ملاکنڈ کے دوسرے اضلاع کی طرح چترال میں بھی نان کسٹم پیڈ گاڑیوں کی پروفائیلنگ شروع کردی گئی

چترال ( نمائندہ چترال ٹائمز ) صوبائی حکومت کے ہدایت کی روشنی میں محکمہ ایکسائزاینڈ ٹیکسیشن نے نان کسٹم پیڈ گاڑیوں کی پروفائیلنگ / اندراج کا آغاز کردیا ہے۔ اس سلسلے میں ملاکنڈ ڈویژن کے مختلف اضلاع میں نان کسٹم پیڈ گاڑیوں کی پروفائیلنگ شروع ہے اسی طرح چترال میں بھی کل یعنی ۲۵اکتوبر سے اندراج کا سلسلہ شروع ہوگا۔ ڈائریکٹر جنرل محکمہ ایکسائزاینڈ ٹیکسیشن خیبرپختونخوا کی طرف سے جاری اعلامیہ کے مطابق نان کسٹم پیڈ گاڑیوں کی پروفائیلنگ / اندراج کا سلسلہ 31دسمبر2023تک جاری رہیگا۔ جبکہ اس کے بعد غیرپروفائیل، اندراج شدہ گاڑیوں کو سڑکوں پر نہیں آنے دی جائیگی۔ محکمہ ایکسائز اینڈ ٹیکسیشن چترال کے ذمہ داروں نے چترال ٹائمز کو بتایا کہ این سی پی گاڑیوں کی پروفائلنگ اور اندراج کا مقصد تمام گاڑیوں کے کمپیوٹرائزڈ ڈیٹاپر مبنی نظام کی تشکیل ہے اور ساتھ عوام الناس اور ان کی قیمتی گاڑیوں کی حفاظت کیلئے نان کسٹم پیڈ گاڑیوں کو باقاعدہ شناخت مہیا کرنا ہے۔ انھوں نے مذید بتایا کہ این سی پی گاڑیوں کی پروفائیلنگ سے ان کو غیرقانونی سرگرمیوں میں استعمال کو بھی روکنا ہے اور ساتھ عوام الناس کی مال وجان کی تحفظ اور ٹریفک کے نظام میں بہتری لانا ہے۔ انھوں نے مذید بتایا کہ این سی پی گاڑیوں کی پروفائیلنگ کو پہلے سے اسان بنا دیا گیا ہے ، صرف درخواست فارم، شناختی کارڈ کی فوٹو کاپی، حلفیہ بیان کے ساتھ مالک اور گاڑی کی موجودگی اور ساتھ گاڑی کی کاغذات پیش کرنا ہے جن سے گاڑی کی پروفائیلنگ کردی جائیگی۔