وزیر اعلیٰ خیبر پختونخوا کا ضلع کرم میں سڑک کی بندش کے باعث ادویات کی قلت پیدا ہونے کے معاملے کا نوٹس لیتے ہوئے علاقے میں ضروری ادویات کی ہنگامی بنیادوں پر ترسیل کے لئے اپنا ہیلی کاپٹر فراہم کردیا
وزیر اعلیٰ خیبر پختونخوا کا ضلع کرم میں سڑک کی بندش کے باعث ادویات کی قلت پیدا ہونے کے معاملے کا نوٹس لیتے ہوئے علاقے میں ضروری ادویات کی ہنگامی بنیادوں پر ترسیل کے لئے اپنا ہیلی کاپٹر فراہم کردیا
پشاور ( چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے ضلع کرم میں سڑک کی بندش کے باعث ادویات کی قلت پیدا ہونے کے معاملے کا نوٹس لیتے ہوئے علاقے میں ضروری ادویات کی ہنگامی بنیادوں پر ترسیل کے لئے اپنا ہیلی کاپٹر فراہم کردیا ہے۔ وزیر اعلیٰ کے ہیلی کاپٹر کے ذریعے بدھ کے روز ضروری ادویات کی دو کنسائنمنٹ ضلع کرم پہنچا دی گئی ہیں۔ ان ادویات میں 63 لاکھ روپے مالیت کی لائف سیونگ سمیت دیگر ضروری ادویات شامل ہیں۔ مزید برآں ، وزیر اعلیٰ کی ہدایت پر زمینی راستہ کھلنے تک ہیلی کاپٹر روزانہ کی بنیاد پر ادویات سپلائی کرے گا۔ علی امین گنڈاپور کی خصوصی ہدایت پر مشیر صحت اور سیکرٹری صحت کرم میں ضروری ادویات کی فراہمی کی خود نگرانی کر رہے ہیں۔ وزیر اعلیٰ نے ہدایت کی ہے کہ علاقے میں ضروری ادویات کی ہمہ وقت دستیابی کو ہر صورت یقینی بنایا جائے، جب تک زمینی رابطہ مکملطور پر بحال نہیں ہو جاتا علاقے میں بذریعہ ہیلی ادویات کی سپلائی کا عمل جاری رکھا جائے۔صوبائی حکومت علاقے میں ادویات کی فراہمی کے لئے تمام دستیاب وسائل بروئے کارلائے گی۔
