بجلی کے صارفین پر 22 ارب 56 کروڑ 30 لاکھ کا بوجھ پڑنے کا امکان
بجلی کے صارفین پر 22 ارب 56 کروڑ 30 لاکھ کا بوجھ پڑنے کا امکان
اسلام آباد( چترال ٹائمزرپورٹ)ڈسکوز کی جانب سے سہ ماہی ایڈجسٹمنٹ کی مد میں بجلی مہنگی کرنے کی درخواست کی گئی ہے جس کے نتیجے میں بجلی صارفین پر 22 ارب 56 کروڑ 30 لاکھ کا بوجھ پڑ سکتا ہے۔ڈسکوز کی درخواست رواں مالی سال کی پہلی سہ ماہی کی ایڈجسٹمنٹ کی مد میں دی گئی ہے۔کمپنیوں نے کیپیسٹی چارجز کی مد میں 12 ارب 12 کروڑ 60 لاکھ روپے وصولی کی اجازت مانگ لی ہے۔ڈسکوز کی جانب سے یوز آف سسٹم چارجز کے تحت 10 ارب 24 کروڑ 70 لاکھ روپے جبکہ نقصانات کی مد میں 6 ارب 61 کروڑ 70 لاکھ روپے وصول کرنے کی درخواست کی گئی ہے۔آپریشن اینڈ مینٹیننس کی مد میں 4 ارب 61 کروڑ 70 لاکھ روپے مانگے گئے ہیں۔دوسری جانب بجلی کمپنیوں کی درخواست پر نیپرا 14 نومبر کو سماعت کرے گا۔
چیئرمین PTI کی بیٹوں سے بات نہ کروانے پر سپرنٹنڈنٹ اڈیالہ جیل سے جواب طلب
اسلام آباد(سی ایم لنکس)آفیشل سیکریٹ ایکٹ خصوصی عدالت نے چیئرمین پی ٹی آئی کی اْن کے بیٹوں سے بات نہ کروانے پر سپرنٹنڈنٹ اڈیالہ جیل سے جواب طلب کر لیا۔آفیشل سیکریٹ ایکٹ خصوصی عدالت میں چیئرمین پی ٹی آئی کی ہر ہفتے بیٹوں سے بات کرانے کی درخواست پر جج ابوالحسنات ذوالقرنین نے سماعت کی۔دورانِ سماعت پی ٹی آئی کے وکیل شیراز احمد رانجھا پیش ہوئے جنہوں نے بتایا کہ عدالت نے21 اکتوبر کو چیئرمین پی ٹی آئی کی بیٹوں سے بات کرانے کا حکم دیا تھا، تاہم سپرنٹنڈنٹ اڈیالہ جیل نے واٹس ایپ پر چیئرمین پی ٹی آئی کی بیٹوں سے بات نہیں کرائی۔انہوں نے استدعا کی کہ ہر ہفتے کو چیئرمین پی ٹی آئی کی واٹس ایپ پر بیٹوں سے بات کرانے کا حکم دیا جائے، ان کا بیٹوں سلمان اور قاسم سے بات کرنا حق ہے۔جس پر جج ابوالحسنات نے اڈیالہ جیل کے سپرنٹنڈنٹ سے 8 نومبر تک جواب طلب کرتے ہوئے سماعت ملتوی کر دی۔