کی گئی وعدے کو نبھانے میں ناکام ہے جس کی وجہ سے کنزرویشن کا کام خطرے میں پڑ گئی ہے۔ انہوں نے کہاکہ 1998ء میں ورلڈ بنک کی مالی تعاون سے اس نیشنل پارک میں کمیونٹی کی شراکت کے لئے 22کروڑ روپے پر مشتمل انڈومنٹ فنڈ کا قیام عمل میں لایا گیا تھا جس سے ملنے والی آمدنی سے کمیونٹی واچر مقرر کئے گئے اور ویلج کنزرویشن کمیٹیوں نے مختلف ترقیاتی منصوبے بھی سر انجام دئیے۔ انہوں نے کہاکہ اسلام آباد میں کلائمیٹ چینج منسٹری سے انڈومنٹ فنڈ سے سالانہ آمدنی کا حصول اور چترال میں کمیونٹی کو پہنچانا وائلڈ لائف ڈیپارٹمنٹ کے اعلیٰ حکام کی ذمہ داری ہے جس میں وہ گزشتہ دس مہینوں سے ناکام رہے ہیں جس کی وجہ سے 30کے لگ بھگ کمیونٹی واچروں کو تنخواہ کی بندش کی وجہ سے ڈیوٹی دینا بند کردی ہے اور اب نیشنل پارک مکمل طور پر غیر قانونی شکاریوں اور ٹمبر چوروں کے رحم وکرم ہے۔ انہوں نے مطالبہ کیاکہ نہ صرف اسلام آباد سے فنڈز کے حصول اور کمیونٹی واچروں کو ادائیگی کے لئے فوری اور ہنگامی بنیادوں پر اقدامات کئے جائیں بلکہ اس تاخیر کے مرتکب وائلڈ لائف افسران کے خلاف بھی کاروائی کی جائے۔ انہوں نے مطالبہ کیاکہ 18ویں آئینی ترمیم کی روشنی میں اس انڈومنٹ فنڈ کو اسلام آباد سے صوبے اور پھر چترال میں وائلڈ لائف ڈیپارٹمنٹ کو منتقل کیا جائے تاکہ مستقبل میں اس نوعیت کا کوئی مسئلہ پید ا نہ ہو۔ احتجاجی مظاہرہ بعدازاں پرامن طور پر منتشر ہوگئی۔

ضلعی زکواۃ کمیٹی کے چیئرمین کی گاڑی سے منشیات کی برآمدگی کی خبرمن گھڑت ہے۔۔شفیق

Posted on July 12, 2020July 12, 2020

چترال (نمائندہ چترال ٹائمز) اتوار کے روز سوشل میڈیا میں ضلعی زکواۃ کمیٹی کے چیرمین محمد قاسم کی سرکاری گاڑی میں بکرآباد کے پولیس چیک پوسٹ میں تلاشی کے دوران بھاری مقدار میں چرس اور شراب کی برامدگی کی خبر وائرل ہوگئی اور یہ خبر جنگل میں آگ کی طرح پھیل گئی۔ پولیس اسٹیشن چترال کے ایس ایچ او سجا د حسین نے رابطہ کرنے پر سوشل میڈیا میں لگائی گئی اس پوسٹ کو من گھڑت قرارد یتے ہوئے کہا کہ زکواۃ ڈیپارٹمنٹ کی گاڑی کو بکرآباد چوکی پر روک کر تلاشی لینا معمول کی بات تھی لیکن اس گاڑی سے منشیات کی برامدگی کی خبر درست نہیں۔ انہوں نے کہاکہ گاڑی کو چلانے والے پی ٹی آئی کے ایک مقامی رہنما شفیق الرحمن نے بعدازاں تھانے میں آکر سرکاری گاڑی کی تلاشی پر احتجاج کرکے چلے گئے تھے جبکہ انہیں بعد میں اس خبرکے وائرل ہونے کی اطلاع موصول ہوئی۔

دریں اثناء شفیق الرحمن نے چترال پریس کلب میں صحافیوں کو بتایاکہ وہ پی ٹی آئی کے لیبر ونگ کے ملاکنڈ ڈویژن کے جائنٹ سیکرٹری اور ضلعی زکواۃ کمیٹی کے چیرمین محمد قاسم کے پرسنل سیکرٹری کے طور پر کام کررہے ہیں۔ ان کا کہنا تھاکہ اتوار کے صبح وہ اپنے گاؤں اٹانی سے ضلعی چیرمین زکواۃ کی سرکاری گاڑی میں چترال شہر آرہے تھے کہ بکرآباد کے مقام پر پولیس چیک پوسٹ پر ان کی گاڑی کو روک کر ڈیوٹی پر موجود ہیڈ کنسٹیبل نے تلاشی لینا شروع کردیا اور اسی اثناء مخالف سمت سے پی ٹی آئی کے کارکنان آتے ہوئے ان کی گاڑی کی تلاشی دیکھ کر اپنی گاڑی سے اتر گئے اور ان میں سے ایک کو انہوں نے موبائل فون سے تصویر لیتے ہوئے دیکھ لیا تھا۔ ان کا کہنا تھاکہ عین اس تلاشی کے دوران پی ٹی آئی لویر چترال کے صدر سجا د احمد خان کو بھی انہوں نے اس چیک پوسٹ سے گزرتے ہوئے دیکھ لیا تھا جوکہ وہاں رکے بغیر چلے گئے۔ شفیق الرحمن کا کہنا تھاکہ ان کی گاڑی میں کوئی قابل اعتراض چیز یا منشیات نہیں تھے لیکن پارٹی میں ان کے مخالفین نے ان کو بدنام کرنے کے لئے سوشل میڈیا پر پوسٹ لگادی جس کا حقیقت سے دور کا بھی واسطہ نہیں ہے۔

انہوں نے کہاکہ ضلعی صدر سجا د احمد خان اور ضلعی چیرمین زکواۃ کے درمیان اختلافات موجود ہیں کیونکہ ضلعی صدارت کے حصول کے بعد سجاد احمد خان کامحمد قاسم کے ساتھ رویہ بدل گیا ہے جس کے بل بوتے پر وہ صدر بن گئے ہیں۔ ان کا دعویٰ تھاکہ فیس بک کے جس آئی ڈی سے یہ خبر پوسٹ ہوئی ہے، وہ جعلی ہے اور وہ اس کے ذمہ داروں کے خلاف قانونی چارہ جوئی کا حق محفوظ رکھتے ہیں۔

درین اثناء جماعت اسلامی ضلع لویر چترال کے سیکرٹری فضل ربی جان نے کہا ہے کہ زکواۃ کمیٹی کی گاڑی سے منشیات کی برامدگی کی سوشل میڈیا پر خبر وائرل ہونے کی مکمل تحقیقات کی جائے اور اصل صورت حال کو عوام کے سامنے لایا جائے جس میں اگر صداقت ہو تو اس گھناونے کھیل میں ملوث افراد کو قرار واقعی سز ا دی جائے۔ ایک اخباری بیان میں انہوں نے کہاکہ محکمہ زکواۃ کی سرکاری گاڑی سے منشیات برامد ہونے کی خبر پر عوام میں پریشانی کا پھیل جاناقدرتی امرہے اور اگر انکوائری کے نتیجے میں یہ خبر جھوٹ اور من گھڑت ثابت ہوتو بھی ذمہ دار افراد کے خلاف قانون کے مطابق کاروائی کی جائے۔

انصاف و یلفیئر وِنگ ملاکنڈ ڈویژن کے صدر شاہد خان کا دورہ اپر چترال

Posted on July 12, 2020July 12, 2020

اپر چترال (زاکر زخمی) انصاف و یلفیئر ونگ ملاکنڈ ڈویژن کے صدر شاہد خان، سنئیرنائب صدر سلطان حسین جنرل سکرٹری ارشاد حسین اور ایڈیشنل جنرل سکرٹری نابیگ ایڈوکیٹ کے ہمراہ کابینہ سازی کے سلسلے میں اتوار کے روز اپر چترال کے ہیڈ کوارٹر بونی کا مختصر دورہ کیا۔جہاں اپر چترال ضلع کے ضلعی صدررحمت غازی،سنئیر نائب صدر معراج خان،نائب صدر میر جمشید الدین، صدر تحصیل مستوج سردار حکیم،جنرل سکرٹری مستوج سید حبیب اللہ اور دیگر ارکان ان کے استقبال کے لیے موجود تھے۔

تلاوتِ کلام پاک سے میٹنگ کا آغاز ہوا۔تحصیل صدر سردار حکیم ابتدا کرتے ہوئے مہمانوں کو اپر چترال امد پر خوش امدید کہا۔ابتدا میں تعارفی نشست ہوئی اس کے بعد تحریکِ انصاف اپر چترال کے اندرونی مسائل زیر بحث رہی۔ جس میں اپر چترال کابینہ کی نوٹیفکیشن میں غیر ضروری تاخیر سرِ فہرست تھی۔گفتگو میں شریک تمام اراکین کا گلہ اور حدشہ تھا کہ اپر چترال کابینہ کے نوٹیفکیشن میں غیر ضروری تاخیر سے پارٹی کے وقار اور مقبولیت کو شدید نقصان پہنچ رہا ہے۔یہاں کوئی زمہ داری سے کردار ادا کرنے سے قا صر ہے۔جب تک کابینہ کی نوٹیفکیشن نہیں ہوگی پارٹی فعال کردار ادا نہیں کرسکتی اس لیے بالائی زمہ داروں سے نوٹیفکیشن کرایا جائے۔

میٹنگ موجودتحصیل مستوج کے جنرل سکرٹری سید حبیب اللہ نے اپنی تحفظات کا اظہار کرتے ہوئے کہا کہ جو لوگ شروع سے تحریکِ انصاف پر قابض ہیں وہ پارٹی کے لیے کچھ نہیں کیے ہیں بلکہ ذاتی مفادات کے لیے ہمیشہ پارٹی کو استعمال کر رہے ہیں۔وہ علاقے میں پارٹی کی فعالیت کی راہ میں سب سے بڑی روکاوٹ ہیں۔ وہ اپنے اثاثے بنانے میں مصروف ہیں ان کے ثبوت ہمارے پاس ہیں اور یہ ہی لوگ اپر چترال کابینہ کی نوٹیفکیشن کی راہ میں حائل ہیں لہذا پارٹی کے بہتر مفاد میں گزارش ہے کہ۔پارٹی کے بہتر ی کے پیشِ نظر اپر چترال کابینہ کی نوٹیفکیشن جلد از جلد جاری کی جائے تاکہ ورکر اطمینان سے پارٹی کے بہتری کے لیے کردار ادا کر سکے۔

بعد میں ویلفر وِنگ ملاکنڈ کے سنئیر نائب صدر سلطان حسین اور جنرل سکرٹری ارشاد حسین نے بھی خطاب کی اور پارٹی کو ہر قسم منظم اور فعال کرنے اور مسائل حل کرنے میں کردار ادا کرنے کی یقین دہانی کی۔آخر میں صدر ویلفر وِنگ ملاکنڈ ڈویژن شاہد خان نے اپنے خطاب میں کہا کہ ویلفر وِنگ عمران خان کی خصوصی ہدایت پر وجود میں ائی ہے جس کا مقصد معاشرے کی انتہائی نادار اور غریب طبقے کی مسائل سے اگاہی اور ان کے حل میں معاونت ہے۔انہوں نے مزید کہا۔کہ تحریکِ انصاف کا ہر ورکر بااختیار ہے۔اور اختیارات دوسروں سے مانگنے کے بجائے خود کو با اختیار بنادیں۔انھوں نے کہا کہ ورکر کے رائے کا احترام تحریکِ انصاف میں ہے۔ اس میں کوئی دو رائے نہیں کہ وزیر اعظم عمران خان اور وزیر اعلیٰ محمود خان ہمیشہ ورکرز کی رائے کو اہمیت دی ہیں اور دیتے رہینگے۔انہوں نے کہا کہ میں اپنی دورہِ چترال میں اس بات کو شدت سے محسوس کیا کہ اس وقت اپر اور لوئیر چترال میں سب سے اہم مسلہ انٹرنیٹ کا ہے۔جس سے ہمارے بچوں کی مستقبل اور قیمتی وقت ضائع ہورہا ہے۔ اس وقت کرونا کی بنا تعلیمی ادارے بند اور بچے سارے آن لائن کلاسیں لے رہے ہیں۔ اس لحاظ سے ہمارے بچوں کی مستقبل خطرے میں پڑی ہے۔ اس لیے ہمارے ترجیح ہو گی کہ اولین فرصت میں بالائی حکام سے رابطے کرکے اس مسلہ کوجلد از جلد کراسکے۔انہوں نے علاقے میں ناقص انفراسٹرکچر کا ذکر کرتے ہوئے کہاکہ سابقہ نااہل حکمرانوں کی نا اہلی کی وجہ سے چترال میں انفراسٹرکچر تباہی کے دہانے پرہے۔انہیں بہتر بنانے میں حکومت، وقت سنجیدہ ہے۔انہوں نے ورکروں کے حدشات دور کرنے کا وعدہ کیا ساتھ باہمی افہام و تفہیم کے ساتھ جلد ازجلد اپر چترال میں انصاف ویلفر وِ نگ کی کابینہ ترتیب دینے کی ہدایت دی۔ اور اس کام کو انجام تک پہنچانے کے لیے ایک کمیٹی بنائی گئی جو بعد میں اتفاقِ رائے سے جامی اللہ کو ویلفر وِنگ اپر چترال کے لیے صدر اور شہزاد علی کو ویلفر وِنگ اپر چترال کے لیے جنرل سکرٹری مقرر کیے۔

نصرت جبین ڈسٹرکٹ آفیسر سوشل ویلفیئر چترال تعینات

Posted on July 11, 2020July 11, 2020

چترال (نمائندہ چترال ٹائمز) نصرت جبین نے ڈسٹرکٹ افیسر سوشل ویلفیر، اسپیشل ایجوکیشن اینڈ ویمن ایمپاورمنٹ چترال کی حیثیت سے سنھبال لیا جس سے قبل وہ صوبائی ڈائریکٹوریٹ آف اسپیشل ایجوکیشن اینڈ ویمن ایمپاورمنٹ پشاورمیں ڈپٹی ڈائرکٹر کے طور پر کام کررہی تھی۔ وہ اس سے قبل بھی اس اسامی پر کئی سالوں رہ چکی ہیں اور چترال میں سوشل ویلفیر، اسپیشل ایجوکیشن اور خواتین کو بااختیار بنانے کے منصوبوں میں اہم کردار اداکرتی رہی ہیں۔
نصرت جبین ڈسٹرکٹ آفیسر سوشل ویلفیئر،اسپیشل ایجوکیشن اینڈ ویمن ایمپاورمنٹ کے گزشتہ دو سالوں کے دوران اپنی کارکردگی کی بنا پر مختلف اداروں اور حکام سے تعریفی اسناد اور ایوارڈ وصول کرچکے ہیں۔ انھوں نے معذور افراد کی فلاح وبہبود اور خصوصاً اسپیشل بچوں کی تعلیم میں متعدد اقدامات کئے تھے۔ انہوں نے ضرورت مند افراد کے لئے مقامی وسائل کو بروئے کار لاکرڈی ایچ کیوہسپتال چترال میں شیلٹر ہوم قائم کیا جس سے ہسپتال میں داخل مریضوں کے تیمار دار مستفید ہورہے ہیں۔ وہ اس عہدے پر تعینات ہونے والی چترال سے پہلی خاتون افسر ہیں۔

یادرہے کہ اس کے پیش رو خضرحیات کو سوشل ویلفئیر آفیسر ڈی ایچ کیوہسپتال چترال تعینات کردیا گیا ہے ۔

شندور کو متنازعہ بنانا ایک گہری سازش کا ہی نتیجہ ہوسکتا ہے جس سے احتراز کیا جائے۔۔عمائدین چترال

Posted on July 10, 2020July 10, 2020

چترال (نمائندہ چترال ٹائمز) چترال کے عوام شندور چراگاہ کو ہندارپ نیشنل پارک کے ساتھ شامل کرنے کی وفاقی حکومت کی اقدام کو نہ صرف مسترد کرتے ہیں بلکہ اسے کسی بھی صورت قبول کرنے کو تیار نہیں ہیں اور اس کی ڈی نوٹیفکیشن کا پرزور مطالبہ کرتے ہوئے حکومت پر واضح کرتے ہیں کہ گزشتہ دو سو سال کی تحریر شدہ تاریخ سے ثابت اپنی ملکیت سے دستبردار نہیں ہوں گے اور شندور کو متنازعہ بنانا ایک گہری سازش کا ہی نتیجہ ہوسکتا ہے جس سے احتراز کیا جائے۔ جمعہ کے روز چترال پریس کلب میں ایک پرہجوم پریس کانفرنس سے خطاب کرتے ہوئے چترال کے تمام سیاسی جماعتوں اور سول سوسائٹی تنظیموں کے رہنماؤں شہزادہ سکندرالملک، عبدالولی خان ایڈوکیٹ، مولانا جمشید احمد، محمد حکیم ایڈوکیٹ، ایم آئی خان سرحدی ایڈوکیٹ، وقاص احمد ایڈوکیٹ، قاضی نسیم، محمد یوسف شہزاد، زلفی ہنر شاہ، قلندر شاہ، لیفٹیننٹ (ر) شیر اعظم خان اور دوسروں نے وزیر اعظم عمران خان پر زور دیا کہ انہیں حقائق کے منافی مشورے دے کر ہندراپ شندور نیشنل پارک کی منظوری ان سے لے لی گئی ہے جس سے چترال میں سراسیمگی اور بے چینی پھیل گئی ہے کیونکہ شندور چترال کا حصہ ہے اور ہندراپ گلگت بلتستان میں واقع ہے جن کے درمیان 40کلومیٹر کا فاصلہ واقع ہے۔ انہوں نے زور دے کرکہاکہ اقوام متحدہ کی قرار دادوں کے مطابق مسئلہ کشمیر کا حل ہونے تک گلگت بلتستان متنازعہ رہے گااور اس وجہ سے بھارتی خفیہ ایجنسی را مختلف ناموں سے خیبر پختونخوا کی وسیع اراضی کو گلگت بلتستان میں شامل کرکے متنازعہ بنانا چاہتی ہے جس کا اعتراف اگست 2016ء میں بھارت کے وزیر اعظم نریندر مودی نے کیا تھااور حال ہی میں گلگت بلتستان کے علاقے سے کئی بھارتی ایجنٹ گرفتار بھی ہوچکے ہیں۔ انہوں نے شندور چراگاہ کا چترال کی ملکیت ہونے کے ثبوت پیش کرتے ہوئے کہاکہ 1895ء میں انگریز فوج نے جب چترال کی طرف پیش قدمی کی تو شندور چراگاہ کے شروعات میں واقع کاریان گاز کے مقام تک اہالیان گلگت نے ان کے ساتھ سامان کی بار برداری میں مدد دی جبکہ اس مقام سے آگے چترال کے باشندوں نے انگریزوں کی مدد کی اور 20ویں صدی عیسوی کے شروع میں مہتر چترال نے شندور ٹاپ کے مقام پر ریسٹ ہاؤس تعمیر کیا تھا اور یہ بات بھی ریکارڈ پر موجود ہے کہ گلگت اسکاوٹس کا کمانڈنٹ 1926ء میں اس میں قیام کے لئے مہتر چترال سے منظوری لی تھی اور یہ ثبوت اوریجنل خط کی صورت میں موجود ہے۔ انہوں نے کہاکہ 1959ء میں شندور چراگاہ سے متصل لنگار جنگل پر چترال اورغذر کے عوام کے درمیان تنازعہ ہواتو بھی اسے چترال ہی کا حصہ قرار دے دیا گیا تھا اور 1988ء تک چترال فارسٹ ڈویژن کا فارسٹ گارڈ اس جنگل کی حفاظت پرمامور رہنے کے بعد ریٹائرڈ ہوگئے اور اس کی بیوہ اب بھی فیملی پنشن لے رہی ہے۔ انہوں نے کہاکہ 1981ء میں جشن شندور شروع ہونے کے بعد سے اب تک اس کا انتظام وانصرام چترال کے ڈسٹرکٹ ایڈمنسٹریشن کے ہاتھ رہا اور شندور میں ماضی قریب میں قتل سمیت جرائم کی تین دوسری واراتوں کا ایف آئی آر چترال پولیس نے درج کی اور مقدمات چترال کے ضلعی جوڈیشری میں سماعت ہوئے۔ چترال کے سیاسی اور سوشل عمائیدین نے کہاکہ موجودہ حالات میں صوبائی حکومت نے سی پیک منصوبے کے تحت متبادل شاہراہ کے لئے شندور ٹاپ کو مناسب راستہ قرار دیا ہے اور ایسے نازک موقع پر بھارتی ایجنٹوں کی طرف سے گلگت بلتستان کے علاقہ سے ملاکر شندور میں نیشنل پارک قائم کرنا سی پیک کے عظیم منصوبے کو ناکام بنانے کی گہری سازش ہے جس کے خلاف پشاور ہائی کورٹ سے حکم امتناعی حاصل کیا جائے گا اور بھارتی ایجنٹوں کا بچھایا ہوا جال کامیاب نہیں ہونے دیں گے۔ انہوں نے کہاکہ یہ صوبائی حکومت کی کمزور ی ہے کہ وفاقی حکومت کو درست معلومات فراہم نہ کرنے اور اس متنازعہ نیشنل پارک کے فیصلے کے خلاف کچھ نہیں کیا۔ا س موقع پر فیصلہ ہواکہ تمام زمینی حقائق سے وزیر اعظم عمران خان کو صوبائی حکومت کی مدد سے باخبر کیا جائے گا۔

محکمہ ابتدائی و ثانوی تعلیم کے تمام منسٹریل سٹاف کے تقرری اور تبادلوں کے احکامات جاری

Posted on July 9, 2020July 9, 2020

پشاور (چترال ٹائمز رپورٹ)خیبر پختونخوا کے وزیر برائے ابتدائی و ثانوی تعلیم اکبر ایوب خان نے محکمہ تعلیم کے صوبائی ڈائریکٹوریٹ کے تمام افسران کو ہدایت جاری کی ہے کہ تمام اضلاع کے دفاتر اور سکولوں بشمول صوبائی ڈائریکٹوریٹ کے تمام کلیریکل سٹاف جنہوں نے ایک ہی دفتر، ڈائریکٹوریٹ یا ضلعی دفاتر (میل/فی میل) میں مجموعی طور پر دو یا دو سال سے زیادہ کا عرصہ گزارا ہو ان سب کو دوسرے ضلعی دفاتر اور سکولوں میں مختلف جگہوں پر تعیناتی اور تبادلوں کے احکامات جلد از جلد جاری کر دیئے جائیں۔ انہوں نے کہا کہ یہ عمل دس دنوں کے اندر اندر مکمل کیا جائے اور تمام ضلعی افسران اپنے متعلقہ ضلع کے لئے ذمہ دار ہونگے۔صوبائی وزیر تعلیم نے کہا کہ دس دنوں کے بعد محکمہ تعلیم کے اعلیٰ افسران کی کمیٹی بنائی جائے گی جو کہ تمام اضلاع کے دفاتر کا دورہ کرے گی اور ان کی تعیناتی اور تبادلوں کی جانچ پڑتال کریں گی اور اگر کوئی بھی ضلعی آفیسر اس معاملے میں کوتاہی کا مرتکب پایا گیا تو اس کے خلاف ای اینڈ ڈی رولز کے تحت سخت سے سخت کاروائی عمل میں لائی جائے گی۔اکبر ایوب خان نے کہا کہ ہم اپنے پارٹی کے عزم کے مطابق محکمہ تعلیم کو ہر طرح کے ناسور سے پاک کریں گے تاکہ تمام اضلاع کے دفاتراورسکولوں میں میرٹ کی بالادستی قائم ہو سکے اور لوگوں کو موجودہ صوبائی حکومت کے تعلیمی اصلاحات کے واضح اور مثبت اثرات مل سکیں۔

غیرسرکاری تنظیم سی ارایس پی کےزیرانتظام کالاش ویلی میں کورونا سے بچاو کے سامان تقسیم

Posted on July 8, 2020July 8, 2020

چترال (چترال ٹائمز رپورٹ) غیر سرکاری تنظیم چترال رورل سپورٹ پروگرام کے زیر اہتمام کالاش ویلی میں کورونا وائرس سے بچاؤسے متعلق اشیاٗ تقسیم کئے گئے۔ اس پروجیکٹ کا افتتاح چترال سے ممبر صوبائی اسمبلی مولانا ہدایت الرحمن نے کی جبکہ قاضی نسیم ضلعی ترجمان جے یوآئی لوئیر چترال اور حبیب الرحمن سابق ڈسٹرکٹ ممبر ودیگربھی موجود تھے۔

سی ار ایس پی کے چیف ایگزیکٹیو امیر علی شاہ نے بتایا کہ کالاش ویلیز میں فیس ماسک، دستانے اورسینٹائزر تقسیم کئے جارہے ہیں اور یہ سلسلہ جاری رہیگا۔

انٹرنیٹ سروس کی عدم دستیابی کے خلا ف مستوج خاص میں طلبا وطالبات کا احتجاج،

Posted on July 7, 2020July 8, 2020

مستوج (نمائندہ چترال ٹائمز ) منگل کے روز مستوج خاص میں انٹرنیٹ کی فراہمی میں تاخیر کے حوالے سے ایک ہنگامی اجلاس زیر صدارت شہزادہ سکندرالملک ، ایڈوکیٹ خالد حسین تاج کے گھر میں منعقد ہوا۔ جس میں صدر ٹیچر یونین اپر چترال فاتح شکست اور سابقہ ممبر تحصیل کونسل مستوج محسن حیات شاداب اور طلبا ء و طالبات نے شرکت کی۔

اجلاس میں اظہار خیال کرتے ہوئے شرکاء نے افسوس کا اظہار کیا۔ کہ علاقے میں فائبر اوپٹک کیبل بچھانے اور تمام لوازمات مکمل ہونے کے باوجود علاقے کے لئے انٹر نیٹ کی سہولت فراہم نہیں کی جا رہی۔ متعلقہ حکام سے طلبا ء و طالبات نے بار ہا انٹر نیٹ کی فراہمی کے لئے استدعا کی لیکن کسی بھی فورم پر شنوائی نہیں ہوئی۔ بعض طلبا ء و طالبات انٹرنیٹ کی سہولت نہ ہونے کی وجہ سے آن لائن کلاسز سے بھی محروم ہو کر شدید ذہنی دباو کا شکار ہو چکے ہیں۔یہاں تک ایک طالب علم نے دلبرداشتہ ہو کر خودکشی تک کر لی۔ کئی طلباء مالی مشکلات کی وجہ سے آن لائن کلاسز کے لئے شہر نہیں جا سکےجسکی وجہ سے انکا تعلیمی سال ضائع ہونے کا خطرہ ہے۔ اندرین حالات استدعا ہے کہ متعلقہ حکام جلد از جلد مستوج خاص اور ملحقہ ایریے میں انٹرنیٹ کی فراہمی کو جلد از جلد ممکن بنا کر علاقے کے نادار اور بے سہارا طلباء طالبات کا تعلیمی سال ضائع ہونے سے بچائے۔

شرکاء نے جی ایم و اعلیٰ حکام پی ٹی سی ایل اورچترال چیمبرآف کامرس کے صدر و کوارڈنیٹر ایف پی سی سی آئی سرتاج احمد خان سے خصوصی اپیل کی ہے کہ وہ طلباو طالبات کی قیمتی وقت کو بچانے میں اپناکردار اداکریں اورمستوج ایکس چینچ سے ڈی سی ایل کے اجرء کو جلد یقینی بنائیں۔

دو برسوں سے گردوں کے ڈائیلاسز مشینین خراب، ڈی ایچ کیوہسپتال چترال کے سامنے احتجاجی مظاہرہ

Posted on July 7, 2020July 7, 2020

چترال ( نمائندہ چترال ٹائمز ) چترال میں بڑی تعداد میں گردوں کے مریضوں کے ساتھ یکجہتی کا اظہار کرتے ہوئے سیاسی قائدین اور سماجی تنظیمات کے نمائندوں نے منگل کے روز ڈی ایچ کیو ہسپتال چترال کے مین گیٹ کے احاطےمیں زبردست احتجاجی مظاہرہ کیا ۔ جس سے خطاب کرتے ہوئے صدر جے آئی یوتھ چترال وجیہہ الدین ، عرفان عزیز، مسلم لیگ ن کے رہنما محمد کوثر ایڈوکیٹ ، سابق صوبائی وزیر سلیم خان اور سوشل ایکٹی وسٹ حسین احمد نے کہا ہے ۔ کہ پاکستان تحریک انصاف کی حکومت عوام کو اعلی طبی سہولیات فراہم کرنے کا دعوی کرتی ہے ۔ لیکن حقیقت یہ ہے ۔ کہ گذشتہ دو سالوں سے ڈی ایچ کیو ہسپتال میں ڈائیلاسز مشینین خراب ہیں ۔ جن پر چھ سات لاکھ روپے خرچ کرنے پر یہ فنکشنل ہو سکتے ہیں ۔ مگر افسوس کا مقام ہے ۔ کہ ابھی تک سات لاکھ روپے خرچ کرکے اسے ٹھیک کرکے مریضوں کو سہولت دینے کی بجائے انہیں چترال سے طویل سفر کرکے پشاور جانے پر مجبور کیا جا رہا ہے ۔ اور اکثر مریض ایسے ہیں ۔ جو اضافی سفری اخراجات برداشت کرنے کے قابل نہیں ہیں ۔ انہوں نے کہا ۔ کہ اس حکومت نے جتنے بھی دعوے کئے ۔ وہ سب جھوٹ ثابت ہوئے ہیں ۔ اس پر عوام کا اعتماد مکمل طور پر اٹھ چکا ہے ۔ انہوں نے کہا ۔ کہ ادارے بے یقینی کا شکار ہیں ۔ عوام کا کوئی مسئلہ حل نہیں ہو رہا ۔ اور بے روزگاری و معاشی بدحالی نے لوگوں کو خود کشی پر مجبور کر دیا ہے ۔ انہوں نے کہا ۔ کہ دوسروں کو کرپٹ کہنے والا عمران خان خود کرپشن اور اقربا پروری میں دھنس کر رہ گیا ہے ۔

مقررین نے ایک ہفتے کی ڈیڈ لائن دیتے ہوئے کہا ۔کہ اس دوران اگر ڈائیلاسز مشینین درست نہیں کئے گئے ۔ تو بھر پور احتجاج کیا جائے گا ۔ انہوں نے ڈپٹی کمشنر چترال اور ڈی ایچ او کو شدید تنقید کا نشانہ بناتے ہوئے کہا ۔ کہ دونوں آفیسران کو چترال کے مسائل سے کوئی دلچسپی نہیں ۔ صرف اپنی کرسی سے چمٹے ہوئے ہیں ۔ قبل ازیں مظاہرین نے چترال بازار میں احتجاجی ریلی نکالی ۔ اور وزیر اعظم عمران خان ، وزیر اعلی خیبر پختونخوا محمود خان ، منسٹر ہیلتھ ، ڈی ایچ او کے خلاف زبردست نعرے لگائے ۔ مظاہرین نے ایک ہفتے کے اندر مسئلہ کرنے اور ڈائیلاسز کے مریضوں کو فوری طور پر ریلیف دینے کا مطالبہ کیا ۔

چترال کے معروف علمی شخصیت استادالا ساتذہ مولائی جان ہزاروں اشکبار آنکھوں کے سامنے سپرد خاک

Posted on July 7, 2020July 7, 2020

چترال ( محکم الدین ) چترال کے معروف علمی شخصیت استاد الا ساتذہ مولائی جان کو ہزاروں اشکبار آنکھوں کے سامنے منگل کے روز سپرد خاک کردیا گیا ۔ آپ گذشتہ رات انتقال کر گئے تھے ۔ ان کی نماز جنازہ چترال پولوگراونڈ میں ادا کی گئی ۔ جس میں چترال کے تمام سرکاری اور غیر سر کاری اداروں کے آفیسران، عزیز و اقارب اور ان کے سینکڑوں شاگردوں نے شرکت کی ۔ آپ معروف سوشل ایکٹی وسٹ جاوید اقبال، سی ای او آغا خان فاونڈیشن اختر اقبال ، اطہر اقبال ، اظہر اقبال اور سعود اقبال کے والد گرامی تھے اور چترال کے بزرگ اساتذہ میں سے تھے ۔ آپ کافی عرصہ کینسر کے عارضے میں مبتلا رہے ۔ بالاخر اپنے خالق حقیقی سے جا ملے ۔ آپ نہایت کم گو ، ملنسار شخصیت کے مالک تھے ۔ جس کی بنا پر بیماری کے باوجود آپ نے بھر پور زندگی گزاری ۔

اپرچترال انتظامیہ متحرک، سی اینڈ ڈبلیو ایکسین سمیت متعدد اہلکاروں کی غیر حاضری پر تادیبی کاروائی کا فیصلہ

Posted on July 6, 2020July 6, 2020

اپرچترال (ذاکر زخمی ) شاہ سعود ڈی سی اپر چترال کی ہدایت پر پیرکے دن محمد ریاض خان اسسٹنٹ کمشنر مستوج نے معظم خان اے اے سی مستوج کے ہمراہ ایکسین سی اینڈ ڈبلیو ڈویژن اپر چترال کے دفتر کا اچانک دورہ کیا جہاں ایکسین سمیت متعدد اہلکار بھی غیر حاضر پائے گئے۔

اپر انتظامیہ کی طرف سے جاری پریس ریلیز کے مطابق ایکسین سی اینڈ ڈبلیو اپر چترال یکم جولائی 2020 سے اسٹیشن سے غیر حاضر ہیں۔ مذکورہ غیر حاضرعملہ کے بارے میں ہیڈ کلرک سی اینڈ ڈبلیو ڈویژن اپرچترال سے دریافت کرنے پر ، انہوں نے مجاز اتھارٹی / ضلعی انتظامیہ کی بالائی چترال کی پیشگی منظوری کے بغیر اسٹیشن سے ان کی جان بوجھ کر عدم موجودگی کا جواز پیش نہیں کر سکا ہے غیر حاضر افسران / اہلکار ڈسٹرکٹ اپر چترال میں منظور شدہ اسکیموں / منصوبوں کے مطابق اپنا سرکاری امور نمٹانے میں کم سے کم دلچسپی رکھتے ہیں۔ ڈیوٹی سے ان کی جان بوجھ کر عدم موجودگی نے ضلعی انتظامیہ کو مشکل صورتحال میں ڈال دیا کیوں کہ مون سون کا موسم تیزی سے قریب آرہا ہے۔

محمد ریاض خان اسسٹنٹ کمشنر نے ڈپٹی کمشنر اپر چترال سے استدعا کی ہے کہ افادیت اور نظم و ضبط کے قواعد 2011 کے تحت درج دفعات کے مطابق مذکورہ غیر حاضر افراد کے خلاف تادیبی کاروائی کے لئے محکمہ سی اینڈ ڈبلیو خیبر پختونخوا سے رجوع کریں۔

چترال چیمبرآف کامرس، چترال بار اور چترال پریس کلب کا ایک مشترکہ فورم ترتیب دینے کا فیصلہ

Posted on July 6, 2020July 6, 2020

چترال (نمائندہ چترال ٹائمز )لواری ٹنل کی تکمیل، چترال کو سی پیک کا متبادل روٹ بنانے اورمجوزہ چترال تاجکستان روڈ قریب آنے کی تناظر میں چترال چیمبر آف کامرس اینڈ انڈسٹری، چترال بار ایسوسی ایشن اور چترال پریس کلب نے ایک مشترکہ فورم ترتیب دینے کا اصولی فیصلہ کر لیا۔

اتوار کے روز چترال چیمبر کے صدر سرتاج احمد خان، بار ایسوسی ایشن کے صدر نیاز اے نیازی ایڈوکیٹ اور چترال پریس کلب کے صدر ظہیر الدین نے ڈسٹرکٹ بار میں ابتدائی اجلاس میں اس بات پر اتفاق کیا کہ ان منصوبوں کے ثمرات کو چترال کے عوام تک پہنچاکر یہاں ترقی و خوشحالیکی منزل لانے کی کوشش اور جدوجہد کی جائے گی۔ بار کے سینئر ارکان ساجد اللہ ایڈوکیٹ اور رضا علی ایڈووکیٹ کی موجودگی میں اس اجلاس میں فیصلہ ہوا کہ فورم کی تمام تفصیلات طے کر نے کے بعد بہت جلد اجلاس میں فورم کو حتمی شکل دے دیا جائے گا۔

روش گول میں غیر قانونی شکاری ماحولیاتی دہشت گردی پھیلانے میں مصروف،نوٹس لیا جائے۔ کنزرویشن کمیٹی

Posted on July 6, 2020July 6, 2020

چترال(نمائندہ چترال ٹائمز)ویلی کنزرویشن کمیٹی زوندرانگرام تریچ کے عہدیداران پروفیسر رحمت کریم بیگ، گمبوری شاہ، مولانا عبدالغنی چمن اور دوسروں نے چترال کے معروف ترین چراگاہ روش گول میں غیر قانونی شکار کا سلسلہ روکنے اور صنوبر کے جنگل کو تباہی سے بچانے اور اس ماحولیاتی تباہی میں ملوث مافیا کے خلاف موثر کاروائی کرکے حکومتی رٹ کو قائم کرنے کا مطالبہ کیا ہے۔

پیر کے روز چترال پریس کلب میں ایک پریس کانفرنس سے خطاب کرتے ہوئے انہوں نے نتہائی تشویش کا اظہار کرتے ہوئے کہا کہ حکومت کی بے حسی سے فائدہ اٹھاکر روش گول میں شکاری مافیاماحولیاتی دہشت گردی پھیلانے میں مصروف ہے جس کی وجہ سے برفانی چیتا اور آئی بیکس شدید خطرات سے دوچار ہیں اور نباتات بھی ان کے ہاتھوں غیر محفوظ ہیں اور ماحولیاتی کنزرویشن کی کسی بھی کوشش کو یہ ناکام بناتے رہے اور حال ہی میں سنولیپرڈ فاونڈیشن کے ایک پراجیکٹ کے خلاف بھی طاقت کا استعمال کیا ہے تاکہ ان کی غیر قانونی شکار کی راہ میں کوئی رکاوٹ نہ بن سکے۔

انہوں نے کہا کہ تریچ میر کی چوٹی کے دامن میں واقع وادی تریچ جنگلی حیات کے لئے مشہور ہے جہاں معدومیت سے دوچاربرفانی چیتا کی موجودگی بھی ہے اور آئی بیکس کی بھی ایک بڑی آبادی کے ساتھ ساتھ تیتر اور چکوربھی بہت ذیادہ تعداد میں پائے جاتے ہیں جن کی کنزرویشن کے لئے کمیونٹی میں ایک جذبہ اور درد پایا جاتا ہے لیکن یہاں ایک مخصوص ٹولہ مختلف ادوار میں بین الاقوامی اداروں کی طرف سے شروع کردہ منصوبے ناکام کردئیے تاکہ ان کی غیر قانونی شکار کا راستہ ہمیشہ ہمیشہ کے لئے بند نہ ہونے پائے۔ انہوں نے کہاکہ ان معدودے چند افراد کا قانون کو اپنے ہاتھ میں لینا اور جنگلی حیات کا بے دریغ شکار کرنا ماحولیاتی دہشت گردی سے کم نہیں ہے اور افسوس کا مقام یہ ہے کہ ان ماحولیاتی دہشت گردوں کو حکومت نے ہمیشہ سے کھلی چھٹی دے دی ہے اور صوبائی حکومت کا محکمہ جنگلی حیات اس میں مکمل طور پر ناکام ہے۔

علاقے کے معززین کا کہنا تھاکہ بیس سال پہلے بھی آئی یو سی این کی ایک کنزرویشن پراجیکٹ کو بھی اس مافیا نے ناکام بنادیا اور اب سنولیپرڈ فاونڈیشن کے ایک پراجیکٹ کے خلاف بھی سازشوں میں مصروف ہیں اور ادارے کے افراد اور خود پولیس فورس کے اہلکاروں کو زدوکوب کرکے انہوں نے حکومتی رٹ کو بھی چیلنج کردیا ہے۔انہوں نے کہاکہ ماحولیات کے شعبے میں انقلابی اقدامات لانے اور حال ہی میں درجن سے ذیادہ نیشنل پارک قائم کرنے کا اعلان کرنے والی پی ٹی آئی حکومت کو چاہئے کہ اس وادی میں اپنی رٹ قائم کرکے کنزرویشن کا کام کرنے والوں کو ان غنڈوں سے مکمل تحفظ دلوائے بصورت دیگر برفانی چیتا اور آئی بیکس کا یہ معروف مسکن تباہ ہوگا اور یہ جنگلی جانور معدوم ہوجائیں گے۔ انہوں نے کہاکہ شکار مافیا مقامی عوام کو بھی غلط پروپیگنڈوں کے ذریعے اپنے ہمنوا بنانے کی کوشش کررہی ہے اور سنولیپرڈ فاونڈیشن کی اس پراجیکٹ کے خلاف اکسارہے ہیں جوکہ خدانخواستہ ناکامی سے دوچار ہوئی تو اس سے بڑی بدقسمتی اس علاقے کے لئے اور کوئی نہیں ہوسکتی۔

گلگت سے مستوج تک نیٹکوبس سروس دوبارہ بحال کی جائے۔۔سیڈکو

Posted on July 6, 2020July 6, 2020

مستوج(نمائندہ چترال ٹائمز) شندورایریا کنزرویشن اینڈ ویلفیئر ارگنائزیشن نے مطالبہ کیا ہے کہ گلگت سے مستوج تک نیٹکو(NATCO) بس سروس دوبارہ شروع کی جائے۔گذشتہ سال دسمبر میں برف باری کی وجہ سے بس سروس بند ہوگئی تھی مئی2020ء میں راستہ کھلنے کے باوجود بس سروس کو جولائی کے مہینے میں بھی دوبارہ شروع نہیں کیا گیا اس سروس سے گلگت،گاہکوچ،گوپس،پھنڈر،لاسپور اور مستوج کے سینکڑوں مسافر ہر روز سفر کرتے ہیں اور نیٹکو کی یہ سروس کامیاب روٹوں میں شمار ہوتی تھی۔مسافروں نے نگران وزیراعلیٰ گلگت بلتستان میرافضل خان سے پُرزور مطالبہ کیا ہے کہ گلگت سے مستوج تک چلنے والی نیٹکو (NATCO) بسوں کی سروس کو عوامی مفاد میں دوبارہ بحال کیا جائے مسافروں نے کمانڈر ایف سی این اے اور آئی جی فرنٹیئر کور سے اپیل کی ہے کہ بس سروس کے لئے روٹ پرمٹ دی جائے۔

اپرچترال کے کورونا کے خلاف جنگ میں صف اول کےاہلکارکی گرفتاری کا حکم، تقریب میں بدمزگی

Posted on July 5, 2020July 5, 2020

اپرچترال (چترال ٹائمز رپورٹ ) کورونا وائرس کے خلاف جنگ کو سو دن پورا ہونے پر وزیر اعلیٰ کے حکم پر فر ٹ لائن میں کام کرنے والوں کی خدمات کا اعتراف کرنے اور ان کی عزت افزائی کے لئے اپر چترال ضلع کے ہیڈکوارٹرز میں منعقدہ تقریب میں محکمہ صحت کے ایک سینئر اہلکار کو اسسٹنٹ کمشنر مستوج نے گرفتار کرنےکے حکم دے کر تقریب میں بدمزگی پیدا کردی۔۔

تقریب میں شریک ہیلتھ ڈیپارٹمنٹ کے اہلکاراحتجاج کردیا تو اہلکار عباداللہ کو رہا کردیا گیا۔ ڈی ایچ او چترال ڈاکٹر حیدر الملک نے واقعے پر افسوس کا اظہار کرتے ہوئے کہا کہ مذکورہ اہلکار نہایت جانفشانی سے دن رات ڈیوٹی سر انجام دینے میں مصروف رہتے ہیں اور گزشتہ ہفتے اپنے چچا زاد بھائی کی وفات پر بھی اپنے گاؤں جانے کی بجائے خصوصی ٹاسک پر مستوج چلا گیا اور دوسروں کے لیے مثال قائم کردی۔ انہوں نے کہاکہ ضلعی انتظامیہ نے ایسے کارکن کو تعریفی سند نہیں دی تو انہوں نے اپنا احتجاج ریکارڈ کرایا لیکن اے سی نے گرفتار کرنے کا حکم دے دیا۔ انہوں نے کہا کہ وہ یہ واقعی اپنے اعلیٰ حکام کے نوٹس میں بھی لے آئیں گے جبکہ انہوں نے پیرامیڈیکل اسٹاف کے ساتھ بات چیت کرکے ہڑتال سے روک دیا ہے۔

کورونا وائرس کے خلاف جنگ کےسودن پورے ہونے پرلوئرچترال میں تقریب،تعریفی اسناد تقسیم

Posted on July 4, 2020July 4, 2020

چترال (نمائندہ چترال ٹائمز ) کورونا وائرس کے خلاف جنگ کے100 دن پورے ہونے پر ضلعی انتظامیہ لویر چترال نے ہفتے کے روز ‘عزم و ہمت کے 100 دن’ کے نام پر خصوصی تقریب منعقد کر کے سرکاری اور غیر سرکاری اداروں اور سول سوسائٹی تنظیموں کے ذمہ داران میں تعریفی اسناد تقسیم کرکے ان کی خدمات کو سراہا۔ ڈی سی لویر چترال نویدِ احمد اور ڈی پی او وسیم ریاض نے اسناد تقسیم کی۔ اس موقع پر خطاب کرتے ہوئے ڈی سی نے کہا کہ چترال میں اس عالمی وبا کے ساتھ کشمکش میں پولیس، لیویز، سکاؤٹس کے ساتھ ساتھ سول سوسائٹی تنظیموں نے بھرپور تعاون کا مظاہرہ کیا اور اس مہلک بیماری کو چترال سے دور رکھا۔ اُنہوں نے ڈی پی او وسیم ریاض کی اپنی ٹیم کے ہمراہ دن رات خدمات کو گرانقدر قرار دیا۔ تقریب سے ڈی پی او وسیم ریاض نے بھی خطاب کیا اور ان مشکلات کا ذکر کیا جو کہ شروع میں درپیش تھے۔ اے سی چترال عبدالولی خان، الحاج عیدالحسین، قاضی نسیم اور دوسروں نے بھی خطاب کیا۔ تقریب میں اے ڈی سی حیات شاہ، ایس پی انوسٹی گیشن محمد خالد، اے سی ریونیو شہزاد، ایم ایس ڈاکٹر محمد شمیم، سیاسی پارٹیوں کے رہنماؤں سجاد، عبداالطیف اور دوسرے موجود تھے۔

چترال میں اعلیٰ معاشرتی اقدار کو پروموٹ کرنے میں اسٹریم میڈیا کا کردار قابل تعریف ہے۔۔وسیم ریاض

Posted on July 4, 2020July 4, 2020

چترال(نمائندہ چترال ٹائمز ) ڈسٹرکٹ پولیس آفیسر چترال وسیم ریاض نے کہا ہے کہ چترال میں امن وامان کو قائم رکھنے اور اعلیٰ معاشرتی اقدار کو پروموٹ کرنے میں مین اسٹریم میڈیا کا کردار قابل تعریف ہے اور یہاں کے صحافی احساس ذمہ داری کے ساتھ اپنے پیشہ ورانہ خدمات سر انجامِ دے رہے ہیں۔ ہفتے کے روز چترال پریس کلب کی عمارت میں رینویشن کے کام کا افتتاح کرتے ہوئے انہوں نے کہا کہ گزشتہ ایک سال سے چترال میں اپنی تعیناتی کے دوران انہوں نے منشیات کے خلاف جنگ سمیت جتنے بھی کام کی اور مہم چلائی،ان سب میں میڈیا کا بھرپور حاصل رہا۔ اس موقع پر پریس کلب کے صدر ظہیر الدین نے کہا کہ پریس اور پولیس کے ایک قریبی تعلق کار ہوتی جوکہ چترال میں مثالی انداز میں قائم ہے اور معاشرتی برائیوں کے خلاف دونوں ایک دوسرے کا ساتھ دیتے رہے ہیں۔ انہوں نے ڈی پی او وسیم ریاض کا منشیات کے خلاف منظم، مربوط اور مخلصانہ کاوشوں کو سراہتے ہوئے کہا کہ گزشتہ ایک سال سے منشیات کے کاروباریوں کا قلع قمع ہوگئی ہے جس سے عوام نے سکھ کا سانس لے لیا ہے۔ اس سے قبل ڈی پی او نے افتتاحی تختی کی نقاب کشائی کی۔ ایس پی انوسٹی گیشن محمد خالد اور ڈی ایس پی ہیڈکوارٹرز محئ الدین اور دوسرے پولیس افسران بھی موجود تھے۔

پہلے سلام پھر کلام، چترال کی تاریخ میں پہلی بار ٹریفک وارڈن پولیس متعارف

Posted on July 4, 2020July 4, 2020

چترال (چترال ٹائمز رپورٹ) ڈی پی او چترال وسیم ریاض خان PSP نے ضلع چترال میں ٹریفک وارڈن سسٹم متعارف کروایا، جس میں ٹریفک پولیس کے نظام میں نمایاں ظاہری اور عملی تبدیلی کے علاوہ عوام کے ساتھ بہتر اور دوستانہ رویے پر زور دیا گیا ہے ۔

ڈی پی او چترال نے اخباری نمائندوں سے بات کرتے ہوئے اپنے ایک بیان میں کہا اگرچہ چترال ٹریفک پولیس کی امیچ پہلے سے ہی اچھی ہے مزید اس کی کارکردگی میں نکھار لانے کی خاطر کچھ عملی اقدامات اٹھانے کی ضرورت تھی جس میں ٹریفک سٹاف کی گیٹ اپ سے لے کر ان کی عوام کے ساتھ اچھا برتاؤ اور خوش اسلوبی سے اپنے فرائض اور کارکردگی کو بہتر بنانا شامل تھا ۔ اس ضمن میں ٹریفک اسٹاف کو ٹریننگ دی گئی تاکہ وہ عوام کی امیدوں پر پورے اتر سکیں اور اپنی ذمہ داریاں مزید احسن طریقے سے نبھا سکیں۔ اور کہا کہ مجھے امید ہے کہ چترال کے عوام بھی ٹریفک وارڈن پولیس کے ساتھ ہر ممکن تعاون کریں گے اور منظم شہری ہونے کا ثبوت دیں گے ۔

گرم چشمہ؛ ایکٹیڈ کی جانب سے تعمیرکردہ ہیومینٹرین رسپانس فیسیلٹی کی بدست ڈپٹی کمشنر افتتاح

Posted on July 3, 2020July 3, 2020

چترال (نمائندہ چترال ٹائمز)ایکٹڈ (ACTED) نامی انٹرنیشنل این جی او نے چترال کی وادی لوٹ کوہ میں گرم چشمہ کے مقام پر قدرتی آفات کے دوران ایمرجنسی کی بنیاد پر ابتدائی امداد اور رسپانس کی فراہمی کے لئے ہیومینٹرین رسپانس فیسیلیٹی تعمیر کرکے ضلعی انتظامیہ کے حوالے کردی جس میں مقامی کمیونٹی کے نمائندے بھی شامل تھے۔

جمعہ کے روز گرم چشمہ میں منعقدہ تقریب میں ڈپٹی کمشنر چترال لویر نوید احمد اور ایکٹڈ کے پراجیکٹ منیجر کامران زیب نے فیسیلیٹی کی حوالگی کے دستاویز پر دستخط کئے جبکہ مقامی کمیونٹی کے نمائندوں نے ڈیزاسٹر کے فوری بعد متاثرین کے کام آنے والے مختلف النوع اشیاء چارج لیا جوکہ ضلعی انتظامیہ کی طرف سے فراہم کردہ قطعہ اراضی پر تعمیر کردہ تین کمروں میں سجائے گئے تھے۔ اس سے قبل ڈپٹی کمشنر نوید احمد نے افتتاحی تختی کی نقاب کشائی اورفیتہ کاٹ کر ہومینٹرین رسپانس فیسیلٹی کا باقاعدہ افتتاح کیا

اس موقع پر اپنے خطاب میں ڈپٹی کمشنر نوید احمد نے ایکٹڈ ادارے کی طرف سے اپنی نوعیت کے لحا ظ سے انتہائی اہمیت کے حامل سہولت گھر کی فراہمی پرمسرت اورشکریہ کا اظہا رکرتے ہوئے کہاکہ قدرتی آفات سے دوچار ایسے دوردراز مقامات کی نشاندہی اور ان میں کمیونٹی کو وسائل فراہم کرنے سے ان کے مشکلات اور مصائب میں بہت ہی کمی واقع ہوگی۔ انہوں نے کہاکہ کمیونٹی سے تعلق رکھنے والے نوجوانوں کو آگے بڑھ کر قدرتی آفات واقع ہونے کی صورت میں ریسکیو اپریشن اور سامان ضرورت کی رسد اور انتظام میں تربیت حاصل کرنی چاہئے۔ انہوں نے کہاکہ سہولت گھر میں موجود سازوسامان کمیونٹی کی امانت ہیں اور ان سے استفادہ حاصل کرنا کمیونٹی کی ذمہ داری ہے اور ایک ایک آئٹم کی استعمال سے واقفیت حاصل کرنا ناگزیر ہے۔ انہوں نے کہاکہ گورنمنٹ اور این جی اوز مل کر جب ڈیزاسٹر رسک کی کمی اور کمیونٹی کی امپاورمنٹ کے لئے کام کریں تو اس کے نتائج بہتر ہی برامد ہوتے ہیں جوکہ اس فیسیلیٹی کی صورت میں ہمارے سامنے ہیں۔

اس سے قبل پروجیکٹ منیجر کامران زیب نے کہاکہ حکومت برطانیہ کے ڈی ایف آئی ڈی کی مالی معاونت سے ان فیسیلیٹی ہوم کی قیام کا مقصد قدرتی آفات سے ذیادہ دوچار علاقوں میں کمیونٹی کو وہ سہولیات فراہم کئے جائیں جوکہ قدرتی آفات کی صورت میں ضلعے کے دیگر حصوں سے کٹ کر رہ جاتے ہیں اور فوری طور پر امداد کی ترسیل ممکن نہیں ہوتی۔ انہوں نے کہاکہ اس نوعیت کی فیسیلیٹی کالاش وادیوں بمبوریت اور بریر کے سنگھم میں واقع دوباژ کے مقام پر بھی پایہ تکمیل کو پہنچ گئی ہے جسے ضلعی انتظامیہ اور کمیونٹی کے حوالے کیا جائے گاجبکہ اپر چترال کے مقام مستوج خاص میں فیسیلیٹی کا افتتاح 13جون کو ہوچکا ہے۔

اس موقع پر کمیونٹی کی طرف سے اسماعیلی کونسل کے سیکرٹری محمد ولی نے ایکٹڈ، حکومت پاکستان اور حکومت برطانیہ کا شکریہ اداکرتے ہوئے کہاکہ اس فیسیلیٹی کی ضرورت عرصہ دراز سے محسوس کی جارہی تھی جس کا اندازہ وہ لوگ کرسکتے ہیں جوکہ 2015ء میں موسلادھار بارش کے نتیجے میں آنے والی قیامت خیز سیلاب کے وقت یہاں مصائب سے دوچار ہوئے تھے۔ انہوں نے وادی میں ڈی ایس ایل کی سہولت کی فراہمی کا بھی مطالبہ کیا۔ لوٹ کوہ سرکل کے ایس ڈی پی او احمد عیسیٰ کے علاوہ ایکٹیڈ کے پروگرام افیسر ڈی آر آر سلیم خان، مقبول اور دوسرے بھی موجود تھے۔ گرم چشمہ جاتے ہوئے ڈی سی نے سین، بوختولی اور گرم چشمہ میں جیپ ایبل پلوں کا معائنہ کیا جنہیں ایکٹڈ نے ضروری مرمت کے بعد ٹریفک کے قابل بنائی ہے۔ ڈی سی نے اس موقع پر کام کی معیارکو سراہا۔