غیر قانونی مقیم افراد کے انخلاء کی تاریخ میں توسیع نہیں ہو گی: سرفراز بگٹی،- افغان باشندوں کو پاکستانی پاسپورٹ جاری کرنے کا معاملہ، زونل ڈائریکٹرز کو رپورٹ پیش کرنے کی ہدایت
غیر قانونی مقیم افراد کے انخلاء کی تاریخ میں توسیع نہیں ہو گی: سرفراز بگٹی
اسلام آباد(چترال ٹائمزرپورٹ ) ملک میں غیر قانونی طور پر مقیم افراد کے انخلاء میں دو روز باقی ہیں جس کے تحت حکومت نے ایکشن پلان مرتب کرلیا ہے۔نگران وزیرداخلہ سرفراز بگٹی نے کہا ہے کہ غیر قانونی طور پر مقیم افراد کے انخلا سے متعلق تاریخ میں توسیع نہیں ہو گی، غیر قانونی غیر ملکی افراد کو واپس بھیجنے کی تیاری مکمل کر لی ہے۔سرفراز بگٹی کا کہنا ہے کہ غیر قانونی مقیم افراد کے انخلا سے متعلق جیو فیسنگ اور جیو میپنگ مکمل کرلی ہے، ڈاکومنٹ رجیم کی پالیسی میں ہم پاسپورٹ اور ویزہ لیکر آنے والوں کی حوصلہ افزائی کر رہے ہیں۔انہوں نے کہا ہے کہ اب لوگ ہمارے ملک میں ویزہ لیکر آئیں گے، کسی بھی ملک میں ایسا نہیں ہوتا کہ روزانہ 12 سے 15 ہزار افراد بغیر سفری دستاویزات سفر کریں، ون ڈاکومنٹ رجیم کے تحت کل قلعہ عبداللہ میں پاسپورٹ آفس کا افتتاح کر رہے ہیں۔ان کا کہنا تھا کہ غیر ملکی پاسپورٹ کے ذریعے ویزہ لیکر ا?ئیں جائیں ہمیں کوئی اعتراض نہیں، پاک ایران، افغان بارڈر پر کاروبار کا اپنا ایک طریقہ کار ہے، ہم نے بلوچستان میں کاروبار نہیں سمگلنگ بند کی ہے، عام انتخابات سے متعلق سکیورٹی کا بڑا چیلنج ہے مگر ریاست اس چیلنج سے نبردآزما ہوں گی۔
سعودی عرب میں افغان باشندوں کو پاکستانی پاسپورٹ جاری کرنے کا معاملہ، زونل ڈائریکٹرز کو رپورٹ پیش کرنے کی ہدایت
اسلام آباد(سی ایم لنکس)سعودی عرب میں 12 ہزار افغانیوں کو پاکستانی پاسپورٹ جاری کرنے کے معاملے پر ڈی جی ایف آئی اے اہم قدم ا ٹھاتے ہوئے تمام زونز سے تفصیلات طلب کر لی ہیں۔ڈی جی ایف آئی اے نے تمام زونل ڈائریکٹرز کو رپورٹ پیش کرنے کی ہدایت کردی ہے، ڈی جی ایف آئی اے نے سوال کرتے ہوئے کہا کہ نادرا اور پاسپورٹ حکام کے خلاف کتنے کیسز چل رہے ہیں؟ڈی جی ایف آئی اے نے تفصیلات طلب کرتے ہوئے کہا کہ کیا نادرا اور پاسپورٹ آفس کے ملازمین کو شامل تفتیش کر لیا گیا ہے؟کیاوہ سرکاری افسر جس نے فارم کی تصدیق کی شامل تفتیش کیا گیا؟ کیاجعلی شناختی کارڈ اور پاسپورٹ جاری کرنے پر مقدمات درج کیے ہیں؟واضح رہے کہ 12ہزارافغانیوں کو پاسپورٹ جاری کرنے پر وزارت داخلہ 9 رکنی کمیٹی بنا چکی ہے، کمیٹی میں آئی ایس آئی،آئی بی، ایف آئی اے سمیت دیگر اداروں کے لوگ شامل ہیں۔