ڈی سی ٹی آئی اور برٹش کونسل کے اشتراک سے صوبہ بھر سے جیتنے والے 26 سکولوں میں انعامات تقسیم
صوبائی وزیر تعلیم شہرام خان ترکئی کی انٹرنیشنل سکول ایوارڈ تقریب میں شرکت
جیتنے والے سکولوں نے مختلف سٹالز بھی لگائے جن میں تربیت کے دوران بنائے گئے ماڈلز بھی شامل تھے
26جتنے والے سکولوں کو بین الاقوامی طور پر منظور شدہ سرٹیفیکیٹس دئے گئے جو کہ عرصہ تین سال تک کارآمد رہیں گے
جیتنے والے سکولوں میں چترال اپر سے ایک جبکہ لوئر چترال سے تین سکولز بھی شامل
پشاور (چترال ٹائمز رپورٹ) صوبائی وزیر تعلیم شہرام خان ترکئی نے برٹش کونسل اور ڈی سی ٹی ای کے اشتراک سے تربیت مکمل کرنے اور پورے صوبے میں پوزیشنز حاصل کرنے والے 26 سکولوں کے سربراہان، اساتذہ اور طلبہ و طالبات میں انعامات اور سرٹیفیکیٹس تقسیم کیئے۔یہ بین الاقوامی طور پر منظور شدہ سرٹیفکیٹس عرصہ تین سال تک کارآمد رہیں گے سکول لیڈر اور سربراہان نے سکول لیڈرشپ اور کنکٹنگ کلاس رومزپروگرام کے تحت لیڈرشپ، سنگل نیشنل کریکولم، کنٹنٹ اور ڈیجیٹل لٹریسی پر جدید تربیت حاصل کرکے بہترین پوزیشن حاصل کیں۔پشاور کے مقامی ہوٹل میں انعامات دینے کیلئے منعقدہ تقریب سے خطاب کرتے ہوئے وزیر تعلیم شہرام خان ترکئی نے کہا کہ محکمہ تعلیم میں کوالٹی ایجوکیشن اور سہولیات کی فراہمی پر بہترین کام جاری ہے اب ہر کلاس میں استاد ہوگا بہت جلد میرٹ پر مزید 23 ہزار سے زائد اساتذہ بھرتی کر رہے ہیں۔
محکمہ کے حکام کو میری ہدایت ہے کہ آنے والے دو سالوں کے لئے ڈیٹا اکھٹا کریں۔ ایک دن بھی ایک کلاس روم ٹیچر کے بغیر نہیں ہوگا جس دن ٹیچر ریٹائر ہو گا اگلے دن پیرنٹس ٹیچرز کونسل کے ذریعے عارضی طور پر استاد بھرتی کریں گے یہ ہمارا ویژن ہے اور کابینہ سے منظوری لے کر یہ پروگرام جلد از جلد شروع کریں گے۔ انہوں نے مزید کہا کہ میں فخر سے کہتا ہوں کہ پچھلے آٹھ سالوں میں محکمہ تعلیم میں وہ کام ہوا اور وہ انقلابی اہداف حاصل کیے جو 70 سالوں میں نہیں ہوئے یہی عمران خان کا ویژن اور پارٹی منشور ہے۔ وزیر تعلیم شہرام خان ترکئی نے اساتذہ کو خوشخبری دیتے ہوئے کہا کہ ان کے بنیادی مسائل ٹائم سکیل اور فور ٹائیر فارمولے کی منظوری پر کام جاری ہے اساتذہ پوری توجہ بنیادی تعلیم پر دیں بہت جلد کابینہ سے ان مطالبات کی منظوری لوں گا۔ مگر اساتذہ نے بہترین نتائج دینے ہیں۔
شہرام خان ترکئی نے سکولوں میں سہولیات کی فراہمی کے حوالے سے کہا کہ سکولوں میں باقی ماندہ سہولیات کی فراہمی پر اربوں روپے خرچ کئے جاچکے ہیں۔ 6 ارب روپے کا فرنیچر خریدا جا رہا ہے جس سے 26 لاکھ سے زائد طلبہ و طالبات مستفید ہوں گے جبکہ آئی ٹی کی تعلیم کی اہمیت کو مدنظر رکھ کر سمارٹ سکول ایجوکیشن پروگرام شروع کردیاہے اور اب کے بعد ہر سال تین لاکھ بچوں کو ارلی چائلڈ ہڈ ایجوکیشن پروگرام کے تحت تربیت دیں گے۔ جن سکولوں میں سہولیات پوری ہیں ان کو مکمل طور پر آئی ٹی پر شفٹ کر رہے ہیں۔ وزیر تعلیم نے اساتذہ کرام اور سکول لیڈرزپر زوردیا کہ بچوں کو تعلیم کے ساتھ ساتھ اخلاقیات سکھائیں۔ سچ بولنے کی تبلیغ کریں اور ان کے دلوں میں انسانیت کی قدر ڈالیں۔ تقریب سے سپیشل سیکرٹری ایجوکیشن شہباز طاہر ندیم، ڈائریکٹر ڈی سی ٹی آئی گوہر خان اور برٹش کونسل کی ڈاکٹر نشاط ریاض نے بھی خطاب کیا۔
تقریب کے اختتام پر پورے صوبے کے مختلف اضلاع سے پوزیشن حاصل کرنے والے 26سکولوں کے سربراہان کوانعامات اور سرٹیفکیٹس دیے گئے
یادرہے کہ برٹش کونسل ایوارڈ کیلئے اپر چترال سے صرف ایک سکول گورنمنٹ گرلزہائیر سیکنڈری سکول وریجون اور لوئر چترال سے تین گورنمنٹ گرلز ہائری سیکنڈری سکول شیاقوٹیک، گورنمنٹ ہائی سکول بلچ اور گورنمنٹ مڈل سکول جغور چترال لوئر شامل تھے۔
