خیبرپختونخوا کلچراینڈٹورازم اتھارٹی کی جانب سے فرینڈز آف پیرا پلاجیک کے خصوصی افراد کیلئے قومی سیاحت کانفرنس کا انعقاد
خیبرپختونخوا کلچراینڈٹورازم اتھارٹی کی جانب سے فرینڈز آف پیرا پلاجیک کے خصوصی افراد کیلئے قومی سیاحت کانفرنس اورپینٹنگ و فوٹو نمائش میں شرکت کیلئے خصوصی دورے کا انعقاد
عالمی یوم سیاحت، خیبرپختونخوا کے سیاحتی پراجیکٹس قومی سیاحت کانفرنس میں توجہ کا مرکز بنے رہے
اسلام آباد(چترال ٹائمز رپورٹ)عالمی یوم سیاحت پر خیبرپختونخوا کلچراینڈٹورازم اتھارٹی کی جانب سے فرینڈز آف پیرا پلاجیک کے خصوصی افراد کیلئے قومی سیاحت کانفرنس اور پینٹنگ و فوٹو نمائش میں شرکت کیلئے خصوصی دورے کا انعقاد کیاگیا۔ یونائیٹڈ نیشنل ورلڈ ٹورازم آرگنائزیشن کی سال 2022 کی سیاحت کا خیالیہ (تھیم)”سیاحت پر نظرثانی” ہے۔اس سلسلے میں پاکستان ٹورازم ڈیویلپمنٹ کارپوریشن کے زیراہتمام پاکستان نیشنل کونسل آف آرٹس میں قومی سیاحتی کانفرنس کا انعقاد کیا گیا۔جس کی مہمان خصوصی ڈائریکٹر اٹالین ایجنسی فار ڈیویلپمنٹ کارپوریشن (AICS) ایمن ویلا بی نینی (Emanvela Benini) تھی جنہوں نے یونیسکو ورلڈ ہیریٹج سائٹ روہتاس فورٹ پر بنائی گئی پینٹنگ اور ہیریٹج کرافٹ نمائش کا افتتاح کیا۔ ان کے ہمراہ منیجنگ ڈائریکٹر پی ٹی ڈی سی آفتاب الرحمان رانا اور دیگر اہم شخصیات موجود تھیں۔ کانفرنس میں خیبرپختونخوا کلچراینڈٹورازم اتھارٹی کی جانب سے ٹورازم انفارمیشن ڈیسک لگایا گیا ہے جس میں سیاحتی مقامات پر انٹیگریٹڈ ٹورازم زونز پراجیکٹ سمیت دیگر معلومات اور صوبے کی ثقافت کے بارے میں براؤشرز رکھے گئے جبکہ ساتھ ہی ساتھ صوبے کے مختلف سیاحتی مقامات، ثقافت، حسین وادیوں اور ڈسٹرکٹس پر بنائی گئی ویڈیوز ڈاکومنٹریز بھی نشر کی گئیں۔
کانفرنس میں صوبے میں سیاحت کے فروغ، بہتری کیلئے اقدامات، سیاحوں کو دی جانے والی سہولیات بارے مختلف سیشنز میں تفصیلی بات چیت کی گئی۔جس میں تمام صوبوں کے سیاحت سے وابستہ افراد، سٹیک ہولڈرز اور دیگر اہم شخصیات موجود تھیں جنہوں نے خیبرپختونخوا کے سیاحتی پراجیکٹس،پبلک پرائیویٹ پارٹنرشپ کے پراجیکٹس، ٹورازم پولیس اور کیمپنگ پاڈزجیسے پراجیکٹس اور اقدامات کو سراہا گیا۔ منیجر ایونٹس خیبرپختونخوا کلچراینڈٹورازم اتھارٹی حسینہ شوکت کا کہنا تھا کہ عالمی یوم سیاحت کی مناسبت سے خیبرپختونخوا کے خصوصی افراد کو سیاحت سے متعلق منعقدہ قومی سیاحت کانفرنس، تصاویری اور فوٹو نمائش میں شرکت کیلئے دورے کا انعقاد کیا گیا۔ خیبرپختونخوا کلچر اینڈ ٹورازم اتھارٹی کی جانب سے کانفرنس میں شرکت کا مقصد صوبے میں سیاحت کے فروغ، یہاں کئے جانے والے اقدامات، پراجیکٹس اور ان کی رونمائی ہے۔کانفرنس میں جنرل منیجر انویسٹمنٹ خیبرپختونخوا کلچراینڈٹورازم اتھارٹی محمد عمیر خٹک نے خیبرپختونخوا کے سیاحتی مقامات اور سرمایہ کاری سے متعلق پراجیکٹس پرتفصیلی بریفنگ دی۔ انہوں نے کہاکہ ورلڈبینک کے تعاون سے انٹیگریٹڈ ٹورازم زونزکے پراجیکٹ پبلک پرائیویٹ پارٹنرشپ کے تحت لا رہے ہیں جس میں بہترین مینجمنٹ پلان، صفائی ستھرائی کا نظام، بلڈنگ سٹرکچرسمیت دیگر تمام چیزوں کو ایک پلان کے تحت ترتیب دیا گیا ہے۔
