ریشن کے متاثرین بجلی گھرکمیٹی کا اجلاس، اپنے مطالبات کے حق میں 18 اکتوبر سے بھرپور احتجاج کا فیصلہ
اپر چترال ( نمائندہ چترال ٹائمز ) آج ریشن میں متاثرین بجلی گھر کمیٹی کا ایک اہم اجلاس کمیونٹی سینٹر ریشن میں منعقد ہوا۔ جس کی صدارت سابق ناظم امیر اللہ نے کی اجلاس میں علاقے کے عمادین کی کثیر تعداد نے شرکت کی۔ اجلاس میں 18 اکتوبر کو ریشن میں بجلی کے بلوں میں اضافے کے خلاف بھرپور احتجاجی جلسہ روڈ بلاک اور بجلی گھر کے پانی کو بند کرنے کا جو نوٹس حکومت کو دیا گیا ہے۔ اس حوالے سے اس اجلاس میں یہ فیصلہ ہوا کہ جو نوٹس دیا گیا ہے۔اس پر بھرپور عمل کیا جائے گا۔ 18 اکتوبر کو بھرپور طریقے سے ریشن کے عوام گھروں سے نکلے گی۔ اور اپنے جائز مطالبات کو حاصل کرنے کے لیے کسی بھی قربانی سے دریغ نہیں کیا جائے گا۔ ہم پہلے ہی حکومت انتظامیہ اور ادارے کو خبردار کر چکے ہیں۔ پیڈو ہمارے پانی سے بجلی پیدا کرکے اربوں روپے کما رہا ہے۔ اور ہمارے پانی سے بجلی پیدا کرکے ہمیں ایندھن کے ریٹ پر بل بھیج رہا ہے۔ جو سراسر ظلم اور نہ انصافی ہے ۔ ہم ریشن کے عوام اس بجلی گھر کی وجہ سے ہر لحاظ سے متاثر ہیں۔
اس پاؤر ہاؤس کی وجہ سے ہماری چار قیمتی جانیں ہزاروں ایکڑ اراضی اور سینکڑوں مکانات کو نقصان پہنچا ہے۔ اور اس کے علاو ہم علاقہ میں مختلف بیماریاں کی زد میں ہیں۔ لیکن حکومت اور ادارہ متاثرہ عوام کو ریلیف دینے کے بجائے بجلی کے بیلوں بے تحاشہ اضافہ کر کے ہمارے صبر کا امتحان لے رہا ہے۔ پیڈو جو پہلے بل ہم بھیج رہے تھے ہم اس کو دینے کے لیے تیار ہیں۔ اب ہمیں پیسکو جو اضافی بل بھیج رہا ہے ہم اس کو ادا کرنے کے لیے تیار نہیں ۔کیونکہ ہم پیسکو کے بجلی استعمال نہیں کرتے ہیں ۔ تو اس کو بل کیوں دیں گے۔ ہم اپنے جائز حقوق کے حصول میں ہرگز سمجھوتہ نہیں کریں گے ۔اپر چترال کے عوام کو مطلع کیا جا رہا ہے کہ 18 اکتوبر کو ریشن میں مستوج روڈ کو بند کیا جائے گا۔
