بونی بوزند روڈ کی تعمیر میں سست روی،غفلت اور عوامی احتجاج پر ڈپٹی سپیکر خیبر پختونخوا اسمبلی ثریا بی بی کا سخت نوٹس
پشاور (چترال ٹائمزرپورٹ) ڈپٹی سپیکر خیبر پختونخوا اسمبلی ثریا بی بی نے ضلع چترال اپر کے علاقے بونی بوزند روڈ پر جاری تعمیراتی کام میں غفلت اورسست روی کا سخت نوٹس لیتے ہوئے متعلقہ حکام کو اپنے چیمبر میں بلایا اور تعمیراتی کام میں سست روی پر شدید برہمی کا اظہار کیا. میٹنگ میں چترال سے منتخب ایم این اے عبدالطیف،تحریک انصاف ضلعی صدر شہزادہ سکندر الملک،جلال محسود چیف انجینیر محکمہ سی اینڈ ڈبلیو ضیاء الرحمان ایکس ای این سی اینڈ ڈبلیو چترال اپر, ایس ڈی او سی اینڈ ڈبلیو اپر چترال،اے ڈی سی اپر چترال, اے سی اپر چترال اور متعلقہ تعمیراتی کام پر مامور ٹھیکدار نے شرکت کی.
ڈپٹی سپیکر ثریا بی بی نے متعلقہ حکام کو ہدایات جاری کرتے ہوئے کہا کہ تعمیراتی کام میں سست روی, غفلت اور کسی بھی قسم کی رکاوٹ کو برداشت نہیں کی جائیگی۔تورکھو اور تریچ کی عوام نے جو شکایات لگائی ہیں ان پر محکمانہ کاروائی کرکے غفلت کے مرتکب افراد کے خلاف سخت کاروائی کی جائے. انہوں نے ضلعی انتظامیہ کو ہدایات دی کہ عوام کو سڑکوں پر نکلنے پر مجبور نہ کریں،اس وقت احتجاج پر نکلے عوام کو مطمئن کرنااور انکے مسائل کو سن کر جلد از جلد حل کرنا ہم سب کی ذمہ داری ہے. متعلقہ حکام تعمیراتی کاموں پر نظر رکھیں اورکام میں سست روی اور غفلت کو روکیں۔
ڈپٹی سپیکر نے متعلقہ حکام کو ہدایات کی کہ فلفور سات عدد ڈمپر اور ایکسیویٹر مہیا کی جائے تاکہ کام میں پیش رفت ہو اور اس منصوبہ کو جلد از جلد پایہ تکمیل تک پہنچایا جائے. ڈپٹی سپیکر نے متعلقہ محکمے اور ٹھیکہ دار کو روزانہ کی بنیاد پر ورک پراگرس رپورٹ دینے،کام کے معیار پر کوئی سمجھوتہ نہ کرنے کی ہدایات کی اور کہا کہ اس ضمن میں کسی بھی قسم کی کوتاہی،لاپرواہی کو برداشت نہں کیا جایگا. انہوں نے ضلعی انتظامیہ سے کہاکہ وہ ہفتے میں دو تین مرتبہ موقع پر جاکر کام کا جائزہ لے تاکہ اس منصوبے پر سست روی کی وجہ سے عوام تکالیف کا ازالہ ہو۔
